1. Ndi ngani Yesu o humbela Yehova uri a tsireledze vhatevheli vhawe?

KHA vhusiku hawe ha u fhedzisela musi e kha ḽifhasi, Yesu o vha a tshi khou humbula nga ha thaidzo dzoṱhe dze vhatevheli vhawe vha vha vha tshi ḓo sedzana nadzo. Yesu o vha a tshi funa vhatevheli vhawe nga maanḓa, ndi ngazwo o humbela Khotsi awe uri a “vha tsireledze kha muvhi.” (Yoh. 17:14, 15) O vha a tshi zwi ḓivha uri hu si kale u ḓo humela ṱaḓulu na uri Saṱhane Diabolo u ḓo bvela phanḓa a tshi lwa na vhathu vhane vha ṱoḓa u shumela Yehova. Zwi tou vha khagala uri vhathu vha Yehova vho vha vha tshi ḓo ṱoḓa u tsireledzwa.

2. Ri nga vha hani na vhungoho ha uri Yehova u ḓo fhindula thabelo dzashu?

² Yehova o fhindula thabelo ya Yesu ngauri o vha a tshi mu funa. Arali ra nga lingedza nga nḓila dzoṱhe u ita zwine zwa takadza Yehova, na riṋe u ḓo ri funa na u fhindula thabelo dzashu musi ri tshi ṱoḓa u thusiwa na u tsireledzwa. Yehova ndi Khotsi a re na lufuno. Nga zwenezwo, u ḓo bvela phanḓa a tshi tsireledza vhana vhawe. Arali a sa ita nga u ralo, dzina ḽawe ḽi ḓo nyadziwa.

3. Ndi ngani ri tshi ṱoḓa u tsireledzwa nga Yehova ṋamusi?

³ Ri ṱoḓa Yehova a tshi ri tsireledza u fhira naho hu lini. Saṱhane o pandelwa ṱaḓulu “e na mbiti khulu.” (Nzumb. 12:12) O ita uri vhaṅwe vhathu vha humbule uri musi vha tshi ri tovhola vha khou “itela Mudzimu mushumo mukhethwa.” (Yoh. 16:2) Na vhaṅwe vhane vha si tende uri Mudzimu u hone vha ri tovhola ngauri vha vhona ri sa fani na vhathu vha ḽino shango. Hu sa londwi uri vhathu vha itiswa ngani musi vha tshi ri tovhola, riṋe a ri ofhi. Ndi ngani? Ndi ngauri Ipfi ḽa Mudzimu  ḽi ri: “Murena u a fhulufhedzea, u ḓo ni khwaṱhisa na u ni tsireledza kha muvhi.” (2 Vhathes. 3:3) Yehova u ri tsireledza hani? Ri ḓo amba nga ha nḓila mbili dzine a zwi ita ngadzo.

4. U ya nga Vhaefesa 6:13-17, Yehova o ri ṋea mini u itela u ri tsireledza?

⁴ Yehova o ri ṋea zwithu zwa u ḓitsireledza nndwani zwine zwa nga ri tsireledza musi Saṱhane a tshi ri ṱhasela. (Vhalani Vhaefesa 6:13-17.) Zwenezwi zwithu zwo khwaṱha nahone zwi a shuma zwavhuḓi. Fhedzi u itela uri zwi kone u ri tsireledza, ri fanela u zwi shumisa zwoṱhe nahone tshifhinga tshoṱhe. Zwenezwi zwithu ndi mini? Kha ri haseledze nga hazwo.

5. Bannda ḽi imela mini nahone ndi ngani ri tshi fanela u ḽi vhofha?

⁵ Bannda ḽi imela ngoho ine ya wanala Bivhilini. Ndi ngani ri tshi fanela u ḓivhofha nga ḽeneḽi bannda? Ndi ngauri Saṱhane ndi “khotsi a vhane vha zwifha.” (Yoh. 8:44) Ndi kale Saṱhane a tshi zwifha nahone o no “xedza ḽifhasi ḽoṱhe.” (Nzumb. 12:9) Fhedzi ngoho i wanalaho Bivhilini i a ri tsireledza uri ri si fhurwe. Ri vhofha hani ḽeneḽi bannda ḽa ngoho? Ri zwi ita nga u guda nga ha Yehova, u mu gwadamela nga “muya na ngoho,” na nga u fhulufhedzea kha zwithu zwoṱhe.—Yoh. 4:24; Vhaef. 4:25; Vhahev. 13:18.

6. Tshithu tsha u tsireledza khana tshi imela mini nahone ndi ngani ri tshi fanela u tshi ambara?

⁶ Tshithu tsha u tsireledza khana tshi imela milayo ya Yehova ya u luga. Ndi ngani ri tshi fanela u tshi ambara? Samusi tshithu tsha u tsireledza khana tshi tshi tsireledza swole uri ḽi si ṱhavhiwe mbilu, musi riṋe ri tshi tsireledza khana nga u luga, ri vha ri tshi khou ḓitsireledza kha ṱhuṱhuwedzo ya ḽino shango ḽivhi. (Mir. 4:23) Yehova u lavhelela uri ri mu fune na u mu shumela nga mbilu yashu yoṱhe. (Mat. 22:36, 37) Ndi ngazwo Saṱhane a tshi lingedza u ita uri ri fune shango na zwithu zwine Yehova a zwi vhenga uri ri si shumele Yehova nga mbilu yashu yoṱhe. (Yak. 4:4; 1 Yoh. 2:15, 16) Arali zwenezwo zwi sa shumi, u a ri shushedza uri ri ite zwine Yehova a si zwi takalele.

7. Ri tsireledza hani khana yashu nga u luga?

⁷ Ri tsireledza khana yashu nga u luga musi ri tshi thetshelesa na u ita zwine Yehova a ri zwo luga na u iledza zwine a ri a zwo ngo luga. (Ps. 97:10) Vhaṅwe vha nga vhona u nga milayo ya Yehova i a konḓa. Fhedzi arali ra nga litsha u shumisa milayo ya Bivhili vhutshiloni hashu, ri ḓo fana na swole ḽine ḽa bvula tshithu tsha u tsireledza khana musi ḽi nndwani nge ḽa pfa tshi tshi khou lemela. Zwenezwo zwi nga vha vhutsilu vhuhulu! Kha vhane vha funa Yehova, milayo yawe “a si muhwalo,” fhedzi i a ri tsireledza.—1 Yoh. 5:3.

8. Zwi amba mini u dzula ro ambara thovho milenzheni, ro lugela u ḓivhadza mafhungo maḓifha?

⁸ Paulo o ri ṱuṱuwedza uri ri dzule ro ambara thovho milenzheni, ro lugela u ḓivhadza mafhungo maḓifha a mulalo. Zwenezwi zwi amba uri ri fanela u dzula ro lugela u huwelela mafhungo maḓifha a Muvhuso. Musi ri tshi vhudza vhaṅwe mafhungo maḓifha a re Bivhilini, lutendo lwashu lu a khwaṱha. Ri pfa ri tshi ṱuṱuwedzea musi ri tshi vhona vhathu vha Yehova shangoni ḽoṱhe vha tshi shumisa tshibuli tshiṅwe na tshiṅwe tsha u huwelela mafhungo maḓifha huṅwe na huṅwe hune vha vha vhe hone. Sa tsumbo, vha huwelela musi vhe mishumoni kana zwikoloni, vha huwelela nnḓu nga nnḓu kana fhethu hu re na mabindu, vha tshi ya mavhengeleni, u dalela mashaka ane a si vhe Dziṱhanzi na musi vha tshi amba na vhathu vhane vha vha ḓivha. Arali ra litsha u  huwelela nga nṱhani ha nyofho, ri ḓo fana na swole ḽine ḽa bvula thovho dzaḽo nndwani. Milenzhe yaḽo i nga huvhala nga ho leluwaho. Zwi nga ḽi konḓela vhukuma u ḓilwela musi ḽi tshi ṱhaselwa nahone ḽi nga si kone u tevhedza zwine mulangammbi a ḽi vhudza zwone.

9. Ndi ngani ri tshi fanela u fara tshiṱangu tshihulu tsha lutendo?

⁹ Tshiṱangu tshihulu tsha lutendo tshi imela lutendo lune ra vha nalwo kha Yehova. Ri a tenda uri u ḓo ita zwoṱhe zwe a ri fhulufhedzisa. Lwonolo lutendo lu ḓo ri thusa u ‘dzima misevhe yoṱhe i dugaho ya muvhi.’ Ndi ngani ri tshi fanela u fara tshenetshi tshiṱangu tshihulu? Tshi ri tsireledza kha pfunzo dza vhagunei vhane vha ṱoḓa u ri fhura, tsha ri thusa uri ri si kulee nungo musi vhathu vha tshi kolela zwine ra tenda. Arali ri si na lutendo, ri nga si vhe na maanḓa a u thetshelesa Yehova musi vhaṅwe vha tshi lingedza u ita uri ri si mu thetshelese. Fhedzi tshifhinga tshoṱhe musi ri tshi hana u ita zwithu zwine Yehova a si zwi fune musi ri mushumoni kana tshikoloni, lutendo lwashu lu vha lu tshi khou ri tsireledza. (1 Pet. 3:15) Tshifhinga tshoṱhe musi ri tshi hana mushumo une wa badela vhukuma une wa ri thivhela u shumela Yehova nga vhuḓalo, lutendo lwashu lu vha lu tshi khou ri tsireledza. (Vhahev. 13:5, 6) Nahone tshifhinga tshoṱhe musi ri tshi shumela Yehova naho ri  tshi khou tovholwa, lutendo lwashu lu vha lu tshi khou ri tsireledza.—1 Vhathes. 2:2.

10. Gondolo ḽa u tshidza ndi mini nahone ndi ngani ri tshi fanela u ḽi ambara?

¹⁰ Gondolo ḽa u tshidza ndi fhulufhelo ḽine Yehova a ri ṋea ḽone. Ndi fhulufhelo ḽa uri u ḓo lambedza vhoṱhe vhane vha ita zwine a funa na ḽa uri u ḓo vha vusa arali vha nga fa. (1 Vhathes. 5:8; 1 Tim. 4:10; Tito 1:1, 2) Samusi gondolo ḽi tshi kona u tsireledza ṱhoho ya swole, fhulufhelo ḽine ra vha naḽo ḽi tsireledza nḓila ine ra humbula ngayo. Nga nḓila ḓe? Ḽeneḽo fhulufhelo ḽi ita uri ri livhise ṱhogomelo kha zwe Mudzimu a ri fhulufhedzisa zwone na u ri thusa uri ri si tsikeledzwe nga thaidzo dzashu. Ri ambara hani ḽeneḽi gondolo? Ri ḽi ambara nga u ita vhungoho ha uri nḓila ine ra humbula ngayo i tshimbidzane na ya Mudzimu. Sa tsumbo, fhulufhelo ḽashu a ḽo ngo thewa kha lupfumo lwa tshifhinganyana, fhedzi ḽi kha Mudzimu.—Ps. 26:2; 104:34; 1 Tim. 6:17.

11. Banga ḽa muya mukhethwa ndi mini nahone ndi ngani ri tshi tea u ḽi shumisa?

¹¹ Banga ḽa muya mukhethwa ndi Bivhili. Ḽeneḽo banga ḽi na maanḓa a u bvukulula mazwifhi naho e afhio nahone ḽi nga thusa vhathu uri vha si tsha tenda mazwifhi na u ḓifara nga nḓila i si yavhuḓi. (2 Vhakor. 10:4, 5; 2 Tim. 3:16, 17; Vhahev. 4:12) Ndangulo ya Mudzimu na pfunzo ya muthu nga eṱhe zwi ri gudisa u shumisa ḽeneḽi banga nga nḓila yo teaho. (2 Tim. 2:15) Yehova ha ri ṋei zwithu zwa u ḓitsireledza nndwani fhedzi, u dovha a ri tsireledza nga iṅwe nḓila. Ndi ifhio yeneyo nḓila?

12. Ndi zwifhio zwiṅwe zwine ra zwi ṱoḓa nahone ndi ngani?

¹² Swole ḽi re na tshenzhelo ḽi a zwi ḓivha uri ḽi nga si kone u lwa na mmbi khulu ḽi ḽoṱhe ḽa kunda, ḽi ṱoḓa thuso ya maṅwe maswole. Nga nḓila i fanaho, ri nga si kone u kunda Saṱhane na vhatevheli vhawe ri roṱhe. Ri ṱoḓa thuso ya vhahashu. Yehova o ri ṋea maswole manzhi ane a nga ri thusa. Eneo maswole ndi “vhatendi” nga riṋe vha re hone shangoni ḽoṱhe.—1 Pet. 2:17.

13. U ya nga Vhahevheru 10:24, 25, miṱangano i ri thusa hani?

¹³ Ri dovha ra tikedzwa nga miṱangano ya tshivhidzo. (Vhalani Vhahevheru 10:24, 25.) Roṱhe ri a kulea nungo nga zwiṅwe zwifhinga, fhedzi miṱangano i a ri ṱuṱuwedza. Ri ṱuṱuwedzwa nga phindulo dza vhahashu dzi bvaho mbiluni. Nyambo dzine vha dzi ita na misumbedzo zwi ri ṱuṱuwedza uri ri bvele phanḓa ri tshi shumela Yehova. Nahone ri a ṱuṱuwedzea musi ri tshi amba navho musi miṱangano i sa athu u thoma na musi yo no fhela. (1 Vhathes. 5:14) Miṱangano yashu i dovha ya ri vulela zwibuli zwa u thusa vhaṅwe nahone zwenezwi zwi ita uri ri takale. (Mish. 20:35; Vharoma 1:11, 12) Miṱangano i dovha ya ri thusa nga dziṅwe nḓila. I ita uri ri khwinise nḓila ine ra huwelela na u funza ngayo. Sa tsumbo, ri gudiswa u shumisa zwi re kha Bogisi Ḽa Zwishumiswa Zwa U Funza nga nḓila yavhuḓi. Nga zwenezwo, ni lugiselele zwavhuḓi musi ni sa athu u ya miṱanganoni. Musi ni miṱanganoni, ni thetshelese nga vhuronwane. Musi no no bva miṱanganoni, ni shumise zwe na zwi guda. Musi ni tshi ita zwenezwi zwithu, ni ḓo vha “swole ḽavhuḓi ḽa Kristo Yesu.”—2 Tim. 2:3.

14. Ndi vhafhio vhaṅwe vhane vha ri thusa?

¹⁴ Ri dovha ra tikedzwa nga vharuṅwa vha dzimiḽioni. Humbulani nga ha vhukoni vhune muruṅwa muthihi a vha naho. (Yes. 37:36) Zwino humbulani nga ha zwine mmbi ya vharuṅwa ya nga kona u zwi ita. A hu na muthu kana dimoni ḽine ḽa nga kunda musi ḽi tshi khou lwa na mmbi ya Yehova i re na maanḓa.  Yehova ndi Ramaanḓaoṱhe. Nga zwenezwo, musi ri nae, maswina ashu a nga si ri kunde, naho e manzhi. (Vhahaṱ. 6:16) A hu na ngoho i fhiraho yeneyo. Ni humbule nga ha zwenezwi zwithu musi ane na shuma nae kana ane na dzhena nae tshikolo kana shaka ḽi tshi amba kana u ita zwithu zwine zwa ni kula nungo. Ni songo hangwa uri a ni khou lwa yeneyi nndwa ni noṱhe. Ni khou livhiswa nga Yehova.

15. U ya nga Yesaya 54:15, 17, ndi ngani hu si na muthu ane a nga thivhela vhathu vha Mudzimu u huwelela?

¹⁵ Shango ḽine ḽa vhuswa nga Saṱhane ḽi na zwiitisi zwinzhi zwa u ri vhenga. A ri dzheneleli kha politiki na dzinndwa. Ri huwelela nga ha dzina ḽa Mudzimu na uri Muvhuso wawe ndi wone u woṱhe une wa ḓo ḓisa mulalo. Ri tshila u tendelana na milayo ya Mudzimu. Ri sumbedza vhathu uri muthu ane a khou vhusa ḽino shango ndi muzwifhi na muvhulayi. (Yoh. 8:44) Nahone ri ḓivhadza uri shango ḽa Saṱhane ḽi tsini na u fheliswa. Saṱhane na vhatevheli vhawe vha nga si kone u thivhela mushumo washu wa u huwelela. Nṱhani hazwo, ri ḓo dzula ri tshi renda Yehova nga nḓila naho i ifhio ine ra nga kona ngayo. Naho Saṱhane e na maanḓa, ha koni u thivhela mulaedza wa Muvhuso une wa huwelelwa shangoni ḽoṱhe. Zwenezwi zwi khou konadzea ngauri Yehova u khou ri tsireledza.—Vhalani Yesaya 54:15, 17.

16. Yehova u ḓo tshidza hani vhathu vhawe nga tshifhinga tsha maṱungu mahulu?

¹⁶ Hu ḓo itea mini hu si kale? Yehova u ḓo ri tshidza nga nḓila mbili nga tshifhinga tsha maṱungu mahulu. Ya u thoma, u ḓo tshidza vhatevheli vhawe vha fhulufhedzeaho musi mahosi a ḽino shango a tshi fhelisa Babele Ḽihulu ḽine ḽa vha vhurereli ha mazwifhi. (Nzumb. 17:16-18; 18:2, 4) Ya vhuvhili, u ḓo tshidza vhathu vhawe musi a tshi fhelisa shango ḽoṱhe ḽa Saṱhane nga nndwa ya Haramagedo.—Nzumb. 7:9, 10; 16:14, 16.

17. Ri vhuyelwa hani nga u dzula ri tsini na Yehova?

¹⁷ Arali ra dzula ri tsini na Yehova, Saṱhane a nga si ri vhaise lwa tshoṱhe. Zwavhuḓivhuḓi, ndi ene ane a ḓo fheliswa lwa tshoṱhe. (Vharoma 16:20) Nga zwenezwo, shumisani zwithu zwa u ḓitsireledza nndwani nahone ni songo litsha u zwi shumisa. Ni songo lingedza u lwa na Saṱhane na ḽino shango ni noṱhe. Ni tikedze vhahaṋu. Ni tevhele vhulivhisi ha Yehova. Arali na ita zwenezwo, ni nga vha na vhungoho ha uri Khotsi aṋu wa ṱaḓulu ane a ni funa, u ḓo ni khwaṱhisa na u ni tsireledza.—Yes. 41:10.