Vhaisiraele Vha Tshifhingani Tsho Fhiraho Vho Vha Vha Tshi Ya Nndwani—Ndi Ngani Riṋe Ṋamusi Ri Sa Yi?
NGA Nndwa ya Shango Ya Vhuvhili, ḽiṅwe swole ḽa Vhanazi ḽo amba na Dziṱhanzi ḽa ri: “Arali vhoiwe ni sa khou tenda u lwa na France kana England, ni ḓo fa noṱhe!” Naho maswole a Vhanazi o vha e na zwigidi, a hu na na Ṱhanzi na nthihi ye ya tenda u pfuka milayo ya Yehova. Vho sumbedza uri vha na tshivhindi. Yeneyi ndi tsumbo yavhuḓi i sumbedzaho nḓila ine Ṱhanzi dza Yehova dza dzhia ngayo nndwa. A ri dzheneleli kha nndwa dza shango. Naho vhathu vha nga ri shushedza uri vha ḓo ri vhulaya, a ri dzhii sia kha nndwa dza ḽino shango.
Fhedzi a si vhathu vhoṱhe vhane vha ḓivhidza Vhakriste vhane vha tendelana na enea mavhonele. Vhunzhi ha vhathu vha tenda uri Mukriste u tea u lwela shango ḽa hawe. Vha nga kha ḓi amba uri: ‘Vhaisiraele vha tshifhingani tsho fhiraho vho vha vhe vhathu vha Mudzimu nahone vha tshi ya nndwani, ndi ngani Vhakriste ṋamusi vha sa yi nndwani?’ Ni nga vha fhindula hani? Ri nga vha ṱalutshedza uri vhuimo ha Vhaisiraele vha tshifhingani tsho fhiraho ho fhambana na vhuimo vhune vhathu vha Mudzimu vha vha khaho ṋamusi. Kha ri ambe nga ha nḓila ṱhanu dze vha fhambana ngadzo.
1. VHATHU VHA MUDZIMU VHO VHA VHE LUSHAKA LUTHIHI
Tshifhingani tsho fhiraho, Yehova o vha o khetha lushaka lwa Isiraele fhedzi uri lu vhe vhathu vhawe. O ri Vhaisiraele ndi ‘vhathu vhawe vho khetheaho kha vhathu vhoṱhe.’ (Ek. 19:5) Mudzimu o vha ṋea na shango ḽine vha ḓo dzula khaḽo. Nga zwenezwo, musi Mudzimu a tshi vhudza Vhaisiraele uri vha ye nndwani, vho vha vha tshi lwa na dziṅwe tshaka, vha sa lwi na vhatendi ngavho kana u vha vhulaya. *
Ṋamusi, vhashumeli vha Mudzimu vha ngoho vha bva kha “tshaka dzoṱhe na ndimi dzoṱhe.” (Nzumb. 7:9) Arali vhathu vha Mudzimu vha ya nndwani, vha ḓo vha vha tshi khou lwa na vhatendi ngavho na u vha vhulaya.
2. YEHOVA O VHA A TSHI TOU VHUDZA VHAISIRAELE URI VHA YE NNDWANI
Tshifhingani tsho fhiraho, Yehova o vha a tshi tou dzhia phetho ya uri Vhaisiraele vha ya lini nndwani na uri ndi ngani vha tshi tea u ya. Sa tsumbo, Mudzimu o vhudza Vhaisiraele uri vha lwe na Vhakanana ngauri Vhakanana vho vha vha tshi gwadamela madimoni, vha tshi ḓifara luvhi nga zwa vhudzekani nga nḓila i shonisaho na u ita vhana vhavho zwiṱhavhelo. Yehova o vhudza Vhaisiraele uri vha fhelise vhathu vhoṱhe vhane vha ita zwenezwo zwithu zwivhi Shangoni ḽo Fhulufhedziswaho u itela uri Vhaisiraele vha si edzise yeneyo tsumbo mmbi. (Lev. 18:24, 25) Musi Vhaisiraele vho no dzula Shangoni ḽo Fhulufhedziswaho, nga zwiṅwe zwifhinga Mudzimu o vha a tshi vha vhudza uri vha ye nndwani uri vha ḓitsireledze kha maswina avho. (2 Sam. 5:17-25) Fhedzi Yehova o vha a sa tendeli Vhaisiraele vha tshi ḓidzhiela phetho ya uri vha ye nndwani. Musi vha tshi ḓidzhiela yeneyo phetho, kanzhi ho vha hu tshi itea zwithu zwi si zwavhuḓi.—Num. 14:41-45; 2 Koron. 35:20-24.
Ṋamusi, Yehova ha tendeli vhathu vha tshi ya nndwani. Vhathu vha ya nndwani ngauri vha vha vha tshi khou itela u ḓivhuyedza vhone vhaṋe, vha sa khou itela Mudzimu. Vha ya nndwani ngauri vha khou ṱoḓa u vha na shango ḽihulwane, u vha na tshelede nnzhi kana vha tshi khou itela mafhungo a politiki. Fhedzi hu pfi mini nga vhane vha ri vha khou ya nndwani dzinani ḽa Mudzimu u itela u tsireledza vhurabeli havho kana u vhulaya maswina a Mudzimu? Yehova u ḓo tsireledza vhashumeli vhawe vha ngoho na u fhelisa maswina awe tshifhingani tshi ḓaho kha nndwa ine ya pfi Haramagedo. (Nzumb. 16:14, 16) Kha yeneyo nndwa, vhane vha ḓo vha vha tshi khou lwa ndi zwivhumbiwa zwa Mudzimu zwi re ṱaḓulu, hu si vhashumeli vhawe vhane vha vha kha ḽifhasi.—Nzumb. 19:11-15.
3. VHAISIRAELE VHO VHA VHA SA VHULAYI VHATHU VHE VHA VHA VHE NA LUTENDO KHA MUDZIMU
Naa Yehova u a lwela lushaka luṅwe na luṅwe ṋamusi u fana na musi a tshi lwela Vhaisiraele ngei Yeriko?
Tshifhingani tsho fhiraho, kanzhi mmbi ya Vhaisiraele yo vha i sa vhulayi vhathu vhane vha vha na lutendo kha Mudzimu. Nṱhani hazwo, vho vha vha tshi vhulaya vhathu vhe Yehova a ri vha vhulawe. Ṱhogomelani tsumbo mbili. Naho Yehova o vha o vhudza Vhaisiraele uri vha fhelise vhathu vha Yeriko, a vho ngo vhulaya Rahaba na muṱa wawe ngauri vho vha vho sumbedza lutendo. (Yosh. 2:9-16; 6:16, 17) Nga murahu, Vhaisiraele a vho ngo vhulaya lushaka lwa Gibeoni ngauri vho sumbedza uri vha ofha Mudzimu.—Yosh. 9:3-9, 17-19.
Ṋamusi, musi vhathu vha tshi ya nndwani, a vha vhavhaleli vhane vha vha na lutendo. Nga zwiṅwe zwifhinga musi hu na nndwa, hu vhulawa na vhathu vha si na mulandu.
4. MUSI VHAISIRAELE VHA TSHI YA NNDWANI, VHO VHA VHA TSHI TEA U TEVHEDZA MILAYO YA MUDZIMU
Tshifhingani tsho fhiraho, Yehova o vha a tshi ṱoḓa uri Vhaisiraele vha tevhedze milayo yawe musi vha tshi ya nndwani. Sa tsumbo, nga zwiṅwe zwifhinga, Yehova o vhudza Vhaisiraele uri vha vhudze muḓi we vha ḓa u lwa nawo uri vho “ḓa nga mulalo.” (Dot. 20:10) Yehova o vha a tshi dovha a ṱoḓa uri maswole a Vhaisiraele a dzule o kuna na uri vha tevhedze nḓila ine a ṱoḓa vha tshi ḓifara ngayo. (Dot. 23:9-14) Naho mmbi dza tshaka dze dza vha dzo tanga Vhaisiraele vho vha vha tshi tzhipa vhafumakadzi musi vho no kunda miḓi ye vha vha tshi khou lwa nayo, Yehova o vha a sa tendeli Vhaisiraele uri vha zwi ite. Zwavhuḓi-vhuḓi, vho vha vha songo tea u vhinga vhafumakadzi vhe vha vha thuba, u vhuya u swika hu tshi fhela ṅwedzi.—Dot. 21:10-13.
Ṋamusi, vhunzhi ha mashango o tendelana uri musi a tshi ya nndwani, a ḓo tevhedza milayo ye ya vhewa. Naho yeneyi milayo yo vhetshelwa uri i tsireledze vhathu vhane vha si vhe maswole, kanzhi dzitshaka dzi a pfuka yeneyi milayo.
5. YEHOVA O VHA A TSHI LWELA LUSHAKA LWAWE
Musi hu na nndwa ṋamusi, naa maswole a a khathutshela vhane vha fhulufhedzea kha Yehova u fana na musi hu tshi khathutshelwa Rahaba na muṱa wawe ngei Yeriko?
Tshifhingani tsho fhiraho, Yehova o vha a tshi lwela Vhaisiraele. Kanzhi o vha a tshi vha thusa nga lwa vhuṱolo uri vha kunde nndwani. Sa tsumbo, Yehova o thusa hani Vhaisiraele uri vha kunde muḓi wa Yeriko? Yehova o vha vhudza zwine vha tea u ita. Musi Vhaisiraele vha tshi ‘ṱavha mukosi muhulu u ngaho wa vhathu vha re nndwani, luvhondo lwo wa,’ zwa ita uri vha kunde muḓi wa Yeriko nga nḓila yo leluwaho. (Yosh. 6:20) Nahone Vhaisiraele vho kunda hani Vhaamori? ‘Yehova o nisa matombo mahulu a tshifhango a bvaho makoleni a vha rwa. Zwi re zwone ndi uri vho vhulawaho nga tshifhango vho vha vha tshi fhira vhe vha vhulawa nga Vhaisiraele nga banga.’—Yosh. 10:6-11.
Ṋamusi, Yehova ha lweli tshaka dzine dza vha kha ḽifhasi. Muvhuso wawe une wa vhuswa nga Yesu, “a si tshipiḓa tsha ḽino shango.” (Yoh. 18:36) Nṱhani hazwo, Saṱhane ndi ene ane a khou langa mivhuso yoṱhe ya vhathu. Nḓila ine nndwa dza ḽino shango dza tshinyadza ngayo nga nḓila ya tshiṱuhu, dzi sumbedza zwine Saṱhane a vha zwone.—Luka 4:5, 6; 1 Yoh. 5:19.
VHAKRISTE VHA VHUKUMA VHA LINGEDZA U ITA MULALO NA VHAṄWE
Samusi ro zwi vhona, vhuimo hashu ṋamusi ho fhambana na ha Vhaisiraele vha tshifhingani tsho fhiraho. Fhedzi zwenezwo a si zwone fhedzi zwine zwa ita uri ri si ye nndwani. Hu na zwiṅwe. Sa tsumbo, Mudzimu o dzula o amba uri maḓuvhani a vhufhelo vhathu vhane vha gudiswa ngae “a vha tsha ḓo dovha vha guda u lwa.” Nga zwenezwo, zwi tou pfala uri vha nga si dzhenelele kha dzinndwa. (Yes. 2:2-4) Zwiṅwe hafhu, Kristo o amba uri vhatevheli vhawe ‘a si tshipiḓa tsha shango,’ vha nga si dzhie sia kha nndwa dza shango.—Yoh. 15:19.
Kristo o dovha a ṱuṱuwedza vhatevheli vhawe uri vha ite zwi fhiraho zwenezwo. O vha vhudza uri vha iledze zwine zwa nga ita uri vha fare vhaṅwe nga mbilu, vha sinyuwe kana zwine zwa nga ita uri hu vhe na nndwa. (Mat. 5:21, 22) Zwiṅwe hafhu, o vha vhudza uri vha vhe “vhane vha ita uri hu vhe na mulalo” na uri vha fune maswina avho.—Mat. 5:9, 44.
Riṋe ri nga zwi itisa hani? Khamusi a ri ṱoḓi u ya nndwani, fhedzi naa ri pfa u nga muṅwe muthu ndi swina ḽashu tshivhidzoni? Kha ri lwe nga nungo dzoṱhe uri ri si ḓipfe nga yeneyo nḓila.—Yak. 4:1, 11.
A ri dzheneleli kha dzinndwa. Nṱhani hazwo, ri ita zwoṱhe zwine ra nga kona uri hu vhe na mulalo na u dzula ri tshi funana nga tshashu. (Yoh. 13:34, 35) U nga ri ri nga ḓiimisela u dzula ri sa dzhii sia musi ro lindela Yehova a tshi fhelisa nndwa dzoṱhe lwa tshoṱhe.—Ps. 46:9.
^ Nga zwiṅwe zwifhinga, lushaka lwa Vhaisiraele lwo vha lu tshi lwa nga tshalwo, fhedzi zwenezwo zwo vha zwi sa takadzi Yehova. (1 Dzikh. 12:24) Nga zwiṅwe zwifhinga, o vha a tshi tendela lushaka lwa Isiraele lu tshi lwa nga tshalwo ngauri vhaṅwe vhathu kha lwonolwo lushaka vho vha vha sa tsha fhulufhedzea khae kana vho ita zwivhi zwihulwane.—Vhahaṱ. 20:3-35; 2 Koron. 13:3-18; 25:14-22; 28:1-8.
You May Also Like
MBUDZISO DZINE DZA ANZELA U VHUDZISWA
Ndi Ngani Ṱhanzi dza Yehova vha sa yi Nndwani?
Shangoni ḽothe zwi a ḓivhea uri Ṱhanzi dza Yehova vha a hana u ya nndwani. Vhalani zwi itaho uri ri dzhie honoho vhukando.
