Khwaṱhisedzo Yavhuḓi Vhukuma I Re Kha Ḽeḓere Ḽiṱukusa Ḽa Luheberu
Naa ri nga vha na vhungoho ha uri mafulufhedziso oṱhe a Mudzimu a ḓo ḓadzea? Yesu o vha e na vhungoho ha zwenezwo nahone zwe a zwi funza zwo ita uri vhathetshelesi vhawe vha vhe na lutendo. Ṱhogomelani zwe a zwi funza musi e thavhani, samusi zwo ṅwalwa kha Mateo 5:18: “Ngoho ndi a ni vhudza uri hu si kale hu ḓo lovha ḽiṱaḓulu na ḽifhasi hu sa athu lovha na ‘i’ na nthihi na kuswayo kuthihi kha Mulayo u swika zwithu zwoṱhe zwi tshi ḓadzea.”
Ḽeḓere ḽiṱukusa ḽa alifabeta ya Luheberu ndi י (yod), ḽine ḽa vha ḽeḓere ḽa u thoma kha Tetragrammaton, dzina ḽikhethwa ḽa Mudzimu ḽine ḽa vha Yehova. * Kha maipfi na maḽeḓere e a vha e kha Mulayo wa Mudzimu, vha maṅwalo na Vhafarisei vho vha vha tshi dzhia ḽeḓere ḽiṅwe na ḽiṅwe sa ḽine ḽa vha ḽa ndeme vhukuma.
Yesu o vha a tshi khou amba uri ḽiṱaḓulu na ḽifhasi zwo vha zwi tshi nga fheliswa nṱhani ha uri hu si ḓadzee zwidodombedzwa zwiṱuku-ṱuku zwa Mulayo wa Mushe. Naho zwo ralo, Maṅwalo a ri khwaṱhisedza uri ḽiṱaḓulu na ḽifhasi zwi ḓo dzula zwi hone. (Psalme ya 78:69) Nga zwenezwo, enea mafhungo a sumbedza uri a hu nga ḓo vha na tshidodombedzwa na tshithihi tsha wonoyo Mulayo tshine tsha sa ḓo ḓadzea.
Naa Yehova Mudzimu u a dzhiela nṱha zwidodombedzwa zwiṱuku? Ee, u a zwi dzhiela nṱha. Ṱhogomelani zwi tevhelaho: Vhaisiraele vha tshifhingani tsha kale vho vha vho vhudzwa uri a vho ngo fanela u vunḓa shambo na ḽithihi ḽa ngwana ya Paseka. (Ekisodo 12:46) Khamusi zwenezwo zwo vha zwi zwithu zwiṱuku. Naa vho vha vha tshi pfesesa uri ndi ngani vha songo fanela u vunḓa shambo na ḽithihi? Khamusi vho vha vha sa zwi pfesesi. Naho zwo ralo, Yehova Mudzimu o vha a tshi zwi ḓivha uri tshenetshi tshidodombedzwa tsho vha tshi vhuporofita ha uri Messia o vha a sa ḓo vunḓwa shambo na ḽithihi musi a tshi vhulahwa kha danda ḽa tshengedzo.—Psalme ya 34:20; Yohane 19:31-33, 36.
Ri guda mini kha maipfi a Yesu? Na riṋe ri nga vha na vhungoho ha uri mafulufhedziso oṱhe a Yehova Mudzimu a ḓo ḓadzea u katela na zwidodombedzwa zwiṱuku. Yeneyi ndi khwaṱhisedzo yavhuḓi vhukuma i re kha ḽeḓere ḽiṱukusa ḽa Luheberu!
^ phar. 3 Ḽeḓere ḽiṱukusa ḽa alifabeta ya Lugerika ndi iota nahone ḽi fana na ḽeḓere ḽa alifabeta ya Luheberu י (yod). Samusi mathomoni Mulayo wa Mushe wo vha wo ṅwalwa nga Luheberu, khamusi Yesu o vha a tshi khou ambela kha ḽeḓere ḽa Luheberu.
You May Also Like
MBUDZISO DZA BIVHILI DZO FHINDULWA
Yehova Ndi Nnyi?
Naa ndi Mudzimu wa lushaka luthihi, u fana na lwa Isiraele?
NEW WORLD TRANSLATION OF THE HOLY SCRIPTURES (YO VUSULUSWAHO NGA 2013 )
Bivhili I Fhulufhedzisa Mini Nga Ha Vhumatshelo?
Ni nga mangadzwa nga fhulufhelo ḽine ya amba nga haḽo.
