1. Ndi ifhio pfaneleo yavhuḓi ine Yesu a vha nayo? Ṱalutshedzani.

PFANELEO yavhuḓi ine Yesu a vha nayo ndi vhukoni ha u pfesesa thaidzo dzine ra vha nadzo ngauri a ro ngo fhelela. Musi Yesu e kha ḽifhasi, o vha a tshi “[takala] na vho takalaho” na u “[lila] na vhane vha lila.” (Vharoma 12:15) Sa tsumbo, musi vhafunziwa vha Yesu vha 70 vha tshi vhuya vhe na dakalo vha tshi khou bva u huwelela, “muya mukhethwa [wo] mu ita uri a takale.” (Luka 10:17-21) Kha ḽiṅwe sia, musi Yesu a tshi vhona nḓila ye lufu lwa Lazaro lwa kwama ngayo vhane vha mu funa, zwo “mu vhaisa a ṱungufhala zwihulu.”—Yoh. 11:33.

2. Ndi mini zwo thusaho Yesu uri a pfele vhuṱungu?

² Ndi mini zwo thusaho onoyo munna o fhelelaho uri a khathutshele nahone a pfele vhuṱungu vhathu vha songo fhelelaho? Tsha ndeme vhukuma, Yesu o vha a tshi funa vhathu. Samusi zwo sumbedzwa kha thero yo fhiraho, o vha a “tshi takalela vhana vha vhathu.” (Mir. 8:31) U funa hawe vhathu zwo ita uri a kone u ḓivha khwine nḓila ine vhathu vha humbula ngayo. Muapostola Yohane o ri: “O vha a tshi ḓivha zwi re mbiluni dza vhathu.” (Yoh. 2:25) Yesu o vha a tshi pfela vhaṅwe vhuṱungu. Vhathu vho kwamea nga lufuno lwe a vha e nalwo nahone vha ṱanganedza mulaedza wa Muvhuso. Nga nḓila i fanaho, arali ri tshi pfela vhuṱungu ri ḓo kona u thusa vhathu musi ri tshi huwelela khavho.—2 Tim. 4:5.

3-4. (a) Arali ri tshi pfela vhuṱungu, ri ḓo dzhia hani vhuḓinḓa hashu? (b) Ri ḓo ṱolisisa mini kha ino thero?

³ Muapostola Paulo o vha a tshi zwi ḓivha uri u na vhuḓifhinduleli ha u huwelela nahone na riṋe ri na vhuḓifhinduleli vhu fanaho. (1 Vhakor. 9:16) Naho zwo ralo, arali ri tshi pfela vhuṱungu, ri ḓo dzhia u huwelela zwi si muhwalo. Ri ḓo ṱoḓa u sumbedza uri ri na ndavha na vhathu nahone ri ṱoḓa u vha thusa. Ri a zwi ḓivha uri “u ṋea zwi ḓisa dakalo ḽihulu u fhira u ṋewa.”  (Mish. 20:35) Musi ri tshi huwelela nga nṱhani ha uri ri khou ṱoḓa u thusa vhathu, ri ḓo takalela u huwelela nga ho engedzeaho.

⁴ Kha ino thero, ri ḓo ṱolisisa uri ri nga sumbedza hani u pfela vhuṱungu vhuḓinḓani. Kha ri thome nga u ṱolisisa zwine ra nga zwi guda kha nḓila ye Yesu a ḓipfa ngayo nga ha vhathu. Ri ḓo dovha ra ṱolisisa nḓila nṋa dzine ra nga edzisa ngadzo tsumbo yawe.—1 Pet. 2:21.

5-6. (a) Ndi vhafhio vhe Yesu a vha pfela vhuṱungu? (b) Samusi Yesaya 61:1, 2 yo dzula yo amba, ndi ngani Yesu o pfela vhuṱungu vhathu vhe a huwelela khavho?

⁵ Ṱhogomelani tsumbo ye Yesu a sumbedza ngayo u pfela vhuṱungu. Kha tshiṅwe tshiitea, Yesu na vhaapostola vhawe vho vha vha tshi khou huwelela mafhungo maḓifha vha sa khou awela. Vho vha vha si na na ‘tshifhinga tsha u ḽa.’ Ngauralo, Yesu o dzhia vhaapostola vhawe ‘vha ṱuwa vhe vhoṱhe vha ya fhethu hu re thungo’ u itela u “awelenyana.” Naho zwo ralo, gogo ḽa vhathu ḽo gidimela he Yesu na vhafunziwa vhawe vha vha vha tshi khou ya hone. Yesu o ita mini musi a tshi vhona gogo ḽa vhathu ḽe ḽa vha ḽi henefho? O “ḽi pfela vhuṱungu * ngauri ḽo vha ḽi tshi tou nga nngu dzi si na mulisa. A thoma u vha funza zwithu zwinzhi.”—Marko 6:30-34.

⁶ Ndi ngani Yesu o vha pfela vhuṱungu? O ṱhogomela uri vhathu vho vha vha tshi “tou nga nngu dzi si na mulisa.” Khamusi Yesu o vhona uri vho vha vha tshi tambula nahone vha tshi shuma tshifhinga tshilapfu u itela u ṱunḓela miṱa yavho. Khamusi vhaṅwe vho vha vho felwa nga vhafunwa vhavho. Arali zwo ralo, Yesu o vha a tshi pfesesa vhuimo havho. Samusi zwo sumbedzwa kha thero yo fhiraho, Yesu a nga vha o sedzana na vhuimo vhu fanaho. Yesu o vha a tshi pfela vhaṅwe vhuṱungu nahone zwenezwo zwo ita uri a vha khuthadze.—Vhalani Yesaya 61:1, 2.

7. Ri nga edzisa hani tsumbo ya Yesu?

 ⁷ Ri guda mini kha tsumbo ya Yesu? U fana na Yesu, ro tangwa nga vhathu vhane vha “tou nga nngu dzi si na mulisa.” Vha na thaidzo nnzhi. Ri na zwine vha zwi ṱoḓa—mulaedza wa Muvhuso wa Mudzimu. (Nzumb. 14:6) Ri huwelela mafhungo maḓifha nga nṱhani ha uri ri “khathutshela vhaṱoma na vhatshinyali” nahone ri vha ri tshi khou edzisa Yesu. (Ps. 72:13) Ri pfela vhathu vhuṱungu nahone ri ṱoḓa u ita zwiṅwe zwithu u itela u vha thusa.

8. Ri nga sumbedza hani u pfela vhuṱungu musi ri vhuḓinḓani? Fanyisani.

⁸ Ndi mini zwine zwa nga ri thusa uri ri sumbedze u pfela vhuṱungu vhane ra huwelela khavho? Ri ṱoḓa u ḓivhea kha vhuimo ha vhathu vhane ra ṱangana navho vhuḓinḓani na u vha fara nga nḓila ye ra vha ri tshi ḓo ṱoḓa u farwa ngayo. * (Mat. 7:12) Kha ri ṱhogomele nḓila nṋa dzine dza nga ri thusa u ita zwenezwo. Ya u thoma, humbulani nga ha ṱhoḓea dza muṅwe na muṅwe. Musi ri tshi huwelela, ri nga fanyisa mushumo washu na wa dokotela. Dokotela wavhuḓi u ṱhogomela ṱhoḓea dza mulwadze muṅwe na muṅwe. U vhudzisa mbudziso na u thetshelesa nga vhuronwane musi mulwadze a tshi ṱalutshedza nḓila ine a khou ḓipfa ngayo. Nṱhani ha u ṋea mulwadze mushonga muṅwe na muṅwe une a u ḓivha, a nga fhedza tshifhinga a tshi khou ṱola mulwadze nahone nga murahu a mu ṋea dzilafho ḽo teaho. Nga hu fanaho, a ro ngo tea u shumisa maitele a fanaho kha muṅwe na muṅwe ane ra ṱangana nae vhuḓinḓani. Nṱhani hazwo, ri tea u lingedza u pfesesa vhuimo ha muṅwe na muṅwe na nḓila ine a khou ḓipfa ngayo.

9. Ri tea u iledza mini? Ṱalutshedzani.

⁹ Musi ni tshi ṱangana na muthu vhuḓinḓani, ni tea u iledza u nga ni ḓivha vhuimo hawe, zwine a tenda khazwo na uri ndi ngani a tshi tenda khazwo. (Mir. 18:13) Nṱhani hazwo, vhudzisani mbudziso nga vhuṱali. (Mir. 20:5) Arali zwo tea u ya nga mvelele, vhudzisani nga ha mushumo, muṱa, zwe a ṱangana nazwo na mavhonele awe. Musi ri tshi vhudzisa mbudziso, ri vha ri tshi khou ita uri vha ri vhudze uri ndi ngani vha tshi ṱoḓa mafhungo maḓifha. Musi ro no ḓivha zwenezwo, ri ḓo kona u sumbedza u pfela vhuṱungu na u vha thusa u fana na zwe Yesu a ita.—Vhambedzani 1 Vhakorinta 9:19-23.

10-11. U ya nga 2 Vhakorinta 4:7, 8, ndi ifhio nḓila ya vhuvhili ine ra nga sumbedza ngayo u pfela vhuṱungu? Ṋeani tsumbo.

¹⁰ Ya vhuvhili, lingedzani u humbula uri vhutshilo havho vhu nga vha vhu hani. Ri nga lingedza u pfesesa vhuimo havho nga dziṅwe nḓila. Samusi ri songo fhelela, ri ṱangana na thaidzo dzi fanaho. (1 Vhakor. 10:13) Ri a zwi ḓivha uri vhutshilo kha tshino tshifhinga  vhu nga konḓa. Ri koniswa fhedzi nga thuso ya Yehova. (Vhalani 2 Vhakorinta 4:7, 8.) Lingedzani u humbula nga ha vhane vha si vhe na vhushaka ha tsini na Yehova. Zwi a vha konḓela u tshila kha ḽino shango vha sa thuswi ngae. U fana na Yesu, ri a vha pfela vhuṱungu nahone ri ṱoḓa u vha ḓivhadza “fhungo-ḽa-vhuḓi.”—Yes. 52:7.

¹¹ Ṱhogomelani tsumbo ya wahashu ane a pfi Sergey. Musi a sa athu guda ngoho, o vha e na ṱhoni nahone o fhumula. Zwo vha zwi tshi mu konḓela u amba na vhaṅwe vhathu. Nga u ya ha tshifhinga, o ṱanganedza pfunzo ya Bivhili. Sergey o ri: “Ndo guda uri Vhakriste vha tea u vhudza vhaṅwe zwine vha tenda. Ngoho ndi ya uri ndo vha ndi tshi tenda uri ndi nga si vhuye nda zwi kona.” Fhedzi o humbula nga ha vhane a vha athu vhuya vha pfa ngoho nahone a ṱhogomela uri vhutshilo havho vhu a konḓa ngauri a vha ḓivhi Yehova. O ri: “Zwithu zwe nda vha ndi tshi khou zwi guda zwo ita uri ndi takale nahone ndi vhe na mulalo. Ndo zwi ḓivha uri na vhaṅwe vha tea u guda ngoho.” Musi Sergey a tshi pfela vhuṱungu nga ho engedzeaho, o ṱhogomela uri o vha na tshivhindi tsho engedzeaho tsha u ya u huwelela. O dovha a ri: “Zwo mmangadzaho ndi uri musi ndi tshi amba na vhaṅwe vhathu nga ha Bivhili, zwo ita uri ndi ḓifulufhele. Nahone zwo dovha zwa ita uri ndi vhe na lutendo lwo khwaṱhaho.” *

12-13. Ndi ngani ri sa faneli u fhelela mbilu vhane ra huwelela khavho? Fanyisani.

¹² Ya vhuraru, ni songo fhelela mbilu vhane na huwelela khavho. Humbulani uri vha nga vha vha sa athu humbula nga ha ngoho ine ya vha Bivhilini ine riṋe ra i ḓivha zwavhuḓi. Nahone vhunzhi ha vhathu vho nambatela zwine vha tenda khazwo. Vha nga vhona u nga vhurereli havho ndi hone ha ndeme ngauri hu vha ita uri vha vhe tsini na miṱa yavho, mvelele na tshitshavha tsha havho. Ri nga vha thusa hani?

¹³ Humbulani nga ha tsumbo i tevhelaho: Hu itea mini kha buroho ya kale ine ya khou ṱoḓa  u lugiswa? Musi buroho ntswa i tshi khou fhaṱwa vhathu vha bvela phanḓa vha tshi khou shumisa ya kale. Musi buroho ntswa yo no fhela, ya kale i nga kha ḓi kwashiwa. Nga hu fanaho, musi ri sa athu humbela vhathu uri vha ṱutshele vhurereli havho ha “kale,” ri nga thoma nga u vha thusa uri vha ḓivhe na u funa ngoho “ntswa” ine ya vha Bivhilini ye vha vha vha sa i ḓivhi. Nga murahu, vha ḓo kona u ṱutshela zwe vha vha vha tshi tenda khazwo. Zwi nga dzhia tshifhinga u ita dzenedzo tshanduko.—Vharoma 12:2.

14-15. Ri nga thusa hani vhathu vhane vha ḓivha zwiṱuku kana vha sa ḓivhi tshithu nga ha fulufhelo ḽa u tshila tshoṱhe paradisoni kha ḽifhasi? Ṋeani tsumbo.

¹⁴ Arali ri sa fheleli mbilu vhathu vhane ra ṱangana navho vhuḓinḓani, a ri nga lavheleli uri vha pfesese kana u ṱanganedza ngoho ine ya vha Bivhilini musi vha tshi i pfa lwa u tou thoma. Nṱhani hazwo, u vha pfela hashu vhuṱungu zwi ri sudzulusela uri ri vha thuse u humbula nga vhuronwane nga ha zwine Bivhili ya zwi amba. Sa tsumbo, ṱhogomelani nḓila ine ra nga thusa ngayo muṅwe muthu uri a pfesese nga ha fulufhelo ḽa u tshila tshoṱhe paradisoni kha ḽifhasi. Vhunzhi ha vhathu vha ḓivha zwiṱuku kana a vha ḓivhi tshithu nga ha zwenezwi. Vha nga vha vha tshi tenda uri lufu ndi amba dzi fhele. Kana vha tshi humbula uri vhathu vhoṱhe vhane vha ita zwivhuya vha ḓo ya ṱaḓulu. Ri nga vha thusa hani?

¹⁵ Ṱhogomelani nḓila ine muṅwe wahashu wa tshinnani a thusa ngayo vhaṅwe vhuḓinḓani uri vha pfesese nga ha fulufhelo ḽa u tshila tshoṱhe kha ḽifhasi. U thoma nga u vhala Genesi 1:28. Nga murahu, u vhudzisa ṋemuḓi uri Mudzimu o vha a tshi khou ṱoḓa vhathu vha tshi dzula ngafhi na u tshila vhutshilo ha hani. Vhunzhi ha vhathu vha fhindula uri, “O vha a tshi ṱoḓa vha tshi dzula vho takala kha ḽifhasi.” Nga murahu, onoyo wahashu u vhala Yesaya 55:11 nahone a vhudzisa arali tshipikwa tsha Mudzimu tsho shanduka. Kanzhi ṋemuḓi uri hai. Mafheleloni, wahashu u vhala Psalme ya 37:10, 11 nahone a vhudzisa uri vhumatshelo vhu ḓo vha vhu hani. Musi a tshi shumisa Bivhili nga yeneyi nḓila, o thusa vhathu vhanzhi uri vha pfesese uri Mudzimu u khou ṱoḓa vhathu vho lugaho vha tshi tshila tshoṱhe Paradisoni kha ḽifhasi.

16-17. U ya nga Mirero 3:27, ndi dzifhio dziṅwe nḓila dzine ra nga sumbedza ngadzo u pfela vhuṱungu? Fanyisani.

¹⁶ Ya vhuṋa, humbulani nga ha zwine na nga ita u itela u sumbedza vhathu uri ni na ndavha navho. Sa tsumbo, naa ro dalela ṋemuḓi nga tshifhinga tshi si tshone? Ri nga humbela pfarelo nahone ra amba uri ri ḓo vhuya nga tshiṅwe tshifhinga. Hu pfi mini arali ṋemuḓi a tshi khou ṱoḓa uri ri mu thuse nga muṅwe mushumonyana? Hu pfi mini arali hu muthu ane a tea u dzula hayani nga nṱhani ha uri ha na mutakalo wavhuḓi kana a mulala a tshi khou ṱoḓa u itelwa zwiṅwe zwithu? Kha honoho vhuimo ri nga kona u thusa.—Vhalani Mirero 3:27.

¹⁷ Muṅwe wahashu wa tshifumakadzini o vha  na mbuyelo dzavhuḓi musi a tshi sumbedza vhuthu nga nḓila ye ya vha i tshi vhonala i si ya ndeme. O ṅwalela vhurifhi muṱa we wa lovhelwa nga ṅwana nahone zwenezwo o zwi itiswa nga nṱhani ha u pfela vhuṱungu. Vhurifhi ho vha hu tshi katela Maṅwalo ane a khuthadza. Wonoyo muṱa wo ḓipfa hani? Mme o lovhelwaho o ri: “Ndo vha ndo tsikeledzea mulovha. Vhurifhi he na ri ṅwalela hone ho ri thusa vhukuma. A thi ḓivhi uri ndi nga ni livhuwa hani kana u ṱalutshedza nḓila ye honoho vhurifhi ha ri kwama ngayo. Ndi nga vha ndo vhala honoho vhurifhi lu fhiraho 20 mulovha. Ho nkhuthadza na u nṱuṱuwedza nga nḓila i mangadzaho. Ri khou ni livhuwa zwi tshi bva mbiluni.” A zwi timatimisi uri ri nga vha na mbuyelo dzavhuḓi musi ri tshi ḓivhea kha vhuimo ha vhathu vhane vha khou tambula nahone ra ita zwiṅwe u itela u vha thusa.

18. U ya nga 1 Vhakorinta 3:6, 7, ndi ngani ri tshi ṱoḓa u vha na mavhonele o linganyiselwaho?

¹⁸ Ndi ngoho uri ri ṱoḓa u vha na mavhonele o linganyiselwaho musi ri vhuḓinḓani. Ri thusa vhathu uri vha gude nga ha Mudzimu, fhedzi a si riṋe vhane ra ita tshipiḓa tsha ndeme kha wonoyo mushumo. (Vhalani 1 Vhakorinta 3:6, 7.) Ndi Yehova ane a kokodzela vhathu khae. (Yoh. 6:44) Muthu muṅwe na muṅwe u ḓo landula kana u ṱanganedza mafhungo maḓifha zwi tshi ḓitika nga nḓila ine a khou ḓipfa ngayo. (Mat. 13:4-8) Humbulani uri vhunzhi ha vhathu a vho ngo ṱanganedza mulaedza wa Yesu naho o vha e Mufunzi muhulu we a vhuya a tshila. Nga zwenezwo, a ro ngo fanela u kulea nungo musi vhathu vhanzhi vhane ra lingedza u vha thusa vha sa thetshelesi mulaedza washu.

19. Ndi mbuyelo dzifhio dzine dza vha hone musi ri tshi sumbedza u pfela vhuṱungu vhuḓinḓani?

¹⁹ Ri ḓo vha na mbuyelo dzavhuḓi musi ri tshi sumbedza u pfela vhuṱungu vhuḓinḓani. Ri ḓo ḓiphina nga ho engedzeaho nga mushumo washu wa u huwelela. Ri ḓo vha na dakalo ḽihulwane ḽine ḽa ḓiswa nga u ṋea. Nahone ri ita uri zwi lelutshele vhane vha vha na “mavhonele o teaho uri vha wane vhutshilo vhu sa fheli” vha ṱanganedze mafhungo maḓifha. (Mish. 13:48) “Samusi ri na tshibuli, kha ri itele vhathu vhoṱhe zwivhuya.” (Vhagal. 6:10) Nga zwenezwo, ri ḓo takalela uri ro ṋea Khotsi ashu wa ṱaḓulu vhugala.—Mat. 5:16.