1. U ya nga 3 Yohane 3, 4, ndi mini zwine zwa ri takadza?

HUMBULANI uri muapostola Yohane a nga vha o takala hani musi a tshi pfa uri vhathu vhe a vha thusa uri vha ḓe ngohoni vha kha ḓi shumela Yehova nga u fhulufhedzea. Vho vha vha tshi khou ṱangana na thaidzo nnzhi nahone Yohane o vha a tshi khou ita zwoṱhe zwine a nga kona u itela u vha thusa uri vha dzule vha tshi fhulufhedzea ngauri vho vha vha tshi tou nga vhana khae. Na riṋe ri ḓipfa nga nḓila i fanaho musi vhana vhashu kana vhaṅwe vhe ra vha thusa uri vha ḓe ngohoni vha tshi ḓiṋekedza kha Yehova nahone vha bvela phanḓa na u mu shumela.—Vhalani 3 Yohane 3, 4.

2. Ndi ngani Yohane o ṅwala marifhi awe?

² Nga 98 C.E., Yohane a nga vha o vha a tshi khou dzula Efesa kana tsini naho. A nga vha o pfulutshela Efesa nga murahu ha u vhofhololwa dzhele ngei tshiṱangadzimeni tsha Patimo. Nga tshenetsho tshifhinga, muya mukhethwa wa Mudzimu wo mu ṱuṱuwedza uri a ṅwale marifhi mararu. Musi a tshi ṅwala eneo marifhi, o vha a tshi khou ṱoḓa u ṱuṱuwedza Vhakriste vha fhulufhedzeaho uri vha dzule vha tshi vha na lutendo kha Yesu na uri vha dzule vha tshi tshimbila ngohoni.

3. Ri ḓo fhindula mbudziso dzifhio?

³ Samusi vhaṅwe vhaapostola vho vha vho no fa, Yohane o vha e ene muapostola e eṱhe we a vha o sala a tshi khou tshila. O vha a tshi khou vhilaela nga nṱhani ha masiandoitwa ane a ḓo vha hone nga nṱhani ha vhafunzi vha mazwifhi. * (1 Yoh. 2:18, 19, 26) Vhenevho vhagunei vho vha vha tshi ḓiita u nga vha ḓivha  Mudzimu, fhedzi vha sa tevhedzi zwine a zwi amba. Kha ri ambe nga ha zwe Yohane a vha vhudza zwone. Musi ri tshi amba nga hazwo, ri ḓo fhindula mbudziso tharu: Zwi amba mini u tshimbila ngohoni? Ndi mini zwine zwa nga ita uri ri litshe u tshimbila ngohoni? Nahone ri nga thusana hani uri ri dzule ri tshi tshimbila ngohoni?

4. U ya nga 1 Yohane 2:3-6 na 2 Yohane 4, 6, ri tea u ita mini uri ri tshimbile ngohoni?

⁴ U itela uri ri tshimbile ngohoni, ri tea u ḓivha ngoho ine ya wanala Bivhilini. Zwiṅwe hafhu, ri tea u ‘tevhedza milayo ya Yehova,’ zwine zwa amba uri ri tea u mu thetshelesa. (Vhalani 1 Yohane 2:3-6; 2 Yohane 4, 6.) Yesu o ri vhetshela tsumbo ngauri o thetshelesa Yehova tshifhinga tshoṱhe. Iṅwe nḓila ine ra nga thetshelesa ngayo Yehova, ndi nga u tevhela tsumbo ya Yesu nga vhuronwane.—Yoh. 8:29; 1 Pet. 2:21.

5. Ri tea u vha na vhungoho ha mini?

⁵ U itela uri ri dzule ri tshi tshimbila ngohoni, ri tea u vha na vhungoho ha uri Yehova u dzula a tshi amba ngoho na uri zwine zwa vha kha Ipfi ḽawe Bivhili ndi ngoho. Nahone ri tea u vha na vhungoho ha uri Yesu ndi Messia we ha vha ho dzula ho ambiwa nga hae. Vhunzhi ha vhathu ṋamusi vha a timatima uri Yehova o nanga Yesu uri a vhe Khosi ya Muvhuso wawe. Yohane o tsivhudza uri hu ḓo vha na “vhafhuri vhanzhi” vhane vha ḓo fhura vhane vha si vhe na lutendo lwo khwaṱhaho kha Yehova na Yesu. (2 Yoh. 7-11) O ri: “Ane a zwifha ndi ane a hanedza uri Yesu ndi Kristo.” (1 Yoh. 2:22) U guda Ipfi ḽa Mudzimu ndi zwone zwi zwoṱhe zwine zwa nga ita uri ri si fhurwe. Musi ri tshi ita zwenezwo, ri ḓo ḓivha Yehova na Yesu. (Yoh. 17:3) Nahone ri ḓo vha na vhungoho ha uri ro wana ngoho.

6. Ndi mini tshine tsha nga ita uri Vhakriste vha re miṅwahani ya vhuswa vha si tsha tshimbila ngohoni?

⁶ Vhakriste vhoṱhe vha tea u ṱhogomela uri vha sa fhurwe nga pfunzo dza maṱali. (1 Yoh. 2:26) Vhathu vhane vha vha khomboni ya u wela kha tshenetsho tshikwekwe ndi Vhakriste vhane vha vha miṅwahani ya vhuswa. Alexia * ane a bva Fura ane a vha na miṅwaha ya 25 u ri: “Musi ndi tshikoloni ndo gudiswa uri zwithu zwo sokou bvelela, na dziṅwe pfunzo dza maṱali nahone zwenezwo zwithu zwo ita uri ndi timatime ngoho. Nga zwiṅwe zwifhinga ndo vha ndi tshi vhona u nga zwenezwo zwithu ndi  ngoho. Fhedzi ndo vhona uri a thi nga si dzhie zwoṱhe zwine nda zwi guda tshikoloni ndi sa fhe Yehova tshibuli tsha u amba.” Alexia o vhala bugu ine ya ri Life—How Did It Get Here? By Evolution or by Creation? Nga murahu ha vhege dzi si gathi, o vha a si tsha timatima uri zwithu zwo tou sikwa. U ri: “Ndo vha na vhungoho ha uri zwine Bivhili ya zwi funza ndi ngoho. Nda zwi vhona uri u tevhedzela zwine ya zwi amba zwi ḓo ita uri ndi takale na u vha na mulalo.”

7. Ri tea u iledza mini nahone ndi ngani?

⁷ Vhakriste vhoṱhe vha tea u ṱhogomela uri vha si vhe vhadzia muhoyo nga u ita u nga vha shumela Yehova ngeno vha tshi khou ita zwithu zwivhi. Yohane o zwi bvisela khagala uri a zwi konadzei u tshimbila ngohoni ngeno ri tshi khou tshila nga nḓila ine Mudzimu a sa i takalele. (1 Yoh. 1:6) Arali ri tshi ṱoḓa uri Yehova a ri takalele, ri tea u dzula ri tshi humbula uri zwithu zwoṱhe zwine ra zwi ita zwi khagala khae. Naho vhathu vha sa vhoni zwine ra zwi ita tshiphirini, Yehova u vhona zwithu zwoṱhe zwine ra zwi ita.—Vhahev. 4:13.

8. Ri tea u iledza mini?

⁸ Ri tea u iledza nḓila ine shango ḽa dzhia ngayo tshivhi. Muapostola Yohane o ri: “Arali ra ri, ‘A ri na tshivhi,’ ri khou ḓifhura.” (1 Yoh. 1:8) Nga tshifhinga tsha Yohane, vhagunei vho vha vha tshi amba uri muthu a nga vha na vhushaka havhuḓi na Mudzimu naho a tshi khou ita tshivhi. Na ṋamusi vhathu vha kha ḓi ḓipfa nga nḓila i fanaho. Vhunzhi ha vhathu vha amba uri vha tenda kha Mudzimu, fhedzi a vha tendelani na zwine Mudzimu a zwi dzhia sa tshivhi, nga maanḓa musi zwi tshi ḓa kha mafhungo a zwa vhudzekani. Yehova u dzhia u ḓifara luvhi nga zwa vhudzekani hu tshivhi, fhedzi vhenevho vhathu vha amba uri zwo tendelwa u ita tshiṅwe na tshiṅwe tshine wa funa.

9. Ndi ngani vhaswa vha tshi tea u ita zwine Bivhili ya zwi amba?

⁹ Zwihuluhulu Vhakriste vha re miṅwahani ya vhuswa, vha nga tsikeledzwa uri vha ḓifare nga  nḓila i si yavhuḓi nga vhane vha shuma navho kana vhane vha dzhena navho tshikolo. Zwenezwo zwo itea kha Aleksandar. O ri: “Vhaṅwe vhasidzana vho vha vha tshi nkombetshedza uri ndi ite zwa vhudzekani navho. Vho amba uri samusi hu si na musidzana ane nda pfana nae, zwi amba uri ndi ita zwa vhudzekani na vhatukana.” Hu nga kha ḓi itea zwi fanaho kha inwi. Fhedzi arali na ita zwine Bivhili ya zwi amba, ni ḓo takala, na tsireledza mutakalo waṋu, na si vhe na mutsiko nahone na vha na vhushaka havhuḓi na Yehova. Na ḓiḓowedza u hana u ita zwithu zwo khakheaho, zwi ḓo ni lelutshela u ita zwithu zwo lugaho. Ni songo hangwa uri Saṱhane ndi ene ane a ita uri vhathu vha ḓifare luvhi nga zwa vhudzekani. Ngauralo, musi ni tshi hana u ḓifara luvhi nga zwa vhudzekani, ni vha ni tshi khou “kunda muvhi.”—1 Yoh. 2:14.

10. Luṅwalo lwa 1 Yohane 1:9 lu ri thusa hani uri ri shumele Yehova ri na luvalo lwo kunaho?

¹⁰ Ri a zwi ḓivha uri Yehova ndi ene e eṱhe o tewaho nga u amba uri ndi zwifhio zwithu zwo khakheaho. Nahone ri ita zwoṱhe zwine ra nga kona uri ri sa ite tshivhi. Fhedzi arali ra khakha, ri a rabela kha Yehova ra bula zwivhi zwashu khae. (Vhalani 1 Yohane 1:9.) Arali ra ita tshivhi tshihulwane, ri ya kha vhahulwane vhe Yehova a vha vhea uri vha ri ṱhogomele. (Yak. 5:14-16) A ro ngo tea u tendela luvalo lwashu lu tshi ri dina nga nṱhani ha vhukhakhi he ra vhu ita kale. Ndi ngani? Ndi ngauri Yehova o ri ṋea tshiṱhavhelo tsha murwa wawe uri ri kone u hangwelwa zwivhi. Musi Yehova a tshi amba uri u ḓo hangwela muitazwivhi o rembuluwaho, u amba zwezwo. A hu na tshine tsha nga ita uri ri sa shumele Yehova ri na luvalo lwo kunaho.—1 Yoh. 2:1, 2, 12; 3:19, 20.

11. Ri nga ḓitsireledza hani kha pfunzo dzine dza nga ita uri ri si vhe na lutendo lwo khwaṱhaho?

¹¹ Ri tea u iledza zwine zwa funzwa nga vhagunei. U bva tshee tshivhidzo tsha Vhakriste tsha thoma, Saṱhane u dzula a tshi lingedza u ita uri lutendo lwa Vhakriste lu si khwaṱhe. Nga zwenezwo, ri tea u kona u fhambanya ngoho na  mazwifhi. * Maswina ashu vha nga lingedza u shumisa inthanethe kana social media u itela uri ri si vhe na lutendo kha Yehova na uri ri si fune vhahashu. Ni songo tenda eneo mazwifhi ngauri a bva kha Saṱhane.—1 Yoh. 4:1, 6; Nzumb. 12:9.

12. Ndi ngani ri tshi tea u vha na lutendo lwo khwaṱhaho kha ngoho ye ra i guda?

¹² Arali ra nga vha na fhulufhelo kha Yesu, na nḓila ine Yehova a khou mu shumisa ngayo uri a ite zwine a ṱoḓa, ri ḓo kona u hanedza zwithu zwine Saṱhane a zwi shumisa uri ri vhe na lutendo lu songo khwaṱhaho. Ri tea u dovha ra fhulufhela mulanda a fhulufhedzeaho na wa vhuṱali. (Mat. 24:45-47) Ri nga ita zwenezwo nga u guda Ipfi ḽa Mudzimu tshifhinga tshoṱhe. Lutendo lwashu lu ḓo nga muri une midzi yawo ya tou vha fhasi-fhasi mavuni. Paulo o amba zwi fanaho musi a tshi ṅwalela tshivhidzo tsha Kolosa. O ri: “Vhunga no tenda Kristo Yesu Murena washu, dzulani ni na vhuthihi nae . . . ni ṱoke midzi na u fhaṱwa khae na u vha na lutendo lwo khwaṱhaho.” (Vhakol. 2:6, 7) Arali ri na lutendo lwo khwaṱhaho, a hu na tshithu na tshithihi tshine Saṱhane na vhane vha mu tikedza vha nga tshi ita uri ri sa tshimbile ngohoni.—2 Yoh. 8, 9.

13. Ri tea u lavhelela mini nahone ndi ngani?

¹³ A ro ngo tea u mangala musi shango ḽi tshi ri vhenga. (1 Yoh. 3:13) Yohane o ri: “shango ḽoṱhe ḽi zwanḓani zwa muvhi.” (1 Yoh. 5:19) Saṱhane o sinyuwa ngauri ḽino shango ḽi khou ḓo fheliswa hu si kale. (Nzumb. 12:12) U ri vutshela nga nḓila i songo livhaho u fana na musi a tshi ita uri ri ḓifare luvhi nga zwa vhudzekani kana nga uri ri thetshelese mazwifhi a vhagunei. U dovha a ri vutshela nga ho livhaho nga u ri tovhola. Saṱhane u a zwi ḓivha uri o salelwa nga tshifhinga tshiṱuku tsha u ita uri ri si tsha huwelela na uri ri si tsha vha na lutendo. Ndi ngazwo zwi sa ri mangadzi uri kha maṅwe mashango ho thivhelwa mushumo washu woṱhe kana miṅwe ya mishumo yashu. Fhedzi vhahashu vhane vha dzula kha eneo mashango vha khou konḓelela. Zwenezwi zwi khou sumbedza uri vhathu vha Yehova vha nga fhulufhedzea hu sa londwi tshiṅwe na tshiṅwe tshine Saṱhane a nga tshi ita.

14. Ri nga thusa hani vhahashu uri vha dzule vhe ngohoni?

¹⁴ Ri nga thusa vhahashu uri vha dzule vha tshi tshimbila ngohoni nga u vha pfela vhuṱungu. (1 Yoh. 3:10, 11, 16-18) Ri tea u sumbedzana lufuno musi zwithu zwi tshi khou tshimbila zwavhuḓi na musi zwi sa khou tshimbila zwavhuḓi. Sa tsumbo, naa hu na muthu o felwaho ane na mu ḓivha ane a khou ṱoda u khuthadzwa kana u thusiwa? Kana naa no pfa nga ha vhahashu vho welwaho nga khombo dza mupo vhane vha khou ṱoḓa u thusiwa nga u fhaṱululelwa Holo kana mahaya avho? A ri sumbedzi vhahashu uri ri a vha funa na u vha pfela vhuṱungu nga zwine ra zwi amba fhedzi, tsha ndeme ndi u vha sumbedza nga zwine ra zwi ita.

15. U ya nga 1 Yohane 4:7, 8, ri tea u ita mini?

¹⁵ Musi ri tshi sumbedza vhaṅwe uri ri a vha funa, ri vha ri tshi khou edzisa Khotsi ashu wa ṱaḓulu Yehova. (Vhalani 1 Yohane 4:7, 8.) Nahone nḓila khulwane ine ra sumbedza uri ri funa ngayo vhaṅwe ndi nga u vha hangwela. Sa tsumbo, muṅwe a nga ri khukhulisa, fhedzi a ri humbela pfarelo. Ri sumbedza uri ri a mu funa nga u mu hangwela na nga u hangwa zwe a zwi ita. (Vhakol. 3:13) Wahashu ane a pfi Aldo o vha o dinalea musi muṅwe wahashu a tshi amba zwithu zwi si zwavhuḓi nga ha vhathu vha lushaka lwa hawe. U ri: “Ndo rabela lunzhi  uri Yehova a nthuse uri ndi si humbule zwithu zwi si zwavhuḓi nga hae.” Fhedzi Aldo ho ngo guma henefho. O humbela onoyo wahashu uri a tshimbile nae tsimuni. Musi a tshi khou shuma na onoyo wahashu, Aldo o mu vhudza uri zwe a zwi amba a zwo ngo mu fara zwavhuḓi. Aldo u ri: “Musi onoyo wahashu a tshi pfa uri zwe a zwi amba a zwo ngo mpfara zwavhuḓi, o humbela pfarelo. Nḓila ye a amba ngayo yo vha i tshi khou sumbedza uri u khou ḓisola vhukuma. Nga murahu ha zwenezwo, ro dovha ra vha madele mapfani.”

16-17. Ri tea u ḓiimisela u ita mini?

¹⁶ Muapostola Yohane o vha a tshi funa vhahawe nahone o vha a tshi ṱoḓa uri vha vhe na lutendo lwo khwaṱhaho. Nḓila ye vha vha vhe vha ndeme khae na nḓila ye a vha a tshi vha funa ngayo, yo vhonala kha nḓila ye a ṅwala ngayo marifhi awe mararu. Ndi zwavhuḓi u ḓivha uri vhanna na vhafumakadzi vhane vha ḓo vhusa na Yesu ṱaḓulu vha na lufuno u fana na Yohane.—1 Yoh. 2:27.

¹⁷ U nga ri ri nga dzhiela nṱha zwe ra zwi guda kha yeneyi thero. Kha ri ḓiimisele u tshimbila ngohoni, zwine zwa amba uri ri tea u thetshelesa Yehova tshifhinga tshoṱhe. Gudani Ipfi ḽawe nahone ni tende zwine na zwi guda. Ivhani na lutendo lwo khwaṱhaho kha Yesu. Ni songo tenda pfunzo dza maṱali na zwine zwa funzwa nga vhagunei. Ni songo tenda vhathu vhane vha ni ṱuṱuwedza uri ni kande nga huvhili na uri ni ite tshivhi. Dzulani ni tshi ita zwine Yehova a zwi funa. Ri nga thusa vhahashu uri vha dzule vha na lutendo lwo khwaṱhaho nga u vha hangwela musi vho ri khakhela na nga u thusa vhane vha ṱoḓa thuso. Ra ita zwenezwo, ri ḓo dzula ri tshi tshimbila ngohoni hu sa londwi milingo ine ra ṱangana nayo.