Nḓila Ya U Wana Mbofholowo Ya Vhukuma
“Arali Murwa a ni vhofholola, ni ḓo vha no vhofhololwa zwa vhukuma.”—YOH. 8: 36.
NYIMBO: 65, 52
1, 2. (a) Ndi vhuṱanzi vhufhio vhune ha sumbedza uri vhathu vha a ṱoḓa u wana mbofholowo? (b) Hu vha na mvelelo dzifhio?
ṊAMUSI hu ambiwa nga ha u vha na pfanelo dzi linganaho na u vha na mbofholowo. Vhathu vhanzhi vha ṱoḓa u vhofhololwa kha u tsikeledzwa, tshiṱalula na tshengelo. Vhaṅwe vha ṱoḓa u vha na mbofholowo ya u amba, ya u ḓikhethela na u ita zwine vha funa. Zwi vhonala uri vhathu vhoṱhe vha ṱoḓa u ita zwine vha funa kana u tshila nga nḓila ine vha funa.
2 Naho zwo ralo, hu na zwine vhathu vha zwi ita u itela u wana mbofholowo. Vhathu vhanzhi vha a ṱereka na u shandukela muvhuso u itela u wana zwine vha zwi ṱoḓa. Fhedzi naa zwenezwo zwithu zwi ita uri vha wane zwine vha zwi ṱoḓa? Zwo fhambanaho na zwenezwo, kanzhi zwenezwo zwithu zwi vha ḓisela makhaulambilu na lufu. Zwenezwi zwoṱhe zwi dovha zwa ṋea vhuṱanzi ha zwe zwa ṅwalwa nga Khosi Salomo musi a tshi ri: “Muthu a tshi vhusa muthu muṅwe [u] a mu tshinya.”—Muh. 8:9.
3. Ri nga wana hani dakalo ḽa vhukuma na u fushea?
3 Yakobo mufunziwa wa Mukriste o amba nga ha zwine ra nga zwi ita u itela u wana dakalo ḽa vhukuma na u fushea. O ri: ‘Ane a sedzesa mulayo wo fhelelaho une wa vha wa mbofholowo a futelela khawo, u ḓo takala musi a tshi khou shuma.’ (Yak. 1:25) Samusi hu Yehova we a vhea wonoyo mulayo wo fhelelaho, u a ḓivha zwithu zwa khwine zwine vhathu vha fanela u zwi ita uri vha takale na u fushea nga ho fhelelaho. O ṋea vhavhingani vha u thoma zwoṱhe zwe vha vha vha tshi zwi ṱoḓa uri vha takale, u katela na mbofholowo ya vhukuma.
MUSI VHATHU VHA TSHI KHA ḒI VHA NA MBOFHOLOWO YA VHUKUMA
4. Ndi ifhio mbofholowo ye Adamu na Eva vha ḓiphina ngayo? (Sedzani tshifanyiso tsha u thoma.)
4 Musi ri tshi vhala ndima mbili dza u thoma dza bugu ya Genesi, ri kona u vhona nga hu leluwaho uri Adamu na Eva vho ḓiphiṋa nga mbofholowo ine vhathu ṋamusi vha tou ḽora nga hayo. Vho vha vha sa shayi tshithu, vha sa ofhi tshithu nahone ho vha hu si na muthu ane a vha fara nga nḓila i si yavhuḓi. Vhenevho vhavhingani vha u thoma vho vha vha sa vhilaeli nga ha zwiḽiwa, mushumo, malwadze na u fa. (Gen. 1:27-29; 2:8, 9, 15) Naa zwenezwo zwi amba uri mbofholowo ye Adamu na Eva vha vha vhe nayo yo vha yo fhelela? Kha ri vhone.
5. U fhambana na zwine vhathu vhanzhi vha zwi humbula, ndi mini zwine zwa ṱoḓea u itela uri vhathu vha wane mbofholowo?
5 Vhathu vhanzhi ṋamusi vha humbula uri u vha na mbofholowo ya vhukuma zwi amba uri vha fanela u ita zwine vha funa, hu sa londwi masiandoitwa ane a nga vha hone. The World Book Encyclopedia i ṱalusa mbofholowo sa “vhukoni ha u dzhia phetho na u i khunyeledza.” I dovha ya amba uri vhathu vha a vha na mbofholowo arali muvhuso u sa vha vhetsheli mikano kha zwithu zwi sa pfali kana zwi sa ṱoḓei. Zwenezwo zwi sumbedza uri zwi a ṱoḓea uri hu vhe na mikano u itela uri vhathu vhoṱhe vha kone u vhuyelwa nga mbofholowo ye vha ṋewa yone. Zwino mbudziso ndi ya uri: Ndi nnyi ane a vha na ndugelo ya u amba uri yeneyo mikano i a pfala nahone i a ṱoḓea?
6. (a) Ndi ngani hu Yehova fhedzi a re na mbofholowo yo fhelelaho? (b) Ndi mbofholowo ifhio ine vhathu vha nga ḓiphina ngayo, nahone ndi ngani?
6 Ri fanela u dzula ri tshi humbula uri ndi Yehova Mudzimu fhedzi ane a vha na mbofholowo yo fhelelaho na i si na mikano. Ndi ngani? Ndi nga nṱhani ha uri ndi Musiki wa fhethu hoṱhe nahone ndi Muvhusahoṱhe. (1 Tim. 1:17; Nzumb. 4:11) Humbulani maipfi e a ambiwa nga Khosi Davida musi a tshi amba nga ha vhuimo ho khetheaho vhune Yehova a vha naho. (Vhalani 1 Koronika 29:11, 12.) Nga zwenezwo, mbofholowo ya zwivhumbiwa zwoṱhe zwi re ṱaḓulu na zwi re kha ḽifhasi i na mikano. Zwenezwo zwivhumbiwa zwi fanela u ḓivha uri Yehova Mudzimu u na ndugelo ya u vhea mikano ine ya pfala na ine ya ṱoḓea. Zwenezwo ndi zwe Yehova Mudzimu a zwi ita musi a tshi sika vhathu vha u thoma.
7. Ndi zwifhio zwiṅwe zwithu zwo ḓoweleaho zwine zwa ita uri vhathu vha takale?
7 Naho mathomoni Adamu na Eva vho ḓiphina nga mbofholowo ye vha vho ṋewa yone, yeneyo mbofholowo yo vha i na mikano. Miṅwe ya yeneyo mikano yo vha yo ḓowelea khavho. Sa tsumbo, u itela uri vha kone u tshila, vhabebi vhashu vha u thoma vho vha vha tshi zwi ḓivha uri vha fanela u fema, u ḽa, u eḓela na zwiṅwe-vho. Naa u ita zwenezwo zwithu zwo ita uri vha pfe vha si na mbofholowo? Hai, Yehova o ita vhungoho ha uri vha takale na u fushea musi vha tshi ita zwenezwo zwithu. (Ps. 104:14, 15; Muh. 3:12, 13) Ndi nnyi a sa takadzwi nga u fema muya wavhuḓi, u ḽa zwiḽiwa zwine a zwi takalela kana u eḓela khofhe tshidele? Ri ita zwenezwi zwoṱhe ro takala nahone a ri zwi dzhii zwi muhwalo. A zwi timatimisi uri Adamu na Eva vho ḓipfa nga nḓila i fanaho.
8. Ndi ndaela ifhio yo livhaho ye Mudzimu a i ṋea vhabebi vhashu vha u thoma, nahone ndi ngani?
8 Yehova o ṋea Adamu na Eva ndaela yo livhaho ya uri vha ḓadze ḽifhasi nga vhana na u ḽi ṱhogomela. (Gen. 1:28) Naa yeneyo ndaela yo vha thivhela uri vha si vhe na mbofholowo? Na luthihi! Yeneyo ndaela yo ita uri vhathu vha kone u shela mulenzhe kha tshipikwa tsha Musiki tsha uri ḽifhasi ḽi vhe haya ha paradiso i re na vhathu vho fhelelaho lwa tshoṱhe. (Yes. 45:18) Ṋamusi, arali vhathu vha sa ṱoḓi u vha mbinganoni kana vha vha mbinganoni fhedzi vha khetha u sa vha na vhana, vha vha vha sa khou lwisana na zwine Yehova a zwi ṱoḓa. Naho zwo ralo, vhathu vhanzhi vha khetha u vha mbinganoni na u alusa vhana hu sa londwi vhuleme vhu ne ha ḓiswa nga phetho dze vha dzi dzhia. (1 Vhakor. 7:36-38) Ndi ngani? Ndi nga nṱhani ha uri u ita zwenezwo zwi ita uri vhathu vha takale na u fushea. (Ps. 127:3) Arali Adamu na Eva vha vhe vho thetshelesa Mudzimu, vho vha vha tshi ḓo vha vho ḓiphina lwa tshoṱhe nga mbingano yavho na u vha na muṱa.
NḒILA YE MBOFHOLOWO YA VHUKUMA YA XELA NGAYO
9. Ndi ngani ndaela ya Mudzimu i re kha Genesi 2:17 i tshi pfala kana i tshi ṱoḓea?
9 Yehova o dovha a ṋea Adamu na Eva iṅwe ndaela ye ya vha i tshi katela masiandoitwa ane a ḓo vha hone arali vha sa thetshelesa, o ri: “Uḽa muri wa u ṱalukanya vhuḓi na vhuvhi U sóngo u ḽa; ngauri ḓuvha ḽine wa ḓo ḽa wonoyo, U ḓo vha wa u fa.” (Gen. 2:17) Naa yeneyo ndaela yo vha i sa pfali kana i sa ṱoḓei? Naa zwo ita uri Adamu na Eva vha si vhe na mbofholowo? Na khathihi. Zwi re zwone ndi uri vhaṅwe vhagudi vha Bivhili vho amba uri yeneyo ndaela i ya pfala nahone yo vha yo tea. Sa tsumbo, muṅwe mugudi o amba uri yeneyo ndaela i ri gudisa “uri ndi Mudzimu fhedzi ane a ḓivha zwo lugelaho . . . vhathu nahone ndi Mudzimu fhedzi ane a ḓivha zwi songo . . . vha lugelaho. U itela uri vhathu vha ḓiphine nga zwithu ‘zwo lugaho,’ vha fanela u fulufhela Mudzimu na u mu thetshelesa. Arali vha sa thetshelesa, zwi ḓo ita uri vhone vhaṋe vha khethe zwo lugaho . . . na zwi songo lugaho.” Wonoyo ndi muhwalo une vhathu vha nga si kone u u hwala nga vhone vhaṋe.
Phetho ya Adamu na Eva yo vha ḓisela makhaulambilu! (Sedzani dziphara 9-12)
10. Ndi ngani u vha na mbofholowo ya u ḓikhethela zwi sa fani na u vha na ndugelo ya u khetha zwo lugaho na zwi songo lugaho?
10 Musi vhathu vhanzhi vha tshi vhala ndaela ye Yehova a i ṋea Adamu, vha nga amba uri Adamu ho ngo ṋewa mbofholowo ye a vha a tshi i ṱoḓa. Musi vha tshi amba nga u ralo, vha vha vha sa khou ḓivha phambano vhukati ha mbofholowo ya u ḓikhethela na ndugelo ya u khetha zwo lugaho na zwi songo lugaho. Adamu na Eva vho vha vhe na mbofholowo ya u khetha u thetshelesa Mudzimu kana u sa mu thetshelesa. Naho zwo ralo, ndi Yehova fhedzi a re na ndugelo ya u khetha zwo lugaho na zwi songo lugaho, samusi zwo sumbedzwa nga “muri wa u ṱalukanya vhuḓi na vhuvhi” we wa vha u tsimuni ya Edeni. (Gen. 2:9) A ri ḓivhi masiandoitwa a phetho dzashu nahone a si tshifhinga tshoṱhe hune phetho dzine ra dzi dzhia dza ḓo vha na mvelelo dzavhuḓi. Ndi ngazwo kanzhi ri tshi vhona vhathu vha tshi dzhia phetho vhe na zwiṱuṱuwedzi zwavhuḓi, fhedzi mafheleloni dzenedzo phetho dza vha ḓisela tshengelo kana makhaulambilu. (Mir. 14:12) Zwine vhathu vha zwi ita zwi na mikano. Yehova o ṋea Adamu na Eva ndaela u itela u vha funza nḓila ine vha nga wana ngayo mbofholowo ya vhukuma. Vhenevho vhavhingani vha u thoma vho aravha hani?
11, 12. Ndi ngani phetho ya Adamu na Eva yo vha ḓisela makhaulambilu? Ṋeani tsumbo.
11 Zwi ṱungufhadzaho ndi uri vhabebi vhashu vha u thoma vho khetha u sa thetshelesa. Eva ho ngo kona u landula mazwifhi a Sathane a uri “maṱo aṋu a ḓo bonyolowa, na ḓo nga Mudzimu, na ḓo ḓivha vhuḓi na vhuvhi.” (Gen. 3:5) Naa phetho ye Adamu na Eva vha i dzhia yo ita uri vha wane mbofholowo? Zwi ṱungufhadzaho ndi uri a zwo ngo ralo. A vho ngo wana zwe Sathane a amba uri vha ḓo zwi wana. Vho guda uri u sa thetshelesa vhulivhisi ha Yehova na u ita zwithu nga nḓila yavho zwo vha ḓisela makhaulambilu. (Gen. 3:16-19) Ndi ngani? Ndi nga nṱhani ha uri Yehova ho ngo ṋea vhathu mbofholowo ya u ḓikhethela zwo lugaho na zwi songo lugaho.—Vhalani Mirero 20:24, Yeremia 10:23.
12 Zwenezwi zwi nga fanyiswa na muthu ane a khou reila bufho. U itela uri a swike hune a khou ya hone o tsireledzea, u fanela u tevhela vhulivhisi ha tshithu tshine tsha mu sumbedza nḓila tshine tsha vha henefho kha bufho. U dovha a davhidzana na vhathu vhane vha shuma u ṋea vhulivhisi ha hune a fanela u fhufha hone na tshifhinga tshine a fanela u takuwa ngatsho u itela uri a si thule maṅwe mabufho. Fhedzi arali onoyo mureili a sa tevhela vhulivhisi nahone a ya hune ene muṋe a khou ṱoḓa u ya hone, zwenezwo zwi nga ita uri a ṱangane na khombo. U fana na onoyo mureili wa bufho, Adamu na Eva vho vha vha tshi ṱoḓa u ita zwithu nga nḓila yavho. A vho ngo thetshelesa vhulivhisi he Mudzimu a vha ṋea hone. Ho vha na mvelelo dzifhio? Vho fhedzisela vho welwa nga khombo, zwa bveledza tshivhi na lufu kha vhone vhaṋe na kha vhana vhavho. (Vharoma 5:12) Nga nṱhani ha uri vho vha vha tshi ṱoḓa u ita zwine vha funa, vho xelelwa nga mbofholowo ya vhukuma ye vha vha vho ṋewa yone.
NḒILA YA U WANA MBOFHOLOWO YA VHUKUMA
13, 14. Ri nga wana hani mbofholowo ya vhukuma?
13 Vhathu vha nga humbula uri u vha na mbofholowo yo engedzeaho zwi nga ita uri vha tshile zwavhuḓi, fhedzi ngoho ndi ya uri u vha na yeneyo mbofholowo ndi banga ḽa mu tshea hoṱhe. Ndi ngoho uri u vha na mbofholowo zwi na mbuyelo nnzhi; fhedzi edzani u humbula nḓila ye shango ḽa vha ḽi tshi ḓo vha ḽi ngayo arali ho vha hu si na mikano. Ndi ngazwo The World Book Encyclopedia yo amba uri milayo ine ya vhewa nga madzangano oṱhe yo vhilingana ngauri yeneyo milayo i fanela u tsireledza vhathu na u vha vhetshela mikano nga tshifhinga tshithihi. Zwenezwo a zwo ngo leluwa tshifhinga tshoṱhe. Humbulani nga ha milayo minzhi-minzhi yo ṅwalwaho nga vhathu, ine vhoramilayo na vhahaṱuli vha lingedza u i ṱalutshedza na u i shumisa.
14 Zwo fhambanaho na zwenezwo, Yesu Kristo o amba nga ha nḓila yo leluwaho ine ra nga wana ngayo mbofholowo ya vhukuma. O ri: “Arali na dzula ni kha ipfi ḽanga, ni vhafunziwa vhanga zwa vhukuma, ni ḓo ḓivha ngoho, hone ngoho i ḓo ni vhofholola.” (Yoh. 8:31, 32) Vhulivhisi ha Yesu ha u wana mbofholowo ya vhukuma vhu katela zwithu zwivhili: Tsha u thoma, ndi u ṱanganedza ngoho ye a i funza nahone tsha vhuvhili ndi u vha mufunziwa wawe. U ita nga u ralo zwi ḓo ita uri ri wane mbofholowo ya vhukuma. Fhedzi ndi u vhofhololwa kha mini? Yesu o dovha a ri: “Muṅwe na muṅwe ane a ita tshivhi ndi mulanda wa tshivhi. . . . Arali Murwa a ni vhofholola, ni ḓo vha no vhofhololwa zwa vhukuma.”—Yoh. 8:34, 36.
15. Ndi ngani mbofholowo ye Yesu a i fulufhedzisa i tshi nga ita uri ri ‘vhofhololwe zwa vhukuma’?
15 Zwi tou vha khagala uri mbofholowo ye Yesu a i fulufhedzisa vhafunziwa vhawe i fhira mbofholowo naho i ifhio ine vhathu vhanzhi vha i ṱoḓa ṋamusi. Musi Yesu a tshi amba uri “Arali Murwa a ni vhofholola, ni ḓo vha no vhofhololwa zwa vhukuma,” o vha a tshi khou amba nga ha u vhofhololwa kha vhupuli na u tsikeledzwa hune vhathu vha sa athu u vhuya vha vhu tshenzhela—ha u vha “mulanda wa tshivhi.” Tshivhi a tshi iti uri ri ite zwithu zwivhi fhedzi, fhedzi tshi dovha tsha ri thivhela u ita zwithu zwine ra ḓivha uri zwo luga kana u ita zwine ra zwi kona. Nga zwenezwo, ri vhalanda vha tshivhi nahone mvelelo dza hone dzi vha u tsikeledzea, vhuṱungu, tshengelo nahone mafheleloni ha vha lufu. (Vharoma 6:23) Muapostola Paulo o pfa honoho vhuṱungu. (Vhalani Vharoma 7:21-25.) Musi tshivhi tshi tshi fheliswa lwa tshoṱhe, ri ḓo kona u wana mbofholowo ya vhukuma ye vhabebi vhashu vha u thoma vha vhuya vha ḓiphina ngayo.
16. Ri nga vhofhololwa zwa vhukuma nga nḓila-ḓe?
16 Musi Yesu a tshi amba uri “arali na dzula ni kha ipfi ḽanga,” o vha a tshi khou sumbedza uri hu na zwithu zwine zwa ṱoḓea kana mikano u itela uri ri kone u vhofhololwa ngae. Samusi ri Vhakriste vho ḓiṋekedzelaho, ro ḓihangwa nahone ro khetha u tshila u tendelana na zwe Kristo a zwi funza samusi ri vhafunziwa vhawe. (Mat. 16:24) Samusi Yesu o fulufhedzisa, ri ḓo vhofhololwa zwa vhukuma musi ri tshi wana mbuyelo dza tshirengululi nga vhuḓalo.
17. (a) Ndi mini zwine zwa ḓo ita uri ri fushee na u ḓivha uri ri khou tshilela mini? (b) Ri ḓo haseledza mini kha thero i tevhelaho?
17 U tevhedza zwe Yesu a zwi funza, zwi ḓo ita uri ri fushee na u ḓivha uri ri khou tshilela mini. Zwenezwi zwi ri ṋea tshibuli tsha u vhofhololwa lwa tshoṱhe vhupulini ha tshivhi na lufu. (Vhalani Vharoma 8:1, 2, 20, 21.) Thero i tevhelaho i ḓo haseledza nga ha nḓila ine ra nga shumisa ngayo nga vhuṱali mbofholowo ine ra vha nayo zwino, u itela uri ri kone u hulisa Yehova Mudzimu ane a ṋea mbofholowo ya vhukuma na ya tshoṱhe.
