THERO I GUDWAHO 40
U “Ḓisa Vhanzhi Kha Zwivhuya”
“Vhane vha ḓisa vhanzhi kha zwivhuya vha ḓo penya sa ṋaledzi lini na lini.”—DAN. 12:3.
LUIMBO 151 U Ḓo Vhidzelela
MANWELEDZO *
1. Ndi zwiitea zwifhio zwi takadzaho zwine zwa ḓo itea nga Miṅwaha ya Tshigidi ya u vhusa ha Kristo?
RI ḒO vha ro takala vhukuma musi hu tshi thoma u vusiwa vhafu fhano kha ḽifhasi nga Miṅwaha ya Tshigidi ine ha ḓo vha hu tshi khou vhusa Kristo. Vhoṱhe vhe vha felwa nga vhane vha vha funa vho lavhelela nga maṱo matswuku u dovha vha vha vhona. Na Yehova u ḓipfa nga yeneyo nḓila. (Yobo 14:15) Humbulani uri vhathu ḽifhasini ḽoṱhe vha ḓo vha vho takala hani musi vhane vha vha funa vha tshi vuswa. Samusi ro zwi guda kha thero yo fhiraho, “vho lugaho” vhe madzina avho a ṅwalwa kha bugu ya vhutshilo, “vha ḓo vuswa uri vha tshile.” (Mish. 24:15; Yoh. 5:29) Khamusi vhunzhi ha vhathu vhane ra vha funa vho lovhaho vha ḓo vuswa musi hu tshi kha ḓi tou bva u fhela nndwa ya Haramagedo. * Zwiṅwe hafhu, “vha songo lugaho” sa vhe vha fa vha songo wana tshibuli tsha u ḓivha Yehova kana u mu shumela musi vha kha ḓi tshila, vha ḓo “vuswa uri vha haṱulwe.”
2-3. (a) Samusi zwo sumbedzwa kha Yesaya 11:9, 10, ndi mushumo ufhio wa u funza u sa athu u vhuya wa itwa ḽifhasini ḽoṱhe une wa ḓo itwa? (b) Ri ḓo amba nga ha mini kha ino thero?
2 Vhathu vhoṱhe vho vuswaho vha ḓo tea uri vha gudiswe. (Yes. 26:9; 61:11) Nga zwenezwo, hu ḓo tea u itwa mushumo wa u funza une a u athu u vhuya wa itwa ḽifhasini ḽoṱhe. (Vhalani Yesaya 11:9, 10.) Ndi ngani? Ndi ngauri vha songo lugaho vhane vha ḓo vuswa vha ḓo tea u guda nga ha Muvhuso wa Mudzimu, tshiṱhavhelo tsha Yesu tshi rengululaho, uri dzina ḽa Yehova ndi ḽa ndeme lungafhani na uri ndi ngani hu ene e eṱhe o tewaho nga u vhusa. Na vho lugaho vhane vha ḓo vuswa vha ḓo tea u guda nga ha zwe Yehova a zwi gudisa vhathu vhawe uri u ḓo zwi ita kha ḽifhasi nga zwiṱuku nga zwiṱuku. Vhaṅwe vha vhathu vho lugaho vho lovha musi Bivhili i sa athu u fhelela. Hu na zwinzhi zwine vho lugaho na vha songo lugaho vha ḓo tea u zwi guda.
3 Kha ino thero, ri ḓo fhindula mbudziso dzi tevhelaho: Mushumo muhulwane wa u funza vhathu u ḓo itwa hani? Hu ḓo itea mini kha vhane vha aravha zwavhuḓi musi vha tshi funzwa? Hu ḓo itea mini kha vhane vha sa ḓo aravha zwavhuḓi musi vha tshi funzwa? Phindulo dza dzenedzi mbudziso ndi dza ndeme vhukuma kha riṋe ṋamusi. Samusi ri tshi ḓo zwi vhona, vhuporofita vhu takadzaho vhu re kha bugu ya Daniele na Nzumbululo vhu ḓo ri thusa u pfesesa uri hu ḓo itea mini musi vhafu vha tshi vuswa. Kha ri thome nga u amba nga ha zwiitea zwavhuḓi zwe zwa ambiwa kha vhuporofita vhu re kha Daniele 12:1, 2.
“VHO EḒELAHO MAVUNI VHA ḒO VUWA”
4-5. Daniele 12:1 i ri hu ḓo itea mini maḓuvhani a vhufhelo?
4 Vhalani Daniele 12:1. Bugu ya Daniele i amba nga ha zwithu zwi takadzaho zwine zwa ḓo itea nga u tevhekana maḓuvhani a vhufhelo. Sa tsumbo Daniele 12:1 i amba uri Mikaele ane a vha Yesu Kristo u ḓo ‘imelela vhathu’ vha Mudzimu. Tshenetsho tshipiḓa tsha vhuporofita tsho thoma u itea nga 1914 musi Yesu a tshi vhewa uri a vhe Khosi ya Muvhuso wa Mudzimu u re ṱaḓulu.
5 Fhedzi Daniele o vhudzwa na uri Yesu o vha a tshi “ḓo ima” nga “tshifhinga tshi konḓaho tshi sa athu u vhuya tsha vha hone u bva tshee ha vha na lushaka u swika nga tshenetsho tshifhinga.” Tshenetsho “tshifhinga tshi konḓaho” ndi “maṱungu mahulu” e a ambiwa kha Mateo 24:21. Yesu u ḓo ima kana a tsireledza vhathu vha Mudzimu mafheleloni a tshifhinga tshi konḓaho, hune ha vha nga Haramagedo. Bugu ya Nzumbululo i amba uri vhenevha vhathu ndi vha “gogo ḽihulu,” vhane vha ḓo “bva maṱunguni mahulu.”—Nzumb. 7:9, 14.
6. Hu ḓo itea mini musi vha gogo ḽihulu vho no ponyoka maṱungu mahulu? Ṱalutshedzani. (Vhalani na thero “Mbudziso Dzi Bvaho Kha Vhavhali” kha tshenetshi Tshiingamo, ine ya amba nga ha vhane vha ḓo vuselwa u tshila kha ḽifhasi.)
6 Vhalani Daniele 12:2 na ṱhaluso yalwo i re magumoni a siaṱari Bivhilini. Hu ḓo itea mini musi vha gogo ḽihulu vho no ponyoka tshenetshi tshifhinga tshi konḓaho? Tshifhingani tsho fhiraho, ro vha ri tshi humbula uri Daniele 12:2 i vha i tshi khou ambela kha vhane vha ḓo vuselwa u tshila ṱaḓulu kana kha nḓila ye mushumo washu wa bvela ngayo phanḓa nga murahu ha musi vhane vha ri tovhola vho lingedza u thivhela mushumo washu nga 1918. * Fhedzi zwino ri pfesesa uri maipfi a re kha Daniele 12:2 a vha a tshi khou ambela kha vhane vha ḓo vusiwa shangoni ḽiswa. Ndi ngani ri tshi amba nga u ralo? Ndi ngauri ipfi “mavuni” ḽo dovha ḽa shumiswa kha Yobo 17:16 hune ḽa vha ḽi tshi khou ambela kha “Vhiḓa.” Nga nṱhani ha uri ipfi “mavuni” ḽi ambela kha “Vhiḓa,” zwi amba uri Daniele 12:2 i tea u vha i tshi khou ambela kha vhane vha ḓo vuselwa u tshila kha ḽifhasi, musi maḓuvha a vhufhelo o no fhela na nga murahu ha nndwa ya Haramagedo.
7. (a) Ndi ngani ri tshi nga ri vhaṅwe vha ḓo “vuselwa u tshila tshoṱhe”? (b) Ndi ngani ri tshi ri vha vha vho “vuswa nga nḓila yo khetheaho”?
7 Fhedzi Daniele 12:2 i vha i tshi khou amba mini musi i tshi ri vhaṅwe vha ḓo “vuselwa u tshila tshoṱhe”? I vha i tshi khou amba uri miṅwahani ya 1 000, vhe vha vuswa vha ḓivha Yehova kana vha bvela phanḓa vha tshi mu ḓivha na u mu thetshelesa na u thetshelesa Yesu vha ḓo wana vhutshilo vhu sa fheli. (Yoh. 17:3) Vhenevho vhathu vha ḓo vha vho “vuswa nga nḓila yo khetheaho” u fhira vhe vha vuswa tshifhingani tsho fhiraho. (Vhahev. 11:35) Ndi ngani? Ndi ngauri vhathu vha re na tshivhi vhe vha vuswa tshifhingani tsho fhiraho vho dovha vha fa.
8. Ndi ngani hu tshi pfi vhaṅwe vha ḓo “vuselwa u shoniswa na u nyadziwa lwa tshoṱhe”?
8 Fhedzi vhaṅwe vha vhathu vhane vha ḓo vuswa a vha nga ḓo tenda u gudiswa nga Yehova. Vhuporofita vhu re kha bugu ya Daniele vhu amba uri vhaṅwe vha ḓo “vuselwa u shoniswa na u nyadziwa lwa tshoṱhe.” Nga nṱhani ha uri a vho ngo thetshelesa Yehova, madzina avho ha nga ḓo ṅwalwa kha bugu ya vhutshilo nahone a vha nga wani vhutshilo vhu sa fheli. Nṱhani hazwo, vha ḓo “nyadziwa lwa tshoṱhe” kana u fheliswa. Nga zwenezwo, Daniele 12:2 i vha i tshi khou amba nga ha zwine zwa ḓo itea kha vhane vha ḓo vuswa, zwi tshi ya nga uri vho ḓifara hani musi vho no vuswa. * (Nzumb. 20:12) Vhaṅwe vha ḓo wana vhutshilo vhu sa fheli; ngeno vhaṅwe vha sa ḓo vhu wana.
“VHA ḒISA VHANZHI KHA ZWIVHUYA”
9-10. Hu ḓo dovha ha itea mini nga murahu ha maṱungu mahulu nahone ndi vhonnyi vhane vha ḓo “penya sa lutombo lwa ṱaḓulu”?
9 Vhalani Daniele 12:3. Hu ḓo dovha ha itea mini nga murahu ha “tshifhinga tshi konḓaho”? Nga nnḓa ha zwo ambiwaho kha Daniele 12:2, ndimana 3 i amba uri hu na zwine zwa ḓo itea nga murahu ha maṱungu mahulu.
10 Ndi vhonnyi vhane vha ḓo “penya sa lutombo lwa ṱaḓulu”? Mateo 13:43 i a ri thusa u ḓivha uri vhenevho vhathu ndi vhonnyi, i ri: “Nga tshenetsho tshifhinga vho lugaho vha ḓo penya vhunga ḓuvha Muvhusoni wa Khotsi avho.” Kha lwonolo luṅwalo Yesu o vha a tshi khou amba nga ha “vhana vha Muvhuso” vhane vha vha vharathu vhawe vho ḓodzwaho, vhane vha ḓo vhusa nae kha Muvhuso wa Mudzimu u re ṱaḓulu. (Mat. 13:38) Nga zwenezwo, Daniele 12:3 i tea u vha i tshi ambela kha vhaḓodzwa na mushumo une vha ḓo u ita nga Miṅwaha ya Tshigidi musi hu tshi khou vhusa Kristo.
Vha 144 000 vha ḓo shumisana na Yesu Kristo u itela u livhisa mushumo wa u funza une wa ḓo itwa nga miṅwaha ya 1 000 (Sedzani phara 11)
11-12. Ndi mushumo ufhio une vha 144 000 vha ḓo u ita nga miṅwaha ya 1 000?
11 Vhakriste vho ḓodzwaho vha ḓo “ḓisa vhanzhi kha zwivhuya” nga nḓila ḓe? Vhaḓodzwa vha ḓo shumisana na Yesu Kristo u itela u livhisa mushumo wa u funza kha ḽifhasi une wa ḓo vha u tshi khou itwa nga miṅwaha ya 1 000. Vha 144 000 a vha nga vhusi sa mahosi fhedzi, vha ḓo dovha vha shuma sa vhotshifhe. (Nzumb. 1:6; 5:10; 20:6) Nga zwenezwo, vha ḓo thusa kha u “fhodza dzitshaka” na u thusa vhathu uri vha si tsha vha na tshivhi nga zwiṱuku nga zwiṱuku. (Nzumb. 22:1, 2; Hesek. 47:12) Tshenetsho tshi ḓo vha tshifhinga tshi takadzaho kha vhaḓodzwa.
12 “Vhanzhi” vhane vha ḓo ḓiswa kha zwivhuya ndi vhafhio? Ndi vho vuswaho na vhane vha ḓo ponyoka Haramagedo u katela na vhana vhane vha nga bebwa shangoni ḽiswa. Nga murahu ha miṅwaha ya 1 000, vhathu vhoṱhe kha ḽifhasi vha ḓo vha vha si na tshivhi. Nga zwenezwo, madzina avho a ḓo ṅwalwa lini kha bugu ya vhutshilo lwa tshoṱhe zwa tou nga o ṅwalwa nga inki hu si nga penisela?
U LINGWA LWA U FHEDZISELA
13-14. Vhathu vhoṱhe vha si na tshivhi vha ḓo tea uri vha ite mini musi vha sa athu u wana vhutshilo vhu sa fheli?
13 Ri songo hangwa uri nga nṱhani ha uri muthu ha na tshivhi a zwi ambi uri u ḓo sokou wana vhutshilo vhu sa fheli. Humbulani nga ha Adamu na Eva. Vho vha vhe si na tshivhi, fhedzi vho vha vha tshi tea u thetshelesa Yehova uri vha kone u wana vhutshilo vhu sa fheli. Zwi ṱungufhadzaho ndi uri a vho ngo thetshelesa.—Vharoma 5:12.
14 Vhathu vha ḓo vha vhe hani nga murahu ha miṅwaha ya 1 000? Vhathu vhoṱhe vha ḓo vha vha si na tshivhi. Naa vhathu vha si na tshivhi vha ḓo tikedza nḓila ine Yehova a vhusa ngayo? Kana vha ḓo fana na Adamu na Eva vhe vha si thetshelese Yehova naho vha si na tshivhi? Dzenedzi mbudziso dzi tea u fhindulwa. Nga nḓila-ḓe?
15-16. (a) Vhathu vhoṱhe vha ḓo wana lini tshibuli tsha u sumbedza uri vha a fhulufhedzea kha Yehova? (b) Hu ḓo itea mini musi ro no lingwa lwa u fhedzisela?
15 Saṱhane u ḓo valelwa lwa miṅwaha ya 1 000. Nga tshenetsho tshifhinga, ha nga koni u xedza vhathu. Fhedzi nga murahu ha miṅwaha ya 1 000, u ḓo vulelwa. U ḓo lingedza u xedza vhathu vha si na tshivhi. Nga tshenetsho tshifhinga, vhathu vhoṱhe vha re kha ḽifhasi vha si na tshivhi vha ḓo tea u sumbedza uri vha ṱhonifha dzina ḽa Yehova na uri vha tikedza nḓila ine a vhusa ngayo. (Nzumb. 20:7-10) Zwine vha ḓo zwi ita nga tshenetsho tshifhinga ndi zwone zwine zwa ḓo ita uri vha ṅwalwe lwa tshoṱhe kha bugu ya vhutshilo kana vha si ṅwalwe.
16 Bivhili i amba uri vhaṅwe a vha nga fhulufhedzei u fana na Adamu na Eva nahone a vha nga tendi u vhuswa nga Yehova. Hu ḓo itea mini khavho? Nzumbululo 20:15 i ri: “Vhoṱhe vha songo ṅwaliwaho buguni ya vhutshilo vha poswa dzivhani ḽa mulilo.” Vhathu vha sa thetshelesi Yehova vha ḓo fheliswa lwa tshoṱhe. Fhedzi vhunzhi ha vhathu vha si na tshivhi vha ḓo fhulufhedzea musi vha tshi lingwa lwa u fhedzisela. Madzina avho a ḓo ṅwalwa kha bugu ya vhutshilo lwa tshoṱhe.
“TSHIFHINGANI TSHA VHUFHELO”
17. Muruṅwa o vhudza Daniele uri hu ḓo itea mini nga tshifhinga tshashu? (Daniele 12:4, 8-10)
17 Zwi a takadza vhukuma u humbula nga ha zwithu zwine zwa ḓo itea tshifhingani tshi ḓaho. Fhedzi muruṅwa o dovha a vhudza Daniele maṅwe mafhungo a ndeme malugana na tshifhinga tshashu, tshine tsha vha ‘tshifhinga tsha vhufhelo.’ (Vhalani Daniele 12:4, 8-10; 2 Tim. 3:1-5) Muruṅwa o vhudza Daniele a ri: ‘Nḓivho ya ngoho i ḓo ḓala.’ Vhuṅwe vhuporofita vhu re kha yeneyi bugu ho vha vhu tshi ḓo pfeseswa nga vhuḓalo nga vhathu vha Mudzimu. Muruṅwa o dovha a amba uri nga tshenetshi tshifhinga “vhavhi vha ḓo ita vhuvhi, a hu na na muthihi wavho ane a ḓo pfesesa.”
18. Hu ḓo itea mini hu si kale kha vhathu vhavhi?
18 Ṋamusi zwi nga vhonala u nga vhathu vhavhi a vha pfiswi vhuṱungu nga nṱhani ha vhuvhi vhune vha vhu ita. (Maḽ. 3:14, 15) Fhedzi hu si kale, Yehova u ḓo haṱula vhane vha fanyiswa na mbudzi a vha khethekanya na vhane vha fanyiswa na nngu. (Mat. 25:31-33) Vhavhi a vha nga ponyoki maṱungu mahulu kana u vuswa uri vha vhe hone shangoni ḽiswa. Madzina avho a ḓo vha a songo ṅwalwa “buguni” yo ambiwaho kha Maḽeaxi 3:16.
19. Zwino ndi tshifhinga tsha uri ri ite mini nahone ndi ngani? (Maḽeaxi 3:16-18)
19 Zwino ndi tshifhinga tsha uri ri tshile nga nḓila ine ya sumbedza uri a ri vhathu vhavhi. (Vhalani Maḽeaxi 3:16-18.) Yehova u khou kuvhanganya vhane a vha dzhia sa ‘vhathu vhawe vho khetheaho’ kana vhane vha vha vha ndeme khae. A zwi timatimisi uri ri ṱoḓa u vha vhathu vho raloho.
Zwi ḓo takadza vhukuma u vhona Daniele, vhane ra vha funa na vhaṅwe vhanzhi vha tshi “ima” kana u vuswa uri vha wane mukovhe wavho (Sedzani phara 20)
20. Ndi zwifhio zwe Yehova a zwi fhulufhedzisa Daniele nahone ndi ngani no lavhelela u vhona zwenezwo zwi tshi itea?
20 Ri khou tshila zwifhingani zwi takadzaho vhukuma. Fhedzi hu kha ḓi ḓo itea zwithu zwi takadzaho hu si kale. Hu si kale, ri ḓo vhona vhuvhi hoṱhe vhu tshi fheliswa. Nga murahu ha zwenezwo, ri ḓo vhona hu tshi itea zwe Yehova a fhulufhedzisa Daniele musi a tshi ri: “U ḓo ima maḓuvhani a vhufhelo wa wana mukovhe wau.” (Dan. 12:13) Naa no lavhelela nga maṱo matswuku u vhona ḓuvha ḽa musi Daniele khathihi na vhane na vha funa vha tshi dovha vha “ima” kana u vuswa? Arali zwo ralo, itani zwine na nga kona uri ni dzule ni tshi fhulufhedzea, ndi hone ni tshi nga vha na vhungoho ha uri dzina ḽaṋu a ḽi nga thuthiwi kha bugu ya Yehova ya vhutshilo.
LUIMBO 80 ‘Thetshelani Ni Vhone, Yehova Ndi Wavhuḓi’
^ Ino thero i ḓo khwinisa nḓila ye ra vha ri tshi pfesesa ngayo mushumo muhulwane wa u funza wo ambiwaho kha Daniele 12:2, 3. Ri ḓo vhona uri wonoyo mushumo u ḓo itwa lini na uri ndi vhonnyi vhane vha ḓo u ita. Ri ḓo dovha ra vhona uri wonoyo mushumo wa u funza u ḓo lugiselela hani vhane vha ḓo vha vhe hone kha ḽifhasi musi vha tshi lingwa lwa u fhedza nga murahu ha Miṅwaha ya Tshigidi ya u vhusa ha Kristo.
^ Khamusi hu ḓo thoma nga u vuswa vhashumeli vha Mudzimu vhe vha lovha vha tshi mu shumela nga u fhulufhedzea kha maḓuvha a vhufhelo, ha kona u vuswa vhe vha lovha nga phanḓa havho, zwi tshi ya nga murafho na murafho. Arali zwi nga yeneyo nḓila, zwi amba uri murafho muṅwe na muṅwe u ḓo vha na tshibuli tsha u ṱanganedza vhathu vhane vha vha ḓivha. Hu sa londwi uri zwi ḓo vha nga nḓila ifhio, Bivhili i amba uri vhane vha ḓo vuselwa u tshila ṱaḓulu vha ḓo vuswa nga ‘nḓila yo dzudzanyeaho.’ Nga zwenezwo, zwi tou pfala uri na vhane vha ḓo vuselwa u tshila kha ḽifhasi vha ḓo vuswa nga nḓila yo dzudzanyeaho.—1 Vhakor. 14:33; 15:23.
^ Zwenezwi zwi shandula nḓila ye ra vha ri tshi pfesesa ngayo enea mafhungo na nḓila ye ra zwi ṱalutshedza ngayo kha bugu Thetshelesani Vhuporofita ha Daniele! na kha Tshiingamo tsha Tshiisimane tsha 1 July, 1987, masiaṱ. 21-25.
^ Maipfi “vho lugaho” na “vha songo lugaho” ane a wanala kha Mishumo 24:15 na maipfi “vhe vha ita zwivhuya” na “vhe vha ita zwivhi” ane a wanala kha Yohane 5:29, a vha a tshi khou amba nga ha zwe vhathu vho vuswaho vha zwi ita musi vha sa athu u lovha. Fhedzi ane a vha kha Daniele 12:2 a vha a tshi khou ambela kha zwine vha ḓo zwi ita musi vho no vuswa.
