1-2. Ndi ngani Vhakriste vha tshi tea u guda nga ha vhane vha ḓo vuselwa u tshila ṱaḓulu?

VHATHU vhanzhi vhane vha khou shumela Yehova zwino vho fhulufhela u tshila tshoṱhe kha ḽifhasi. Fhedzi Vhakriste vha si gathi vho ḓodzwaho nga Yehova vho fhulufhela u vuswa vha tshila ṱaḓulu. Vhenevha vhaḓodzwa vha a takalela u ḓivha uri vhutshilo havho vhu ḓo vha vhu hani ṱaḓulu. Fhedzi ndi ngani vha re na fhulufhelo ḽa u tshila kha ḽifhasi na vhone vha tshi ṱoḓa u guda nga hazwo? Samusi ri tshi ḓo zwi vhona, vhane vha ḓo vuselwa ṱaḓulu vha ḓo ita uri hu fhaṱutshedzwe na vhane vha vha na fhulufhelo ḽa u tshila kha ḽifhasi. Nga zwenezwo, ri fanela u takalela u ḓivha nga ha vhane vha vuselwa ṱaḓulu hu sa londwi uri ro fhulufhela u tshila ṱaḓulu kana kha ḽifhasi.

² Mudzimu o ita uri vhaṅwe vhafunziwa vha Yesu vha u thoma vha ṅwale nga ha fhulufhelo ḽa u tshila ṱaḓulu. Muapostola Yohane o ri: “Naho ri vhana vha Mudzimu, a ri athu u dzumbululelwa zwine ra ḓo vha zwone. Ri a ḓivha uri musi a tshi vhonadzwa ri ḓo nga ene.” (1 Yoh. 3:2) Ngauralo, Vhakriste vho ḓodzwaho a vha ḓivhi uri zwi ḓo vha zwi hani musi vha tshi vuselwa ṱaḓulu. Naho zwo ralo, vha ḓo vhona Yehova musi vha tshi wana malamba avho. Bivhili a i ri vhudzi zwoṱhe nga ha vhane vha ḓo vuselwa ṱaḓulu, fhedzi muapostola Paulo o amba zwiṅwenyana nga hazwo. Vhaḓodzwa vha ḓo vha vhe na Kristo musi a tshi “fhelisa mivhuso yoṱhe na vhavhusi”  na musi hu tshi ‘fheliswa lufu swina ḽa u fhedza.’ Yesu na vhane a ḓo vhusa navho vha ḓo fhedzisela nga u ḓiṱukufhadzela Yehova na u vhea zwithu zwoṱhe nga fhasi hawe. (1 Vhakor. 15:24-28) Zwenezwo zwi ḓo vha zwithu zwi takadzaho vhukuma. *

3. Samusi zwo ambiwa kha 1 Vhakorinta 15:30-32, Paulo o thuswa hani nga u tenda uri u ḓo vuswa?

³ Paulo o kona u konḓelela milingo yo fhambanaho ngauri o vha a tshi tenda uri u ḓo vuswa. (Vhalani 1 Vhakorinta 15:30-32.) O vhudza Vhakorinta a ri: “Ḓuvha ḽiṅwe na ḽiṅwe ndi vha ndo livhana na lufu.” O dovha a ri: “Ndo lwa na zwivhanda ngei Efesa.” Khamusi o vha a tshi khou amba uri o lwa na phukha dza vhukuma kha ḽa Efesa. (2 Vhakor. 1:8; 4:10; 11:23) Kana khamusi o vha a tshi khou amba Vhayuda kana vhaṅwe vhe vha vha vha tshi mu pikisa vhe vha vha vha tshi nga “zwivhanda.” (Mish. 19:26-34; 1 Vhakor. 16:9) Hu sa londwi uri Paulo o ṱangana na zwifhio, o bvela phanḓa a tshi fhulufhela uri u ḓo takala tshifhingani tshi ḓaho.—2 Vhakor. 4:16-18.

4. Vhakriste ṋamusi vha khwaṱhiswa hani nga fhulufhelo ḽa uri vha ḓo vuswa? (Sedzani tshifanyiso tshi re kha gwati.)

⁴ Shango ḽine ra khou tshila khaḽo ḽo ima nga milenzhe. Vhaṅwe vhahashu vho no sedzana na vhuvemu. Vhaṅwe vha dzula fhethu hu re na dzinndwa hune vha pfa vha songo tsireledzea. Kha maṅwe mashango, vhathu vha Yehova a vha na mbofholowo ya u huwelela, fhedzi vha mu shumela naho vha tshi nga valelwa dzhele kana vha vhulawa. Vhenevha vhahashu vha bvela phanḓa vha tshi gwadamela Yehova nahone vha ri vhetshela tsumbo yavhuḓi. A vha ofhi ngauri vha a zwi ḓivha uri naho vha nga fa zwino, Yehova u vha fhulufhedzisa vhumatshelo ha khwine.

5. Ndi mavhonele afhio a re na khombo ane a nga ita uri ri si tsha vha na fhulufhelo ḽa u vuswa?

⁵ Paulo o tsivhudza vhahawe nga ha mavhonele a re na khombo e vhaṅwe vha vha vhe nao a uri: “Arali vhafu vha sa ḓo vuswa, ‘kha ri ḽe ri nwe, ngauri matshelo ri ḓo fa.’” Vhaṅwe vhathu vho vha vhe na mavhonele o raloho na musi Paulo a sa athu u vha hone. Khamusi Paulo o vha a tshi khou amba zwo ṅwaliwaho kha Yesaya 22:13 ine ya amba nga ha mavhonele a Vhaisiraele. Vho vha vha tshi funesa miḓifho u fhira Mudzimu. Nga maṅwe maipfi, vhenevho Vhaisiraele vho vha vha tshi khou ri ri tea u ḓiphiṋa zwino ngauri ḽa matshelo ḽi ḓihwa nga areḓi. Vhathu vha kha ḓi vha na eneo mavhonele na ṋamusi. Bivhili i amba nga ha masiandoitwa a si avhuḓi e Vhaisiraele vha ṱangana nao nga nṱhani ha u vha na eneo mavhonele o khakheaho.—2 Koron. 36:15-20.

6. U tenda uri vhafu vha ḓo vuswa zwi kwama hani nḓila ine ra tea u khetha ngayo khonani?

⁶ Ri a zwi ḓivha uri Yehova u ḓo vusa vhafu, nga zwenezwo, ri tea u khetha khonani dzashu nga vhuṱali. Vhakorinta vho vha vha sa tei u vha na vhukonani na vhathu vhe vha vha vha sa tendi uri vhafu vha ḓo vuswa. Riṋe ri guda mini? Arali ri na khonani dzine dza funesa miḓifho nahone dzi si na ndavha na zwine zwa ḓo itea tshifhingani tshi ḓaho, dzi nga ri ṱuṱuwedza nga nḓila i si yavhuḓi. Arali Mukriste e na khonani yo raloho, a nga fhedzisela a si tsheena mavhonele avhuḓi nahone a si tsha ḓifara nga nḓila yavhuḓi. Samusi mulilo wa mbava u sa orwi, a nga fhedzisela a tshi khou ita zwithu zwine Yehova a zwi vhenga. Ndi ngazwo Paulo o ri: “Dzivhuluwani ni ite zwo lugaho, ni songo dzula ni tshi ita tshivhi.”—1 Vhakor. 15:33, 34.

7. Samusi zwo sumbedzwa kha 1 Vhakorinta 15:35-38, vhaṅwe vha nga vha vho vhudzisa mbudziso ifhio musi zwi tshi ḓa kha u vuswa ha vhafu?

⁷ Vhalani 1 Vhakorinta 15:35-38. Muṅwe we a vha a tshi khou ṱoḓa uri vhaṅwe vha timatime uri vhafu vha ḓo vuswa a nga vha o vhudzisa uri: “Vhafu vha ḓo vuswa nga nḓila-ḓe?” Ri tea u humbula nga ha phindulo ya Paulo ngauri vhathu vhanzhi vha tenda zwi sa fani musi zwi tshi ḓa kha uri hu itea mini kha muthu musi a tshi fa. Fhedzi Bivhili i ri mini?

8. Ri nga thuswa nga tshifanyiso tshifhio u itela u pfesesa nḓila ine vhathu vha ḓo vuselwa ngayo ṱaḓulu?

⁸ Musi muthu a tshi fa, muvhili wawe u a sina. Fhedzi Mudzimu o sikaho zwithu zwoṱhe a nga kona u vusa onoyo muthu a mu ṋea muvhili une a u ṱoḓa. (Gen. 1:1; 2:7) Paulo o shumisa tshifanyiso u itela u ṱalutshedza uri Mudzimu a nga ṋea muthu muvhili wo fhambanaho na we a vha e nawo. Humbulani nga ha “mbeu” ya tshimela. Musi yeneyo mbeu i tshi ṱavhiwa, i mbo ḓi mela. Tshenetsho tshimela tshi vha tshi sa fani na mbeu. Paulo o shumisa tshenetsho tshifanyiso u itela u sumbedza uri Mudzimu a nga ṋea muthu muvhili “nga hune a funa ngaho.”

9. Luṅwalo lwa 1 Vhakorinta 15:39-41 lu ri zwithu zwe Mudzimu a zwi sika zwo fhambana hani?

⁹ Vhalani 1 Vhakorinta 15:39-41. Paulo o amba uri zwithu zwe Mudzimu a zwi sika zwo fhambana. Sa tsumbo, mivhili ya kholomo a i fani na ya zwiṋoni kana ya khovhe. O ri musi ri tshi sedza nṱha, ri vhona ḓuvha ḽi sa fani na ṅwedzi. A dovha a ri “ṋaledzi a dzo ngo naka u fana.” Naho zwenezwi ri sa koni u zwi vhona nga maṱo ashu, vhorasaintsi vha ri ṋaledzi dzo fhambana. Vha ri dziṅwe ndi khulwane, dziṅwe ndi ṱhukhu, dziṅwe ndi tswuku, dziṅwe ndi tshena nahone dziṅwe ndi ṱaḓa sa ḓuvha. Paulo o dovha a ri “zwi re ṱaḓulu zwi na mivhili i sa fani na ya zwi re kha ḽifhasi.” O vha a tshi khou amba uri mini? Fhano kha ḽifhasi  ri na mivhili ya ṋama, fhedzi ngei ṱaḓulu vharuṅwa vha na mivhili ya muya.

10. Vhane vha vuselwa ṱaḓulu vha ḓo vuswa vhe na muvhili wa mufuda-ḓe?

¹⁰ Ṱhogomelani zwe Paulo a dovha a zwi amba, o ri: “Zwo tou ralo na nga u vuswa ha vhafu. Hu zwalwa muvhili une wa sina, ha vuswa u sa sini.” Ri a zwi ḓivha uri musi muthu a tshi fa, muvhili wawe u a sina, a vhuyelela buseni. (Gen. 3:19) Nga zwenezwo, zwi ḓa hani uri wonoyo muvhili ‘u vuswe u sa tsha sina’? Paulo o vha a sa khou amba nga ha vhathu vhe vha vuselwa fhano kha ḽifhasi vha ngaho sa vhe vha vuswa nga Elia, Elisa na Yesu. Paulo o vha a tshi khou amba nga ha muthu ane a vuswa e na muvhili “wa muya” une wa kona u tshila ṱaḓulu.—1 Vhakor. 15:42-44.

11-12. Yesu o vuswa e na muvhili wa mufuda-ḓe nahone na vhaḓodzwa vha vuswa vhe na muvhili wa mufuda-ḓe u fana na Yesu?

¹¹ Musi Yesu e kha ḽifhasi, o vha e na muvhili wa ṋama. Fhedzi musi a tshi vuswa, o vha na muvhili wa muya, a vha “muthu a ṋeaho vhutshilo” a vhuyelela ṱaḓulu. Na Vhakriste vho ḓodzwaho vha ḓo vuswa vhe na muvhili une wa kona u tshila ṱaḓulu u fana na Yesu. Paulo o ri: “Samusi ri tshi fana na o itwaho nga mavu, ri ḓo fana na wa ṱaḓulu.”—1 Vhakor. 15:45-49.

¹² Ndi zwa ndeme u humbula uri Yesu ho ngo vuswa e na muvhili wa ṋama. Musi Paulo e tsini na u fhedza mafhungo awe, o amba uri ndi ngani Yesu a songo vuswa e na muvhili wa ṋama. O ri: “Ṋama na malofha zwi nga si dzhene Muvhusoni wa Mudzimu” ngei ṱaḓulu. (1 Vhakor. 15:50) Vhaapostola na vhaṅwe vhaḓodzwa vho vha vha sa ḓo vuswa vhe na mivhili ya ṋama ine ya sina. Vho vha vha tshi ḓo vuswa lini? Paulo o amba uri vho vha vha sa ḓo vuswa nga tshifhinga tshe vha vha vha tshi kha ḓi tou bva u fa, fhedzi vho vha vha tshi ḓo vuswa tshifhingani tshi ḓaho. Nga tshifhinga tshe Paulo a ṅwala ngatsho 1 Vhakorinta, vhaṅwe vhafunziwa vho vha  vho no “fa,” u fana na muapostola Yakobo. (Mish. 12:1, 2) Na vhaṅwe vhaapostola na vhaḓodzwa vho vha vha tshi kha ḓi ḓo “fa.”—1 Vhakor. 15:6.

13. Ho vha hu tshi ḓo itea mini tshifhingani tsha u vha hone ha Yesu?

¹³ Yesu na Paulo vho porofita nga ha tshifhinga tsho khetheaho vhukuma. Tshenetsho tshifhinga ndi u vha hone ha Kristo. Kha tshenetsho tshifhinga tsha u vha hone ha Kristo ho vha hu tshi ḓo vha na dzinndwa, midzinginyo, malwadze na zwiṅwe zwithu zwi si zwavhuḓi zwine zwa khou itea kha ḽifhasi. Honovhu vhuporofita ha Bivhili ho itea u bva nga 1914. Ho vha hu tshi ḓo vha na tshiṅwe tshithu tsha ndeme tshine tsha sumbedza uri ri khou tshila kha tshifhinga tsha u vha hone ha Kristo. Yesu o ri mafhungo maḓifha a uri Muvhuso wa Mudzimu u khou vhusa o vha a tshi ḓo ḓivhadzwa “ḽifhasini ḽoṱhe uri a pfiwe nga tshaka dzoṱhe, nga murahu ndi hone vhufhelo vhu tshi ḓo ḓa.” (Mat. 24:3, 7-14) Paulo o ri Vhakriste vho ḓodzwaho “vho faho” vho vha vha tshi ḓo vuselwa ṱaḓulu nga tshifhinga tsha “u vha hone ha Murena.”—1 Vhathes. 4:14-16; 1 Vhakor. 15:23.

14. Hu itea mini kha Vhakriste vho ḓodzwaho vhane vha fa nga tshifhinga tsha u vha hone ha Kristo?

¹⁴ Vhakriste vho ḓodzwaho vhane vha fa zwino vha ṱavhanya vha vuselwa ṱaḓulu. Zwenezwi zwi khwaṱhiswa nga maipfi a Paulo a re kha 1 Vhakorinta 15:51, 52 ane a ri: “Ri nga si fe roṱhe, fhedzi roṱhe ri ḓo shandukiswa, nga tshifhinganyana, nga u poidza ha ḽiṱo, musi hu tshi lila phalaphala ya u fhedza.” Zwe Paulo a zwi amba zwi khou itea ṋamusi. Musi vhenevha vharathu vha Kristo vha tshi vuswa vha ḓo takala vhukuma. Vha ḓo vha “na Murena misi yoṱhe.”—1 Vhathes. 4:17.

15. Vhane vha ḓo shandulwa nga “u poidza ha ḽiṱo” vha ḓo ita mushumo ufhio?

 ¹⁵ Bivhili i ri vhudza uri vhane vha ḓo shandulwa nga “u poidza ha ḽiṱo” vha ḓo ita mini ṱaḓulu. Yesu o vha vhudza uri: “Ane a kunda na u tevhedza mishumo yanga u swika vhufheloni, ndi ḓo ita uri a vhuse dzitshaka, u ḓo lisa vhathu nga lubaḓa lwa tsimbi, a vha fhelisa vha nga midzio ya vumba yo kwasheaho, samusi na nṋe ndo ṋewa maanḓa nga Khotsi anga.” (Nzumb. 2:26, 27) Vha ḓo tevhela Mulangammbi wavho kha mushumo wa u lisa dzitshaka nga lubaḓa lwa tsimbi.—Nzumb. 19:11-15.

16. Vhaḓodzwa na vhaṅwe Vhakriste vha ḓo kunda hani lufu?

¹⁶ Vhaḓodzwa vha kunda lufu musi vha tshi vuselwa ṱaḓulu. (1 Vhakor. 15:54-57) Musi vho no vuswa, vha ḓo kona u shela mulenzhe kha u fhelisa vhuvhi hoṱhe nga nndwa ya Haramagedo ine ya khou ḓa. Vhakriste vha dzimiḽioni vha vhanna na vhafumakadzi vha ḓo “bva maṱunguni mahulu” vha dzhena shangoni ḽiswa. (Nzumb. 7:14) Vhenevho vhathu vho ponyokaho vha ḓo vhona lufu lu tshi dovha lwa kundwa musi vhathu vha dzibiḽioni vhe vha fa tshifhingani tsho fhiraho vha tshi vuswa. Humbulani uri ri ḓo takala hani musi zwenezwo zwi tshi itea. (Mish. 24:15) Vhane vha dzula vha tshi fhulufhedzea kha Yehova vha ḓo kunda lufu lwe ra lu mamela kha Adamu. Vha ḓo tshila tshoṱhe.

17. Luṅwalo lwa 1 Vhakorinta 15:58 lu ri ṱuṱuwedza uri ri ite mini zwino?

¹⁷ Mukriste muṅwe na muṅwe u tea u dzhiela nṱha maipfi a Paulo a khuthadzaho a re kha bugu ya Vhakorinta ane a amba nga ha u vuswa ha vho faho. Ri na zwiitisi zwavhuḓi zwa u tevhela nyeletshedzo ya Paulo ya uri zwino ri ite zwoṱhe zwine ra nga kona “mushumoni wa Murena.” (Vhalani 1 Vhakorinta 15:58.) Arali ra dzula ri tshi ita zwoṱhe zwine ra nga kona kha wonoyo mushumo, ri nga lavhelela u vha na vhutshilo vhu takadzaho tshifhingani tshi ḓaho. Honoho vhutshilo vhu ḓo takadza u fhira zwoṱhe zwine ra nga zwi humbula. Zwenezwo zwi ḓo sumbedza uri mushumo washu a wo ngo vha wa fhedzi Murenani.