NAA no no zwi ṱhogomela uri vhunzhi ha vhathu ano maḓuvha vha vhona u nga vha tea u farwa nga nḓila yo khetheaho u fhira vhaṅwe? Naho vha farwa nga nḓila yo khetheaho, vha vhona u nga a zwo ngo eḓana. Vhathu vhane vha ḓidzhia nga yeneyo nḓila vha humbulela vhone vhaṋe fhedzi nahone a vha livhuwi zwine vha vha nazwo. Bivhili yo dzula yo amba uri vhathu vha ḓo vha nga yeneyo nḓila tshifhingani tsha vhufhelo.​—2 Tim. 3:2.

Ndi ngoho uri ndi kale vhathu vha tshi humbulela vhone vhaṋe fhedzi. Sa tsumbo, Adamu na Eva vho vha vha tshi ṱoḓa u ḓikhethela uri ndi zwifhio zwo lugaho na zwi songo lugaho nahone ri kha ḓi sedzana na masiandoitwa a phetho yavho ṋamusi. Iṅwe tsumbo ndi ya Khosi Usia wa ngei Yuda, we a vha a tshi khou ṱoḓa u ita mushumo wa u fhisa zwioro thembeleni naho o vha a songo tendelwa u zwi ita. (2 Koron. 26:18, 19) Vhafarisei na Vhasadukei vho vha vha tshi vhona u nga Mudzimu u tea u vha fara nga nḓila yo khetheaho ngauri vho vha vhe vhaḓuhulu vha Abrahamu.​—Mat. 3:9.

Ri khou tshila kha shango ḽo ḓalaho vhathu vhane vha humbulela vhone vhaṋe fhedzi. Arali ra sa ṱhogomela, ri nga fhedzisela ri tshi vho tshila u fana na vhenevho vhathu. (Vhagal. 5:26) Ri nga thoma u humbula uri ri a fanelea u wana dziṅwe ndugelo kana uri ri tea u farwa nga nḓila yo khetheaho. Ri nga iledza hani u humbula nga yeneyi nḓila? Kha ri thome nga u vhona uri Yehova u zwi dzhia hani. Ri ḓo haseledza nga ha zwithu zwivhili zwi bvaho Bivhilini zwine zwa ḓo ri thusa.

Yehova ndi ene ane a khetha uri ndi zwifhio zwine ra fanela u zwi wana. Kha ri haseledze nga ha tsumbo dzi tevhelaho.

• Muṱani, munna u ṱoḓa uri mufumakadzi wawe a mu ṱhonifhe, mufumakadzi u ṱoḓa uri munna wawe a mu sumbedze lufuno. (Vhaef. 5:33)  Yehova u amba uri vhavhingani vha tea u funa vhafarisi vhavho fhedzi, vha si sumbedze dzangalelo kha muṅwe muthu. (1 Vhakor. 7:3) Vhabebi vha lavhelela uri vhana vhavho vha vha thetshelese, na vhana vha nga lavhelela uri vhabebi vhavho vha vha fune na u vha tikedza.​—2 Vhakor. 12:14; Vhaef. 6:2.

• Yehova u amba uri vhahulwane vha tshivhidzo vha tea u ṱhonifhiwa ngauri vha shuma nga maanḓa tshivhidzoni. (1 Vhathes. 5:12) Fhedzi vhahulwane a vha na maanḓa a u langa zwine vhahashu vha zwi ita.​—1 Pet. 5:2, 3.

• Mudzimu o ṋea vhavhusi vha ḽino shango maanḓa a u ṱoḓa muthelo na u ṱoḓa u huliswa nga vhathu vhane vha vha vhusa.​—Vharoma 13:1, 6, 7.

Yehova u ri ṋea zwi fhiraho zwo ri teaho nga nṱhani ha uri u a ri funa. Sa izwi roṱhe ri na tshivhi tshe re tshi wana kha Adamu, ro tewa nga u fa. (Vharoma 6:23) Naho zwo ralo, Yehova o ri fhaṱutshedza nga zwithu zwinzhi nga nṱhani ha uri u a ri funa. (Ps. 103:10, 11) Musi a tshi ri fhaṱutshedza, a si ngauri ri vha ro tewa nga u fhaṱutshedzwa, fhedzi u zwi ita ngauri u a ri funa na ngauri u na vhuthu vhuhulu.​—Vharoma 12:6-8; Vhaef. 2:8.

Ni ṱhogomele uri ni sa thome u humbula sa vhathu vha ḽino shango. Yesu o anetshela tshiṱori tshi sumbedzaho nḓila ine zwa nga leluwa ngayo u thoma u humbula u fana na vhathu vha ḽino shango. O amba nga ha vhashumi vhe vha tenda uri vha ḓo shuma ḓuvha ḽoṱhe nahone vha holelwa dinari nthihi. Musi vhenevho vhashumi vho no thoma u shuma, mutholi o mbo ḓi thola vhaṅwe vhashumi. Nga madekwana o badela vhashumi vhoṱhe tshelede i fanaho, na vhe vha shuma awara nthihi fhedzi vho badelwa tshelede i fanaho na ya vhaṅwe. Fhedzi vhashumi vhe vha shuma ḓuvha ḽoṱhe vho vha vha tshi vhona u nga vha tea u holelwa tshelede nnzhi u fhira ya vhaṅwe. (Mat. 20:1-16) Yesu o zwi sumbedza nga tshenetshi tshifanyiso uri vhatevheli vhawe vha tea u fushea nga zwine Mudzimu a vha ṋea zwone.

Ni livhuwe zwine na vha nazwo, ni songo kombetshedza vhaṅwe vhathu uri vha ni ṋee zwine na zwi ṱoḓa. (1 Vhathes. 5:18) Ni edzise muapostola Paulo we a si humbele vhahawe vha ngei Korinta uri vha mu ṋee zwe a vha a tshi khou zwi ṱoḓa naho zwo vha zwo tea uri a vha humbele. (1 Vhakor. 9:11-14) Ri tea u livhuwa zwoṱhe zwine vhathu vha ri ṋea zwone nahone a ro  ngo tea u vha kombetshedza uri vha ri ṋee zwine ra zwi ṱoḓa.

Ni ḓiṱukufhadze. Musi muthu a tshi ḓidzhia e wa ndeme u fhira vhaṅwe, zwi ita uri a pfe u nga u tea u vha na zwinzhi u fhira zwine a vha nazwo. Fhedzi u ḓiṱukufhadza zwi ḓo ri thusa uri ri sa humbule nga yeneyo nḓila.

Muporofita Daniele o ri vhetshela tsumbo yavhuḓi ya u ḓiṱukufhadza. O vha a tshi bva kha muṱa wa ndeme, o naka, o ṱalifha nahone e na vhukoni vhunzhi. Nga zwenezwo, zwo vha zwi tshi nga mu lelutshela uri a pfe u nga zwo vha zwo tea uri a farwe nga nḓila yo khetheaho na uri o vha o tea u wana ndugelo dzo khetheaho dze a dzi wana. (Dan. 1:3, 4, 19, 20) Naho zwo ralo, Daniele o dzula a tshi ḓiṱukufhadza, zwenezwo zwo ita uri Yehova a mu fune.​—Dan. 2:30; 10:11, 12.

Ri tea u iledza u humbulela riṋe vhaṋe fhedzi na u ḓidzhiela nṱha u fana na vhathu vha ḽino shango. Nṱhani hazwo, u nga ri ri nga bvela phanḓa ri tshi takalela zwoṱhe zwine Yehova a ri fhaṱutshedza ngazwo nga nṱhani ha vhuthu hawe vhuhulu.