Naho Vhakriste vha tshi nga dzhia vhukando ho engedzeaho u itela u ḓitsireledza, vha ita zwenezwo vha tshi humbula nga ha zwilinganyo zwo ṅwalwaho Bivhilini. Zwenezwi zwilinganyo zwi lwisana na u shumiswa ha zwihali zwi ngaho zwigidi, dzi-rifle kana miṅwe mifuda ya zwigidi u itela u ḓitsireledza kha vhaṅwe vhathu. Ṱhogomelani zwi tevhelaho:

Kha Yehova, vhutshilo—zwihuluhulu vhutshilo ha vhathu—ndi vhukhethwa. Mupsalme Davida o vha a tshi zwi ḓivha uri Yehova ndi “tshisima tsha vhutshilo.” (Ps. 36:9) Nga zwenezwo, arali Mukriste a khetha u dzhia vhukando ha u ḓitsireledza kana u tsireledza thundu yawe, u ḓo ita zwoṱhe zwine a nga kona u itela u iledza u sa vhulaha muthu na u vha na mulandu wa malofha.—Doit. 22:8; Ps. 51:14.

Naho u shumisa tshithu tshiṅwe na tshiṅwe zwi tshi nga ita uri hu shuluwe malofha, zwigidi zwi ita uri zwi leluwe u vhulaha muthu—u songo ḓiimisela kana nga ho livhaho. * Zwiṅwe hafhu, arali muvutsheli a tshi vhona uri hu na muthu ane a vha na tshigidi, honoho vhuimo vhu nga kha ḓi bva nnḓa ha tshanḓa nahone zwi nga kha ḓi itea ha fa muthu.

Musi Yesu a tshi vhudza vhatevheli vhawe uri vha fare banga vhusikuni ha musi a sa athu u fa, ho ngo amba zwenezwo u itela uri vha ḓitsireledze. (Luka 22:36, 38) Nṱhani hazwo, Yesu o vha a tshi ṱoḓa u gudisa vhatevheli vhawe ngudo ya uri vha sa ite zwa vhuvemu, naho vho sedzana na tshigwada tsho faraho zwihali. (Luka 22:52) Musi Petro a tshi  shumisa tshiṅwe tsha tshihali tshawe kha phuli ya tshifhe muhulu, Yesu o kaidza Petro a ri: “Vhuyedzedza banga ḽau vhudzuloni haḽo.” Nga murahu, Yesu o amba nga ha zwilinganyo zwine zwa livhisa na vhatevheli vhawe ṋamusi: “Vhoṱhe vhane vha fara mabanga vha ḓo fa nga banga.”—Mat. 26:51, 52.

Samusi zwo dzula zwo ambiwa kha Mixa 4:3, vhathu vha Mudzimu “vha ḓo a fululula [mapfumo avho] vha ita malembe, dzinthi vha ita khwea.” Vhakriste vha vhukuma vha ḓivhiwa sa vhadzia-mulalo nahone vha tevhela ndaela ye Mudzimu a i ṋea a tshi shumisa muapostola Paulo ya uri: “Ni songo lifhedza vhuvhi nga vhuvhi. . . . Arali zwi tshi konadzea, zwi tshi ḓitika nga vhuimo haṋu, ivhani na mulalo na vhathu vhoṱhe.” (Vharoma 12:17, 18) Hu sa londwi thaidzo nnzhi dze Paulo a sedzana nadzo, u katela na ‘khombo dza mavemu,’ o tshila u tendelana na maipfi awe, ho ngo vhuya a ita uri nḓila ine a ḓitsireledza ngayo i fhire zwilinganyo zwi re Maṅwaloni. (2 Vhakor. 11:26) Nṱhani hazwo, o vha a tshi fulufhela Mudzimu na vhuṱali vhu bvaho Ipfini ḽawe—vhuṱali vhune ha “fhira mafumo.”—Muh. 9:18.

Vhakriste vha dzhia vhutshilo vhu ha ndeme u fhira zwithu zwi vhonalaho. “Vhutshilo. . . . a vhu ḓitiki nga thundu ine [muthu] a vha nayo.” (Luka 12:15) Nga zwenezwo, arali u amba nga nḓila ya vhuthu na muvutsheli o faraho tshigidi zwi sa shumi, ri tevhela nyeletshedzo ya Yesu ine ya ri: “Ni songo hanedza muvhi.” Zwenezwi zwi amba uri ri ḓo mu ṋea tshiṅwe na tshiṅwe tshine a tshi ṱoḓa. (Mat. 5:39, 40; Luka 6:29) * Ndi zwa ndeme u iledza u ḓivhea khomboni kha tshigevhenga. Arali ra iledza “u ṱongisa zwine [ra] vha nazwo” nahone ri tshi ḓivhiwa nga vhahura vhashu sa Ṱhanzi dza Yehova dzine dza vha na mulalo, zwenezwo zwi nga ri thusa uri ri si dzhenelwe nga zwigevhenga.—1 Yoh. 2:16; Mir. 18:10.

Vhakriste vha ṱhonifha luvalo lwa vhaṅwe. (Vharoma 14:21) Arali zwa nga ḓivhea uri muraḓo wa tshivhidzo u na tshigidi tsha u ḓitsireledza kha vhaṅwe vhathu, vhaṅwe vhatendi ngae vha nga mangala na u khukhulisea. Lufuno lu ri ṱuṱuwedza uri ri vhee dzangalelo ḽa vhaṅwe u thoma u fhira ḽashu, naho zwenezwo zwi tshi amba u litsha zwithu zwine ra zwi vhona zwo ri lugela.—1 Vhakor. 10:32, 33; 13:4, 5.

Vhakriste vha lwela u vha tsumbo yavhuḓi. (2 Vhakor. 4:2; 1 Pet. 5:2, 3) Musi Mukriste o no wana nyeletshedzo i bvaho Maṅwaloni, arali a bvela phanḓa e na tshigidi u itela u ḓitsireledza kha vhaṅwe vhathu, a nga si dzhiiwe e tsumbo yavhuḓi. Nga zwenezwo, u vha a si tsha fanelea u hwala vhuḓifhinduleli kana ndugelo dzo khetheaho tshivhidzoni. Zwenezwo zwi shuma na kha Vhakriste vhane vha fara tshigidi mushumoni wavho wa u ḓitshidza. Zwi nga vha khwine vhukuma arali a ṱoḓa muṅwe mushumo! *

Mukriste u fanela u ḓikhethela nḓila ya u ḓitsireledza, u tsireledza muṱa kana thundu yawe u katela na hune a ṱoḓa u shuma hone. Fhedzi musi a tshi ita zwenezwo, zwi fanela u tshimbidzana na zwilinganyo zwa Mudzimu na u funa vhaṅwe. Nga nṱhani ha zwenezwo zwilinganyo, Vhakriste vho vhibvaho vha khetha u sa vha na tshigidi u itela u ḓitsireledza kha vhaṅwe. Vha a ḓivha uri tsireledzo ya vhukuma na ya tshoṱhe ndi ya vhane vha sumbedza u fulufhedzea kha Mudzimu na u tshila u tendelana na zwilinganyo zwa Bivhili.—Ps. 97:10; Mir. 1:33; 2:6, 7.