Yesu o ri hu ḓo vha na “maṱungu mahulu” nahone eneo maṱungu ane a khou ḓa hu si kale a ḓo nga sa ḓumbumazwikule. (Mateo 24:21) Riṋe ri nga si kone u shavha, fhedzi hu na zwine ra nga ita u itela u khuda. Ri nga ita mini?

Musi Yesu a tshi khou funza e thavhani, o ri: “Dzulani ni tshi ṱoḓa Muvhuso wa Mudzimu na u luga hawe u thoma.” (Mateo 6:33) Ri nga zwi itisa hani?

Ṱoḓani Muvhuso wa Mudzimu u thoma. Zwenezwi zwi amba uri Muvhuso wa Mudzimu u tea u vha wa ndeme u fhira zwithu zwoṱhe. (Mateo 6:25, 32, 33) Ndi ngani u tshi tea u vha wa ndeme? Ndi ngauri Muvhuso wa Mudzimu ndi wone u woṱhe une wa nga tandulula thaidzo dzoṱhe dzine dza vha hone. Vhathu a vha koni u dzi tandulula.

Ṱoḓani u luga hawe. Lingedzani nga nḓila dzoṱhe u tevhedza zwine na zwi guda Bivhilini. Ndi ngani ni tshi tea u ita nga u ralo? Ndi ngauri zwithu zwi nga si tshimbile zwavhuḓi arali vhathu vha tshi ḓikhethela uri ndi zwifhio zwo lugaho na zwi songo lugaho. (Mirero 16:25) Fhedzi u tshila nga nḓila ine Mudzimu a ṱoḓa ri tshi tshila ngayo zwi ḓo ita uri ri vhuyelwe nahone zwa mu takadza.—Yesaya 48:17, 18.

Dzulani ni tshi ṱoḓa Muvhuso wa Mudzimu na u luga hawe u thoma. Yesu o amba uri vhaṅwe  vha nga thithiswa nga u ṱoḓa tshelede nnzhi vha tshi vhona u nga i nga vha tsireledza. Vhaṅwe vha nga tsikeledzwa nga mbilaelo dza vhutshilo lune vha si kone u ṱoḓa Muvhuso wa Mudzimu.—Mateo 6:19-21, 25-32.

Yesu o amba uri vhane vha tikedza Muvhuso wa Mudzimu vha ḓo vha na zwine vha zwi ṱoḓa u itela u tshila nahone vha ḓo fhaṱutshedzwa tshifhingani tshi ḓaho.—Mateo 6:33.

Naho vhafunziwa vha Yesu vho vha vha tshi ṱoḓa Muvhuso wa Mudzimu u thoma na u luga hawe, vho vhuya vha lovha hu tshi kha ḓi vha na maṱungu na u shengela. Fhedzi musi vha tshi kha ḓi tshila, vho vha vho tsireledzea. Hani?

U tshila vha tshi takadza Mudzimu zwo ita uri vha si tshile nga nḓila i si yavhuḓi ye vhathu vha vha vha tshi tshila ngayo. Vho kona u sedzana na thaidzo ngauri vho vha vha tshi fhulufhela uri Muvhuso wa Mudzimu u ḓo ḓa. Nahone Mudzimu o vha ṋea “maanḓa a songo ḓoweleaho” uri vha kone u konḓelela thaidzo dzavho.—2 Vhakorinta 4:7-9.

Vhakriste vha tshifhingani tsha kale vho ṱoḓa Muvhuso wa Mudzimu u thoma sa zwe Yesu a vha vhudza. Vho huwelela nga hawo fhethu hune vha dzula hone. (Vhakolosa 1:23) Naa vha tshee hone vhane vha kha ḓi zwi ita?

Ee! Ṱhanzi dza Yehova vha a pfesesa uri tshifhinga tsho salaho ndi tshiṱuku nahone vha khou ita zwoṱhe zwi re maanḓani avho u ita zwe Yesu a amba musi a tshi ri: “Huno aya mafhungo maḓifha a Muvhuso a ḓo ḓivhadzwa ḽifhasini ḽoṱhe uri a pfiwe nga tshaka dzoṱhe, nga murahu ndi hone vhufhelo vhu tshi ḓo ḓa.”—Mateo 24:14.

Naa ni ḓo ṱoḓa Muvhuso wa Mudzimu u thoma? Edzisani vhathu vha tshifhingani tsha kale vhe vha vha vha tshi dzula ḓoroboni ya Berea kha ḽa Makedonia. Musi Paulo a tshi vha gudisa nga ha Muvhuso wa Mudzimu, vho ṱanganedza Ipfi ḽa Mudzimu “nga mbilu yoṱhe.” Vho “ṱolisisa Maṅwalo” u itela u vhona arali zwine Paulo a khou vha funza zwi Maṅwaloni nahone vha shumisa zwe vha zwi guda.—Mishumo 17:11, 12.

Na inwi zwi nga si ni balele. Musi ni tshi ṱoḓa Muvhuso wa Mudzimu na u luga hawe u thoma, ni ḓo wana vhukhudo zwino nahone tshifhingani tshi ḓaho ni ḓo vha na mulalo na tsireledzea.