1. Petro o vhudza Vhakriste uri vha ite mini nahone ndi ngani zwi tshi nga vhonala u nga a zwi konadzei?

ROṰHE ri nga vhuyelwa nga zwe muapostola Petro a zwi vhudza Vhakriste vha u thoma vho ḓodzwaho, hu sa londwi uri ri na fhulufhelo ḽa u tshila tshoṱhe ṱaḓulu kana kha ḽifhasi. Petro o ri: “Ivhani vhakhethwa kha zwoṱhe zwine na ita, samusi we a ni vhidza e Mukhethwa, ngauri ho ṅwaliwa u pfi: ‘Ni tea u vha vhakhethwa, ngauri nṋe ndi mukhethwa.’” (1 Pet. 1:15, 16) Enea maipfi a ri gudisa uri ri nga edzisa Yehova sa izwi e ene tsumbo khulwane ya u vha mukhethwa. Ri tea u vha vhakhethwa kha nḓila ine ra ḓifara ngayo nahone zwenezwo zwi a konadzea. Ri nga vhona u nga a zwi konadzei ngauri ri na tshivhi. Petro o ita vhukhakhi vhunzhi, fhedzi tsumbo yawe i sumbedza uri ri nga “vha vhakhethwa.”

2. Ri ḓo fhindula mbudziso dzifhio kha ino thero?

² Kha ino thero, ri ḓo fhindula mbudziso dzi tevhelaho: Zwi amba mini u vha mukhethwa? Bivhili i ri gudisa mini nga ha vhukhethwa ha Yehova? Ri nga vha hani vhakhethwa kha nḓila ine ra ḓifara ngayo? U vha hashu vhakhethwa zwi kwama hani vhushaka hashu na Yehova?

3. Vhathu vhanzhi vha vhona u nga muthu mukhethwa o tou ita hani, fhedzi ri nga wana ngafhi ngoho?

³ Musi vhathu vhanzhi vha tshi humbula nga ha muthu ane a vha mukhethwa, vha humbula uri ha na dakalo, u dzula o ambara tshiambaro tsha kereke nahone ha sei. Fhedzi vhathu vhakhethwa a vho ngo tou ralo. Naho Yehova e mukhethwa, Bivhili i ri ndi “Mudzimu o takalaho.” (1 Tim. 1:11) I dovha ya amba uri “hu takala” vhane vha mu gwadamela. (Ps. 144:15) Yesu o kaidza vhe vha vha vha tshi ambara zwiambaro zwo khetheaho na vhe vha ita zwithu zwo khetheaho vha tshi itela u vhonwa. (Mat. 6:1; Marko 12:38) Vhakriste vha ngoho vha a ḓivha  uri zwi amba mini u vha mukhethwa nga nṱhani ha zwine Bivhili ya zwi amba. Ri a zwi ḓivha uri Mudzimu u a ri funa nahone a nga si ri vhudze uri ri ite tshithu tshine tsha ri balela. Musi Yehova a tshi ri vhudza uri: “Ni tea u vha vhakhethwa,” zwi amba uri zwi a konadzea u vha vhakhethwa. Zwi tou pfala uri ri tea u pfesesa uri zwi amba mini u vha vhakhethwa uri ri kone u vha vhakhethwa kha nḓila ine ra ḓifara ngayo.

4. Maipfi “mukhethwa” na “vhukhethwa” a amba mini?

⁴ Zwi amba mini u vha mukhethwa? Bivhilini maipfi “mukhethwa” na “vhukhethwa” a ambela kha nḓila yo kunaho ine muthu a ḓifara ngayo na u gwadamela Yehova nga nḓila yo kunaho. A nga dovha a ambela kha u nangiwa uri u shumele Mudzimu. Nga maṅwe maipfi, musi ri tshi ḓifara nga nḓila yo kunaho, ri tshi gwadamela Yehova nga nḓila ine a i ṱanganedza na u vha na vhushaka ha tsini nae, ri vha ri vhakhethwa. Zwi a ri mangadza uri Yehova u kha ḓi ṱoḓa u vha khonani yashu naho e mukhethwa ngeno riṋe ri na tshivhi.

5. Ndi zwifhio zwine ra zwi guda nga ha Yehova kha vharuṅwa vha fhulufhedzeaho?

⁵ Yehova o kuna kha zwithu zwoṱhe. Vhaserafe vhane vha vha vharuṅwa vha imaho tsini na khuluṋoni ya Yehova, vho ri: “Mukhethwa, mukhethwa, mukhethwa ndi Yehova wa mavhuthu.” (Yes. 6:3) Vhenevha vharuṅwa vha kona u vha na vhushaka ha tsini na Mudzimu wavho ane a vha mukhethwa ngauri na vhone vha vhakhethwa. Ndi ngazwo fhethu he vharuṅwa vha ḓivhadza mulaedza musi vhe kha ḽifhasi ho ambiwa uri ndi hukhethwa. Zwenezwi ndi zwe zwa itea musi Mushe e tsini na tshiṱaka tsha mipfa tshi dugaho.—Ek. 3:2-5; Yosh. 5:15.

6-7. (a) U ya nga Ekisoda 15:1, 11, Mushe o zwi bvisela hani khagala uri Mudzimu ndi mukhethwa? (b) Ndi mini tshe tsha vha tshi tshi humbudza Vhaisiraele uri Mudzimu ndi mukhethwa? (Sedzani tshifanyiso tshi re kha gwati.)

⁶ Musi Vhaisiraele vho no wela Lwanzhe Lutswuku, Mushe o vha vhudza uri Yehova Mudzimu wavho ndi mukhethwa. (Vhalani Ekisoda 15:1, 11.) Vhaegipita vhe vha vha vha tshi gwadamela midzimu ya mazwifhi, vho vha vhe si vhakhethwa. Na Vhakanana vhe vha vha vha tshi gwadamela midzimu ya mazwifhi vho vha vhe si vhakhethwa. Musi vha tshi gwadamela midzimu yavho, vho vha vha tshi ita zwiṱhavhelo nga vhana vhavho nahone vha tshi ḓifara luvhi nga zwa vhudzekani. (Lev. 18:3, 4, 21-24; Dot. 18:9, 10) Fhedzi Yehova ha fani na yeneyo midzimu ya mazwifhi. A nga si vhuye a vhudza vhane vha mu gwadamela uri vha ite zwithu zwi songo kunaho. Yehova ndi mukhethwa nga ho fhelelaho. U itela u humbudza Vhaisiraele zwenezwo, tshifhe muhulu o vha a tshi vhofha dugu i re na kuzennge kwa musuku. Kwonoko kuzennge kwo vha kwo korwa maipfi ane a ri: “Vhukhethwa ndi ha Yehova.”—Ek. 28:36-38.

⁷ Maipfi a re kha kwonoko kuzennge o vha a tshi ḓo khwaṱhisedza muṅwe na muṅwe ane a a vhala uri ngangoho Yehova ndi mukhethwa. Fhedzi hu pfi mini nga ha Muisiraele we a vha a sa koni u vhona kwonoko kuzennge nge a vha a sa koni u sendela tsini na tshifhe muhulu? Naa o vha a tshi nga kona u zwi ḓivha uri Yehova ndi mukhethwa? Ee. Vhaisiraele vhoṱhe vho pfa eneo maipfi musi Mulayo u tshi vhalelwa vhanna, vhafumakadzi na vhana. (Dot. 31:9-12) Arali ni vhe ni henefho, no vha ni tshi ḓo vha no pfa hu tshi pfi: “Ndi nṋe Yehova Mudzimu waṋu, ni fanela . . . u vha vhakhethwa, ngauri ndi mukhethwa.” “Ni vhe vhakhethwa kha nṋe, ngauri nṋe Yehova ndi mukhethwa.”—Lev. 11:44, 45; 20:7, 26.

8. Ndi zwifhio zwine ra zwi guda kha Levitiko 19:2 na 1 Petro 1:14-16?

 ⁸ Kha ri ambe nga ha maipfi a re kha Levitiko 19:2 e a vhalelwa Vhaisiraele vhoṱhe. Yehova o vhudza Mushe uri: “Amba na tshitshavha tshoṱhe tsha Vhaisiraele, u ri: ‘Ni tea u vha vhakhethwa, ngauri nṋe Yehova Mudzimu waṋu ndi mukhethwa.’” Petro a nga vha o vha a tshi khou redza yeneyo ndimana musi a tshi vhudza Vhakriste uri: “Ivhani vhakhethwa.” (Vhalani 1 Petro 1:14-16.) Ndi ngoho uri a ri tsha vha nga fhasi ha Mulayo wa Mushe. Fhedzi zwe Petro a zwi ṅwala, zwi tendelana na zwine ra zwi guda kha Levitiko 19:2, zwa uri Yehova ndi mukhethwa na uri vhane vha mu funa vha tea u ita zwoṱhe zwine vha nga kona uri vha vhe vhakhethwa. Ri tea u vha vhakhethwa, hu sa londwi uri ro fhulufhela u tshila ṱaḓulu kana pharadisoni kha ḽifhasi.—1 Pet. 1:4; 2 Pet. 3:13.

9. Ri ḓo vhuyelwa hani nga u haseledza zwi re kha Levitiko ndima ya 19?

⁹ Ri ṱoḓa u guda uri ri fanela u ita mini uri ri vhe vhakhethwa ngauri ri ṱoḓa u takadza Mudzimu washu mukhethwa. Yehova u a ri vhudza zwine ra fanela u zwi ita uri ri vhe vhakhethwa. U ri vhudza zwone kha Levitiko ndima ya 19. Marcus Kalisch o gudaho nga ha maṅwalo a Vhahevheru u ri: “Heyi ndima i nga vha i ya ndeme u fhira ndima dzoṱhe dza bugu ya Levitiko na bugu ṱhanu dza u thoma dza Bivhili.” Ni songo hangwa uri Levitiko 19 i thoma nga maipfi ane a ri: “Ni tea u vha vhakhethwa.” Zwino ri ḓo haseledza dziṅwe ndimana dza yeneyi ndima dzine dza ri gudisa nḓila dzo fhambanaho dzine ra nga vha vhakhethwa ngadzo vhutshiloni hashu.

10-11. Levitiko 19 i ri ri fanela u ita mini nahone ndi ngani zwi zwa ndeme?

¹⁰ Musi Yehova o no vhudza Vhaisiraele uri vha tea u vha vhakhethwa, o dovha a ri: “Muṅwe na muṅwe a ṱhonifhe mme awe na khotsi awe . . . ndi nṋe Yehova Mudzimu waṋu.”—Lev. 19:2, 3.

¹¹ Zwi tou vha khagala uri ndi zwa ndeme uri ri thetshelese mulayo wa Mudzimu wa uri ri hulise vhabebi vhashu. Humbulani zwe Yesu a zwi vhudza munna we a mu vhudzisa uri: “Ndi zwithu zwifhio zwavhuḓi zwine nda tea u zwi ita uri ndi wane vhutshilo vhu sa fheli?” Musi  Yesu a tshi fhindula onoyo munna, o mu vhudza uri zwiṅwe zwa zwithu zwine a fanela u zwi ita ndi u hulisa khotsi awe na mme awe. (Mat. 19:16-19) Yesu o ita na u kaidza Vhafarisei na vhamaṅwalo ngauri vho ita zwoṱhe zwine vha nga kona uri vha shavhe vhuḓifhinduleli ha u ṱhogomela vhabebi vhavho. Nga u ita zwenezwo, vho “ita uri ipfi ḽa Mudzimu ḽi si vhe ḽa ndeme.” (Mat. 15:3-6) “Ipfi ḽa Mudzimu” ḽo vha ḽi tshi katela mulayo wa vhuṱanu kha Milayo ya Fumi na zwine zwa wanala kha Levitiko 19:3. (Ek. 20:12) Ni songo hangwa uri mulayo u re kha Levitiko 19:3, wa uri ri tea u ṱhonifha vhabebi vhashu, u tevhela maipfi ane a ri: “Ni tea u vha vhakhethwa, ngauri nṋe Yehova Mudzimu waṋu ndi mukhethwa.”

12. Ri nga tevhedza hani mulayo u re kha Levitiko 19:3?

¹² Musi ri tshi humbula nga ha mulayo we Yehova a ri ṋea wone wa uri ri tea u hulisa vhabebi vhashu, ri nga ḓivhudzisa uri: ‘Naa vhabebi vhanga ndi a vha hulisa?’ Arali ni tshi vhona u nga no vha ni sa vha hulisi tshifhingani tsho fhelaho, ni nga zwi lugisa zwino. Ni nga si kone u shandula zwo iteaho, fhedzi zwine na nga zwi ita zwino ndi u ḓifha tshifhinga tsho engedzeaho tsha u ṱwa na vhabebi vhaṋu na u vha thusa nga ho engedzeaho. Khamusi ni nga vha thusa nga ho engedzeaho nga u vha rengela zwine vha zwi shaya kana nga u vha thusa uri vha dzule vhe tsini na Yehova na u bvela phanḓa vha tshi mu shumela. Kana ni nga vha ṱuṱuwedza na u vha khuthadza nga ho engedzeaho. Na ita zwenezwo, ni ḓo vha ni tshi khou tevhedza mulayo u re kha Levitiko 19:3.

13. (a) U ya nga Levitiko 19:3, ndi zwifhio zwiṅwe zwine ra fanela u zwi ita? (b) Ri nga edzisa hani tsumbo ya Yesu ṋamusi yo ṅwalwaho kha Luka 4:16-18?

¹³ Levitiko 19:3 i dovha ya ri gudisa zwiṅwe nga ha u vha vhakhethwa. I amba nga ha u tevhedza Savhatha. Vhakriste a vhaho nga fhasi ha Mulayo wa Mushe, ndi ngazwo ri sa tevhedzi Savhatha ya vhege iṅwe na iṅwe. Fhedzi hu na zwinzhi zwine ra nga zwi guda kha Vhaisiraele kha nḓila ye vha tevhedza Savhatha ngayo na nḓila ye vha vhuyelwa ngayo nga u i tevhedza. Nga Savhatha vho vha vha tshi awela, vha vha na tshifhinga tsha u gwadamela Mudzimu. * Ndi ngazwo Yesu o vha a tshi ya sinagogoni i re hayani ha hawe a vhala Ipfi ḽa Mudzimu nga ḓuvha ḽa Savhatha. (Ek. 31:12-15; vhalani Luka 4:16-18.) Mulayo wa Mudzimu u re kha Levitiko 19:3 wa uri ri “tevhedze Savhatha” u tea u ri ṱuṱuwedza uri ri ḓifhe tshifhinga tsha u gwadamela Mudzimu ḓuvha ḽiṅwe na ḽiṅwe. Naa hu na hune na nga khwinisa uri ni kone u tevhedza wonoyu mulayo? Arali na dzula ni tshi gwadamela Yehova, ni ḓo vha na vhushaka ha tsini nae vhune ha ḓo ni thusa uri ni vhe mukhethwa.

14. Ndi ifhio ngoho ya ndeme ine ya ambiwa lunzhi-lunzhi kha Levitiko ndima ya 19?

¹⁴ Levitiko ndima ya 19 i amba lunzhi-lunzhi nga ha ngoho ya ndeme ine ya nga ri thusa uri ri dzule ri vhakhethwa. Ndimana ya 4 i phetha nga maipfi ane a ri: “Ndi nṋe Yehova Mudzimu waṋu.” Enea maipfi kana ane a yelana nao a wanala lwa 16 kha yeneyi ndima. Zwenezwi zwi ri humbudza mulayo wa u thoma une wa ri: “Ndi nṋe Yehova Mudzimu wau . . . U songo gwadamela miṅwe midzimu nga nnḓa ha nṋe.” (Ek. 20:2, 3) Mukriste ane a ṱoḓa u vha mukhethwa u tea u ita vhungoho ha uri hu si vhe na tshithu kana muṅwe muthu ane a vha wa ndeme u fhira vhushaka hawe na Mudzimu. Nahone ro ḓiimisela u sa ita zwithu zwine zwa nga nyadzisa dzina ḽawe ḽikhethwa ngauri ri Ṱhanzi dzawe.—Lev. 19:12; Yes. 57:15.

15. Ndimana dzi re kha Levitiko ndima ya 19 dzi ambaho nga ha zwiṱhavhelo dzi fanela u ri ṱuṱuwedza uri ri ite mini?

 ¹⁵ Vhaisiraele vho sumbedza uri Yehova ndi Mudzimu wavho nga u tevhedza milayo yawe. Levitiko 18:4 i ri: “Ni tevhedze mahaṱulele anga na maitele anga, ni tshile ngazwo. Ndi nṋe Yehova Mudzimu waṋu.” Ndima ya 19 i ri vhudza nga ha maṅwe “maitele” e Vhaisiraele vha vha vha tshi tea u a tevhedza. Sa tsumbo, dzindimana 5-8, 21 na 22 dzi amba nga ha zwiṱhavhelo zwa zwifuwo. Vhaisiraele vho vha vha tshi tea u ṋekedza zwenezwo zwiṱhavhelo nga nḓila ye ya vha i sa ḓo “tshikafhadza tshithu tshikhethwa tsha Yehova.” Musi ri tshi vhala dzenedzo ndimana, zwi ḓo ita uri ri ṱoḓe u takadza Yehova nga u mu ṋekedza zwiṱhavhelo zwa u mu renda zwine a zwi ṱanganedza, samusi Vhahevheru 13:15 i tshi amba uri ri ite nga u ralo.

16. Ndi vhufhio vhulivhisi vhu re kha Levitiko 19 vhune ha nga ri thusa u vhona phambano vhukati ha vhane vha shumela Mudzimu na vhane vha si mu shumele?

¹⁶ Arali ri tshi ṱoḓa u vha vhakhethwa, a ro ngo tea u shona u vha vhathu vho fhambanaho na vhane vha si shumele Mudzimu. Fhedzi a zwo ngo leluwa. Nga zwiṅwe zwifhinga vhane ra dzhena navho tshikolo, vhane ra shuma navho, mashaka ashu ane a si vhe Dziṱhanzi na vhaṅwe vha nga ri tsikeledza nga u ita uri ri ite zwithu zwine zwa ḓo khakhisa nḓila ine ra gwadamela Yehova ngayo. Musi vha tshi ita zwenezwo, hu na phetho ya ndeme ine ra fanela u i dzhia. Ndi mini zwine zwa nga ri thusa u dzhia phetho yo teaho? Ṱhogomelani vhulivhisi vhu re kha Levitiko 19:19 vhune ha ri: “U songo ambara tshiambaro tsho rungwaho nga harane dza mifuda mivhili yo ṱanganyiswaho.” Wonoyo mulayo wo vha u tshi ita uri hu vhe na phambano vhukati ha Vhaisiraele na tshaka dzo vha tangaho. Samusi ri siho nga fhasi ha Mulayo wa Mushe, a zwo ngo khakhea uri Mukriste a ambare zwiambaro zwo rungwaho nga harane dza mifuda yo fhambanaho. Fhedzi a ri ṱoḓi u fana na vhathu vhane vha si tshile u tendelana na zwine Bivhili ya zwi funza naho vhenevho vhathu ri tshi dzhena navho tshikolo, ri tshi shuma navho kana vhe mashaka ashu. Ndi ngoho uri mashaka ashu na vhaṅwe vhathu ri a vha funa. Fhedzi phetho dzine ra dzi dzhia dzi sumbedza uri ri thetshelesa Yehova naho zwi tshi nga ita uri ri vhe vho fhambanaho na vhathu vho ri tangaho. Zwenezwi ndi zwa ndeme arali ri tshi ṱoḓa u vha vhakhethwa ngauri arali ri tshi ṱoḓa u vha vhakhethwa, ri tea u vha vho fhambanaho na vhaṅwe ri tshi itela Mudzimu.—2 Vhakor. 6:14-16; 1 Pet. 4:3, 4.

17-18. Levitiko 19:23-25 i ri gudisa mini zwine zwa vha zwa ndeme?

¹⁷ Maipfi ane a ri: “Ndi nṋe Yehova Mudzimu  waṋu” o vha o tea u vha o humbudza Vhaisiraele uri vha tea u ita uri vhushaka havho na Yehova vhu ḓe u thoma vhutshiloni havho. Nga nḓila-ḓe? Levitiko 19:23-25 i ri vhudza iṅwe nḓila ye vha vha vha tshi tea u zwi ita ngayo. (Vhalani.) Ṱhogomelani uri Vhaisiraele vho vha vha tshi ḓo kwamea hani nga eneo maipfi musi vho no dzhena Shangoni ḽo Fhulufhedziswaho. Arali muthu o ṱavha miri, ho vha hu tshi tea u thoma ha fhela miṅwaha miraru a sa athu u ḽa mitshelo yayo. Nga ṅwaha wa vhuṋa, yeneyo mitshelo yo vha i tshi tea u shumiswa nḓuni khethwa ya Mudzimu. Muṋe wa yeneyo mitshelo o vha a tshi kona u i ḽa nga ṅwaha wa vhuṱanu. Wonoyu mulayo wo vha wo tea u thusa Vhaisiraele u pfesesa uri zwine vha zwi ṱoḓa a si zwone zwa ndeme. Yehova o vha a tshi khou ṱoḓa uri vha fhulufhele uri u ḓo vha ṱhogomela na uri vha ite uri u mu shumela zwi ḓe u thoma vhutshiloni havho. O vha a tshi ṱoḓa u ita vhungoho ha uri a vha lili zwiḽiwa nahone o vha ṱuṱuwedza uri vha ḓise zwiḽiwa zwinzhi nḓuni khethwa he vha vha vha tshi mu gwadamela hone.

¹⁸ Mulayo u re kha Levitiko 19:23-25 u ri humbudza zwe Yesu a zwi amba musi a tshi khou funza e thavhani. O ri: “Litshani u vhilaela uri ni ḓo ḽa mini kana ni ḓo nwa mini.” A dovha a ri: “Khotsi aṋu wa ṱaḓulu u a zwi ḓivha uri ni ṱoḓa zwenezwi zwithu zwoṱhe.” Mudzimu u ḓo ri ṱhogomela samusi a tshi ṱhogomela zwiṋoni. (Mat. 6:25, 26, 32) Ri a fhulufhela uri Yehova u ḓo ri ṱhogomela nahone ri ṋea vha shayaho “zwifhiwa zwa khathutshelo,” fhedzi a ri zwi vhudzi vhaṅwe. Zwiṅwe hafhu, ri ṋeela nga zwine ra nga kona u itela u thusa u badela tshinyalelo dza tshivhidzo. Yehova u a zwi vhona musi ri tshi ita zwoṱhe zwine ra nga kona u itela u tikedza vhurabeli hawe nahone u ḓo ri lambedza. (Mat. 6:2-4) Musi ri tshi ita zwenezwi, ri vha ri tshi khou sumbedza uri ri a pfesesa zwine Levitiko 19:23-25 ya ri gudisa zwone.

19. No vhuyelwa hani nga u haseledza itshi tshipiḓa tsha Levitiko?

¹⁹ Ro haseledza ndimana dzi si gathi dza Levitiko ndima ya 19 nahone dzo ri thusa u vhona uri ri nga vha hani vhakhethwa u fana na Mudzimu washu mukhethwa. Musi ri tshi mu edzisa, ri vha ri tshi khou sumbedza uri ri khou lingedza u ‘vha vhakhethwa kha zwoṱhe zwine ra ita.’ (1 Pet. 1:15) Vhathu vhanzhi vhane vha si shumele Yehova vho ṱhogomela nḓila yavhuḓi ine vhathu vha Mudzimu vha ḓifara ngayo. Zwo ita uri vhaṅwe vhavho vha rende Yehova. (1 Pet. 2:12) Fhedzi hu kha ḓi vha na zwinzhi zwine ra zwi guda kha Levitiko ndima ya 19. Thero i tevhelaho i ḓo haseledza dziṅwe ndimana dza yeneyo ndima nahone i ḓo ri thusa u pfesesa dziṅwe nḓila dzine ra nga vha ngadzo “vhakhethwa” samusi Petro o ri ṱuṱuwedza uri ri ite nga u ralo.