Salomo khotsi a Rehabeamu vho vhusa Isiraele miṅwaha ya 40. (1 Dzikh. 11:42) Salomo o lovha nga 997 B.C.E. Nga zwenezwo, Rehabeamu o tshimbila u bva devhula ha Yerusalema a tshi ya Shikeme u itela u vha khosi. (2 Koron. 10:1) Naa ni vhona u nga o vha a tshi khou vhilaela nga ha u tevhela ṋayo dza Salomo we a vha tshi ḓivhiwa sa munna o ṱalifhaho? Nga u ṱavhanya, Rehabeamu o vha a tshi fanela u sumbedza uri o ṱalifha lungafhani lune a nga kona u tandulula thaidzo.

Nga nṱhani ha uri Vhaisiraele vho vha vho tsikeledzea, vho rumela vha ambeli uri vha ye u amba na Rehabeamu nga ha zwine vha ṱoḓa a tshi zwi ita: “Khotsi-au o ri hwesa dzhogo i konḓaho. Iwe zwino fhungudza mishumo ya khotsi-au, na dzhogo ye ya ri lemela ye a vha a tshi i vhea kha riṋe; ndi hone ri tshi ḓo vha vhalanda vhau.”—2 Koron. 10:3, 4.

Rehabeamu o vha a tshi fanela u dzhia tsheo i konḓaho! Arali a vhe o ita zwithu zwine vhathu vha khou zwi ṱoḓa, zwo vha zwi tshi khou amba uri ene na muṱa wawe na vhathu vhe vha vha vha tshi dzula pfamoni, vho vha vha tshi ḓo tshila vha si na zwiṅwe zwithu zwa maṱeleṱele zwe vha vha vho ḓowela u vha nazwo. Arali a vhe o hana u zwi ita, vhathu vho vha vha tshi nga kha ḓi mu shandukela. O vha a tshi ḓo ita mini? Rehabeamu we a vha a tshi kha ḓi tou bva u vha khosi o amba na vhanna vhahulwane vhe vha vha vha tshi eletshedza Salomo. Naho zwo ralo, Rehabeamu o dzhia nyeletshedzo ya vhanna vhaṱuku vhane vha lingana nae. Rehabeamu o shumisa nyeletshedzo yavho nahone a dzhia phetho ya u fara vhathu nga nḓila ya tshiṱuhu. O ri: “Arali dzhogo ya khotsi-anga yó no ni lemela, nṋe yanga i ḓo lemelesa. Khotsi-anga o ni rwa nga ṱhamu, nṋe ndi ḓo ni rwa nga phamba.”—2 Koron. 10:6-14.

Naa hu na zwine ra zwi guda? Zwi tou vha khagala uri u thetshelesa vhathu vhahulwane zwi ita uri ni vhe na vhuṱali. Ṋamusi hu na vhaaluwa vhanzhi vhane ndi kale vha tshi khou shumela Mudzimu nahone vha nga ri ṋea nyeletshedzo yavhuḓi na u ri thusa uri ri dzhie phetho dzavhuḓi.—Yobo 12:12.

Rehabeamu o kuvhanganya mmbi yawe u itela u lwa na mashandukwa. Fhedzi Yehova o dzhenelela a tshi shumisa muporofita Semaya, o ri: “Ni songo bva pfumo na yoˈ lwa na vha haṋu, Vha-Isiraele. Vhuyelelani noṱhe mahayani aṋu; ngauri aya mafhungo a tshi itea zwi bva ha Nṋe.”—1 Dzikh. 12:21-24. *

Naa zwo vha zwo lelutshela Rehabeamu uri a thetshelese Yehova? Edzani u humbula nḓila ye zwenezwo zwithu zwa tsikeledza ngayo Rehabeamu! Vhathu vha nga vha vho humbula mini nga ha khosi? Yo vha yo vha vhudza uri i ṱoḓa u vha rwa nga “phamba,” fhedzi ho vha hu si na tshine ya ḓo tshi ita nga ha honoho vhushandukwa. (vhambedzani 2 Koronika 13:7.) Naho zwo ralo, khosi na maswole ayo “vha ri u pfa ḽeneḽo ḽa Yehova vha vhuyelela hayani, vha tshi tevhedza zwe Yehova a amba.”

Ri guda mini? Ndi vhuṱali u thetshelesa Mudzimu naho u ita zwenezwo zwi tshi nga ita uri ri kolelwe. U thetshelesa zwi ita uri Mudzimu a ri takalele na u ri fhaṱutshedza.—Doit. 28:2.

Ho itea mini kha Rehabeamu? O vha a tshi kha ḓi vha khosi ya Yuda na Benyamini nahone o dzhia phetho ya u fhaṱa miḓi miswa. O dovha a fhaṱa miṅwe miḓi “yo khwaṱhaho zwihulu.” (2 Koron. 11:5-12) Tsha ndeme vhukuma ndi uri o vha a tshi vho thetshelesa milayo ya Yehova. Musi tshaka dza fumi dza muvhuso wa Isiraele dze dza vha dzi tshi khou vhuswa nga Yerobeamu dzi tshi thoma u gwadamela midzimu ya zwifanyiso, vhathu vhanzhi vha henefho vho ya Yerusalema u itela u “tikedza Rehabeamu” na u imelela vhurabeli ha ngoho. (2 Koron. 11:16, 17) U thetshelesa ha Rehabeamu zwo khwaṱhisa vhuhosi hawe.

Musi muvhuso wa Rehabeamu wo no khwaṱha, o ita zwithu zwi songo ḓoweleaho. O litsha u tevhela mulayo wa Yehova a tshi khou itela u gwadamela zwifanyiso! Ndi ngani? Naa o vha a tshi khou ṱuṱuwedziwa nga mme awe vhe vha vha vhe Mu-Amoni? (1 Dzikh. 14:21) Hu sa londwi uri o vha a tshi khou ṱuṱuwedzwa nga mini, lushaka lwoṱhe lwo mu tevhela. Nga zwenezwo, Yehova o tendela Sisaka khosi ya Egipita a tshi thuba miḓi minzhi ya Yuda hu sa londwi uri Rehabeamu o vha o i fhaṱa ya khwaṱha lungafhani!—1 Dzikh. 14:22-24; 2 Koron. 12:1-4.

Zwithu zwo ḓa zwa vhifha tshoṱhe musi Sisaka a tshi vutshela Yerusalema he Rehabeamu a vha a tshi vhusa e hone. Musi zwenezwo zwi tshi itea, muporofita Semaya o ya ha Rehabeamu na kha vhahulwane u itela u vha vhudza nga ha mulaedza wa Mudzimu une wa ri: “Inwi no ndaṱa, na Nṋe ndo ni laṱa-vho nda ni kumedzela zwanḓani zwa Sisaka.” Rehabeamu o ita mini musi a tshi pfa wonoyo mulaedza wa khaṱulo? O ḓiṱukufhadza! Bivhili i ri: “Vhahulwane vha Isiraele na yone khosi vha mbo ḓi-vhuyedza vha ri: Yehova u ita zwe zwa ri fanela.” Nga zwenezwo, Yehova o tsireledza Rehabeamu na muḓi wa Yerusalema uri u si fheliswe.—2 Koron. 12:5-7, 12.

Nga murahu ha zwenezwo, Rehabeamu o bvela phanḓa a tshi vhusa muvhuso wa tshipembe. Musi a sa athu u lovha, o ṋea vharwa vhawe zwifhiwa. O vha a tshi khou ṱoḓa u vha na vhungoho ha uri vha sa shandukele murwa wawe Abia we a vha a tshi khou ḓo vha khosi. (2 Koron. 11:21-23) Nga u ita zwenezwo, Rehabeamu o sumbedza u vha na vhuṱali zwithu zwe a kundelwa u zwi sumbedza mathomoni.

Rehabeamu ho ngo takalelwa nga Mudzimu naho o lingedza u ita zwithu zwavhuḓi. Bivhili i ri: “O ita zwivhi.” Ndi ngani? Ngauri ho ngo “[khwaṱhisa] mbilu yawe a ṱoḓa Yehova.”—2 Koron. 12:14.

Ri guda mini kha zwithu zwo iteaho vhutshiloni ha Rehabeamu? Rehabeamu o thetshelesa Mudzimu nga zwiṅwe zwifhinga. O itela lushaka lwa Yehova zwithu zwavhuḓi. Fhedzi o kundelwa u vha na vhushaka ha tsini na Yehova kana u lwela u mu takadza. Nga zwenezwo, o ita zwithu zwivhi na u ṱanganela kha vhurabeli ha mazwifhi. Ni nga ḓivhudzisa uri: ‘Musi Rehabeamu a tshi tenda u kaidzwa nga Mudzimu, naa o vha a tshi khou ṱuṱuwedziwa nga vhaṅwe nṱhani ha u ḓisola zwi tshi bva mbiluni na u ṱoḓa u takadza Mudzimu?’ (2 Koron. 11:3, 4; 12:6) Musi  vhutshilo vhu tshi khou ḓi bvelaphanḓa o dovha a ita zwithu zwivhi. O vha o fhambana vhukuma na Khosi Davida we a vha e makhulu wawe! Ndi ngoho uri Davida o ita vhukhakhi, fhedzi Yehova o vha a tshi mu funa, o vha o ḓiṋekedzela kha vhurabeli ha ngoho nahone o rembuluwa zwi tshi bva mbiluni kha zwivhi zwe a zwi ita.—1 Dzikh. 14:8; Ps. 51:1, 17; 63:1.

Ri nga guda kha tsumbo ya Rehabeamu. Zwi a khoḓea u vhona vhathu vha tshi ṱunḓela miṱa yavho na u lwela u khunyeledza zwiṅwe zwithu zwavhuḓi. Fhedzi u itela uri ri takalelwe nga Mudzimu, tsha u thoma, ri fanela u tikedza vhurabeli ha ngoho na u farelela khaho.

Ri nga ita zwenezwo arali ri tshi funa Yehova zwi tshi bva mbiluni. Samusi ri tshi khuṱhedza mulilo u itela uri u dzule u tshi khou duga, ri fanela u dzula ri tshi ita uri u funa hashu Mudzimu hu si fhungudzee. Ri nga ita zwenezwo nga u vhala Bivhili tshifhinga tshoṱhe, u elekanya nga ha zwe ra zwi vhala na u rabela zwi tshi bva mbiluni. (Ps. 1:2; Vharoma 12:12) U funa hashu Yehova zwi ḓo ita uri ri ṱoḓe u mu takadza kha zwoṱhe zwine ra zwi ita. Zwi ḓo dovha zwa ita uri ri ḓisole zwi tshi bva mbiluni. U fhambana na Rehabeamu, ri ḓo dzula ro farelela kha vhurabeli ha ngoho.—Yuda 20, 21.