Yesu o ri vhudza zwithu zwine zwa ḓo ri thusa uri ri “ḓivhe uri Muvhuso wa Mudzimu u tsini.” (Luka 21:31) O porofita uri hu ḓo vha na dzinndwa, midzinginyo mihulu, nḓala na malwadze nahone zwenezwi zwithu ri a zwi vhona ṋamusi.—Luka 21:10-17.

Bivhili i amba uri “maḓuvhani a vhufhelo,” vhathu a vha nga ḓifari nga nḓila yavhuḓi. Ni nga zwi vhala kha 2 Timotheo 3:1-5. Musi ni tshi vhona zwo ṅwalwaho kha lwonolu luṅwalo zwi tshi khou itea ṋamusi, ni a kona u vhona uri honoho vhuporofita ndi ngoho.

Zwenezwo zwi amba mini? Muvhuso Wa Mudzimu u tsini na u shandukisa zwithu kha ḽifhasi nga nḓila khulwane uri zwi vhe khwine. (Luka 21:36) Bivhilini, Mudzimu o fhulufhedzisa uri ḽifhasi ḽi ḓo vha pharadiso na uri vhane vha ḓo tshila khayo vha ḓo ḓiphiṋa. Ṱhogomelani zwiṅwe zwine zwa ḓo vha hone tshifhingani tshi ḓaho.

“[Yesu] a ṋewa vhuhosi, khuliso na muvhuso uri vhathu vhoṱhe vha tshaka na nyambo dzo fhambanaho vha mu shumele. Vhuhosi hawe ndi ha lini na lini, a vhu nga fheli na muvhuso wawe a u nga fheliswi.”—DANIELE 7:14.

Zwenezwi zwi amba mini? Ri ḓo ḓiphina nga u tshila fhasi ha Muvhuso muhulwanesa une wa ḓo vhusa shango ḽoṱhe, une Khosi yawo ya vha Yesu Kristo.

“A hu na mudzulapo ane a ḓo ri: ‘Ndi a lwala.’”—YESAYA 33:24.

Zwenezwi zwi amba mini? A ri tsha ḓo lwala kana u holefhala; ri ḓo tshila ri sa fi.

“U fhelisa nndwa ḽifhasini ḽoṱhe.”—PHISALEMA 46:9.

Zwenezwi zwi amba mini? A hu tsha ḓo vha na dzinndwa na u tambula hune ha vhangwa ngadzo.

“Vhavhi a vha tsha ḓo vha hone . . . Vho vuḓaho vha ḓo vha vhaṋe vha ḽifhasi.”—PHISALEMA 37:10, 11.

Zwenezwi zwi amba mini? Vhavhi vha ḓo vha vhe si tsheeho, fhedzi hu ḓo sala vhane vha thetshelesa Mudzimu.

“Vha ḓo fhaṱa nnḓu vha dzula khadzo, vha ḓo ṱavha minḓirivhe vha ḽa mitshelo yayo.” —YESAYA 65:21, 22.

Zwenezwi zwi amba mini? Ḽifhasi ḽi ḓo naka. Mudzimu u ḓo fhindula thabelo yashu ya uri zwine a funa zwi itwe “kha ḽifhasi.” —Mateo 6:10.