Kha yeneyo thero, ro guda uri tshithu tshithihi tsha ndeme tshine tsha kwama vhathu na vharuṅwa ndi u ita uri dzina ḽihulu ḽa Yehova ḽi vhe ḽikhethwa. Enea mafhungo a u ita uri dzina ḽa Yehova ḽi vhe ḽikhethwa a kwama vhuvhusahoṱhe ha Mudzimu kana mafhungo a uri nḓila ine a vhusa ngayo ndi yone ya khwinesa. U ita uri dzina ḽa Yehova ḽi vhe ḽikhethwa zwi dovha zwa kwama na u fhulufhedzea ha vhathu kha Mudzimu.

Ndi ngani ri tshi amba uri mafhungo a ndeme a kwama dzina ḽa Mudzimu na u ita uri dzina ḽa Mudzimu ḽi vhe ḽikhethwa? Kha ri ambe nga ha zwiitisi zwiraru.

Tsha u thoma, Saṱhane o ḓodza dzina ḽa Yehova matope tsimuni ya Edeni. Mbudziso ye Saṱhane a i vhudzisa Eva i ḓisa muhumbulo wa uri Yehova ha na mafunda na uri vhulivhisi he a vhu ṋea Adamu na Eva ho vha vhu sa pfali. Saṱhane o amba zwo fhambanaho na zwe Yehova a zwi amba. Zwavhuḓivhuḓi, o vha a tshi khou amba uri Yehova u a zwifha. Nga zwenezwo, o tshinya dzina ḽa Yehova. Saṱhane o mbo ḓi vha “Diabolo” zwine zwa amba “mupomoki.” (Yoh. 8:44) Ngauri Eva o thetshelesa eneo mazwifhi a Saṱhane, o mbo ḓi ita zwe Mudzimu a vha o mu vhudza uri a songo zwi ita. Zwenezwo zwo sumbedza uri o vha a sa ṱoḓi Mudzimu a tshi vha Muvhusi wawe. (Gen. 3:1-6) Na ṋamusi, Saṱhane u bvela phanḓa a tshi amba mazwifhi nga ha zwine Yehova a vha zwone. Vhane vha tenda eneo mazwifhi vha nga fhedzisela vha si tsha thetshelesa Yehova. Kha vhathu vha Mudzimu, mazwifhi ane a ambelwa dzina ḽa Yehova ḽine ḽa vha ḽikhethwa ndi zwithu zwo vhifhesaho. Eneo mazwifhi ndi one ane a ita uri hu vhe na vhuvhi na u tambula kha ḽino shango ṋamusi.

Tsha vhuvhili, u itela u vhuyedza tsiko yoṱhe, Yehova o ḓiimisela u phumula dzina ḽawe matope. Zwenezwi ndi zwa ndeme vhukuma kha Yehova. Ndi ngazwo a tshi ri: ‘Ndi ḓo ita uri dzina ḽanga ḽihulu ḽi vhe ḽikhethwa.’ (Hesek. 36:23) Yesu o bvisela khagala zwine zwa fanela u vha zwa ndeme musi vhashumeli vha Mudzimu vha fhulufhedzeaho vha tshi rabela. O ri: “Dzina ḽau nga ḽi vhe ḽikhethwa.” (Mat. 6:9) Bivhili yo khwaṱhisedza lunzhi ndeme ya u ita uri dzina ḽa Yehova ḽi vhe ḽikhethwa. Ṱhogomelani tsumbo dzi tevhelaho: “Ṋeani Yehova vhugala ho teaho dzina ḽawe.” (1 Koron. 16:29; Ps. 96:8) “Imbelani dzina ḽawe ḽi re na vhugala thendo.” (Ps. 66:2) “Ndi ḓo hulisa dzina ḽau nga hu sa fheli.” (Ps. 86:12) Tshiṅwe tsha zwiitea he Yehova a amba e ṱaḓulu ndi musi Yesu e thembeleni ngei Yerusalema musi a tshi amba uri: “Khotsi, hulisa dzina ḽau.” Yehova o fhindula a ri: “Ndo ḽi hulisa, ndi ḓo dovha nda ḽi hulisa.”—Yoh. 12:28. a

Tsha vhuraru, tshipikwa tsha Yehova tshi tshimbidzana na dzina ḽawe. Ṱhogomelani nḓila ine dzina ḽa Yehova ḽa ḓo vha ḽi ḽa ndeme ngayo nga murahu ha u lingwa lwa u fhedzisela mafheleloni a Miṅwaha Ya Tshigidi Ya U Vhusa Ha Yesu Kristo. Vharuṅwa na vhathu vhoṱhe vha ḓo ḓipfa hani nga dzina ḽa Mudzimu nga tshenetsho tshifhinga? Uri ri kone u fhindula yeneyo mbudziso, kha ri ambe nga ha u  fhulufhedzea ha vhathu na vhuvhusahoṱhe ha Yehova. Nga tshenetsho tshifhinga, hu ḓo vha hu si tsheena tshiitisi tsha uri vhathu vha sumbedze uri vha a fhulufhedzea kha Yehova. Vha ḓo vha vha si tsheena tshivhi nahone vho no lingwa nga ho fhelelaho. Vha ḓo vha vho no wana vhutshilo vhu sa fheli. Nahone nga tshenetsho tshifhinga, hu ḓo vha hu si tsheena tshiitisi tsha u sumbedza arali Yehova e ene Muvhusi o teaho. Ngauri vhoṱhe vha re ṱaḓulu na kha ḽifhasi vha ḓo vha vhe na vhuthihi nahone vho ṱanganedza Yehova sa Muvhusi wavho. Fhedzi nga tshenetsho tshifhinga, naa dzina ḽa Yehova ḽi ḓo vha ḽi tshi kha ḓi vha tshithu tsha ndeme kha vhathu vhawe?

Nga tshenetsho tshifhinga, vhathu vhoṱhe vha ḓo ḓivha ngoho nga ha Yehova nahone dzina ḽawe ḽi ḓo itwa uri ḽi vhe ḽikhethwa. Naho zwo ralo, dzina ḽa Yehova ḽi ḓo bvela phanḓa ḽi tshi vha tshithu tsha ndeme kha vhashumeli vhawe vhoṱhe vha re ṱaḓulu na kha ḽifhasi. Ndi ngani? Ndi ngauri vha ḓo bvela phanḓa vha tshi vhona zwithu zwi mangadzaho zwine Yehova a ḓo zwi ita. Ṱhogomelani: Ngauri Yesu u ḓo humisela Muvhuso kha Yehova nga u ḓiṱukufhadza, Mudzimu u ḓo vha “zwithu zwoṱhe kha vhoṱhe.” (1 Vhakor. 15:28) Nga murahu ha zwenezwo, vhathu vhoṱhe kha ḽifhasi vha ḓo ḓiphiṋa nga “vhugala ha vhana vha Mudzimu vho vhofholowaho.” (Vharoma 8:21) Nahone Yehova u ḓo ita uri tshipikwa tshawe tshi itee tsha uri muṱa wawe wa ṱaḓulu na kha ḽifhasi u vhe na vhuthihi.—Vhaef. 1:10.

Musi zwenezwi zwithu zwoṱhe zwo no itea, zwivhumbiwa zwi re ṱaḓulu na kha ḽifhasi zwi ḓo ḓipfa hani? Zwi tou pfala uri ri ḓo vha ri tshi kha ḓi vha na lutamo lwa u renda dzina ḽa Yehova. Muphisalema Davida o hevhedzwa uri a ṅwale uri: ‘Ngavhe Yehova Mudzimu a tshi rendwa, ngavhe dzina ḽawe ḽa vhugala ḽi tshi rendwa nga hu sa fheli.’ (Ps. 72:18, 19) Ri ḓo bvela phanḓa na u wana zwiitisi zwa u renda Yehova lwa tshoṱhe.

Dzina ḽa Yehova ḽi imela zwoṱhe zwine a vha zwone. Musi ri tshi humbula nga ha dzina ḽa Yehova, ri humbula nga ha lufuno lune a vha nalwo. (1 Yoh. 4:8) Ri ḓo dzula ri tshi humbula lufuno lwe Yehova a ri sumbedza lwone musi a tshi ri sika na musi a tshi ri ṋea tshirengululi. Ri ḓo dzula ri tshi humbula uri nḓila ine a vhusa ngayo yo luga nahone ndi ya lufuno. Ri ḓo dzula ri tshi vhona nḓila ine Yehova a ri funa ngayo lwa tshoṱhe. Ri ḓo dzula ri tshi sendela tsini nae sa Khotsi ashu na u imbela dzina ḽawe ḽi mangadzaho dzithendo u ya nga hu sa fheli.—Ps. 73:28.