1. Ndi ngani ri tshi tenda uri ri khou tshila “maḓuvhani a vhufhelo”?

ARALI no bebwa nga murahu ha 1914, zwi tou vha khagala uri no tshila vhutshilo haṋu hoṱhe “maḓuvhani a vhufhelo.” (2 Tim. 3:1) Roṱhe ri khou vhona zwe Yesu a dzula o amba uri zwi ḓo itea. Zwenezwi zwi katela dzinndwa, u ṱahela ha zwiḽiwa, midzinginyo, malwadze, u engedzea ha vhuvhi na u tovholwa ha vhathu vha Yehova. (Mat. 24:3, 7-9, 12; Luka 21:10-12) Ri dovha ra vhona vhathu vha tshi ḓifara nga nḓila ye muapostola Paulo a dzula o amba uri vha ḓo ḓifara ngayo. (Sedzani bogisi “ Nḓila Ine Vhathu Vha Vha Ngayo.”) Sa Ṱhanzi Dza Yehova, ri tenda uri ri khou tshila “maḓuvhani a vhufhelo.”

2. Ri tea u haseledza mbudziso dzifhio?

² Sa izwi ho no fhela tshifhinga tshilapfu u bva nga 1914, zwi tou vha khagala uri ri khou tshila mafheleloni a ‘maḓuvha a vhufhelo.’ Samusi vhufhelo vhu tsini tsini, ri tea u haseledza mbudziso dza ndeme dzi ngaho: Hu ḓo itea mini mafheleloni a ‘maḓuvha a vhufhelo’? Nahone Yehova u ṱoḓa uri ri ite mini musi ro lindela zwenezwo zwithu zwi tshi itea?

3. U ya nga vhuporofita vhu re kha 1 Vhathesalonika 5:1-3, vharangaphanḓa vha shango vha ḓo ita nḓivhadzo ifhio?

³ Vhalani 1 Vhathesalonika 5:1-3. Paulo u amba nga ha “ḓuvha ḽa Yehova.” Kha holu luṅwalo, “ḓuvha ḽa Yehova” ḽi thoma musi “Babele Ḽihulu” ḽine ḽa vha vhurereli hoṱhe  ha mazwifhi ḽi tshi vutshelwa, u swika nga Haramagedo. (Nzumb. 16:14, 16; 17:5) Musi ḽeneḽo “ḓuvha” ḽi sa athu thoma, vharangaphanḓa vha shango vha ḓo ḓivhadza uri: “Mulalo na u tsireledzea!” (Iṅwe Bivhili i ri: “Ḽo lala, a hu na khombo.”) Nga zwiṅwe zwifhinga vharangaphanḓa vha shango vha amba zwi fanaho musi vha tshi ita uri mashango a shumisane nga nḓila yavhuḓi. * Naho zwo ralo, nḓivhadzo ya “mulalo na u tsireledzea” yo ambiwaho Bivhilini a i nga vhi nga yeneyo nḓila. Ndi ngani? Musi zwi tshi itea, vhathu vha ḓo vhona u nga vharangaphanḓa vha shango vho kona u ita uri shango ḽi tsireledzee. Fhedzi ngoho ndi ya uri, “maṱungu mahulu” a ḓo thoma nahone nga murahu ha vha na “ndozwo.”—Mat. 24:21.

4. (a) Ndi zwifhio zwine ra kha ḓi tea u zwi ḓivha nga ha nḓivhadzo ya “mulalo na u tsireledzea”? (b) Zwa zwino ri ḓivha mini nga hayo?

⁴ Hu na zwine ra zwi ḓivha nga ha nḓivhadzo ya “mulalo na u tsireledzea.” Fhedzi a ri ḓivhi zwoṱhe. A ri ḓivhi zwine zwa ḓo ita uri vharangaphanḓa vha shango vha ite yeneyo nḓivhadzo kana uri i ḓo itwa nga nḓila ḓe. A ri ḓivhi uri yeneyi nḓivhadzo i ḓo itwa lungana. Zwine ra zwi ḓivha ndi hezwi: A ro ngo tea u vhona u nga vharangaphanḓa vha shango vha nga kona u ita uri shangoni hu vhe na mulalo. Fhedzi Bivhili i ri vhudza uri ri ṱhogomele yeneyo nḓivhadzo, ndi yone ine ya ḓo sumbedza uri “ḓuvha ḽa Yehova” ḽi tsini na u thoma!

5. 1 Vhathesalonika 5:4-6 i ri thusa hani u ḓilugiselela “ḓuvha ḽa Yehova”?

⁵ Vhalani 1 Vhathesalonika 5:4-6. Paulo u ri vhudza zwine ra tea u ita u itela u ḓilugiselela “ḓuvha ḽa Yehova.” O ri, “ri songo eḓela u fana na vhaṅwe vhoṱhe,” fhedzi “ri dzule ro fhaṱuwa” nahone ro tsha maṱoni. Sa tsumbo, ri tea u ita vhungoho ha uri a ri dzheneleli kha zwa politiki kana u vha na vhuḽedzani nazwo. Arali ra vha na vhuḽedzani nazwo, ri nga ḓiwana ri “tshipiḓa tsha shango.” (Yoh. 15:19) Ri a zwi ḓivha uri Muvhuso Wa Mudzimu ndi wone u woṱhe une wa nga kona u ita uri shango ḽoṱhe ḽi vhe na mulalo.

6. Ri tea u thusa vhaṅwe uri vha ite mini nahone ndi ngani?

⁶ Ri tea u dzula ro fhaṱuwa nahone ri tea u thusa na vhaṅwe uri vha fhaṱuwe nga u vha gudisa zwe Bivhili ya amba uri zwi ḓo itea. Ri humbule uri maṱungu mahulu a vhuya a thoma, a hu tsha ḓo vha na tshifhinga tsha u thusa vhathu uri vha thome u shumela Yehova. Ndi ngazwo ri tshi tea u huwelela zwino! *

7. Yehova u ṱoḓa uri ri ite mini zwino?

⁷ Yehova u ṱoḓa uri ri dzule ri tshi huwelela kha kwonoku kufhinga kuṱuku kwo salaho musi “ḓuvha” ḽawe ḽi sa athu thoma. Ri tea u ita vhungoho ha uri ri ‘na zwinzhi zwine ra khou zwi ita mushumoni wa Murena.’ (1 Vhakor. 15:58) Yesu o dzula o amba zwine ra ḓo zwi ita. Musi a tshi khou amba nga ha zwithu zwa ndeme zwine zwa ḓo itea maḓuvhani a vhufhelo, o ri: “Zwiṅwe hafhu, hu ḓo thoma ha ḓivhadzwa mafhungo maḓifha kha tshaka dzoṱhe.” (Marko 13:4, 8, 10; Mat. 24:14) Ni a ḓivha uri tshifhinga tshoṱhe ni tshi ya vhuḓinḓani ni vha ni tshi khou thusa uri honovhu vhuporofita ha Bivhili vhu itee?

8. U huwelela hu khou vha hani na mvelelo dzavhuḓi?

⁸ U huwelela zwi khou vha na mvelelo dzifhio? Ṅwaha muṅwe na muṅwe, hu vha na vhathu vhanzhi vhane vha pfa mulaedza wa Mudzimu. Sa tsumbo, humbulani nga ha nḓila ye vhahuweleli vha engedzea ngayo maḓuvhani a vhufhelo. Nga 1914, ho vha hu na vhahuweleli vha 5 155 kha mashango a 43. Ṋamusi hu na vhahuweleli vhane vha swika milioni dza 8.5 kha mashango a 240! Naho zwo ralo, ri kha ḓi tea u huwelela. Ri tea u bvela phanḓa ri tshi vhudza vhathu uri Muvhuso Wa Mudzimu ndi wone u woṱhe une wa ḓo thusa vhathu.—Ps. 145:11-13.

9. Ndi ngani ri tshi tea u bvela phanḓa na u huwelela mafhungo maḓifha?

⁹ A ri nga litshi u huwelela u swikela Yehova a tshi amba uri ri litshe. Vhathu vho salelwa nga tshifhinga tshingafhani tsha u guda nga ha Yehova na Yesu Kristo? (Yoh. 17:3) A ri na vhuṱanzi. Zwine ra ḓivha ndi uri vhoṱhe vha re na “mavhonele o teaho uri vha wane vhutshilo vhu sa fheli” vha kha ḓi vha na tshibuli tsha u guda ngoho hu sa athu thoma maṱungu mahulu. (Mish. 13:48) Ri nga vha thusa hani tshifhinga tshi sa athu fhela?

10. Ndi mini zwe Yehova a ri ṋea u itela u ri thusa u gudisa vhathu ngoho?

¹⁰ Yehova u khou shumisa ndangulo yawe u ri ṋea zwine ra zwi ṱoḓa u itela u gudisa vhathu ngoho. Sa tsumbo, ri a gudiswa vhukuma kha miṱangano ya vhukati ha vhege. Yeneyi miṱangano i ri gudisa zwine ra nga zwi amba kha lwendo lwa u thoma na kha nyendo dza u vhuyelela. I dovha ya ri  gudisa nḓila ine ra nga ita ngayo pfunzo ya Bivhili. Ndangulo ya Yehova yo dovha ya ri ṋea Bogisi Ḽa Zwishumiswa Zwa U Funza. Zwenezwi zwishumiswa zwi ri thusa:

• u thoma nyambedzano,

• u ita uri vhathu vha takalele mulaedza,

• u ṱuṱuwedza vhathu uri vha gude zwo engedzeaho,

• u gudisa vhathu ngoho kha pfunzo ya Bivhili, na

• u ramba vhane vha takalela mulaedza uri vha ḓe Holoni na u dzhena kha website yashu.

Ri songo takadzwa nga u sokou vha na zwenezwi zwishumiswa fhedzi. Ri tea u zwi shumisa. * Sa tsumbo, musi no no vha na nyambedzano yavhuḓi na muthu ane a takalela, mu ṋeeni khandiso ine a ḓo i vhala u swika ni tshi dovha na amba nae. Muṅwe na muṅwe u na vhuḓifhinduleli ha u dzula a tshi huwelela ṅwedzi muṅwe na muṅwe.

11. Online Bible Study Lessons yo itelwa mini?

¹¹ Iṅwe nḓila ine Yehova a khou thusa ngayo vhathu uri vha gude ngoho ndi nga u shumisa Online Bible Study Lessons dzi wanalaho kha jw.org^®. Ndi ngani ho itwa dzenedzo ngudo? Ṅwedzi muṅwe na muṅwe hu vha na vhathu vhanzhi vhane vha ṱoḓa u guda Bivhili kha Inthanethe. Ngudo dzi re kha website yashu dzi nga gudisa vhathu ngoho i re Ipfini ḽa Mudzimu. Zwi nga itea uri vhaṅwe vhathu vhane ra huwelela khavho a vha ṱoḓi ri tshi vha gudisa Bivhili nga ho livhaho. Arali zwo ralo, ni nga vha sumbedza dzenedzi ngudo kha website yashu kana na vha rumela linki. *

12. Ndi mini zwine muthu a nga zwi guda kha Online Bible Study Lessons?

¹² Kha Online Bible Study Lessons hu na hedzi thero: “Bivhili Na Muṅwali Wayo,” “Vhathu Vhe Ha Ambeswa Nga Havho Bivhilini” na “Fhulufhelo Ḽi Re Bivhilini.” Musi muthu a tshi guda, u ḓo pfesesa:

• Nḓila ine Bivhili ya nga mu thusa ngayo

• Uri Yehova, Yesu na vharuṅwa ndi vhonnyi

• Uri ndi ngani Mudzimu o sika vhathu

• Uri ndi ngani hu na vhuvhi na u tambula

Dzenedzo ngudo dzi dovha dza amba nga ha nḓila ine Yehova a ḓo . . .

• fhelisa ngayo u tambula na lufu,

• u vusa vho faho, na

• u fhelisa mivhuso ya vhathu uri hu vhuse Muvhuso wawe fhedzi.

13. Arali muthu a guda nga ngudo dzi re kha website, naa ho ngo tsha tea u gudiswa Bivhili? Ṱalutshedzani.

¹³ Arali muthu a guda nga ngudo dzi re kha website, a zwi ambi uri ho ngo tsha tea u gudiswa Bivhili. U ita vhafunziwa ndi ndugelo ye ra ṋewa nga Yesu. Ngudo dzi re kha website dzo itelwa uri vha re na dzangalelo vha dzi vhale, vha dzi takalele na uri vha ṱoḓe u guda zwo engedzeaho. Zwenezwi zwi nga ita uri vha tende u gudiswa Bivhili. Magumoni a ngudo iṅwe na iṅwe, ane a khou guda u ṋewa tshibuli tsha u ita khumbelo ya pfunzo ya Bivhili. Kha website yashu, hu vha na vhathu vha fhiraho 230 vhane vha ita khumbelo dza pfunzo dza Bivhili nga ḓuvha. Ndi zwa ndeme uri muthu a vhe na ane a mu gudisa!

14. U tendelana na zwe Yesu a ri laya kha Mateo 28:19, 20, ri tea u lingedza u ita mini nahone ndi ngani?

¹⁴ Vhalani Mateo 28:19, 20. Musi ri tshi gudisa vhathu, ri tea u finya dza khwaṱha u  itela u ‘vha ita vhafunziwa . . .  na u vha funza u tevhedza zwoṱhe zwe Yesu a ri laya.’ Ri tea u thusa vhathu u pfesesa uri ndi zwa ndeme uri vha khethe u shumela Yehova na u tikedza Muvhuso wawe. Zwi amba uri ri tea u vha ṱuṱuwedza u shumisa zwine vha zwi guda, u ḓiṋekedza kha Yehova na u lovhedzwa. Ndi zwone zwine zwa ḓo vha thusa u ponya nga ḓuvha ḽa Yehova.—1 Pet. 3:21.

15. Ri ṱoḓa u ita mini nga tshifhinga tsho salaho nahone ndi ngani?

¹⁵ Zwo no ḓi ambiwa uri tshifhinga tsho salaho ndi tshiṱuku vhukuma. Nga nṱhani ha zwenezwo, a ri nga tambisi tshifhinga nga u guda na vhathu vhane vha sa ṱoḓe u ita tshanduko dzi sumbedzaho uri vha ṱoḓa u shumela Yehova. (1 Vhakor. 9:26) Tshifhinga tshi khou ri ḽa zwirethe! Hu tshee na vhathu vhanzhi vhane vha kha ḓi tea u pfa mulaedza tshifhinga tshi sa athu fhela.

16. U ya nga Nzumbululo 18:2, 4, 5, 8, ndi mini zwine roṱhe ra fanela u zwi ita? (Sedzani ṱhaluso i re magumoni.)

¹⁶ Vhalani Nzumbululo 18:2, 4, 5, 8. Hedzi ndimana dzi amba nga ha zwine Yehova a ṱoḓa vhashumeli vhawe vha ngoho vha tshi zwi ita. A vho ngo tea u vha na vhuḽedzani na vhurabeli ha mazwifhi. Musi muthu a sa athu guda Bivhili, zwi nga itea uri o vha e kha vhurereli ha mazwifhi. Khamusi o vha a tshi ya kerekeni nahone a tshi tikedza zwine zwa itwa nga yeneyo kereke kana o i tikedza nga tshelede. Muthu ane a khou guda Bivhili, u fanela u ita vhungoho ha uri o bva tshoṱhe kha vhurereli ha mazwifhi, ndi hone a tshi ḓo fanelea u vha muhuweleli. U tea u ṅwala luṅwalo lu sumbedzaho uri ha tsha vha muraḓo wa yeneyo kereke kana dzangano ḽiṅwe na ḽiṅwe ḽine ḽa tshimbidzana na Babele Ḽihulu. *

17. Mukriste u fanela u iledza mishumo ya hani nahone ndi ngani?

¹⁷ Mukriste wa ngoho u tea u ita vhungoho ha uri mushumo wawe a u tikedzi Babele Ḽihulu. (2 Vhakor. 6:14-17) Sa tsumbo, ho ngo tea u shumela kereke. Zwiṅwe hafhu, naho o tholwa nga ḽiṅwe bindu, a nga si ṱoḓe u fhedza tshifhinga tshinzhi a tshi khou shuma kha zwifhaṱo zwa vhurereli ha mazwifhi. Arali e na bindu ḽawe a nga si ṱoḓe u shumisana na Babele Ḽihulu nga nḓila naho i ifhio. Ndi ngani zwi zwa ndeme? Ndi ngauri a ri ṱoḓi u tikedza zwivhi zwine zwa itwa nga  vhurabeli vhu songo kunaho phanḓa ha Yehova.—Yes. 52:11. *

18. Muṅwe wahashu o thuswa hani nga Bivhili musi zwi tshi ḓa kha mushumo?

¹⁸ Miṅwahani yo fhiraho, muṅwe muhulwane a re na bindu ḽawe o humbelwa nga mulanguli wa khamphani ya zwa u fhaṱa uri a ite mushumo muṱuku wa u vhaḓa kha kereke ya he onoyo wahashu a vha a tshi dzula hone. Onoyo mulanguli o vha a tshi zwi ḓivha uri wahashu ha ṱoḓi u pfa tshithu nga ha u shuma kerekeni. Fhedzi o vha o hanganea a tshi khou ṱoḓa muthu ane a nga ita wonoyo mushumo. Naho zwo ralo, wahashu o tenda u livhiswa nga Bivhili nahone a hana u ita wonoyo mushumo. Vhegeni i tevhelaho, gurannḓa ya henefho yo sumbedza tshifanyiso tsha muṅwe muvhaḓi a tshi khou hakedza tshifhambano kha yeneyo kereke. Arali wahashu o vha o tenda u ita wonoyo mushumo, khamusi ho vha hu tshi ḓo vha hu ene we a bvelela kha yeneyo gurannḓa. Humbulani uri vhaṅwe Vhakriste vho vha vha tshi ḓo mu dzhia hani! Ni vhona u nga Yehova ene o vha a tshi ḓo ḓipfa hani?

19-20. (a) Ro guda mini? (b) Ndi mini zwine ra kha ḓi tea u zwi guda?

¹⁹ Bivhili i sumbedza uri vhuporofita vhu tevhelaho vhune ha ḓo itea hu si kale ndi ha musi vharangaphanḓa vha shango vha tshi ḓivhadza uri hu na “mulalo na u tsireledzea.” Fhedzi ngauri ro gudiswa nga Yehova, ri a zwi ḓivha uri a hu nga vhi na mulalo wa vhukuma. Ri tea u ita mini musi hu sa athu itiwa yeneyo nḓivhadzo na ndozwo i sa athu vha hone? Yehova u ṱoḓa ri tshi dzula ro farakanea nga u huwelela na u ita vhafunziwa. Ri tea u dovha ra ṱutshela kule na vhurereli ha mazwifhi. Zwenezwo zwi katela u iledza mishumo i tshimbidzanaho na Babele Ḽihulu na u sumbedza nga ho livhaho uri a ri tsha vha tshipiḓa tshaḽo.

²⁰ Hu na zwiṅwe zwine zwa kha ḓi ḓo itea mafheleloni a ‘maḓuvha a vhufhelo.’ Nahone hu tshee na zwiṅwe zwine Yehova a khou ṱoḓa ri tshi zwi ita. Ndi zwifhio nahone ri nga ḓilugiselela hani? Ri ḓo zwi haseledza kha thero i tevhelaho.