1, 2. (a) Ndi mini zwe Yehova a ri zwi ḓo itea tshifhingani tshashu? (b) Ndi mbudziso dzifhio dzine dza ḓo fhindulwa kha ino thero? (Sedzani tshifanyiso tsha u thoma.)

YEHOVA o amba uri tshifhingani tshashu, “vhanna vha ná fumi vha mirafhorafho ya vha-nnḓa, vha ḓo fara munna muthihi wa Yuda, vha tou mu fara nga dzinguvho, vha ri: Litsha ri tshimbile na vho-inwi, ngauri ro zwi pfa zwauri Mudzimu u na inwi.” (Sakaria 8:23) ‘Muyuda’ u imela vho ḓodzwaho nga muya mukhethwa wa Mudzimu. Vha dovha vha vhidzwa “Isiraele wa Mudzimu.” (Vhagalata 6:16) “Vhanna vha ná fumi” vha imela vha re na fulufhelo ḽa u tshila tshoṱhe kha ḽifhasi. Vha a zwi ḓivha uri Yehova o fhaṱutshedza tshenetshi tshigwada tsha vho ḓodzwaho nahone vha ḓipfa vho hulisea u mu gwadamela vhe navho.

² U fana na muporofita Sakaria, Yesu o amba uri vhathu vha Mudzimu vho vha vha tshi ḓo vha na vhuthihi. O ṱalusa vhane vha lavhelela u tshila ṱaḓulu sa “sambi ḽiṱuku” na vhane vha lavhelela u tshila kha ḽifhasi sa vha “dziṅwe nngu.” Fhedzi Yesu o amba uri vhoṱhe vha ḓo vha “sambi ḽithihi” nahone vha ḓo mu tevhela, ene “mulisa muthihi.” (Luka 12:32; Yohane 10: 16) Samusi hu na zwigwada zwivhili, vhaṅwe vha nga ḓivhudzisa uri: (1) Naa ṋamusi vha dziṅwe nngu vha fanela u ḓivha madzina a vhoṱhe vho ḓodzwaho? (2) Vhaḓodzwa vha fanela u ḓidzhia hani? (3) Arali muṅwe muthu tshivhidzoni a thoma u ḽa tshinkwa na u nwa waini Tshihumbudzoni, ndi fanela u mu fara hani? (4) Naa ndi fanela u vhilaedziswa nga u engedzea ha tshivhalo tsha vhane vha ḽa tshinkwa na u nwa waini nga Tshihumbudzo? Dzenedzi mbudziso dzi ḓo fhindulwa kha ino thero.

3. Ndi ngani zwi sa konadzei u vha na vhungoho ha uri ndi vhafhio vhane vha ḓo vha tshipiḓa tsha vha 144 000?

³ Naa vha dziṅwe nngu vha fanela u ḓivha madzina a vhoṱhe vho ḓodzwaho vhane vha kha ḓi vha kha ḽifhasi ṋamusi? Hai. Ndi ngani? Ngauri a zwi konadzei uri muthu a vhe na vhungoho ha uri vhenevho vhathu vha ḓo lambedzwa. ^[1] (Sedzani notsi dza u fhedzisela.) Naho Mudzimu o vha ramba ṱaḓulu, vha ḓo wana malamba avho arali vha dzula vha tshi fulufhedzea. Sathane u a ḓivha zwenezwi nahone u shumisa “vhaporofita vha mazwifhi” u lingedza u vha “xedza.” (Mateo 24:24) Vhakriste vho ḓodzwaho vha nga si vhe na vhungoho ha uri vha ḓo wana malamba avho u swikela Yehova a tshi ita uri zwi vhe khagala khavho uri o vha haṱula sa vha fulufhedzeaho. Yehova u vha swaya lwa u fhedzisela vha sa athu u fa kana musi ‘maṱungu mahulu’ a sa athu u thoma.—Nzumbululo 2:10; 7:3, 14.

4. Arali zwi sa konadzei u ḓivha madzina a vhaḓodzwa vhoṱhe kha ḽifhasi ṋamusi, vha dziṅwe nngu vha nga ‘tshimbila’ hani navho?

⁴ Arali zwi sa konadzei u ḓivha madzina a vhaḓodzwa vhoṱhe kha ḽifhasi ṋamusi, vha dziṅwe nngu vha nga ‘tshimbila’ hani navho? Bivhili i amba uri “vhanna vha ná fumi” vha ḓo fara munna muthihi wa Yuda, vha tou mu fara nga dzinguvho, vha ri: Litsha ri tshimbile na vho-inwi, ngauri ro zwi pfa zwauri Mudzimu u na inwi.” Ndimana ya Bivhili i amba nga ha Muyuda muthihi. Fhedzi maipfi ane a ri “vho-inwi” na “inwi,” a ambela kha vhathu vhanzhi. Zwenezwi zwi amba uri Muyuda a si muthu muthihi, fhedzi u imela tshigwada tshoṱhe tsha vhaḓodzwa. Vha dziṅwe nngu vha a zwi ḓivha nahone vha shumela Yehova vhe na tshenetshi tshigwada. A zwi ṱoḓei uri vha ḓivhe madzina a muraḓo muṅwe na muṅwe wa tshenetshi tshigwada na u tevhela muṅwe na muṅwe wavho. Yesu ndi Murangaphanḓa washu nahone Bivhili i ri vhudza uri ri fanela u tevhela ene fhedzi.—Mateo 23:10.

5. Ndi tsevho ifhio ine vhaḓodzwa vha fanela u humbulisisa nga hayo, nahone ndi ngani?

⁵ Vhaḓodzwa vha fanela u humbula nga ho dzikaho nga ha tsevho i wanalaho kha 1 Vhakorinta 11:27-29. (Vhalani.) Muḓodzwa a nga ḽa hani tshinkwa na u nwa waini Tshihumbudzoni “a sa fanelei”? Arali e si na vhushaka havhuḓi na Yehova nahone a sa fulufhedzei khae, onoyo  muthu u vha a tshi khou sumbedza lunyadzo musi a tshi ḽa tshinkwa na u nwa waini. (Vhaheberu 6:4-6; 10:26-29) Yeneyi tsevho i humbudza vhaḓodzwa uri vha fanela u dzula vha tshi fulufhedzea arali vha tshi ṱoḓa u wana “malamba ngei ṱaḓulu a zwe Mudzimu a ri vhidzela zwone nga Kristo Yesu.”—Vhafilipi 3:13-16.

6. Vhaḓodzwa vha Vhakriste vha fanela u ḓidzhia hani?

⁶ Paulo o vhudza Vhakriste vho ḓodzwaho uri: “Nṋe tshivhotshwa tsha Murena, ndi ni humbela uri ni tshimbile nga nḓila yo teaho zwe na vhidzelwa zwone.” Zwenezwi vha fanela u zwi ita nga nḓila-ḓe? Paulo o ṱalutshedza uri: “Nga u ḓiṱukufhadza nga ho fhelelaho, na u vuḓa, u sa fhela mbilu, na u konḓelelana nga lufuno, na u lwela nga mbilu yoṱhe uri ni dzule ni na vhuthihi he na vhu ṋewa nga muya mukhethwa une wa ita uri ni vhe na mulalo.” (Vhaefesa 4:1-3) Muya mukhethwa wa Yehova u thusa vhashumeli vhawe uri vha ḓiṱukufhadze, hu si u ḓikukumusa. (Vhakolosa 3:12) Nga zwenezwo, vhaḓodzwa a vha ḓidzhii vha khwine u fhira vhaṅwe. Vha a zwi ḓivha uri Yehova ha ṋei vhaḓodzwa muya mukhethwa wo engedzeaho u fhira vhaṅwe vhashumeli vhawe. Nahone a vha pfi u nga vha nga pfesesa ngoho ya Bivhili nga ho dzikaho u fhira muṅwe muthu. Vha nga si vhuye vha vhudza muṅwe muthu uri na ene o ḓodzwa nahone u fanela u thoma u ḽa tshinkwa na u nwa waini Tshihumbudzoni. Nṱhani hazwo, vha a ḓiṱukufhadza na u ḓivha uri ndi Yehova fhedzi ane a nga ramba vhathu ṱaḓulu.

7, 8. Ndi mini zwine Vhakriste vho ḓodzwaho vha si zwi lavhelele, nahone ndi ngani?

⁷ Naho vhaḓodzwa vha tshi pfa vho hulisea nga u rambiwa ṱaḓulu, a vha lavheleli uri vhaṅwe vha vha fare nga nḓila yo khetheaho. (Vhaefesa 1:18, 19; vhalani Vhafilipi 2:2, 3.) Vha ḓivha uri musi Yehova a tshi vha ḓodza ho ngo ḓivhadza vhathu. Nga zwenezwo, muḓodzwa ha mangali musi vhaṅwe vha sa tendi nga tshenetsho tshifhinga uri o ḓodzwa. U a zwi ṱhogomela uri Bivhili i ri vhudza uri ri songo ṱavhanya u tenda muṅwe muthu ane a ri Mudzimu o mu ṋea vhuḓifhinduleli ho khetheaho. (Nzumbululo 2:2) Ngauri muḓodzwa ha lavheleli uri vhaṅwe vha mu dzhiele nṱha, a nga si vhudze vhathu vhane a ṱangana navho lwa u tou thoma uri o ḓodzwa. Zwi re zwone ndi uri a nga si zwi vhudze muṅwe muthu. A nga si dovhe a zuwa nga ha zwithu zwavhuḓi zwine a ḓo zwi ita ṱaḓulu.—1 Vhakorinta 1:28, 29; vhalani 1 Vhakorinta 4:6-8.

⁸ Vhakriste vho ḓodzwaho a vha pfi u nga vha fanela u fhedza tshifhinga na vhaṅwe vhaḓodzwa, zwa tou nga vha miraḓo ya kilabu. A vha lingedzi u ṱoḓa vhaṅwe vhaḓodzwa uri vha ambe nga ha u vha muḓodzwa kana u ṱangana nga zwigwada u itela u guda Bivhili. (Vhagalata 1:15-17) Arali vhaḓodzwa vha ita nga u ralo, tshivhidzo tshi nga si vhe na vhuthihi. Vha ḓo vha vha tshi khou lwisana na muya mukhethwa une wa thusa vhathu vha Mudzimu uri vha vhe na mulalo na vhuthihi.—Vhalani Vharoma 16:17, 18.

9. Ndi ngani ni tshi fanela u ṱhogomela nḓila ine na fara ngayo vhane vha ḽa tshinkwa na u nwa waini Tshihumbudzoni? (Sedzani bogisi “Lufuno ‘A Lu Ḓifari Nga Nḓila I Si Yavhuḓi.’”)

⁹ Ni fanela u fara hani vhahashu vho ḓodzwaho? Yesu o vhudza vhafunziwa vhawe uri: “Noṱhe ni vharathu na vhakomana.” O dovha a ri: “Naho e nnyi ane a  ḓihudza u ḓo ṱukufhadzwa, naho e nnyi ane a ḓiṱukufhadza u ḓo hudzwa.” (Mateo 23:8-12) Nga zwenezwo, zwi ḓo vha zwo khakhea u dzhiela nṱha muthu nga ho kalulaho naho e murathu wa Kristo o ḓodzwaho. Musi Bivhili i tshi amba nga ha vhahulwane, i ri ṱuṱuwedza uri ri edzise lutendo lwavho, fhedzi a i ri vhudzi uri ri nga ita muṅwe muthu murangaphanḓa washu. (Vhaheberu 13:7) Ndi ngoho uri Bivhili i amba uri vhaṅwe vho fanelwa nga u “ṱhonifhiwa zwihulu.” Fhedzi ndi nga nṱhani ha uri vha “ranga phanḓa nga nḓila yavhuḓi,” hu si ngauri ndi vhaḓodzwa. (1 Timotheo 5:17) Arali ra khoḓa na u dzhiela nṱha vhaḓodzwa nga ho kalulaho, ri ḓo ita uri vha ḓipfe vhe na ṱhoni. Zwi fhiraho zwenezwo, ri nga ita uri vha ḓikukumuse. (Vharoma 12:3) A hu na na muthihi washu ane a ṱoḓa u ita uri vharathu vha Kristo vho ḓodzwaho vha ite honoho vhukhakhi vhuhulwane!—Luka 17:2.

10. Ni nga sumbedza hani uri ni ṱhonifha Vhakriste vho ḓodzwaho?

¹⁰ Ri nga sumbedza hani uri ri ṱhonifha vho ḓodzwaho nga Yehova? Ri nga si vha vhudzise uri vho vha hani vhaḓodzwa. Enea ndi mafhungo a muthu nga eṱhe ane ra si vhe na ndugelo ya u a ḓivha. (1 Vhathesalonika 4:11; 2 Vhathesalonika 3:11) Nahone a ro ngo fanela u humbula uri vhanna kana vhafumakadzi vhavho, vhabebi vhavho kana miṅwe miraḓo ya muṱa na vhone vho ḓodzwa. U vha muḓodzwa a zwi tou mamelwa. (1 Vhathesalonika 2:12) Zwiṅwe hafhu ri fanela u iledza u vhudzisa mbudziso dzine dza nga vhaisa vhaṅwe. Sa tsumbo, zwi nga si vhe zwavhuḓi u vhudzisa mufumakadzi wa muḓodzwa nga nḓila ine a ḓipfa ngayo nga ha u tshila tshoṱhe kha ḽifhasi e si na munna wawe. Ri nga vha na vhungoho ha uri shangoni ḽiswa, ‘zwoṱhe zwi tshilaho Yehova U ḓo zwi fusha dakalo.’—Psalme ya 145:16.

11. Ri nga ḓitsireledza hani arali ra iledza u “khoḓa vhaṅwe” nga ho kalulaho?

¹¹ Arali ra sa fara vhaḓodzwa sa vha ndeme vhukuma u fhira vhaṅwe, na riṋe ri vha ri tshi khou ḓitsireledza. Nga nḓila-ḓe? Bivhili i amba uri hu nga vha hu na “vhahashu vha mazwifhi” tshivhidzoni vhane vha nga amba uri vho ḓodzwa. (Vhagalata 2:4, 5; 1 Yohane 2:19) Zwiṅwe hafhu, vhaṅwe vhaḓodzwa vha nga kha ḓi sa fulufhedzea tshifhinga tshoṱhe. (Mateo 25:10-12; 2 Petro 2:20, 21) Fhedzi arali ra iledza u “khoḓa vhaṅwe” nga ho kalulaho, a ri nga ḓo vhuya ra tevhela vhaṅwe, naho hu vhaḓodzwa kana vhathu vha ḓivhiwaho vhukuma kana vhe vha shumela Yehova lwa tshifhinga tshilapfu. Nga zwenezwo, arali vha sa fulufhedzea kana vha ṱutshela tshivhidzo, a ri nga ḓo xelelwa nga lutendo lwashu kha Yehova kana u litsha u mu shumela.—Yuda 16.

12, 13. Ndi ngani ri songo fanela u vhilaedziswa nga tshivhalo tsha vhane vha ḽa tshinkwa na u nwa waini nga Tshihumbudzo?

¹² Lwa miṅwaha minzhi, tshivhalo tsha vhe vha ḽa tshinkwa na u nwa waini Tshihumbudzoni tsho vha tshi tshi khou fhungudzea. Fhedzi zwazwino, tshenetsho tshivhalo tshi vho tou engedzea ṅwaha muṅwe na muṅwe. Naa zwenezwi zwi fanela u ri vhilaedzisa? Hai. Kha ri vhone uri ndi ngani.

¹³ “Yehova u a ḓivha vha re vhawe.” (2 Timotheo 2:19) U fhambana na Yehova, vhahashu vhane vha vhala vhathu vhane vha ḽa tshinkwa na u nwa waini  Tshihumbudzoni a vha ḓivhi o ḓodzwaho zwa vhukuma. Nga zwenezwo, tshenetsho tshivhalo tshi katela vhane vha humbula u nga vho ḓodzwa ngeno zwi songo ralo. Sa tsumbo, vhaṅwe vhe vha vha vha tshi ḽa tshinkwa na u nwa waini nga murahu vho litsha. Vhaṅwe vha nga vha vhe na thaidzo dza muhumbulo kana vho tsikeledzea maḓipfele nahone vha tenda uri vha ḓo vhusa na Kristo ṱaḓulu. Vhukuma, a ri ḓivhi uri ho sala vhaḓodzwa vhangana kha ḽifhasi.

14. Ndi mini zwine Bivhili ya zwi amba nga ha tshivhalo tsha vhaḓodzwa vhane vha ḓo vha vhe kha ḽifhasi musi maṱungu mahulu a tshi thoma?

¹⁴ Hu ḓo vha na vhaḓodzwa kha zwipiḓa zwinzhi zwa ḽifhasi musi Yesu a tshi ḓa u vha dzhia a vha isa ṱaḓulu. Bivhili i ri Yesu “u ḓo ruma vharuṅwa vhawe vhe na phalaphala khulu, vha ḓo kuvhanganya vhanangiwa vhawe vha tshi bva thungo nṋa, u bva magumoni maṅwe a ḽiṱaḓulu u ya magumoni maṅwe.” (Mateo 24:31) Bivhili i dovha ya sumbedza uri tshifhingani tsha maḓuvha a vhufhelo, hu ḓo vha na tshivhalo tshiṱuku tsha vhaḓodzwa vho salaho kha ḽifhasi. (Nzumbululo 12:17) Fhedzi a i ambi uri ndi vhangana vhane vha ḓo sala musi maṱungu mahulu a tshi thoma.

15, 16. Ndi mini zwine ra fanela u zwi pfesesa nga ha vha 144 000 vhe vha nangwa nga Yehova?

¹⁵ Yehova u dzhia phetho ya uri u ḓo nanga lini vhaḓodzwa. (Vharoma 8:28-30) Yehova o thoma u nanga vhaḓodzwa musi Yesu o no vuswa. Zwi vhonala u nga ḓanani ḽa u thoma ḽa miṅwaha, Vhakriste vhoṱhe vha ngoho vho vha vho ḓodzwa. Lwa miṅwaha ya ḓana nga murahu ha zwenezwo, vhunzhi ha vhe vha ri vha Vhakriste  a vho ngo tevhela Kristo zwa vhukuma. Naho zwo ralo, nga yeneyo miṅwaha, Yehova o ḓodza vhenevho vha si gathi vhe vha vha vhe Vhakriste vha ngoho. Vho vha vha tshi nga goroi ye Yesu a ri i ḓo aluwa vhukati ha tsheṋe. (Mateo 13:24-30) Tshifhingani tsha maḓuvha a vhufhelo, Yehova o bvela phanḓa a tshi nanga vhathu vhane vha ḓo vha tshipiḓa tsha vha 144 000. ^[2] (Sedzani notsi dza u fhedzisela.) Nga zwenezwo, arali Mudzimu a dzhia phetho ya u nanga vhaṅwe vha vhenevho hu sa athu u ḓa vhufhelo, vhukuma ri nga si timatime uri u khou ita zwithu zwo lugaho. (Yesaya 45:9; Daniele 4:35; vhalani Vharoma 9:11, 16.) ^[3] (Sedzani notsi dza u fhedzisela.) Ri fanela u ṱhogomela uri ri si aravhe u fana na vhashumi vhe vha gungula nga ha nḓila ye muṋe wavho a fara ngayo vhe vha thoma u shuma nga awara ya u fhedza.—Vhalani Mateo 20:8-15.

¹⁶ A si vhoṱhe vhane vha vha na fulufhelo ḽa u tshila ṱaḓulu vhane vha vha tshipiḓa tsha “mulanda a fulufhedzeaho na wa vhuṱali.” (Mateo 24:45-47) U fana na ḓanani ḽa u thoma ḽa miṅwaha, ṋamusi Yehova na Yesu vha khou shumisa vhathu vha si gathi u kanzwa kana u gudisa vhanzhi. Ho shumiswa Vhakriste vha si gathi fhedzi vho ḓodzwaho vha ḓanani ḽa u thoma ḽa miṅwaha u ṅwala Maṅwalo a Tshikriste a Lugerika. Nahone ṋamusi, Vhakriste vha si gathi fhedzi vho ḓodzwaho vha na vhuḓifhinduleli ha u ṋea vhathu vha Mudzimu ‘zwiḽiwa nga tshifhinga tsho teaho.’

17. No guda mini kha ino thero?

¹⁷ Ndi mini zwe ra zwi guda kha ino thero? Yehova o dzhia phetho ya u ṋea vhunzhi ha vhathu vhawe vhutshilo vhu sa fheli kha ḽifhasi na vhutshilo ṱaḓulu kha vhane vha ḓo vhusa na Yesu. Yehova u lambedza vhashumeli vhawe vhoṱhe, “Muyuda” na “vhanna vha na fumi” nahone u lavhelela uri vha thetshelese milayo yawe na u dzula vha tshi fulufhedzea. Vhoṱhe vha fanela u dzula vha tshi ḓiṱukufhadza. Vha fanela u mu shumela vhoṱhe nga vhuthihi. Nahone vhoṱhe vha fanela u shela mulenzhe kha u ita uri hu dzule hu na mulalo tshivhidzoni. Samusi ri tsini na vhufhelo, roṱhe kha ri dzule ri tshi shumela Yehova na u tevhela Kristo sa sambi ḽithihi.