1, 2. (a) “Tshifhiwa [tsha Mudzimu] tsha fhedzi tshi sa vhambedzwi na tshithu” tshi katela mini? (b) Ndi mbudziso dzifhio dzine ra ḓo dzi ṱolisisa kha ino thero?

YEHOVA o ri ṋea tshifhiwa tsha ndeme tsha lufuno musi a tshi rumela Yesu, Murwa wawe o khetheaho kha ḽifhasi! (Yohane 3:16; 1 Yohane 4:9, 10) Muapostola Paulo o vhidza tshenetshi tshifhiwa uri ndi “tshifhiwa tsha fhedzi tshi sa vhambedzwi na tshithu.” (2 Vhakorinta 9:15) Ndi ngani Paulo o shumisa wonoyo mubulo?

² Paulo o vha a tshi zwi ḓivha uri tshiṱhavhelo tsha Yesu tsho vha tshi khwaṱhisedzo ya uri mafulufhedziso oṱhe a Mudzimu a ḓo ḓadzea. (Vhalani 2 Vhakorinta 1:20.) Zwenezwi zwi amba uri “tshifhiwa [tsha Mudzimu] tsha fhedzi tshi sa vhambedzwi na tshithu” tshi katela tshiṱhavhelo tsha Yesu, zwithu zwoṱhe zwavhuḓi na lufuno lune Yehova a ri sumbedza. A zwi konadzei u ṱalusa tshenetshi tshifhiwa tsha ndeme nga nḓila ine ra nga kona u i pfesesa. Tshenetshi tshifhiwa tsho khetheaho tshi fanela u ri ita uri ri ḓipfe nga nḓila-ḓe? Nahone tshenetshi tshifhiwa tshi fanela u ri ṱuṱuwedza hani musi ri tshi khou lugiselela  Tshihumbudzo tsha lufu lwa Kristo nga Ḽavhuraru ḽa 23 March, 2016?

3, 4. (a) Ni ḓipfa hani musi muṅwe muthu a tshi ni ṋea tshifhiwa? (b) Tshifhiwa tsho khetheaho tshi nga shandula hani vhutshilo haṋu?

³ Ri a zwi takalela musi muṅwe muthu a tshi ri ṋea tshifhiwa. Fhedzi zwiṅwe zwifhiwa ndi zwa ndeme kana zwo khethea lune zwa nga shandula vhutshilo hashu. Sa tsumbo, edzani u humbula no ita vhutshinyi. Mulifho wa honoho vhutshinyi ndi lufu. Fhedzi nga u ṱavhanya, muṅwe muthu ane na sa mu ḓivhe u ḓiimisela u hwala mulandu waṋu. O ḓiimisela u ni fela! Tshenetshi tshifhiwa tsho khetheaho tshi ḓo ita uri ni ḓipfe hani?

⁴ Tshenetshi tshifhiwa tsha lufuno na tsho khetheaho tshi nga ni ita uri ni ite tshanduko vhutshiloni haṋu. Khamusi ni nga dovha na ṱuṱuwedzea uri ni vhe na mafunda, u funa vhaṅwe na u hangwela vhe vha ni khakhela. Kha vhutshilo haṋu hoṱhe, ni ḓo ṱoḓa u sumbedza uri ni dzhiela nṱha zwe na itelwa zwone.

5. Tshifhiwa tsha Mudzimu tsha tshirengululi tshi fhira hani zwiṅwe zwifhiwa zwoṱhe?

⁵ Tshifhiwa tsha Mudzimu tsha tshirengululi tshi fhira kule tshifhiwa tsha tsumbo i re afho nṱha. (1 Petro 3:18) Humbulani nga ha zwi tevhelaho: Roṱhe ro mamela tshivhi kha Adamu nahone mulifho wa tshivhi ndi lufu. (Vharoma 5:12) Lufuno lwo ṱuṱuwedza Yehova uri a rumele Yesu kha ḽifhasi uri “a fele vhoṱhe.” (Vhaheberu 2:9) Fhedzi tshiṱhavhelo tsha Yesu tshi ḓo ita zwi fhiraho zwenezwo! Tshi ḓo fhelisa lufu lwa tshoṱhe. (Yesaya 25:7, 8; 1 Vhakorinta 15:22, 26) Vhoṱhe vhane vha sumbedza lutendo kha Yesu vha ḓo dzula nga mulalo nahone vho takala lwa tshoṱhe, sa mahosi na Kristo ngei ṱaḓulu kana sa vhavhusiwa vha Muvhuso wa Mudzimu kha ḽifhasi. (Vharoma 6:23; Nzumbululo 5:9, 10) Ndi dzifhio dziṅwe phaṱhutshedzo dzo katelwaho kha tshifhiwa tsha Yehova?

6. (a) Ndi phaṱhutshedzo dzifhio dza tshifhiwa tsha Yehova dze na dzi lavhelela? (b) Ndi zwifhio zwithu zwiraru zwine tshifhiwa tsha Mudzimu tsha ḓo ri ṱuṱuwedza u zwi ita?

⁶ Sa tshipiḓa tsha tshifhiwa tsha Mudzimu, ḽifhasi ḽi ḓo vha paradiso, vha lwalaho vha ḓo fhodzwa nahone vho faho vha ḓo vuswa. (Yesaya 33:24; 35:5, 6; Yohane 5:28, 29) Ri funa Yehova na Murwa wawe nge vha ri ṋea tshenetshi “tshifhiwa tsha fhedzi tshi sa vhambedzwi na tshithu.” Tshenetshi tshifhiwa tshi ḓo ri ṱuṱuwedza uri ri ite mini? Tshi ḓo ri ṱuṱuwedza (1) u edzisa Yesu Kristo nga vhuronwane, (2) u funa vhahashu na (3) u hangwela vhaṅwe zwi tshi bva mbiluni.

7, 8. Ri fanela u ḓipfa hani nga ha lufuno lwa Kristo, nahone lu fanela u ri ṱuṱuwedza uri ri ite mini?

⁷ Tsha u thoma, ri fanela u ṱuṱuwedzea uri ri shumise vhutshilo hashu u hulisa Yesu. Muapostola Paulo o ri: “Lufuno lwa Kristo lu a ri kombetshedza.” (Vhalani 2 Vhakorinta 5:14, 15.) Paulo o vha a tshi zwi ḓivha uri arali ra ṱanganedza lufuno luhulwane lwa Yesu, lu ḓo ri kombetshedza kana u ri ṱuṱuwedza, u funa Yesu na u mu hulisa. Vhukuma, arali ri tshi pfesesa nga vhuḓalo zwe Yehova a ri itela zwone, lufuno lwawe lu ḓo ri ṱuṱuwedza uri ri tshile nga nḓila ine ya sumbedza uri ri hulisa Yesu. Ri zwi itisa hani zwenezwo?

⁸ U funa hashu Yehova zwi ḓo ri ṱuṱuwedza uri ri edzise tsumbo ya Yesu, nga u tevhela ṋayo dzawe nga vhuronwane. (1 Petro 2:21; 1 Yohane 2:6) Musi ri tshi thetshelesa Mudzimu na Kristo, ri sumbedza uri ri a vha funa. Yesu o ri: “Ane a ḓivha ndaela dzanga nahone a dzi tevhedza ndi ene ane a mpfuna. Ane a mpfuna u ḓo funwa nga Khotsi  anga, na nṋe ndi ḓo mu funa nahone ndi ḓo ḓisumbedza zwavhuḓi khae.”—Yohane 14:21; 1 Yohane 5:3.

9. Ndi mitsiko ifhio ine ra vha nayo?

⁹ Nga tshenetshi tshifhinga tsha Tshihumbudzo, ndi zwavhuḓi u elekanya nga ha nḓila ine ra khou shumisa vhutshilo hashu ngayo. Ḓivhudziseni uri: ‘Ndi kha masia afhio ane nda khou edzisa Yesu? Ndi nga khwinisa kha masia afhio?’ Ndi zwa ndeme u ḓivhudzisa dzenedzi mbudziso ngauri shango ḽi ṱoḓa ri tshi edzisa maitele aḽo. (Vharoma 12:2) Arali ra sa ṱhogomela, ri nga ḓipfa ri na mutsiko wa u ṱoḓa u edzisa vhadededzi, vhathu vha re na bvumo na vhoramitambo vha shango. (Vhakolosa 2:8; 1 Yohane 2:15-17) Ri nga iledza hani wonoyo mutsiko?

10. Ndi mbudziso dzifhio dzine ra nga ḓivhudzisa nga tshenetshi tshifhinga tsha Tshihumbudzo, nahone phindulo dzi nga ri ṱuṱuwedza uri ri ite mini? (Sedzani tshifanyiso tsha u thoma.)

¹⁰ Zwiṅwe hafhu, ndi zwavhuḓi uri nga tshifhinga tsha Tshihumbudzo ri ṱolisise zwiambaro zwashu, mimuvi, muzika, u katela na zwi re kha dzikhomphyutha dzashu, ṱhingothendeleki kana tablet. Ḓivhudziseni uri: ‘Arali Yesu o vha e fhano nahone a vhona zwe nda ambara, naa ndo vha ndi tshi ḓo shona?’ (Vhalani 1 Timotheo 2:9, 10.) ‘Naa nḓila ine nda ambara ngayo i ḓo sumbedza uri ndi mutevheli wa Kristo? Naa Yesu o vha a tshi nga takalela u ṱalela mimuvi yanga? Naa o vha a tshi nga thetshelesa muzika wanga? Arali Yesu a hadzima ṱhingothendeleki kana tablet yanga, naa ndo vha ndi tshi ḓo shoniswa nga zwine a ḓo zwi vhona? Naa zwo vha zwi tshi ḓo nkonḓela u ṱalutshedza Yesu uri ndi ngani ndi tshi takalela mitambo ya vidio ine nda i tamba?’ U funa hashu Yehova zwi fanela u ri ṱuṱuwedza uri ri laṱele kule zwithu zwoṱhe zwi songo teaho Mukriste, hu sa londwi uri zwo ḓura lungafhani. (Mishumo 19:19, 20) Musi ri tshi ḓiṋekedzela kha Yehova, ro fulufhedzisa u shumisa vhutshilo hashu u itela u hulisa Kristo. Nga zwenezwo, a ro ngo fanela u vha na tshithu naho tshi tshifhio tshine tsha nga ita uri zwi ri konḓele u edzisa Yesu.—Mateo 5:29, 30; Vhafilipi 4:8.

11. (a) U funa hashu Yehova na Yesu zwi ri ṱuṱuwedza hani kha mushumo wa u huwelela? (b) Lufuno lwashu lu nga ri ṱuṱuwedza hani u thusa vhaṅwe tshivhidzoni?

¹¹ U funa hashu Yesu zwi ri ṱuṱuwedza uri ri huwelele na u gudisa nga u fhisea. (Mateo 28:19, 20; Luka 4:43) Nga tshifhinga tsha Tshihumbudzo, naa ni nga dzudzanya vhuimo haṋu u itela uri ni kone u vha muvulanḓila wa u thusa nahone ni fhedze awara dza 30 kana 50 kha mushumo wa u huwelela? Muṅwe mukalaha a re na miṅwaha ya 84 o felwaho nga mufumakadzi, o vha a tshi humbula u nga a nga si kone u vha muvulanḓila nga nṱhani ha miṅwaha yawe na mutakalo u si wavhuḓi. Fhedzi vhavulanḓila vha hune a dzula hone vho vha vha tshi ṱoḓa u mu thusa. Vho ita nzudzanyo dza tshiendedzi nahone vha khetha tsimu yo teaho ine a nga shuma khayo. Nga zwenezwo, wahashu o swikelela tshipikwa tshawe tsha awara dza 30. Naa ni nga thusa muṅwe tshivhidzoni tshaṋu u vha muvulanḓila wa u thusa nga March kana April? Ndi ngoho uri a si vhoṱhe vhane vha nga kona u vha vhavulanḓila, fhedzi ri nga shumisa tshifhinga tshashu na nungo u engedza tshumelo yashu kha Yehova. Arali ra ita nga u ralo u fana na Paulo, ri ḓo sumbedza uri ri ṱuṱuwedzwa nga lufuno lwa Yesu. Ndi zwifhio zwiṅwe zwine lufuno lwa Mudzimu lwa ri sudzulusa uri ri zwi ite?

12. Lufuno lwa Mudzimu lu ri ṱuṱuwedza u ita mini?

¹² Tsha vhuvhili, lufuno lwa Mudzimu lu fanela u ri ṱuṱuwedza uri ri fune vhahashu.  Muapostola Yohane o ṅwala uri: “Vhafunwa, arali Mudzimu o ri funa nga yeneyi nḓila, na riṋe ri a kombetshedzea uri ri funane.” (1 Yohane 4:7-11) Nga zwenezwo, arali ri tshi ṱanganedza lufuno lwa Mudzimu, ri fanela u funa vhahashu. (1 Yohane 3:16) Ri nga vha sumbedza hani uri ri a vha funa?

13. Yesu o vhea tsumbo ifhio ya u funa vhaṅwe?

¹³ Tsumbo ya Yesu i ri sumbedza nḓila ine ra nga funa ngayo vhaṅwe. Musi e kha ḽifhasi o thusa vhathu, zwihuluhulu vha ḓiṱukufhadzaho. O fhodza vha lwalaho, vho holefhalaho, vho pofulaho, vho dzingaho nḓevhe na vha sa koni u amba. (Mateo 11:4, 5) U fhambana na vharangaphanḓa vha vhurereli, Yesu o takalela u gudisa vhathu vhe vha vha vha tshi ṱoḓa u guda nga ha Mudzimu. (Yohane 7:49) O funa vhenevho vhathu vha ḓiṱukufhadzaho nahone o shuma nga nungo dzoṱhe u itela u vha thusa.—Mateo 20:28.

14. Ni nga ita mini u itela u sumbedza vhahaṋu lufuno?

¹⁴ Tshifhinga tsha Tshihumbudzo tshi dovha tsha vha tshifhinga tshavhuḓi tsha u humbula nga ha nḓila ine ra nga thusa ngayo vhahashu tshivhidzoni tshashu, zwihuluhulu vhaaluwa. Naa ni nga dalela vhenevha vhahashu vha funwaho? Naa ni nga vha isela zwiḽiwa, u vha thusa nga mishumo ya hayani, u ṱuwa navho muṱanganoni nga goloi kana u vha ramba uri vha shume na inwi tsimuni? (Vhalani Luka 14:12-14.) Tendelani lufuno lwa Mudzimu lu tshi ni ṱuṱuwedza u sumbedza vhahaṋu lufuno!

15. Ri fanela u ṱhogomela mini?

¹⁵ Tsha vhuraru, lufuno lwa Yehova lu ri ṱuṱuwedza u hangwela vhahashu. Roṱhe ro mamela tshivhi na lufu kha Adamu, nga zwenezwo, a hu na na muthihi ane a nga ri, “A thi ṱoḓi tshirengululi.” Na mushumeli wa Mudzimu a fulufhedzeaho u a ṱoḓa tshifhiwa tsha tshirengululi. Muṅwe na muṅwe washu o hangwelwa mulandu muhulwane! Ndi ngani zwi zwa ndeme u ṱhogomela zwenezwo? Ri wana phindulo kha tshiṅwe tsha zwifanyiso zwa Yesu.

16, 17. (a) Ri guda mini kha tshifanyiso tsha Yesu tsha khosi na vhalanda? (b) Nga murahu ha u elekanya nga tshifanyiso tsha Yesu, no ḓiimisela u ita mini?

¹⁶ Yesu o amba nga ha tshifanyiso tsha khosi ye ya hangwela mulanda wayo mulandu muhulwane wa dinari dza 60 000 000. Fhedzi nga murahu ha zwenezwo, onoyo mulanda ho ngo hangwela mulanda ngae mulandu muṱuku wa dinari dza 100. U khathutshelwa nga khosi zwo vha zwo fanela u mu ṱuṱuwedza uri a hangwele mulanda ngae. Khosi yo sinyuwa musi i tshi pfa uri mulanda wayo ho ngo hangwela wonoyo mulandu muṱuku. Yo ri: “Mulanda muvhi ndi iwe, ndo phumula zwikolodo zwau zwoṱhe musi u tshi nkhumbela. Ndi ngani u songo khathutshela mulanda nga iwe samusi nṋe ndo u khathutshela?” (Mateo 18:23-35) U fana na yeneyo khosi, Yehova o ri hangwela mulandu muhulu. Lufuno na khathutshelo  zwa Yehova zwi fanela u ri ṱuṱuwedza u ita mini?

¹⁷ Musi ri tshi khou lugiselela Tshihumbudzo, ri nga kha ḓi ḓivhudzisa uri: ‘Naa ndo vhaiswa nga wahashu? Naa zwi a nkonḓela u mu hangwela?’ Arali zwo ralo, tshenetshi ndi tshifhinga tshavhuḓi tsha u edzisa Yehova, “o ḓiimiselaho u hangwela.” (Nehemia 9:17; Psalme ya 86:5, NW) Arali ri tshi dzhiela nṱha khathutshelo ya Yehova khulwane, ri ḓo khathutshela vhaṅwe nahone ra vha hangwela zwi tshi bva mbiluni. Arali ri sa funi na u hangwela vhahashu, ri nga si lavhelele uri Yehova a ri fune na u ri hangwela. (Mateo 6:14, 15) Musi ri tshi hangwela vhaṅwe, a zwi ambi uri a vho ngo ri vhaisa, fhedzi zwi ḓo ri thusa u vha na vhumatshelo havhuḓi.

18. Lufuno lwa Mudzimu lwo thusa hani muṅwe wahashu u konḓelela u sa fhelela ha muṅwe wahawe?

¹⁸ Zwi nga konḓa u konḓelela u sa fhelela ha vhahashu. (Vhalani Vhaefesa 4:32; Vhakolosa 3:13, 14.) Muṅwe wahashu wa tshisadzini Lily o ita zwenezwo. ^[1] (Sedzani notsi dza u fhedzisela.) O thusa iṅwe tshilikadzi ino pfi Carol. Sa tsumbo, o vha a tshi isa Carol huṅwe na huṅwe hune a ṱoḓa u ya hone, a tshi mu fhelekedza mavhengeleni na u mu itela zwiṅwe zwithu zwinzhi. Hu sa londwi zwoṱhe zwe Lily a zwi ita, Carol o vha a tshi dzula a tshi sasaladza nahone nga zwiṅwe zwifhinga zwo vha zwi tshi konḓa u mu thusa. Fhedzi Lily o livhisa ṱhogomelo kha pfaneleo dzavhuḓi dza Carol nahone a mu thusa lwa miṅwaha u swika Carol a tshi ṋaṋa u lwala nahone a fa. Naho u thusa Carol zwo vha zwi tshi konḓela Lily, o ri: “Ndo lavhelela nga maṱo matswuku u vhona Carol a tshi vuswa. Ndi ṱoḓa u mu ḓivha musi o no fhelela.” Vhukuma, lufuno lwa Mudzimu lu nga ri ṱuṱuwedza u konḓelela vhahashu na u lavhelela tshifhinga tsha musi vhathu vhoṱhe vha tshi vha vho fhelelaho lwa tshoṱhe.

19. “Tshifhiwa [tsha Mudzimu] tsha fhedzi tshi sa vhambedzwi na tshithu” tshi ḓo ni ṱuṱuwedza hani?

¹⁹ Vhukuma, Yehova o ri ṋea “tshifhiwa tsha fhedzi tshi sa vhambedzwi na tshithu.” U nga ri ri nga dzula ri tshi tshi dzhiela nṱha! Tshifhinga tsha Tshihumbudzo ndi tshifhinga tshavhuḓi tsha u elekanya nga ha zwoṱhe zwe Yehova na Yesu vha ri itela zwone. U nga ri lufuno lwavho lu nga ri ṱuṱuwedza uri ri edzise Yesu nga vhuronwane, ri sumbedze vhahashu lufuno na u hangwela vhahashu zwi tshi bva mbiluni.