• Yo khethiwa nga Mudzimu. “Nṋe ndo vhea khosi yanga . . . Ndi ḓo u ṋea dzitshaka sa ifa ḽau ḽifhasi ḽoṱhe ḽa vha thakha yau.” —Phisalema 2:6, 8.

• I muḽaifa wa Khosi Davida. “Ro bebelwa ṅwana, ro ṋewa murwa . . . U hula ha vhuvhusi hawe na mulalo a zwi nga vhi na magumo, kha khuluṋoni ya Davida na kha muvhuso wawe uri a u khwaṱhise.”—Yesaya 9:6, 7.

• Yo bebwa Betlehema. “Iwe Betlehema . . . kha iwe hu ḓo bva muvhusi . . . Vhugala hawe vhu ḓo swika magumoni a ḽifhasi.” —Mika 5:2, 4.

• Yo landulwa na u haṱulwa. “O nyadziwa, a ro ngo mu dzhia e wa ndeme . . . O ṱhavhelwa vhutshinyi hashu; o kwashelwa vhukhakhi hashu.”—Yesaya 53:3, 5.

• Yo vuswa na u huliswa. “U nga si nnditshe ndi Vhiḓani. U nga si tende muvhuya wau a tshi vhona dindi . . . Hu na dakalo ḽa lini na lini kha tshanḓa tshau tsha u ḽa.” —Phisalema 16:10, 11.

Yesu Kristo ndi ene e eṱhe we ha itea khae zwithu zwoṱhe zwo ambiwaho hafho nṱha. Na muruṅwa o vhudza Maria mme a Yesu zwi tevhelaho nga ha Yesu, o ri: “Mudzimu u ḓo mu ṋea khuluṋoni ya Davida khotsi awe . . . Muvhuso wawe u nga si vhe na magumo.”—Luka 1:31-33.

Yesu ha athu u vhuya a vhusa kha ḽifhasi. Samusi hu ene Khosi ya Muvhuso wa Mudzimu, u ḓo vhusa vhathu vha re kha ḽifhasi e ṱaḓulu. Ndi mini zwi itaho uri a fanelee u vha Khosi? Kha ri ambe nga ha zwe a zwi ita musi e kha ḽifhasi.

•   Yesu o vha e na ndavha na vhathu. O vha a tshi thusa vhathu vhoṱhe, hu si na ndavha uri ndi muṱuku, ndi muhulwane, u bva gai kana uri o pfuma kana ho ngo pfuma. (Mateo 9:36; Marko 10:16) Yesu o pfela vhuṱungu na u fhodza munna a re na mapele we a mu humbela zwi tevhelaho, onoyo munna o ri: “Arali u tshi funa, u nga mphodza.”—Marko 1:40-42.

• Yesu o ri gudisa nḓila ine ra nga takadza ngayo Mudzimu. O ri: “Ni nga si kone u shumela Mudzimu na Lupfumo.” O dovha a amba uri ri tea u fara vhaṅwe nga nḓila ine riṋe ra ṱoḓa u farwa ngayo. O dovha a sumbedza uri Mudzimu u na ndavha na zwine ra humbula na nḓila ine ra ḓipfa ngayo, hu si zwine ra zwi ita fhedzi. Tsha ndeme kha Mudzimu ndi zwi re mbiluni dzashu. (Mateo 5:28; 6:24; 7:12) Yesu o amba uri tshine tsha ḓo ita uri ri takale ndi u ita zwine Mudzimu a ṱoḓa.—Luka 11:28.

• Yesu o ri gudisa uri ri funane. Zwe Yesu a zwi amba na u zwi ita zwo vha zwi tshi kwama mbilu dza vhathetshelesi vhawe. Bivhili i ri: “Gogo ḽa mangadzwa nga nḓila ye a vha a tshi funza ngayo, ngauri musi a tshi vha funza zwo vha zwi tshi pfala uri o ṋewa maanḓa.” (Mateo 7:28, 29) O vha funza uri: “Ni dzule ni tshi funa maswina aṋu.” O ita na u rabelela vhe vha mu vhulaya a ri: “Khotsi, vha hangwele, ngauri a vha ḓivhi zwine vha khou ita.”—Mateo 5:44; Luka 23:34.

Yesu o sumbedza uri u ḓo vha khosi yavhuḓi ine ya ḓo pfela vhuṱungu na u thusa vhathu. Fhedzi u ḓo thoma lini u vhusa kha ḽifhasi?