VHATHU VHOṰHE

Bivhili i ri: ‘Mudzimu ho ngo sika ḽifhasi lwa fhedzi, o ḽi vhumba uri ḽi dzulwe nga vhathu.’—​YESAYA 45:18.

ḼIFHASI

Bivhili i ri: “Murafho u a ṱuwa, ha ḓa muṅwe murafho, fhedzi ḽifhasi ḽi ḓi dzula ḽi hone lini na lini.”—​MUHUWELELI 1:4.

ZWI AMBA MINI? Bivhili i ri ḽifhasi a ḽi nga fheliswi na uri ḽi ḓo ḓi dzula ḽi na vhathu. Nga zwenezwo, vhufhelo ha shango vhu amba mini?

ṰHOGOMELANI HEZWI: Bivhili i vhambedza u fheliswa ha ḽino shango na zwe zwa itea misini ya Noaxe. Nga tshenetsho tshifhinga, ḽifhasi ḽo vha ḽo “ḓala vhuvemu.” (Genesi 6:13) Fhedzi Noaxe o vha e muthu o lugaho. Mudzimu o fhelisa vhathu vhavhi nga Maḓi Mahulu, fhedzi a tsireledza Noaxe na muṱa wawe. Musi Bivhili i tshi amba nga ha zwe zwa itea nga tshenetsho tshifhinga i ri: “Shango ḽa tshenetsho tshifhinga ḽo fheliswa musi ḽi tshi ḓala nga maḓi.” (2 Petro 3:6) Ho vha hu vhufhelo ha shango ḽa tshenetsho tshifhinga. Fhedzi ho fheliswa mini? A ho ngo fheliswa ḽifhasi, fhedzi ho fheliswa vhathu vhavhi vha re khaḽo. Ngauralo, musi Bivhili i tshi amba nga ha vhufhelo ha shango, i vha i sa khou amba u fheliswa ha pulanete. Nṱhani hazwo, i vha i tshi khou amba u fheliswa ha vhathu vhavhi kha ḽifhasi na nḓila ine vha ita zwithu ngayo.

DZITHAIDZO NA VHUVHI

Bivhili i ri: “Hu si kale vhavhi a vha tsha ḓo vha hone; u ḓo sedza he vha vha vhe hone, wa wana vha si tsheeho. Fhedzi vho vuḓaho vha ḓo vha vhaṋe vha ḽifhasi, vha ḓo takadzwa vhukuma nga muḓalo wa mulalo.”—​PHISALEMA 37:10, 11.

ZWI AMBA MINI? Maḓi Mahulu a tshifhingani tsha Noaxe ho ngo fhelisa vhuvhi lwa tshoṱhe. Nga murahu ha Maḓi Mahulu, vhathu vhavhi vho dovha vha konḓisela vhathu vhutshilo. Fhedzi Mudzimu u ḓo fhelisa vhuvhi hu si kale. Muphisalema o ri: “Vhavhi a vha tsha ḓo vha hone.” Mudzimu u ḓo fhelisa vhuvhi nga Muvhuso wawe une wa ḓo vhusa vhathu vho lugaho u ṱaḓulu.

ṰHOGOMELANI HEZWI: Naa vhavhusi vha shango ḽino vha ḓo tikedza Muvhuso wa Mudzimu? Bivhili i sumbedza uri a vha nga u tikedzi. Vha ḓo sumbedza vhutsilu nga u pikisa Muvhuso wa Mudzimu. (Phisalema 2:2) Hu ḓo itea mini? Muvhuso wa Mudzimu u ḓo fhelisa mivhuso yoṱhe ya vhathu nahone “wa ima u woṱhe lini na lini.” (Daniele 2:44) Fhedzi ndi ngani mivhuso ya vhathu i tshi tea u fheliswa?

Bivhili i ri: “[Muthu] ha na maanḓa a u livhisa ṋayo dzawe.”—YEREMIA 10:23.

ZWI AMBA MINI? Vhathu a vho ngo sikelwa uri vha ḓivhuse. Vha a kundelwa u vhusa vhaṅwe vhathu na u piringulula thaidzo dzavho.

ṰHOGOMELANI HEZWI: Britannica Academic i amba uri mivhuso i vhonala i tshi khou kundelwa “u piringulula thaidzo dzi ngaho vhushai, nḓala, malwadze, khombo dza mupo na nndwa kana vhuṅwe vhuvemu.” I tshi bvela phanḓa i ri: “Vhaṅwe . . . vha tenda uri tshine tsha nga piringulula dzenedzi thaidzo dzoṱhe ndi musi shango ḽi tshi vhuswa nga muvhuso muthihi.” Fhedzi naho arali mivhuso yoṱhe ya vhathu ya vha na vhuthihi, shango ḽi ḓo ḓi vha ḽi tshi khou vhuswa nga vhathu vha re na tshivhi, vhane vha si kone u piringulula thaidzo dze ra amba nga hadzo. Muvhuso wa Mudzimu ndi wone fhedzi u re na maanḓa a u piringulula thaidzo dza ḽifhasi ḽoṱhe lwa tshoṱhe.

Ngauralo, Bivhili i ri vhathu vho lugaho a vho ngo tea u ofha vhufhelo ha shango. Nṱhani hazwo, vha tea u vhu lavhelela ngauri heḽi shango ḽa kale ḽi ḓo dzhielwa vhudzulo nga shango ḽiswa ḽo lugaho ḽa Mudzimu!

Izwi zwoṱhe zwi ḓo itea lini? Thero i tevhelaho i ḓo ri vhudza phindulo i re Bivhilini.