1. Ndi ngani tshifhinga tshine ra khou tshila khatsho tsho fhambana na zwiṅwe zwifhinga?

TSHIFHINGA tshine ra khou tshila khatsho tsho fhambana vhukuma na zwifhinga zwo fhiraho. Samusi Bivhili yo dzula yo zwi amba, Yehova u khou kuvhanganya “gogo ḽihulu . . . ḽi bvaho kha tshaka dzoṱhe na ndimi dzoṱhe.” Vhane vha khou kuvhanganywa vha vhumba “lushaka luhulu” lwa vhathu vho takalaho vha fhiraho milioni dza malo vhane vha khou ita “tshumelo khethwa [ya Mudzimu] masiari na vhusiku.” (Nzumb. 7:9, 15; Yes. 60:22) A hu athu u vhuya ha vha na vhathu vhanzhi nga u rali vhane vha funa Mudzimu na vhaṅwe vhathu.

2. Vhathu vhane vha si vhe khonani dza Mudzimu vha na lufuno lwa mufuda-ḓe? (Sedzani tshifanyiso tsha u thoma.)

² Naho zwo ralo, Bivhili yo dzula yo zwi amba uri misini yashu vhathu vhane vha si vhe khonani dza Mudzimu vha ḓo vha na lufuno lwa tseḓa nahone lwonolwo lufuno lwo fhambana vhukuma na lufuno vhukuma. Muapostola Paulo o ṅwala uri: “Maḓuvhani a vhufhelo . . . , vhathu vha ḓo funa vhone vhaṋe fhedzi, vha ḓo vha vhafuni vha tshelede, . . . vhane vha funa miḓifho u fhira Mudzimu.” (2 Tim. 3:1-4) Lwonolwo lufuno lwo fhambana tshoṱhe na u funa  Mudzimu. U vha na tseḓa a zwi iti uri vhathu vha takale naho vha tshi humbula u nga zwi nga ita uri vha takale. Fhedzi lwonolwo lufuno lu ita uri vhathu vha vhe na tseḓa nahone zwenezwo zwi ‘konḓisela’ vhathu vhutshilo.

3. Ri ḓo haseledza mini kha ino thero, nahone ndi ngani?

³ Paulo o vha a tshi zwi ḓivha uri lwonolwo lufuno lwa tseḓa lu ḓo phaḓalala nahone lu ḓo vha khombo kha Vhakriste. Ndi ngazwo o ri tsivhudza uri ri “songo konana” na vhathu vha re na lufuno lu si lwa vhukuma. (2 Tim. 3:5) Naho zwo ralo, ri nga si iledze tshoṱhe u konana na vhathu vho raloho. Nga zwenezwo, ri nga iledza hani u vha na mavhonele a vhathu vho ri tangaho nahone ra lwela u takadza Yehova ane a vha Mudzimu wa lufuno? Kha ri vhone phambano ine ya vha hone vhukati ha lufuno lune Mudzimu a ṱoḓa ri tshi vha nalwo na lufuno lwo ṱaluswaho kha 2 Timotheo 3:2-4. U ita nga u ralo zwi ḓo ri thusa u ḓiṱolisisa na u khwinisa lufuno lune ra vha nalwo, lufuno lune lwa nga ita uri ri fushee na u wana dakalo ḽa vhukuma.

4. Ndi ngani zwi songo khakhea u ḓifuna?

⁴ Muapostola o ṅwala uri, “vhathu vha ḓo funa vhone vhaṋe fhedzi.” Naa zwo khakhea u ḓifuna? A zwo ngo khakhea. U ḓifuna ndi zwa nzulele nahone zwi a ṱoḓea. Yehova o ri sika nga yeneyo nḓila. Yesu o ri: “U tea u funa wahau vhunga u tshi ḓifuna.” (Marko 12:31) Ri nga si kone u funa vhaṅwe arali ri sa ḓifuni. Bivhili i dovha ya ri: “Vhanna vha fanela u funa vhasadzi vhavho u fana na nḓila ine vha funa ngayo mivhili yavho. Ane a funa musadzi wawe u a ḓifuna ene muṋe, ngauri a hu na muthu we a vhuya a vhenga muvhili wawe; fhedzi u a u kanzwa na u u ṱhogomela.” (Vhaef. 5:28, 29) Nga zwenezwo, zwi tou vha khagala uri ri fanela u ḓifuna.

5. Ni nga ṱalusa hani vhathu vhane vha ḓifuna nga ho kalulaho?

⁵ Lufuno lwe ha ambiwa nga halwo kha 2 Timotheo 3:2 a si lwa nzulele. Ndi lufuno lwa tseḓa. Vhathu vhane vha ḓifuna nga ho kalulaho vha vhona u nga vha khwine u fhira zwine vha vha zwone. (Vhalani Vharoma 12:3.) Vha na ndavha na vhone vhaṋe fhedzi. A vha na ndavha na vhaṅwe vhathu. Musi zwithu zwi sa tshimbili zwavhuḓi, vha vhona vhaṅwe mulandu nṱhani ha uri vha tende mulandu. Ri nga vhambedza vhenevho vhathu na muthu ane a fhaṱa luvhondo lulapfu u mona na nnḓu yawe u itela uri a si vhe tsini na vhaṅwe vhathu vhane vha dzula henefho. Ha ṱoḓi vhathu vha tshi ḓa khae. Vhenevho vhathu vhane vha humbulela vhone vhaṋe fhedzi a vho ngo takala zwa vhukuma.

6. U funa Mudzimu zwi ita uri hu vhe na mvelelo dzifhio?

⁶ Muṅwe mugudi wa Bivhili o amba uri lufuno lwa tseḓa ndi lwone lwa u thoma kha mutevhe wa pfaneleo dzi si dzavhuḓi dze muapostola Paulo a amba uri dzi ḓo phaḓalala maḓuvhani a vhufhelo. Ndi nga nṱhani ha uri lwonolwo lufuno lu bveledza dziṅwe pfaneleo dzi si dzavhuḓi. Zwo fhambanaho na zwenezwo, vhathu vhane vha funa Mudzimu vha na pfaneleo dzavhuḓi. Bivhili i sumbedza uri u funa Mudzimu zwi tshimbidzana na u vha na pfaneleo dzi ngaho, dakalo, mulalo, u sa fhela mbilu, vhuthu, vhulenda, lutendo, u vuḓa na u ḓifara. (Vhagal. 5:22, 23) Mupsalme o ṅwala uri: ‘Hu takala vhane Mudzimu wavho a vha Yehova.’ (Ps. 144:15) Yehova ndi Mudzimu o takalaho nahone na vhathu vhawe vho takala. Zwiṅwe hafhu, vhashumeli vha Yehova vho fhambana na vhathu vhane vha funa vhone vhaṋe fhedzi na vhane vha ṱoḓa u ṋewa fhedzi, ngauri vha takalela u thusa vhaṅwe vhathu.—Mish. 20:35.

7. Ndi mbudziso dzifhio dzine dza ḓo ri thusa u ḓivha arali ri tshi funa Mudzimu?

⁷ Ri nga zwi ḓivha hani arali ri tshi vho ḓifunesa  u fhira Mudzimu? Ṱhogomelani nyeletshedzo i re kha Vhafilipi 2:3, 4: “Ni songo ita tshithu na tshithihi nga u ṱaṱisana khani kana nga u ḓihudza, fhedzi ni ḓiṱukufhadze ni dzhie vhaṅwe vhe vhahulwane kha inwi. Ni songo vha na dzangalelo kha mafhungo aṋu fhedzi, fhedzi ni vhe na dzangalelo na kha mafhungo a vhaṅwe.” Ri nga ḓivhudzisa uri: ‘Naa ndi a shumisa yeneyo nyeletshedzo? Naa ndi ṱoḓa u ita zwine Mudzimu a zwi funa nga mbilu yoṱhe? Naa ndi a thusa vhaṅwe, tshivhidzoni na vhuḓinḓani ha tsimu?’ A zwo ngo leluwa u ita zwenezwo zwithu tshifhinga tshoṱhe. Zwi ṱoḓa uri ri ite vhuḓidini na u ḓidzima zwiṅwe zwithu. Fhedzi a huna zwithu zwine zwa nga ita uri ri takale u fhira u ḓivha uri ri takalelwa nga Muvhusi wa fhethu hoṱhe!

8. U funa Mudzimu zwo ṱuṱuwedza vhaṅwe uri vha ite mini?

⁸ Vhaṅwe vho litsha mishumo ye ya vha i tshi nga ita uri vha pfume ngauri vha funa Yehova Mudzimu na u ṱoḓa u mu shumela nga ho engedzeaho. Ericka ane a dzula ngei Amerika, ndi dokotela. Fhedzi nṱhani ha u ṱoḓa vhuimo ha nṱha kha zwa vhu dokotela, o khetha u vha muvulanḓila wa tshifhinga tshoṱhe nahone o shuma kha mashango o fhamba-fhambanaho na munna wawe. Ericka o ri: “Zwithu zwinzhi zwe ra zwi tshenzhela musi ri tshi khou thusa tsimuni ya luṅwe luambo na khonani dze ra vha nadzo, zwo ri thusa vhukuma.” Ericka u kha ḓi vha dokotela, fhedzi u fhedza tshifhinga tshawe tshinzhi na nungo a tshi khou funza vhathu nga ha Yehova na u thusa vhahawe. O amba uri zwenezwi zwi ita uri a “takale vhukuma na u fushea.”

9. Ndi ngani u funesa tshelede zwi sa iti uri muthu a takale?

⁹ Paulo o ṅwala uri vhathu vha ḓo vha “vhafuni vha tshelede.” Miṅwahani yo fhiraho, muṅwe muvulanḓila wa ngei Ireland o amba na muṅwe munna nga ha Mudzimu. Onoyo munna o bvisa tshelede ya bammbiri tshipatshini tshawe, a i imisela nṱha nahone a ri, “Hoyu ndi ene mudzimu wanga!” Naho vhathu vhanzhi vha nga si zwi ambe, fhedzi shangoni ho ḓala vhathu vhane vha funesa tshelede na zwine ya zwi renga. Fhedzi Bivhili i ri: “A funaho mali, ha furi nga yone mali; na a funaho thakha, ha na tshine a kaṋa.” (Muh. 5:9) Vhathu vho raloho vha ḓo dzula vha tshi ṱoḓa tshelede nnzhi na u lingedza u i kuvhanganya. Fhedzi zwenezwo zwi vha pfisa “vhuṱungu.”—1 Tim. 6:9, 10.

10. Ndi mini zwe Aguri a zwi ṅwala nga ha lupfumo na vhushai?

¹⁰ Ndi ngoho uri roṱhe ri ṱoḓa tshelede. I a ri “tsireledza.” (Muh. 7:12, Bivhili khethwa) Fhedzi naa muthu anga takala zwa vhukuma arali e na zwithu zwa ndeme fhedzi zwine a zwi shaya? Ee! (Vhalani Muhuweleli 5:11.) Aguri murwa wa Yake o ṅwala uri: “U songo mpha vhuṱoma kana lupfumo; nkanzwe nga zwo nyeḓanaho.” Ri a pfesesa uri ndi ngani o vha a sa ṱoḓi u shaya nga ho kalulaho. O amba uri o vha a sa ṱoḓi u tswa ngauri u tswa zwo vha zwi tshi ḓo nyadzisa Mudzimu. Fhedzi ndi ngani o rabelela uri a songo pfuma? O ri: “Uri ndi sa ḓo ri ndó furesa nda shanduka nda ri: Naa Yehova ndi nnyi?” (Mir. 30:8, 9) Khamusi ni nga vha ni tshi ḓivha vhathu vhane vha fhulufhela lupfumo lwavho nṱhani ha u fhulufhela Mudzimu.

11. Yesu o ṋea nyeletshedzo ifhio nga ha tshelede?

¹¹ Vhane vha funesa tshelede vha nga si kone u takadza Mudzimu. Yesu o ri: “A hu na ane a nga kona u shumela vhaṋe vhavhili, ngauri u ḓo vhenga muṅwe a funa muṅwe kana u ḓo nambatela muṅwe, a nyadza muṅwe. Ni nga si kone u shumela Mudzimu na Lupfumo.” O dovha a ri: “Litsha u ḓikuvhanganyela lupfumo fhano kha ḽifhasi, hune lwa ḽiwa nga tsole na vhulali na hune mbava dza pwasha dza tswa. Nṱhani hazwo, ḓikuvhanganyele lupfumo ngei ṱaḓulu, hune lwa sa  ḓo ḽiwa nga tshifheṱi na vhulali na hune mbava dzi si pwashe dza tswa.”—Mat. 6:19, 20, 24.

12. U tshila vhutshilo ho leluwaho zwi ita hani uri zwi leluwe u shumela Mudzimu? Ṋeani tsumbo.

¹² Vhanzhi vho wana uri u tshila vhutshilo ho leluwaho zwi ita uri vha takale vhukuma nahone zwi ita uri vha vhe na tshifhinga tsho engedzeaho tsha u shumela Yehova. Jack ane a dzula ngei Amerika, o rengisa nnḓu yawe khulwane na bindu ḽawe ngauri o vha a tshi zwi ḓivha uri u ita nga u ralo zwi ḓo ita uri a kone u vula nḓila na mufumakadzi wawe. O ri: “Zwo vha zwi songo leluwa u ṱutshela nnḓu yashu ya manaka-naka na zwithu zwe ra vha ri nazwo henefho fhethu. Fhedzi lwa miṅwaha minzhi, ndo vha ndi tshi vhuya hayani ndo sinyuwa nga nṱhani ha thaidza dza mushumoni. Mufumakadzi wanga ane a vha muvulanḓila wa tshifhinga tshoṱhe o vha a tshi dzula o takala. O vha a tshi amba uri, ‘Ndi na vhasa wavhuḓisa u fhira vhoṱhe!’ Samusi na nṋe zwino ndi tshi khou vula nḓila, roṱhe ri shumela muthu muthihi ane a vha Yehova.”

13. Ndi mini zwine zwa nga ri thusa u ḓivha nḓila ine ra dzhia ngayo tshelede?

¹³ U itela u ḓivha nḓila ine ra dzhia ngayo tshelede, ri fanela u ḓivhudzisa mbudziso dzi tevhelaho nga u fhulufhedzea: ‘Naa ndi a tenda na u tshila u tendelana na zwine Bivhili ya zwi amba nga ha tshelede? Naa u vha na tshelede ndi zwone zwine zwa ḓa u thoma vhutshiloni hanga? Naa ndi dzhia zwithu zwi vhonalaho zwi zwa ndeme u fhira vhushaka hanga na Yehova u katela na vhaṅwe vhathu? Naa ndi fhulufhela zwa vhukuma uri Yehova u ḓo nṋea zwine nda zwi shaya?’ Ri nga vha na vhungoho ha uri a nga si vhuye a laṱedza vhane vha mu fhulufhela.—Mat. 6:33.

14. Ndi afhio mavhonele o teaho nga ha u ḓimvumvusa?

¹⁴ Samusi Bivhili yo dzula yo zwi amba, vhathu vhanzhi ṋamusi vha ḓo “funa miḓifho.” Samusi zwi songo khakhea u ḓifuna na u funa tshelede nga nḓila yo teaho, u ḓimvumvusa nga nḓila yo teaho na zwone a zwo ngo khakhea. Yehova ha ṱoḓi uri ri si ḓiphine kana u sa ita zwithu zwine zwa nga ita uri ri takale. Bivhili i ṱuṱuwedza vhashumeli vha Mudzimu vha fhulufhedzeaho uri: “Nḓarie-ha! U ḽe vhuswa hau wó takala, U nwe tuvhu ḽau wó rula mbilu.”—Muh. 9:7.

15. Zwi amba mini u “funa miḓifho”?

 ¹⁵ Luṅwalo lwa 2 Timotheo 3:4 lu amba nga ha vhathu vhane vha funa miḓifho nṱhani ha u funa Mudzimu. Muṅwe mugudi o ṅwala uri: “Yeneyi [ndimana] a i ambi uri vha funa Mudzimu na zwiṱuku-ṱuku. Fhedzi i amba uri a vha funi Mudzimu na luthihi.” Yeneyi ndi tsivhudzo ya ndeme kha vhane vha funesa miḓifho! Maipfi ane a ri “vhane vha funa miḓifho,” a ambela kha vhane vha “tsikeledzwa nga . . . madakalo a vhutshilo.”—Luka 8:14.

16, 17. Yesu o ri vhetshela tsumbo ifhio malugana na u ḓimvumvusa?

¹⁶ Yesu o sumbedza u vha na mavhonele o linganyiselwaho nga ha u ḓimvumvusa. O ya kha “munyanya wa mbingano” na kha “tshimima tshihulu.” (Yoh. 2:1-10; Luka 5:29) Musi waini yo fhela munyanyani, o shandula maḓi a vha waini nga lwa vhuṱolo. Kha tshiṅwe tshiitea, musi vhathu vha tshi sasaladza Yesu nga ha uri u ḽesa na u nwesa, o zwi bvisela khagala uri vhenevho vhathu vho vha vhe si na mavhonele o linganyiselwaho.—Luka 7:33-36.

¹⁷ Naho zwo ralo, Yesu ho ngo ḓidzhenisesa kha miḓifho. O vhea Yehova u thoma vhutshiloni hawe na u ita zwoṱhe zwine a nga kona u itela u thusa vhaṅwe. O vha o ḓiimisela u fa lufu lu vhavhaho kha danda ḽa tshengedzo u itela uri vhathu vhanzhi vha tshidzwe. Yesu o vhudza vhane vha ṱoḓa u tevhela tsumbo yawe, a ri: “Ni takale musi vhathu vha tshi ni sema na u ni tovhola, vha tshi ni pomoka vhuvhi hoṱhe hu u zwifha nga nṱhani ha dzina ḽanga. Takalani ni pembele, ngauri malamba aṋu ndi manzhi ngei ṱaḓulu, na vhaporofita vhe vha vha hone phanḓa haṋu vho ḓi vha tovhola.”—Mat. 5:11, 12.

18. Ndi mbudziso dzifhio dzine dza ḓo ri thusa u ḓivha nḓila ine ra funa ngayo vhuḓimvumvusi?

¹⁸ Ndi mini zwine zwa nga ri thusa u ḓivha nḓila ine ra funa ngayo vhuḓimvumvusi? Zwi ḓo vha zwavhuḓi u ḓivhudzisa uri: ‘Naa u ḓimvumvusa ndi zwa ndeme u fhira u ya miṱanganoni na u ya vhuḓinḓani ha tsimu? Naa ndo ḓiimisela u ḓidzima zwiṅwe zwithu zwine nda zwi funesa nga nṱhani ha uri ndi ṱoḓa u shumela Mudzimu? Musi ndi tshi khetha vhuḓimvumvusi, naa ndi a humbula nga ha nḓila ine Yehova a ḓo dzhia ngayo phetho dzanga?’ Arali ri tshi funa Mudzimu zwa vhukuma, a ri nga ḓo iledza fhedzi zwithu zwine ra ḓivha uri a zwi takadzi Mudzimu, fhedzi ri ḓo iledza na zwine ra vhona u nga zwi nga si mu takadze.—Vhalani Mateo 22:37, 38.

19. Ndi vhafhio vhane vha sa ḓo vhuya vha vuwa vho takala zwa vhukuma?

¹⁹ Shango ḽa Sathane ḽo shengedza vhathu lwa miṅwaha i ṱoḓaho u vha 6 000 nahone ḽi tsini na u fheliswa. Ḽifhasi ḽo ḓala nga vhathu vhane vha funa vhone vhaṋe fhedzi, vhane vha funesa tshelede na miḓifho. Vhenevho ndi vhathu vho ḓiimiselaho u wana zwine vha zwi ṱoḓa nahone zwine vha zwi funesa ndi zwone zwine zwa ḓa u thoma vhutshiloni havho. Vhenevho vha nga si vhuye vha vuwa vho takala zwa vhukuma. Nṱhani hazwo, mupsalme o ṅwala uri: ‘Hu takala ane Mudzimu wa Yakobo a vha Mutshidzi wawe, fulufhelo ḽawe a ri ndi Yehova Mudzimu wawe.’—Ps. 146:5.

20. U funa Mudzimu zwo ita hani uri ni takale?

²⁰ Lufuno lune vhathu vha Yehova vha vha nalwo lu khou titima nahone ṅwaha muṅwe na muṅwe vhathu vhanzhi vha ḓivha Yehova na u mu funa. Zwenezwi zwi sumbedza uri Muvhuso wa Mudzimu u khou vhusa nahone hu si kale u ḓo ḓisa phaṱhutshedzo nnzhi kha ḽifhasi. Ri nga wana dakalo ḽa vhukuma na ḽa tshoṱhe nga u ita zwine Mudzimu a zwi funa na u ḓivha uri ri ita zwine zwa mu takadza. Nahone vhane vha funa Yehova vha ḓo takala u ya nga hu sa fheli! Kha thero i tevhelaho, ri ḓo haseledza nga ha vhuṅwe vhuḓifari vhune ha bveledzwa nga u vha na lufuno lwa tseḓa nahone ri ḓo vhona nḓila ine honoho vhuḓifari ha fhambana ngayo na vhuḓifari vhune vhashumeli vha Mudzimu vha vha naho.