Nga nṱhani ha uri ri ṋea khandiso dzashu dzo thewaho Bivhilini nga mahala, vhaṅwe vha vhona u nga zwo tea u kopa kana u dzhenisa dzenedzo khandiso kha dziṅwe website kana zwishumiswa zwa vhudavhidzani. Naho zwo ralo, u ita nga u ralo ndi u vunḓa Milayo ya Kushumisele * kwa website yashu nahone zwo vhuya zwa ri itela thaidzo khulwane. Vhunga zwo bviselwa khagala kha yeneyo Milayo, a huna muthu o tendelwaho u “dzhenisa kha Inthanethe (website iṅwe na iṅwe, website dza u rumelana dzifaela na dzividio kana zwishumiswa zwa vhudavhidzani) zwifanyiso zwo oliwaho, khandiso dza elekitironiki, dzitrademark (kana tswayo), muzika, zwinepe, dzividio kana thero dzi bvaho kha yeneyi website.” Ndi ngani zwi songo tea?

Khandiso dzoṱhe dzi re kha website yashu dzo tsireledzwa nga mulayo wa copyright. Vhagunei na vhaṅwe vhapikisi vha lingedza u shumisa khandiso dzashu kha website dzavho u itela u fasha Ṱhanzi dza Yehova na vhaṅwe. Tshipikwa tshihulwane tsha dzenedzo website dza vhagunei ndi u xedza mihumbulo ya vhavhali. (Ps. 26:4; Mir. 22:5) Vhaṅwe vho shumisa zwithu zwi re kha khandiso dzashu kana tswayo yashu ya jw.org kha khunguwedzo, kha zwibveledzwa zwine vha khou zwi rengisa na kha app dzi re kha zwishumiswa zwa elekitironiki. Nga nṱhani ha uri website yashu yo tsireledzwa nga mulayo wa copyright na trademark, ri na maanḓa a re mulayoni a u thivhela honoho u shumiswa luvhi. (Mir. 27:12) Fhedzi arali ra tendela vhathu u katela na vhahashu vha tshi dzhenisa zwithu zwi re kha website dzashu kha dziṅwe website kana u shumisa tswayo ya jw.org u itela u rengisa zwibveledzwa zwavho, zwenezwi zwi nga ita uri khothe dzi si ri tikedze musi ri tshi thivhela vhapikisi  na vhavhambadzi vhane vha ṱoḓa u zwi shumisa.

U kopa khandiso dzashu kha dziṅwe website nga nnḓa ha kha jw.org zwi na khombo khulwane. Ndi “mulanda a fulufhedzeaho na wa vhuṱali” fhedzi a re na vhuḓifhinduleli he a ṋewa nga Yehova ha u ri ṋea zwiḽiwa zwa muya. (Mat. 24:45) Onoyo “mulanda” u ri ṋea zwiḽiwa zwa muya a tshi shumisa website dzi tevhelaho dzi re mulayoni—www.dan124.com, tv.dan124.com na wol.dan124.com fhedzi. Nahone ri na app tharu fhedzi dzi re mulayoni—ndi JW Language^®, JW Library^® na JW Library Sign Language^®. Zwenezwi zwishumiswa a zwo ngo tshikafhadzwa nga shango ḽa Sathane nahone a hu bveleli dziṅwe khunguwedzo khazwo. Arali ra nga wana khandiso dzashu kana zwiḽiwa zwa muya kha dziṅwe website, zwi nga ita uri mulaedza u vhe wo no shandulwa kana wo tshikafhadzwa.—Ps. 18:26; 19:8.

Zwiṅwe hafhu, u dzhenisa khandiso dzashu kha website dzine dza ṋea vhathu tshibuli tsha uri vha ṅwale mihumbulo yavho, zwi ṋea tshibuli vhagunei na vhaṅwe vhasasaladzi uri vha ite uri vhathu vha si tsha fulufhela ndangulo ya Yehova. Vhaṅwe vhahashu vho vhuya vha rambiwa uri vha ṱanganele kha nyambedzano dza u ṱaṱa khani hu tshi shumiswa Inthanethe nahone dzenedzo nyambedzano dzi nyadzisa dzina ḽa Yehova. U shumisa Inthanethe a si nḓila yo teaho ya u ‘laya mashandukwa wo vuḓa.’ (2 Tim. 2:23-25; 1 Tim. 6:3-5) Zwo ṱhogomelwa uri ho no itwa website na masiaṱari a social media a siho mulayoni hu tshi shumiswa dzina ḽa ndangulo, Tshigwada tshi Langaho na miraḓo ya Tshigwada tshi Langaho. Naho zwo ralo, a huna muraḓo wa Tshigwada tshi Langaho a re na website yawe kana ane a shumisa social media.

U livhisa vhathu kha uri vha shumise jw.org zwi a thusa u phaḓaladza “mafhungo maḓifha.” (Mat. 24:14) Zwishumiswa zwine ra zwi wana kha website yashu zwine ra zwi shumisa vhuḓinḓani, zwi dzula zwi tshi khwiniswa. Ri ṱoḓa muṅwe na muṅwe a tshi vhuyelwa ngazwo. Nga zwenezwo, samusi zwo sumbedzwa kha Milayo ya Kushumisele kwa website, ni nga rumela muṅwe muthu khandiso dzashu ni tshi shumisa e-mail kana na shera linki ya zwine zwa wanala kha jw.org. Nga u livhisa vhathu vha takalelaho kha website yashu i re mulayoni, ri vha ri tshi khou vha sumbedza hune ra wana hone zwiḽiwa zwa muya, kha “mulanda a fulufhedzeaho na wa vhuṱali.”