Shango Ḽiswa Ḽa Pharadiso Ḽine Ḽa Vha Tsini!
Mudzimu o sika ḽifhasi uri vhathu vha fhulufhedzeaho vha tshile tshoṱhe khaḽo. (Phisalema 37:29) O vhea Adamu na Eva, vhathu vhavhili vha u thoma tsimuni ya u naka ya Edeni, a ṋea vhone na vhana vhavho vhuḓifhinduleli ha u lima ḽifhasi na u ḽi ṱhogomela.—Genesi 1:28; 2:15.
Shango ḽa ṋamusi a si Pharadiso ye Mudzimu a vha o funa uri ḽi vhe yone. Naho zwo ralo, Mudzimu u kha ḓi ṱoḓa uri ḽifhasi ḽi vhe Pharadiso. U ḓo zwi itisa hani uri ḽi vhe Pharadiso? Mudzimu ha nga fhelisi ḽifhasi ḽone ḽiṋe samusi ro zwi vhona kha thero dzo fhiraho. Nṱhani hazwo, u ḓo ita uri ḽi dzulwe nga vhathu vha fhulufhedzeaho. Zwiimo kha ḽifhasi zwi ḓo vha hani musi Mudzimu a tshi ita zwe a zwi fhulufhedzisa?
Vhathu vhoṱhe vha ḓo vhuswa nga muvhuso muthihi
Hu si kale musi Muvhuso wa Mudzimu u tshi vhusa vhathu vhoṱhe, ḽifhasi ḽi ḓo vha fhethu hu takadzaho hune vhathu vha nga tshila nga vhuthihi nahone vha ita mushumo wavhuḓi na u fushaho. Mudzimu o vhea Yesu Kristo uri a vhuse ḽifhasi. Ṋamusi vhavhusi vhanzhi a vha na ndavha na vhathu. Yesu ha fani navho ngauri u ḓo dzula a tshi ita zwi vhuyedzaho vhathu. Muvhuso wawe u ḓo ṱuṱuwedzwa nga lufuno nahone u ḓo vha Khosi i re na vhuthu, i khathutshelaho na ine ya haṱula nga nḓila yo teaho.—Yesaya 11:4.
Vhathu vha ḓo vha na vhuthihi kha ḽifhasi ḽoṱhe
Vhathu a vha tsha ḓo vha vho khethekanywa u ya nga lushaka kana u ya nga mvelele. Vhathu vhoṱhe vha ḓo vha vhe na vhuthihi. (Nzumbululo 7:9, 10) Vhoṱhe kha ḽifhasi vha ḓo vha vha tshi funa Mudzimu nahone vha tshi funana. Vha ḓo shuma vhoṱhe nga mulalo u bveledza tshipikwa tsha Mudzimu tsha u thoma tsha uri vha ṱhogomele ḽifhasi ḽi re haya havho.—Phisalema 115:16.
Mutsho u ḓo vha wavhuḓi, ra vha na mulalo na zwipuka
Musi Muvhuso wa Mudzimu u tshi vhusa, Mudzimu u ḓo ita uri mutsho u vhe wavhuḓi. (Phisalema 24:1, 2) Musi Yesu a tshi ita uri ḓumbu ḽi re na khombo ḽi dzike, o vha a tshi khou sumbedza zwe a vha a tshi kona u zwi ita nga maanḓa a Mudzimu. (Marko 4:39, 41) Musi Kristo a tshi vhusa, a hu na ane a ḓo ofha khombo dza mupo. Musi Muvhuso wa Mudzimu u tshi vhusa, ri ḓo tshila na zwipuka nga mulalo nahone a ri tsha ḓo tshinyadza mupo.—Hosea 2:18.
Vhathu vha ḓo vha na mutakalo wavhuḓi na zwiḽiwa zwinzhi
Vhathu vhoṱhe vha ḓo ḓiphiṋa nga mutakalo wavhuḓi. A hu na ane a ḓo lwala, a vha mulala kana a fa. (Yesaya 35:5, 6) Vhathu vha ḓo ḓiphiṋa nga u dzula fhethu ho nakaho na ho kunaho, hu fanaho na tsimuni ya Edeni he vhathu vha u thoma vha vha vho dzula hone. Shangoni ḽiswa, mavu a ḓo bveledza zwiḽiwa zwinzhi nahone vhathu vhoṱhe kha ḽifhasi vha ḓo vha na zwiḽiwa zwo eḓanaho u fana na tsimuni ya Edeni. (Genesi 2:9) Muṅwe na muṅwe Pharadisoni u ḓo “ḽa vhurotho [hawe] u swika [a] tshi fura” u fana na kha lushaka lwa Isiraele.—Levitiko 26:4, 5.
Hu ḓo vha na mulalo wa vhukuma na u tsireledzea
Fhasi ha Muvhuso wa Mudzimu, vhathu vhoṱhe vha ḓo ḓiphiṋa nga mulalo nahone vha ḓo farana nga vhuthu na nga nḓila yo teaho. A hu nga vhi na dzinndwa, vha re na maanḓa vha ḓo a shumisa nga nḓila yo teaho nahone muṅwe na muṅwe u ḓo vha na zwine a zwi shaya. Bivhili i ri: “Vha ḓo dzula fhasi ha minḓirivhe na mihuyu yavho, a hu na ane a ḓo vha tshuwisa.”—Mika 4:3, 4.
Vhathu vhoṱhe vha ḓo vha na dzinnḓu na mushumo une wa ḓo vha takadza
Muṱa muṅwe na muṅwe u ḓo vha na vhudzulo nahone u sa ofhi uri u ḓo pandelwa. Mushumo woṱhe une ra ḓo u ita u ḓo vha u tshi vhuyedza. Samusi Bivhili i tshi zwi amba, vhane vha ḓo dzula shangoni ḽiswa “a vha nga shumeli mahala” kana ḽifhedzi.—Yesaya 65:21-23.
Hu ḓo vha na pfunzo ya khwinesa
Bivhili i ri: “Ḽifhasi ḽi ḓo vha ḽo ḓala nga nḓivho ya Yehova.” (Yesaya 11:9) Vhathu vhane vha ḓo vha vhe fhasi ha Muvhuso wa Mudzimu vha ḓo guda kha nḓivho khulu ya Yehova Musiki wavho na nga ha zwithu zwo nakaho zwe a zwi sika. A vha nga shumisi nḓivho yavho u ita zwihali kana u huvhadza vhaṅwe. (Yesaya 2:4) Nṱhani hazwo vha ḓo guda u tshilisana nga mulalo, vha guda na nḓila ya u ṱhogomela ḽifhasi.—Phisalema 37:11.
Ri ḓo tshila nga hu sa fheli
Mudzimu o ita ḽifhasi nga nḓila yavhuḓi uri ri ḓiphiṋe nga vhutshilo ḓuvha ḽiṅwe na ḽiṅwe. O ḓiimisela u ita uri vhathu vha tshile kha ḽifhasi nga hu sa fheli. (Phisalema 37:29; Yesaya 45:18) Uri zwenezwi zwi konadzee, Mudzimu ‘u ḓo fhelisa lufu lwa tshoṱhe.’ (Yesaya 25:8) Bivhili i ri: “Lufu a lu tsha ḓo vha hone, u ṱungufhala, u lila na vhuṱungu a zwi tsha ḓo vha hone.” (Nzumbululo 21:4) Mudzimu u ḓo ita uri vhathu vhoṱhe vhane a ḓo vha tsireledza musi a tshi fhelisa ḽino shango ḽivhi na vhafu vhanzhi vhane a ḓo vha vusa vhafuni shangoni ḽiswa vha vhe na tshibuli tsha u tshila tshoṱhe.—Yohane 5:28, 29; Mishumo 24:15.
Vhathu vha dzimiḽioni vho no thoma u ḓilugiselela u tshila fhasi ha Muvhuso wa Mudzimu une wa vha tsini-tsini. Naho vha tshi kha ḓi vha na tshivhi, vha khou lingedza u tshila nga nḓila ine Mudzimu a ṱoḓa vha tshi tshila ngayo shangoni ḽawe ḽiswa. Vha khou zwi itisa hani? Nga u guda nga ha Yehova na nga ha Yesu Kristo we a mu ruma.—Yohane 17:3.
Gudani zwo engedzeaho nga ha uri ni nga ponyoka hani musi ḽino shango ḽi tshi fheliswa nahone na tshila shangoni ḽa khwine ḽine ḽa ḓo vha hone hu si kale. Gudani Bivhili nga mahala na muṅwe wa Ṱhanzi dza Yehova ni tshi shumisa bugu Ḓiphiṋeni Nga Vhutshilo Lwa Tshoṱhe!
You May Also Like
TSHIINGAMO
U Ḓo Ni Itela Mini?
Yesu o vha a tshi zwi ḓivha uri ndi Muvhuso wa Mudzimu fhedzi une wa ḓo lugisa zwithu zwoṱhe zwi si zwavhuḓi zwine zwa khou itea kha ḽifhasi. Muvhuso wa Mudzimu wo no ita mini zwi sumbedzaho uri u ḓo vhusa zwavhuḓi?
TSHIINGAMO
Muvhuso Wa Mudzimu
Zwithu zwa rathi zwa wonoyo muvhuso zwi sumbedza uri u ḓo dzula u si na vhutshinyi lwa tshoṱhe.
