Hai. Diabolo ho ngo vhudza Eva uri musi a tshi fa hu na tshipiḓa tshi sa vhonali tsha muvhili wawe tshine tsha ḓo bvela phanḓa tshi tshi tshila huṅwe fhethu. Nṱhani hazwo, o mu vhudza uri arali a ḽa mutshelo wa wonoyo muri ‘a nga si fe’ na luthihi. O ita zwenezwi a tshi shumisa ṋowa. O vha a tshi khou mu vhudza uri u ḓo bvela phanḓa a tshi khou tshila, ḽi ḽa maladze nahone a sa pfi nga muthu u katela na nga Mudzimu.—Gen. 2:17; 3:3-5.

Arali yeneyi pfunzo ya mazwifhi ine ya kha ḓi funzwa na ṋamusi i songo thoma Edeni, yo thoma lini? A ri ḓivhi. Fhedzi ri a zwi ḓivha uri vhurereli hoṱhe ha mazwifhi ho fheliswa nga Maḓi Mahulu a tshifhingani tsha Noaxe nahone ha sala vhurabeli ha ngoho. Ri ḓivha zwenezwi ngauri vhathu vho ponyaho Maḓi Mahulu ho vha hu Noaxe na muṱa wawe fhedzi nahone vho vha vha sa tendi kha funza pfunzo dza mazwifhi.

Zwenezwo zwi amba uri yeneyo pfunzo ya mazwifhi yo thoma nga murahu ha Maḓi Mahulu. Musi Yehova a tshi piringanya nyambo dza Babele a “balanganya [vhathu] na shango ḽoṱhe,” zwi tou pfala uri vho bvela phanḓa vha tshi tenda kha yeneyo pfunzo ya mazwifhi. (Gen. 11:8, 9) Hu sa londwi uri yeneyo pfunzo yo thoma hani, ri a zwi ḓivha uri Sathane “khotsi a vhadzia-u-zwifha” ndi ene muthomi wayo nahone o takala vhukuma musi a tshi vhona eneo mazwifhi a tshi phaḓalala.—Yoh. 8:44.