NGA dzi 24 January 2018 nga Ḽavhuraru nga matsheloni, muṱa wa Bethele ya United States na Canada wo takalela u pfa nḓivhadzo yo khetheaho ine ya ri: Wahashu Kenneth Cook, Jr., ndi muṅwe wa Tshigwada Tshi Langaho tsha Ṱhanzi dza Yehova.

Wahashu Cook o bebelwa na u alutshela ngei Pennsylvania, U.S.A. O guda ngoho kha muthu we a vha a tshi dzhena nae kilasini musi a sa athu u phasa sekondari nahone o lovhedziwa nga ḽa 7 June 1980. O vha muvulanḓila wa tshifhinga tsho ḓalaho nga ḽa 1 September 1982. Musi o no vula nḓila lwa miṅwaha mivhili, o humbelwa uri a ye Bethele nahone o thoma u shuma Bethele ya Wallkill, New York nga ḽa 12 October 1984.

Lwa miṅwaha ya 25, Wahashu Cook o shuma kha mihasho yo fhambanaho, u katela na hune ha gandiswa hone bugu na u shuma Bethel Office. O vhingana na Jamie nga 1996 nahone Jamie a ya a shuma nae Bethele ya Wallkill. Nga December 2009, Wahashu Cook na mufumakadzi wawe vho humbelwa uri vha ye Watchtower Educational Center ngei Patterson, New York, he Wahashu Cook a shuma kha Muhasho wa u Ṅwala. Nga April 2016, musi vho no humela ngei Wallkill, vho humbelwa uri vha ye ngei Brooklyn, New York. Nga murahu ha miṅwedzi miṱanu, vho pfulutshela ofisini khulwane dza davhi ngei Warwick, New York. Nga January 2017, Wahashu Cook o vhewa uri a vhe muthusi wa Komiti ya u Ṅwala ya Tshigwada tshi Langaho.