Nḓila Ine Ra Nga Bvula Ngayo Vhumuthu Ha Kale
“Bvulani vhumuthu ha kale na zwiito zwaho.”—VHAKOL. 3:9.
NYIMBO: 83, 129
1, 2. Ndi mini zwe zwa ṱhogomelwa nga ha Ṱhanzi dza Yehova?
VHATHU vhanzhi vho ṱhogomela nḓila i swayeaho vhukuma ine vhathu vha Yehova vha vha ngayo. Sa tsumbo, muṅwe muṅwali ane a pfi Anton Gill o ṅwala zwi tevhelaho nga ha vhahashu vha Vhanazi vha ngei Dzheremane: “Ṱhanzi dza Yehova dzo kunga Vhanazi vhe vha vha vhe na vengo. . . . Nga 1939, ho vha hu na Ṱhanzi dza 6 000 [gammbani dza tshengedzo].” Naho zwo ralo, o dovha a amba uri hu sa londwi u konḓelela u tovholwa, Ṱhanzi dzo vha dzo dzika naho dzo tsikeledzea nahone dzo dzula dzi tshi fulufhedzea na u vha na vhuthihi.
2 Zwifhingani zwa zwenezwino, vhaṅwe vhathu Afurika Tshipembe vho ṱhogomela pfaneleo dzi fanaho kha vhathu vha Mudzimu. Tshifhingani tsho fhiraho, Ṱhanzi dze dza vha dzi sa fani nga lukanda dzo vha dzi sa koni u ḓikonanya na vhaṅwe vhathu dzo vhofholowa. Naho zwo ralo, nga Swondaha ya ḽa 18 December 2011, zwo takadza vhukuma u vhona vhahashu vha fhiraho 78 000 vha tshaka dzo fhamba-fhambanaho vha Afurika Tshipembe na mashangoni a tsini vho ḓala tshiṱediamu tsha ḓoroboni ya Johannesburg vha tshi khou ḓiphina nga mbekanyamushumo ya lwa muya. Mulanguli wa tshenetsho tshiṱediamu o khoḓa vhathu vhe vha vha vhe hone a ri: “Ndo vha ndi sa athu u vhuya nda vhona vhathu vha no ḓifara zwavhuḓi nga heyi nḓila kha tshenetshi tshiṱediamu. Vhathu vhoṱhe vho vha vho ambara zwavhuḓi. Nahone no kunakisa tshiṱediamu zwavhuḓi vhukuma. Zwa ndeme vhukuma, ni na vhuthihi hu sa londwi uri ni bva kha tshaka dzi sa fani.”
3. Ndi mini zwine zwa ita uri vhushaka hashu vhu vhe ho khetheaho?
3 U khoḓwa nga vhathu vhane vha si vhe Dziṱhanzi zwi sumbedza uri vhushaka hashu ha vhurathu na vhukomana ha shango ḽoṱhe ho khethea vhukuma. (1 Pet. 5:9) Ndi mini zwine zwa ita uri ri si fane na maṅwe madzangano? Ipfi ḽa Mudzimu na muya wawe mukhethwa zwi ri thusa uri ri shume nga nungo dzoṱhe u “[bvula] vhumuthu ha kale,” u itela uri ri “ambare vhumuthu vhuswa.”—Vhakol. 3:9, 10.
4. Ndi mini zwine ra ḓo zwi ṱolisisa kha ino thero, nahone ndi ngani?
4 Musi ro no bvula vhumuthu ha kale, a ro ngo fanela u dovha ra vhu ambara. Kha ino thero, ri ḓo ṱolisisa nḓila ine ra nga bvula ngayo vhumuthu ha kale, zwine zwa ita uri zwenezwo zwi vhe zwa ndeme, na nḓila ine ya ita uri zwi konadzee u shanduka hu sa londwi uri muthu o ita vhukhakhi vhungafhani. Ri ḓo dovha ra ṱolisisa zwine vhathu vho no fhedzaho miṅwaha minzhi vhe Dziṱhanzi vha nga zwi ita u itela u bvula vhumuthu ha kale. Ndi ngani khumbudzo dzo raloho dzi tshi ṱoḓea? Zwi ṱungufhadzaho ndi uri vhaṅwe vhe vha vha vha tshi shumela Yehova a vho ngo tsha fhaṱuwa nahone vho humela kha mikhuvha yavho ya kale. Nga zwenezwo, roṱhe ri fanela u dzhiela nṱha tsevho ine ya ri: “Ane a humbula uri o ima a ṱhogomele a sa ḓo wa.”—1 Vhakor. 10:12.
“VHULAHANI” NYEMULO IṄWE NA IṄWE I TSHIMBIDZANAHO “NA VHUPOMBWE”
5. (a) Ṋeani tsumbo ine ya sumbedza uri ndi ngani zwi zwa ndeme u bvula vhumuthu ha kale. (Sedzani tshifanyiso tsha u thoma.) (b) U ya nga Vhakolosa 3:5-9, ndi mikhuvha ifhio ine ya sumbedza vhumuthu ha kale?
5 Ni nga ita mini arali zwiambaro zwaṋu zwa nga vha na tshika nahone zwi na madondo? Ni nga bvula zwenezwo zwiambaro nga u ṱavhanya. Nga hu fanaho, ri fanela u ṱavhanya ra thetshelesa ndaela ya u litsha mikhuvha ine ya lwisana na zwine Mudzimu a zwi funa. Ri ṱoḓa u thetshelesa ndaela ye Paulo a i vhudza Vhakriste vha misini yawe a ri: “Ni tea u zwi bvula zwoṱhe.” Kha ri ṱolisise zwithu zwivhili zwivhi zwe Paulo a amba nga hazwo—vhupombwe na vhuyaḓa.—Vhalani Vhakolosa 3:5-9.
6, 7. (a) Maipfi a Paulo a sumbedza hani uri zwi ṱoḓa vhuḓidini u bvula vhumuthu ha kale? (b) Sakura o vha a tshi tshila vhutshilo-ḓe, nahone ndi mini zwe zwa mu thusa uri a vhu litshe?
6 Vhupombwe. Bivhilini, ipfi “vhupombwe” ḽi katela u ita zwa vhudzekani ha vhathu vha songo vhinganaho lwa mulayo na vhathu vha mbeu i fanaho. Paulo o vhudza Vhakriste ngae uri vha ‘vhulahe miraḓo yavho’—zwine zwa amba u bvisa nyemulo iṅwe na iṅwe—i tshimbidzanaho “na vhupombwe.” Zwe Paulo a zwi amba zwi sumbedza uri hu ṱoḓea vhuḓidini vhuhulwane vhukuma u itela u bvisa dzenedzo nyemulo mmbi. Naho zwo ralo, ri nga kunda musi ri tshi lwisana na dzenedzo nyemulo mmbi.
7 Ṱhogomelani zwe zwa itea kha Sakura * wa ngei Dzhapani. Musi a tshi aluwa, o vha e na vhuludu nahone a tshi ḓipfa e si tshithu. Musi e na miṅwaha ya 15, o thoma u ita zwa vhudzekani na vhathu vho fhamba-fhambanaho u itela uri a si tsha ḓipfa e na vhuludu. O amba zwi tevhelaho e na ṱhoni: “Ndo reḓula thumbu luraru.” O dovha a ri: “Mathomoni, ndo vha ndi tshi ḓipfa ndo tsireledzea musi ndi tshi ita zwa vhudzekani nahone ndo vha ndi tshi humbula uri ndi wa ndeme nahone ndi a funwa. Fhedzi musi ndi tshi bvela phanḓa ndi tshi ita zwa vhudzekani, ndo vha ndi tshi ḓipfa ndi songo tsireledzea.” Sakura o bvela phanḓa a tshi tshila nga yeneyo nḓila u swika a tshi vha na miṅwaha ya 23. Nga murahu, o thoma u guda Bivhili na Dziṱhanzi. Sakura o takalela zwe a vha a tshi khou zwi guda nahone nga thuso ya Yehova o kona u kunda maḓipfele a u ḓivhona mulandu, u vha na ṱhoni nahone a litsha vhupombwe. Zwino Sakura u shuma sa muvulanḓila wa tshifhinga tshoṱhe nahone ha tsha ḓipfa e na vhuludu. Nṱhani hazwo, o ri: “Ndi takalela u funwa nga Yehova ḓuvha ḽiṅwe na ḽiṅwe.”
U KUNDA VHUYAḒA
8. Ndi zwifhio zwiṅwe zwithu zwine zwa nga ita uri Mudzimu a ri dzhie ri songo kuna?
8 Vhuyaḓa. Bivhilini, ipfi “vhuyaḓa” ndi ipfi ḽo ṱanḓavhuwaho ḽine ḽa katela zwithu zwi fhiraho vhupombwe. Ḽi nga ambela kha mikhuvha i vhaisaho i ngaho u daha kana u ita miswaswo ya vhuḓabaḓaba. (2 Vhakor. 7:1; Vhaef. 5:3, 4) Ḽi dovha ḽa ambela kha mishumo i songo kunaho ine muthu a i ita tshiphirini, i ngaho u vhala bugu dzi karusaho maḓipfele a zwa vhudzekani kana u ṱalela zwifanyiso zwa vhudzekani zwine zwa nga ita uri muthu a ite mikhuvha i si yavhuḓi ya u swoṱa zwiraḓo zwa mbeu.—Vhakol. 3:5. *
9. U ṱahulela “lutamo lwa zwa vhudzekani” zwi nga vha na masiandoitwa afhio a si avhuḓi?
9 Vhane vha vha na dzema ḽa u ṱalela zwifanyiso zwa vhudzekani vha ṱahulela “lutamo lwa zwa vhudzekani,” zwine zwa nga ita uri vha vhe phuli ya zwa vhudzekani. Vhaṱoḓisisi vha sumbedza uri vhathu vhe vha tenda uri vha na dzema ḽa u ṱalela zwifanyiso zwa vhudzekani vha na tswayo dzi fanaho na dza vhathu vhane vha vha dziphuli dza u nwesa na u shumisa luvhi zwidzidzivhadzi. Ndi ngazwo mukhuvha wa u ṱalela zwifanyiso zwa vhudzekani u tshi ita uri hu vhe na masiandoitwa a si avhuḓi—a ngaho u ḓipfa u na ṱhoni, u sa shuma nga nungo dzoṱhe mushumoni, u vha na muṱa u songo takalaho, ṱhalano na u ḓivhulaha. Muṅwe munna ane a vha na ṅwaha a si tsha ṱalela zwifanyiso zwa vhudzekani o ṅwala a ri: “Ndo dovha nda ḓiṱhonifha samusi ndo vha ndi si tsha ita nga u ralo.”
10. Ribeiro o kunda hani dzema ḽa u ṱalela zwifanyiso zwa vhudzekani?
10 Kha vhathu vhanzhi, u sa ṱalela zwifanyiso zwa vhudzekani zwi a konḓa u lwisana nazwo. Naho zwo ralo, samusi zwo sumbedzwa kha zwe zwa itea kha Ribeiro wa ngei Brazil, zwi a konadzea u zwi kunda. Ribeiro o ṱuwa hayani e miṅwahani ya vhufumi nahone o thoma u ṱalela zwifanyiso zwa vhudzekani samusi o vha a tshi shuma fhethu hune ha kuvhanganywa mabammbiri e a shumiswa. O ri: “Nga zwiṱuku nga zwiṱuku, ndo thoma u vha na dzema. Vhuimo ho ḓa ha ṋaṋa lwe zwa ita uri ndi lindele nga maṱo matswuku uri mufumakadzi we nda vha ndi tshi dzula nae a bve hayani u itela uri ndi kone u ṱalela zwifanyiso zwa vhudzekani.” Nga zwenezwo, ḽiṅwe ḓuvha musi Ribeiro e mushumoni o lavhelesa dzibugu dza kale dze dza kuvhanganywa, o ṱhogomela iṅwe bugu ine ya vha na tshiṱoho tshine tsha ri Tshiphiri tsha Dakalo ḽa Muṱa. O dzhia yeneyo bugu nahone a i vhala. Zwe a zwi guda zwo mu sudzulusela uri a thome u guda Bivhili na Ṱhanzi dza Yehova, fhedzi zwo mu dzhiela tshifhinga tshilapfu uri a kunde mikhuvha yawe mivhi. Ndi mini zwe zwa mu thusa nga u ya ha tshifhinga? O ri: “U rabela, u guda Bivhili na u elekanya nga ha zwe nda zwi vhala zwo ita uri ndi dzhiele nṱha nga ho engedzeaho pfaneleo dza Mudzimu nahone zwo ita uri ndi fune Yehova nga ho engedzeaho u fhira dzema ḽa u ṱalela zwifanyiso zwa vhudzekani.” Ribeiro o thuswa nga maanḓa a Ipfi ḽa Mudzimu na muya wawe mukhethwa, a bvula vhumuthu hawe ha kale, a lovhedzwa nahone zwino u shuma sa muhulwane wa tshivhidzo.
11. Ndi mini zwine zwa ṱoḓea uri muthu a litshe u ṱalela zwifanyiso zwa vhudzekani?
11 Ṱhogomelani uri Ribeiro o vha a tshi fanela u ita zwo engedzeaho u fhira u guda Bivhili u itela uri a kunde zwe a vha a tshi khou lwisana nazwo. O vha a tshi fanela u tendela mulaedza u re Bivhilini u tshi kwama mbilu yawe. U rabela na u elekanya, zwo ita uri a fune Mudzimu nga ho engedzeaho nahone zwenezwo zwo ita uri a kunde lutamo lwa u ṱalela zwifanyiso zwa vhudzekani. U funa Yehova nga ho engedzeaho na u vhenga zwithu zwivhi, ndi nḓila ya khwine ya u litsha u ṱalela zwifanyiso zwa vhudzekani.—Vhalani Psalme ya 97:10.
BVULANI TSINYUWO, U SEMANA NA MAZWIFHI
12. Ndi mini zwe zwa thusa Stephen uri a si tsha ṱavhanya u sinyuwa na u semana?
12 Vhathu vhane vha ṱavhanya u fhela mbilu, kanzhi vha a semana musi vho sinyuwa. Zwi khagala uri honoho vhuḓifari vhu nga si ite uri muṱani hu vhe na dakalo. Muṅwe khotsi wa ngei Australia ane a pfi Stephen o ri: “Ndo vha ndi tshi semana vhukuma nahone tshifhinga tshoṱhe ndo vha ndi tshi sinyutshela zwithu zwi si na mushumo. Nṋe na mufumakadzi wanga ro fhandekana luraru lwoṱhe nahone ro vha ri tsini na u ṱalana.” Nga murahu, vhenevho vhavhingani vho thoma u guda Bivhili na Dziṱhanzi. Musi Stephen a tshi thoma u tevhela vhulivhisi vhu re Bivhilini, ho vha na mvelelo dzifhio? O ri: “Vhutshilo ha muṱa washu ho shanduka nga nḓila ye nda vha ndi songo i lavhelela. Nga thuso ya Yehova, zwino ndo no vha na mulalo nahone ndo dzika ngeno mathomoni ndo vha ndi tshi fhufhumelwa na u vha na mbiti, ndi tshi dinwa nga zwithu zwiṱuku-ṱuku.” Ṋamusi, Stephen ndi mushumeli tshivhidzoni nahone mufumakadzi wawe ndi muvulanḓila wa tshifhinga tsho ḓalaho lwa miṅwaha minzhi. Vhahulwane vha tshivhidzo vho amba zwi tevhelaho nga ha Stephen: “Stephen ndi muthu o fhumulaho, ndi mushumi wa biko nahone u a ḓiṱukufhadza.” A vha humbuli vha tshi mu vhona o sinyuwa. Naa Stephen o tendelana na zwenezwo? O ri: “Ndo vha ndi nga si vhe na dzenedzo phaṱhutshedzo dzavhuḓi arali ndo vha ndi songo tendela Yehova a tshi shandula vhumuthu hanga.”
13. Ndi mini zwine zwa ita uri tsinyuwo i vhe khombo, nahone Bivhili i ṋea tsevho ifhio?
13 Bivhili i ri sevha uri ri iledze tsinyuwo, maṱamba na u zhamba. (Vhaef. 4:31) Zwi ṱungufhadzaho ndi uri, vhuḓifari ho raloho kanzhi vhu ita uri hu vhe na dzikhakhathi. Vhathu vha nga dzhia tsinyuwo hu zwithu zwo ḓoweleaho, fhedzi zwi nyadzisa Musiki washu. Vhathu vhanzhi vho vha vha tshi fanela u bvula yeneyo mikhuvha i vhaisaho musi vha sa athu u ambara vhumuthu vhuswa.—Vhalani Psalme ya 37:8-11.
14. Naa zwi a konadzea uri muthu a re na mbiti a vuḓe?
14 Ṱhogomelani tsumbo ya Hans ane a vha muhulwane wa tshivhidzo ngei Austria. Muṅwe mudzudzanyi wa tshigwada tsha vhahulwane vha tshivhidzo tshine Hans a vha khatsho, o ri: “Ndi wahashu o vuḓaho vhukuma ane na nga tama u ṱangana nae.” Fhedzi mathomoni Hans o vha a songo vuḓa. Musi e miṅwahani yawe ya vhufumi, o thoma u nwesa nahone zwenezwo zwa ita uri a vhe na mbiti. Musi o kambiwa, o vhulaha khomba yawe nahone a valelwa dzhele lwa miṅwaha ya 20. Mathomoni, dzhele a yo ngo kona u shandula vhumuthu ha Hans. Nga u ya ha tshifhinga, mme a Hans vho dzudzanya uri muhulwane a ye dzhele u mu vhona nahone a thoma u guda Bivhili. O ri: “Zwo vha zwi tshi konḓa vhukuma u bvula vhumuthu hanga ha kale. Ndo ṱuṱuwedzwa nga Luṅwalo lwa Yesaya 55:7 lune lwa ri ‘Mutshinyi nga a laṱe nḓila yawe,’ na 1 Vhakorinta 6:11 lune lwa amba nga ha vhe vha ṱutshela nḓila dzavho mmbi: ‘Vhaṅwe vhaṋu vho vha vha tshi ita zwenezwo.’ Lwa miṅwaha minzhi, Yehova o nthusa a sa fheli mbilu a tshi shumisa muya wawe mukhethwa u itela uri ndi kone u ambara vhumuthu vhuswa.” Musi o no fhedza miṅwaha ya 17 na hafu e dzhele, o vhofhololwa o no vha Mukriste o lovhedzwaho. O ri: “Ndi livhuha vhukuma Yehova nge a nkhathutshela na u nkhangwela.”
15. Ndi mukhuvha ufhio wo ḓoweleaho, fhedzi Bivhili i ri mini nga hazwo?
15 Nga nnḓa ha u semana, u zwifha na zwone ndi tshipiḓa tsha vhumuthu ha kale. Sa tsumbo, zwo ḓowelea uri vhathu vha zwifhe musi vha tshi fanela u badela muthelo kana u iledza u hwala vhuḓifhinduleli ha zwivhi zwavho. Zwo fhambanaho na zwenezwo, Yehova ndi “Mudzimu wa ngoho.” (Ps. 31:5, NW.) Nga zwenezwo, Mudzimu u ṱoḓa uri mugwadameli wawe “muṅwe na muṅwe” a “ambe ngoho kha wa hawe” hu si u “zwifhelana.” (Vhaef. 4:25; Vhakol. 3:9) Nga u ralo, ri fanela u amba ngoho naho zwi tshi vhonala zwi tshi shonisa kana zwi tshi konḓa.—Mir. 6:16-19.
NḒILA YE VHA KUNDA NGAYO
16. Muthu a nga bvelela hani musi a tshi bvula vhumuthu ha kale?
16 Ri nga si kone u bvula vhumuthu ha kale nga nungo dzashu riṋe vhaṋe. Sakura, Ribeiro, Stephen na Hans vhe vha bulwa kha ino thero, vho vha vha tshi fanela u bvula mikhuvha yavho mivhi. Vho kunda nga u tendela maanḓa a Ipfi ḽa Mudzimu na muya wawe mukhethwa zwi tshi kwama mihumbulo na mbilu dzavho. (Luka 11:13; Vhaheb. 4:12) U itela u vhuyelwa nga eneo maanḓa, ri fanela u guda Bivhili ḓuvha ḽiṅwe na ḽiṅwe, u elekanya nga hayo na u rabelela vhuṱali na nungo dza u shumisa nyeletshedzo i re Bivhilini tshifhinga tshoṱhe. (Yosh. 1:8; Ps. 119:97; 1 Vhathes. 5:17) Ri dovha ra vhuyelwa nga Ipfi ḽa Mudzimu na muya wawe mukhethwa musi ri tshi lugiselela na u ya miṱanganoni ya tshivhidzo. (Vhaheb. 10:24, 25) Zwiṅwe hafhu, ri ṱoḓa u shumisa zwavhuḓi zwiḽiwa zwa muya zwo fhamba-fhambanaho zwine vhathu vha Mudzimu vha zwi wana shangoni ḽoṱhe.—Luka 12:42.
Ri nga bvelela hani musi ri tshi bvula vhumuthu ha kale? (Sedzani phara 16)
17. Ri ḓo ṱolisisa mini kha thero i tevhelaho?
17 Ro ṱolisisa tsumbo dzi si gathi dza mikhuvha mivhi ine Vhakriste vha fanela u i bvula. Naa hu ṱoḓea zwenezwo fhedzi uri ri takalelwe nga Mudzimu? Hai. Ri fanela u dovha ra ambara vhumuthu vhuswa. Kha thero i tevhelaho, ri ḓo ṱolisisa masia o fhamba-fhambanaho a vhumuthu vhuswa vhune ha fanela u vha tshipiḓa tsha vhutshilo hashu.
