1. U imba zwi ri thusa uri ri kone u ita mini?

MUṄWE muṅwali wa dzinyimbo a re na bvumo o vhuya a ri: “Maipfi a ita uri ni humbule nga ha zwiṅwe zwithu. Muzika u kwama maḓipfele. Fhedzi luimbo lu swikelela mbilu.” Nyimbo dzashu dzi renda na u sumbedza nḓila ine ra funa ngayo Khotsi ashu wa ṱaḓulu, Yehova. A zwi timatimisi uri u imba ndi tshipiḓa tsha ndeme tsha vhurabeli ha ngoho, hu sa londwi uri ri khou imba ri roṱhe kana na tshivhidzo tsha vhathu vha Mudzimu.

2, 3. (a) Vhaṅwe vha ḓipfa hani nga u imbela nṱha musi vhe tshivhidzoni? (b) Ndi mbudziso dzifhio dzine ra ḓo dzi ṱolisisa?

² Naho zwo ralo, ni ḓipfa hani nga u imbela nṱha musi ni tshivhidzoni? Naa ni a shona? Kha dziṅwe mvelele, vhanna vha nga ḓipfa vha songo vhofholowa musi vha tshi imba vhukati ha vhathu. Enea mavhonele a nga kwama tshivhidzo, zwihuluhulu musi vhane vha khou ranga phanḓa vha tshi wana zwiitisi zwa u sa imba kana vha tshi farakanea nga miṅwe mishumo ngeno vhaṅwe vha tshi khou imba tshivhidzoni.—Ps. 30:12.

³ Arali ri tshi dzhia u imba zwi zwa ndeme kha vhurabeli hashu, a ri nga ḓo bvela nnḓa musi hu tshi khou imbiwa kana u sa vha hone musi hu tshi itwa tshenetsho tshipiḓa tsha vhurabeli. Nga zwenezwo, muṅwe na muṅwe washu u fanela u ḓivhudzisa uri: ‘Ndi dzhia hani u imba musi ndi miṱanganoni yashu ya vhurabeli? Ndi nga kunda  hani zwithithisi zwine zwa nga nthivhela u imba nga dakalo? Ndi nga imba hani zwi tshi bva mbiluni?’

4, 5. Ndi nzudzanyo dzifhio dza u imba dze dza itwa nga Vhaisiraele vha kale?

⁴ Vhagwadameli vha Yehova vha fulufhedzeaho ndi kale vha tshi shumisa muzika sa nḓila ya u renda Yehova. Zwi swayeaho ndi uri u imba ho vha hu tshipiḓa tsha ndeme tsha vhurabeli ha Vhaisiraele vha kale musi vha tshi shumela Yehova nga u fulufhedzea. Sa tsumbo, musi vha tshi khou lugiselela mushumo wa u fhaṱa thembele, Khosi Davida o dzudzanya Vhalevi vha 4 000 uri vha dzudzanye nyimbo dza thendo. Kha vhenevho vhathu, vha 288 vho “funzwa nyimbo dza Yehova vha vha vhakoni vhadzo.”—1 Koron. 23:5; 25:7.

⁵ Musi hu tshi ṋekedzelwa thembele, muzika na u imba zwo vha zwi tshipiḓa tsha ndeme. Bivhili i ri: “Vhalidzi na vhaimbi vho tou thoma nga ka-thihi nga ipfi ḽine ḽa nga ḽa muthu muthihi, vha tshi renda Yehova vha mu livhuha. Ha ri mubvumo wa dziphalaphala na mirumba na wa dzimbila dziṅwe u tshi pfala na thendo ine ya ri: Rendani Yehova, . . . nnḓu ya Mudzimu yo vha yo ḓala vhurena ha Yehova.” Tshenetsho tshiitea tshi fanela u vha tsho vha khwaṱhisa lutendo!—2 Koron. 5:13, 14; 7:6.

6. Ṱalutshedzani nḓila yo khetheaho ye vhaimbi vha imba ngayo musi Nehemia a kha ḓi vha muvhusi wa Yerusalema.

⁶ Musi Nehemia a tshi khou ranga phanḓa Vhaisiraele vha fulufhedzeaho kha u vusulusa mbondo dza Yerusalema, o dovha a dzudzanya ṋambi dza Vhalevi vhe na zwilidzwa zwa dzingosha. Musi hu tshi ṋekedzelwa dzenedzo mbondo dze dza vusuluswa, muzika wo ita uri tshenetsho tshiitea tshi vhe tshi takadzaho vhukuma. Nga tshenetsho tshifhinga, ho vha hu na “zwigwada zwivhili zwa vhaimbi vha dzithendo.” Tshiṅwe tshigwada tsho bva nga iṅwe thungo, tshiṅwe tsha bva nga iṅwe thungo, zwa ṱangana kha luvhondo tsini na thembele u itela uri zwi kone u ita muungo une wa ḓo pfala kule. (Neh. 12:27, 28, 31, 38, 40, 43) A zwi timatimisi uri Yehova o takadzwa nga u pfa vhagwadameli vhawe vha tshi mu renda nga mafulufulu vha tshi imba.

7. Yesu o sumbedza hani nḓila ine zwa vha zwa ndeme ngayo u imba kha vhurabeli ha Vhukriste?

⁷ U bva tshee ha thoma tshivhidzo tsha Vhukriste, muzika wo bvela phanḓa u tshi vha tshipiḓa tsha ndeme kha vhurabeli ha ngoho. Humbulani nga ha zwe zwa itea nga vhuṅwe vhusiku ho khetheaho kha ḓivhazwakale ya vhathu, Yesu na vhaṅwe vho imba nyimbo dza u renda Mudzimu nga murahu ha Tshilalelo Tsha Murena.—Vhalani Mateo 26:30.

8. Vhakriste vha ḓanani ḽa u thoma ḽa miṅwaha vho ri vhetshela hani tsumbo ya u renda Mudzimu nga nyimbo?

⁸ Vhakriste vha ḓanani ḽa u thoma ḽa miṅwaha vho ri vhetshela tsumbo ya u renda Mudzimu nga nyimbo vho kuvhangana vhoṱhe. Naho kanzhi vho vha vha tshi ṱangana mahayani, u kuvhangana havho vha tshi ita vhurabeli, a zwo ngo fhungudza u fhisetshela havho u imbela Yehova. Muapostola Paulo o ṱuṱuwedza vhahawe vha Vhakriste a ri: “Bvelani phanḓa ni tshi gudisana na u ṱuṱuwedzana nga dzipsalme, ni tshi renda Mudzimu, na nga nyimbo dza lwa muya dzi imbiwaho nga vhulenda, ni tshi imbela Yehova mbiluni dzaṋu.” (Vhakol. 3:16) Nyimbo dzine dza vha kha bugu dzashu dza luimbo ndi ‘nyimbo dza lwa muya dzine dza fanela u imbiwa nga vhulenda.’ Ndi tshipiḓa tsha zwiḽiwa zwa lwa muya zwine ra ṋewa zwone nga “mulanda a fulufhedzeaho na wa vhuṱali.”—Mat. 24:45.

9. (a) Ndi mini zwine zwa nga thivhela vhaṅwe uri vha si imbe miṱanganoni na maguvhanganoni? (b) Ri fanela u imba hani nyimbo dzine dza rendisa Yehova, nahone ndi vhafhio vhane vha fanela u ranga phanḓa? (Sedzani tshifanyiso tsha u thoma.)

⁹ Hu pfi mini arali u imba zwi songo ḓowelea  muṱani wa haṋu, kha mvelele yaṋu kana hune na bva hone? Samusi hu na zwishumiswa zwa thekinolodzhi zwa musalauno, ni nga vha ni tshi takalela u thetshelesa dziṋambi. Naho zwo ralo, musi ni tshi vhambedza ipfi ḽaṋu na ḽa ṋambi dza ḽino shango, ni nga pfa ni tshi shona kana u kulea nungo. Naho zwo ralo, ni songo tendela zwenezwo zwithu zwi tshi thithisa vhuḓifhinduleli haṋu ha u renda Yehova nga nyimbo. Nṱhani hazwo, farelani nṱha bugu yaṋu ya luimbo, ni imise ṱhoho nahone ni imbe zwi tshi bva mbiluni! (Esera 3:11; vhalani Psalme ya 147:1.) Holoni nnzhi dza Muvhuso ṋamusi, nyimbo dzi vhonala kha tshikirini nahone zwi thusa uri ri kone u imba zwavhuḓi. Zwi takadzaho ndi uri zwino Tshikoloni tsha Vhuḓinḓa ha Muvhuso tsha vhahulwane hu vho imbiwa nyimbo dza Muvhuso. Zwenezwi zwi sumbedza uri vhahulwane vha fanela u ranga phanḓa kha u imba tshivhidzoni.

10. Ndi mini zwine ra fanela u zwi humbula musi nyofho dzi tshi ita uri ri si imbe?

¹⁰ Nyofho ndi tshiṅwe tsha tshiitisi tshi itaho uri vhathu vhanzhi vha si imbele nṱha. Vha nga humbula uri maipfi avho a nṱhesa kana vha imba vhuyaḓa. Naho zwo ralo, ri fanela u humbula uri musi ri tshi amba “ri a khakha lunzhi.” (Yak. 3:2) Fhedzi zwenezwo a zwi ri thivheli u amba. Nga zwenezwo, ndi ngani ri tshi fanela u tendela maipfi ashu a si avhuḓi a tshi ri thivhela u renda Yehova nga nyimbo?

11, 12. Ndi dzifhio dziṅwe nyeletshedzo dzine dza nga ita uri ri khwinise nḓila ine ra imba ngayo?

¹¹ Khamusi ri vhilaedziswa nga nḓila ine ra imba ngayo nga nṱhani ha uri a ri ḓivhi nḓila ine ra fanela u imba ngayo. Naho zwo ralo, ri nga khwinisa nḓila ine ra imba ngayo nga u shumisa dziṅwe nyeletshedzo dzi shumaho. *

¹² Ni nga guda u imba nga ipfi ḽo khwaṱhaho na u imbela nṱha nga u fema zwavhuḓi. U fana na gulupu i tshi shuma nga muḓagasi, u fema zwi ita uri ni kone u amba kana u imba. Ni  fanela u imbela nṱha u fana na nḓila ine na amba ngayo kana u imbela nṱha u fhira nḓila ine na amba ngayo. (Sedzani nyeletshedzo kha bugu Vhuyelwani Nga Tshikolo tsha Vhuḓinḓa ha lwa Ṱaḓulu, masiaṱari 181 u swika kha 184, nga fhasi ha tshiṱoho tshine tsha ri “Langani Zwavhuḓi Nḓila Ine Na Fema Ngayo.”) Zwi re zwone ndi uri nga zwiṅwe zwifhinga, Bivhili i vhudza vhagwadameli vha Yehova uri vha ‘fhululedze’ musi vha tshi khou imba nyimbo dza u mu renda.—Ps. 33:1-3.

13. Ṱalutshedzani nḓila ine ra nga vha ngayo na mafulufulu nga ho engedzeaho musi ri tshi imba.

¹³ Nga tshifhinga tsha vhurabeli ha muṱa kana ni tshi khou ita ngudo ya muthu nga eṱhe, lingedzani zwi tevhelaho: Khethani luimbo lune na lu funa kha bugu yashu ya luimbo. Lu vhaleleni nṱhani nahone ni na mafulufulu. Nga murahu, ni tshi khou shumisa ipfi ḽi fanaho, ambani maipfi a u thoma a luimbo nga mufemo muthihi. Nga murahu, ni imbe eneo maipfi ni tshi khou shumisa ipfi ḽi fanaho. (Yes. 24:14) Ni ḓo imba nga mafulufulu nahone zwenezwo ndi zwithu zwavhuḓi. Ni songo tendela zwenezwo zwi tshi ni tshuwisa kana u ita uri ni shone!

14. (a) U ganulula mulomo zwi nga ri thusa hani kha u imba? (Sedzani bogisi “ Nḓila Ine Na Nga Khwinisa Ngayo Musi Ni Tshi Imba.”) (b) Ndi dzifhio nyeletshedzo dza u kunda thaidzo dza u imba dzine na wana dzi tshi shuma?

¹⁴ Ni nga si kone u imba zwavhuḓi arali ni songo ganulula mulomo. Nga zwenezwo, zwiṅwe zwine na nga zwi ita ndi u ganulula mulomo u fhira nḓila ine na amba ngayo. Ni fanela u ita mini arali ni tshi vhona u nga ipfi ḽaṋu a si ḽavhuḓi kana khamusi ni imba vhuyaḓa? Ni nga wana nyeletshedzo dzi shumaho nga ha dzenedzi thaidzo kha bugu, Vhuyelwani Nga Tshikolo tsha Vhuḓinḓa ha lwa Ṱaḓulu, siaṱari 184, kha bogisi “U Kunda Vhuṅwe Vhuleme.”

15. (a) Ndi ifhio nḓivhadzo ye ya itwa muṱanganoni wa ṅwaha muṅwe na muṅwe we wa vha hone nga 2016? (b) Ndi zwifhio zwiṅwe zwa zwiitisi zwe zwa ita uri hu vhe na bugu ntswa ya luimbo?

¹⁵ Ho vha hu na dakalo-fulu kha muṱangano wa ṅwaha muṅwe na muṅwe we wa vha hone nga 2016 wa Watch Tower Bible and Tract Society of Pennsylvania, musi Wahashu Stephen Lett ane a vha muraḓo wa Tshigwada tshi Langaho  a tshi ḓivhadza uri bugu ntswa ya nyimbo ine ya vha na tshiṱoho tshine tsha ri, “Sing Out Joyfully” to Jehovah i ḓo shumiswa miṱanganoni hu si kale. Wahashu Lett o ṱalutshedza uri tshiṅwe tsha tshiitisi tsha uri hu vhe na bugu ntswa ya luimbo ndi ngauri i tshimbidzana na New World Translation of the Holy Scriptures yo vusuluswaho. Ho vha hu tshi ṱoḓea uri hu bviswe kana hu vusuluswe maṅwe a maipfi o shumiswaho kha nyimbo a si tsha wanalaho kha New World Translation ye ya vusuluswa nga 2013. Zwiṅwe hafhu, kha yeneyo bugu ho katelwa na nyimbo ntswa dzi ambaho nga ha mushumo washu wa u huwelela na dzine dza amba nga ha nḓila ine ra livhuwa ngayo tshirengululi. Zwiṅwe hafhu, nga nṱhani ha uri nyimbo ndi tshipiḓa tsha ndeme tsha vhurabeli, Tshigwada tshi Langaho tsho vha tshi tshi ṱoḓa u bveledza gwati ḽavhuḓi ḽa vhuimo ha nṱha ḽi fanaho na gwati ḽa New World Translation yo vusuluswaho.

16, 17. Ndi tshanduko dzifhio dze dza itwa kha bugu ntswa ya nyimbo?

¹⁶ U itela uri zwi leluwe u shumisa bugu ntswa ya nyimbo, nyimbo dzo dzudzanywa u ya nga ṱhoho ya mafhungo. Sa tsumbo, nyimbo dza 12 dza u thoma dzi amba nga ha Yehova, nyimbo dzi tevhelaho dza malo dzi amba nga ha Yesu na tshirengululi na zwiṅwe zwiṱoho. Sa tsumbo, hu na tsumbi ya thero dzine dza nga ni thusa musi ni tshi khou khetha luimbo lwa nyambo ya khagala.

¹⁷ U itela u thusa muthu muṅwe na muṅwe uri a kone u imba zwi tshi bva mbiluni, ho vusuluswa maṅwe a maipfi u itela uri mulaedza u pfale khwine nahone ha bviswa maṅwe maipfi a si tsha shumiswaho. Zwo vha zwo tea uri hu shandulwe tshiṱoho tshine tsha ri, “Lindani Mbilu Yaṋu” uri tshi vhe “Ri Linda Mbilu Dzashu.” Ndi ngani? Ndi nga nṱhani ha uri miṱanganoni yashu, maguvhanganoni na mabuthanoni, hu vha hu na vhathu vhane vha ḓa lwa u tou thoma, vhane vha vha na dzangalelo, vhaswa na vhahashu vha tshisadzini nahone zwi nga vha kanganyisa musi vha tshi imba ngauri zwi vha zwi tshi pfala u nga vha khou vhudza vhathu zwine vha fanela u zwi ita. Nga zwenezwo, ho shandulwa tshiṱoho na maipfi.

18. Ndi ngani ri tshi fanela u ḓivha nyimbo dzine dza vha kha bugu yashu ntswa ya nyimbo? (Sedzani ṱhaluso i re magumoni a siaṱari.)

¹⁸ Vhunzhi ha nyimbo dzine dza vha kha “Sing Out Joyfully” to Jehovah dzi nga thabelo. Musi ni tshi imba dzenedzi nyimbo, ni kona u sumbedza nḓila ine na ḓipfa ngayo nga ha Yehova. Dziṅwe nyimbo dzi ḓo ri thusa u ri ‘ṱuṱuwedze lufunoni na kha mishumo mivhuya.’ (Vhaheb. 10:24) Vhukuma, ri ṱoḓa u ḓivha muzika, bithi na maipfi a nyimbo dzashu. Ni nga ita zwenezwo nga u thetshelesa nyimbo dzine dza vha na maipfi dzi wanalaho kha jw.org. Musi ni tshi ita nḓowe-nḓowe ya u imba dzenedzo nyimbo hayani, ni nga kona u imba nga mafulufulu nahone zwi tshi bva mbiluni. *

19. Vhoṱhe tshivhidzoni vha nga shela hani mulenzhe nga ho livhaho kha u gwadamela Yehova?

¹⁹ Humbulani uri u imba ndi tshipiḓa tsha ndeme tsha vhurabeli hashu. Ndi nḓila yavhuḓi vhukuma ine ra sumbedza uri ri funa Yehova na u mu dzhiela nṱha. (Vhalani Yesaya 12:5.) Musi ni tshi imba nga dakalo nyimbo dza u renda, ni ḓo vha ni tshi khou ṱuṱuwedza na vhaṅwe uri na vhone vha ite nga u ralo. Ndi ngoho uri vhoṱhe tshivhidzoni—vhaswa, vhahulwane na vhane vha vha na dzangalelo—vha nga ṱanganela kha u renda Yehova nga yeneyi nḓila. Nga zwenezwo, ni songo litsha u sumbedza nḓila ine na ḓipfa ngayo nga u imba. Nṱhani hazwo, thetshelesani vhulivhisi ho ṅwalwaho nga mupsalme we a ri: “Imbelani Yehova!” Vhukuma, imbani nga nḓila i takadzaho!—Ps. 96:1.