1, 2. (a) Ndi ufhio mushumo we wa vha u tshi ḓa u thoma vhutshiloni ha Yesu, nahone ndi ngani? (b) Ndi mini zwine ra fanela u zwi ita u itela uri ri vhe “vhashumisani na Mudzimu” vha bvelelaho?

YESU KRISTO o vha e muvhaḓi nahone e muḓinḓa. (Marko 6:3; Vharoma 15:8) O vha e makone kha yeneyo mishumo. Sa muvhaḓi, o guda nḓila ya u shumisa zwishumiswa zwa u vhaḓa, o ita zwithu zwavhuḓi a tshi shumisa thanda. Sa mufunzi wa mafhungo maḓifha, o shumisa nga vhutsila nḓivho yawe nga ha Maṅwalo u itela u thusa vhathu uri vha pfesese ngoho i re Ipfini ḽa Mudzimu. (Mat. 7:28; Luka 24:32, 45) Musi Yesu e na miṅwaha ya 30, o ṱutshela mushumo wawe wa u vhaḓa ngauri o vha a tshi zwi ḓivha uri u vha muḓinḓa wo vha u wone mushumo wa ndeme. O amba uri Mudzimu o mu rumela kha ḽifhasi uri a ḓe a ḓivhadze mafhungo maḓifha nga ha Muvhuso wa Mudzimu. (Mat. 20:28; Luka 3:23; 4:43) Yesu o ita uri vhuḓinḓa vhu ḓe u thoma vhutshiloni hawe nahone o vha a tshi ṱoḓa na vhaṅwe vha tshi ṱanganela nae kha wonoyo mushumo.—Mat. 9:35-38.

² Ri nga kha ḓi vha ri si vhavhaḓi, fhedzi ri vhaḓinḓa vha mafhungo maḓifha. Wonoyo mushumo ndi wa ndeme ngauri ri shuma na Mudzimu; ri vhidzwa “vhashumisani na Mudzimu.” (1 Vhakor. 3:9; 2 Vhakor. 6:4) Ri a zwi ḓivha uri “tshihulwane kha mafhungo [a Yehova] ndi uri a vha mafhungo-ngoho.” (Ps. 119:159, 160) Ndi ngazwo ri tshi ṱoḓa u ita vhungoho ha uri ri “[fara] ipfi ḽa ngoho nga nḓila yo teaho” musi ri vhuḓinḓani. (Vhalani 2 Timotheo 2:15.) U itela u ita zwenezwo, ri  dzula ri tshi khwinisa vhutsila hashu ha u shumisa Bivhili, ine ya vha tshone tshishumiswa tsha ndeme tshine ra tshi shumisa u funza ngoho nga ha Yehova, Yesu na Muvhuso wa Mudzimu. Ndangulo ya Yehova i na zwiṅwe zwishumiswa zwine ra tea u ḓiḓowedza zwone u itela uri thusa uri ri bvelele vhuḓinḓani. Zwenezwo zwishumiswa zwi wanala kha Bogisi Ḽashu Ḽa Zwishumiswa Zwa U Funza.

3. Kha tshenetshi tshifhinga tsho salaho tsha u huwelela, ri fanela u livhisa ṱhogomelo kha mini, nahone Mishumo 13:48 i ri thusa hani u ita zwenezwo?

³ Ni nga ḓi vhudzisa uri ndi ngani ḽi tshi vhidzwa Bogisi Ḽa Zwishumiswa Zwa U Funza hu si Bogisi Ḽa Zwishumiswa Zwa U Huwelela. U “huwelela” zwi amba u ḓivhadza mulaedza; fhedzi u “funza” zwi amba u ḓivhadza mulaedza nga nḓila ine ya swikelela mbilu na muhumbulo wa muthu u itela uri a kone u tevhedza zwe a zwi guda. Kha tshenetshi tshifhinga tsho salaho tsha u huwelela, ri fanela u livhisa ṱhogomelo kha u thoma ngudo dza Bivhili na u funza vhathu ngoho. Zwenezwo zwi amba u ṱoḓa vhane vha vha na “mavhonele o teaho uri vha wane vhutshilo vhu sa fheli” na u vha thusa uri vha vhe vhatendi.—Vhalani Mishumo 13:44-48.

4. Ri nga ḓivha hani vhane vha vha na “mavhonele o teaho uri vha wane vhutshilo vhu sa fheli,” nahone ri nga vha wana hani?

⁴ Ri nga ḓivha hani vhane vha vha na “mavhonele o teaho uri vha wane vhutshilo vhu sa fheli”? U fana na ḓanani ḽa u thoma, ri nga vha wana nga u huwelela khavho. Ri fanela u ita zwe Yesu a ri vhudza zwone musi a tshi ri: “Musi ni tshi dzhena muḓini kana muḓanani naho u ufhio, ni ṱoḓe a faneleaho.” (Mat. 10:11) A ri lavheleli vhathu vha sa fhulufhedzei, vhane vha ḓikukumusa kana vha sa ṱoḓi u ḓivha Mudzimu uri vha ṱanganedze mafhungo maḓifha. Ri khou ṱoḓa vhathu vhane vha fhulufhedzea, u ḓiṱukufhadza na vhane vha ṱoḓa u ḓivha ngoho. Ri nga fanyisa zwenezwo na zwe Yesu a vha a tshi zwi ita u itela u wana thanda dzavhuḓi dza u ita thundu, mavothi, dzhogo kana zwiṅwe zwithu. Musi o no wana thanda yo faneleaho, o vha a tshi dzhia bogisi ḽa zwishumiswa nahone a shumisa vhutsila u itela u ita zwine a khou ṱoḓa u zwi ita. Ri fanela u ita zwi fanaho u itela u wana vhafunziwa vha re na mbilu dzavhuḓi.—Mat. 28:19, 20.

5. Ndi mini zwine ra fanela u zwi ḓivha nga ha zwishumiswa zwine zwa wanala kha Bogisi Ḽashu Ḽa Zwishumiswa Zwa U Funza? Fanyisani. (Sedzani tshifanyiso tsha u thoma.)

⁵ Kha bogisi ḽa zwishumiswa, tshishumiswa tshiṅwe na tshiṅwe tshi na mushumo watsho. Sa tsumbo, ṱhogomelani zwishumiswa zwa u vhaḓa zwe Yesu a vha a tshi nga vha o zwi shumisa. * O vha a tshi ṱoḓa zwishumiswa zwa u kala na u tala; u khatha, u vhora na u khathedzela thanda; na u ita uri i linganele na u vhofha. Nga hu fanaho, tshishumiswa tshiṅwe na tshiṅwe tshine tsha vha kha Bogisi Ḽashu Ḽa Zwishumiswa Zwa U Funza tshi na mushumo watsho. Kha ri ṱhogomela zwine zwa wanala kha bogisi ḽashu ḽa zwishumiswa na u vhona nḓila ine ra nga zwi shumisa ngayo.

6, 7. (a) No no shumisa hani garaṱa dza vhukwamani? (b) Tshibammbiri tsha u rambela vhathu miṱanganoni tshi shuma mini?

⁶ Garaṱa Dza Vhukwamani. Zwenezwi zwishumiswa ndi zwiṱuku fhedzi ndi zwa ndeme sa izwi zwi tshi ri ḓivhadza na u livhisa vhathu kha website yashu. Musi vho no dzhena kha website vha ḓo kona u guda zwo engedzeaho nga ha riṋe na u ita khumbelo ya pfunzo ya Bivhili. Ho no itiwa khumbelo dzi fhiraho 400 000 dza pfunzo dza Bivhili kha jw.org nahone hu itwa khumbelo nnzhi ḓuvha ḽiṅwe na ḽiṅwe! Ni nga tshimbila na garaṱa dza vhukwamani u itela u shumisa zwibuli zwine na zwi wana.

⁷ Zwibammbiri Zwa U Ramba. Tshibammbiri tshine ra tshi shumisela u ramba vhathu miṱanganoni nahone tshi shuma nga nḓila mbili. Tshi ri: “Ni khou rambiwa u itela u guda Bivhili na Ṱhanzi  dza Yehova.” Onoyo muthu a nga ita zwenezwo nga u ḓa “miṱanganoni yashu ya khagala” kana u fara pfunzo nae. Hetshi tshi shumiswa a tshi ri ḓivhadzi fhedzi, fhedzi tshi dovha tsha ramba vhane vha “ṱhogomela uri vha ṱoḓa u ḓivha Mudzimu” uri vha gude Bivhili na riṋe. (Mat. 5:3) Vhathu vho ṱanganedzwa miṱanganoni yashu hu sa londwi uri vho ṱanganedza pfunzo ya Bivhili kana hai. Arali vha ḓa, vha ḓo vhona na u pfa pfunzo ya ngoho i bvaho Bivhilini.

8. Ndi ngani zwi zwa ndeme uri vhathu vha ḓe miṱanganoni yashu naho hu tshi nga vha luthihi fhedzi? Ṋeani tsumbo.

⁸ Ndi zwa ndeme uri ri rambele vhathu miṱanganoni yashu. Ndi ngani? Vha ḓo kona u vhona uri hu na phambano khulwane vhukati ha vhathu vhane vha livhiswa nga muya wa Mudzimu na Babele Ḽihulu. (Yes. 65:13) Vhaṅwe vhavhingani vha ngei Amerika vho ṱhogomela zwenezwi zwithu miṅwahani i si gathi yo fhiraho. Ray na Linda vho dzhia phetho ya uri vha ḓo dalela kereke iṅwe na iṅwe. Vho vha vha tshi tenda kha Mudzimu na u ṱoḓa u vha tsini nae, nga zwenezwo, vho thoma u dalela kereke iṅwe na iṅwe henefho. Kereke dza hanefho dzo vha tamba vhukuma nahone vha ḽiwa tshelede nnzhi nga u ṋeela. Vhenevho vhavhingani vho dzhia phetho ya u sedza zwithu zwivhili zwine zwa ḓo ita uri vha dzhene iṅwe ya kereke dzine vha ḓo dzi dalela. Tsha u thoma, vho vha tshi fanela uri vha gude zwiṅwe zwithu musi vhe henefho kerekeni nahone tsha vhuvhili, miraḓo ya kereke yo vha i tshi fanela u vha yo ambara nga nḓila ine ya sumbedza uri vha vhaimeleli vha Mudzimu. Nga murahu ha miṅwaha i si gathi, vho vha vho no dalela kereke dzoṱhe, fhedzi zwe vha zwi ita ho vha hu ḓinetisela ḽi fhedzi. A vho ngo guda na tshithu na tshithihi, miraḓo ya kereke yo vha i sa sumbedzi uri vha vhaimeleli vha Mudzimu. Musi vha tshi bva kerekeni ya u fhedzisela ye vha vha vho i dalela, Linda o ya mushumoni, Ray a ya hayani. Musi Ray e nḓilani ya u ya hayani, o vhona Holo ya Muvhuso nahone a ḓivhudzisa uri, ‘Ndi ngani ndi sa dzheni, ndi vhone uri hu khou itea mini?’ Ndi ngoho uri zwe a zwi vhona, o vha a sa athu vhuya a zwi vhona na fhethu na huthihi! Muṅwe na muṅwe Holoni ya Muvhuso o vha e na vhuthu, vhe na vhukonani nahone vho ambara nga nḓila i ṱhonifheaho. Ray o ya a dzula kha zwidulo zwa phanḓa nahone a takalela zwe a vha a tshi khou zwi guda! Zwenezwo zwi ri humbudza nḓila ye muapostola Paulo a ṱalusa ngayo muthu ane a ḓa lwa u tou thoma miṱanganoni ya Vhukriste nahone onoyo muthu a ri: “Zwa vhukuma Mudzimu u vhukati haṋu.” (1 Vhakor. 14:23-25) Ray o thoma uya miṱanganoni Swondaha iṅwe na iṅwe; na uya miṱanganoni ya vhukati ha vhege. Linda na ene a thoma u ṱanganela, musi vhe na miṅwaha ya 70, vho tenda u guda Bivhili nahone vha lovhedzwa.

9, 10. (a) Ndi ngani zwi tshi leluwa u shumisa zwibammbiri? (b) Ṱalutshedzani nḓila ine na nga shumisa ngayo tshibammbiri tshine tsha ri Muvhuso wa Mudzimu ndi mini?

⁹ Zwibammbiri. Ri na zwibammbiri zwa malo kha bogisi ḽashu zwine ri nga zwi shumisa u thoma nyambedzano. Samusi zwenezwi zwibammbiri zwo thoma u shumiswa nga 2013, ho no gandiswa zwi ṱoḓaho u vha biḽioni ṱhanu! Tshi takadzaho nga zwenezwi zwibammbiri ndi uri arali na vhuya na guda u shumisa tshithihi tshazwo, ni a kona u shumisa zwoṱhe ngauri zwi a fana. Ni nga shumisa hani tshibammbiri u itela u kunga muthu uri ni vhe na nyambedzano?

¹⁰ Ni nga kha ḓi khetha u shumisa tshibammbiri tshine tsha ri, Muvhuso wa Mudzimu ndi mini? Sumbedzani muthu mbudziso ine ya vha kha siaṱari ḽa u tou thoma: “Naa no no vhuya na ḓivhudzisa uri Muvhuso wa Mudzimu ndi mini? Naa ni nga ri ndi . . . ?” Mu vhudziseni uri o vha a tshi nga khetha phindulo ifhio kha idzi tharu. Ni sa athu amba uri o fhindula zwone kana hai, vulani nga ngomu hatsho. Mu sumbedzeni “Zwine Bivhili Ya Amba” nahone ni haseledze luṅwalo lwa Daniele 2:44 na Yesaya 9:5. Arali zwi tshi konadzea bvelani  phanḓa na nyambedzano. Tsha u fhedzisela, mu vhudziseni mbudziso ine ya vha nga murahu kha tshiṱoho tshine tsha ri, “Zwine Na Nga Ḓivhudzisa Zwone”: “Vhutshilo vhu ḓo vha vhu hani nga fhasi ha vhuvhusi ha Muvhuso wa Mudzimu?” Ni nga fhindula yeneyo mbudziso musi ni tshi haseledza nae tshifhingani tshi ḓaho. Musi ni tshi ṱangana hafhu, ni nga haseledza ngudo 7 ya bugwana Mafhungo Maḓifha A Bvaho Ha Mudzimu!, ine ya vha iṅwe ya zwishumiswa zwashu zwa u thoma ngudo ya Bivhili.

11. Magazini dzashu dzo itelwa mini, fhedzi ndi mini zwine ra fanela u zwi ḓivha nga hadzo?

¹¹ Dzimagazini. Tshiingamo na Awake! ndi dzone bugu dzine dza gandiswa na u ṱalutshedzelwa u fhira bugu dzoṱhe ḽifhasini! Nga nṱhani ha uri dzi vhalwa nga vhathu vhanzhi, thero dzi re kha gwati dzo itwa nga nḓila ine dza kunga. Ri tea u dzi shumisa u itela u thusa vhathu uri vha livhise ṱhogomelo kha zwithu zwine zwa vha zwa ndeme vhutshiloni. Nga zwenezwo, ri tea u ḓivha uri ndi ufhio magazini une ra tea u u ṋea muthu.

12. (a) Awake! yo itelwa vhafhio, nahone tshipikwa tshayo ndi tshifhio? (b) No khunyeledza mini musi ni tshi shumisa tshenetshi tshishumiswa?

¹² Awake! yo itelwa vhavhali vhane vha ḓivha zwiṱuku nga ha Bivhili kana vhane vha si i ḓivhe. Vha nga vha vha sa ḓivhi tshithu nga pfunzo dza Vhukriste, vha sa fhulufheli vhurereli kana vha sa ḓivhi uri Bivhili i na nyeletshedzo dzine dza shuma. Tshipikwa tshihulwane tsha Awake! ndi tsha u ita uri muvhali a tende uri hu na Mudzimu. (Vharoma 1:20; Vhaheb. 11:6) I dovha ya thusa muvhali uri a ‘ṱanganedze Bivhili sa ipfi ḽa Mudzimu.’ (1 Vhathes. 2:13) Thero tharu dza 2018 ndi: “The Way of Happiness,” “12 Secrets of Successful Families” na “Help for Those Who Grieve.”

13. (a) Tshiingamo tsha tsimuni tsho itelwa vhafhio? (b) No khunyeledza mini musi ni tshi shumisa tshenetshi tshishumiswa?

¹³ Tshiingamo tsha tsimuni tshi livhisa ṱhogomelo kha vhathu vhane vha ṱhonifha Mudzimu na Ipfi ḽawe. Naho vha tshi nga vha vha tshi ḓivha zwiṱuku nga Bivhili, fhedzi a vha pfesesi nga vhuḓalo zwine ya zwi funza. (Vharoma 10:2; 1 Tim. 2:3, 4) Thero tharu dza 2018, dzi fhindula mbudziso dzi tevhelaho: “Naa Bivhili I Kha Ḓi Vha Ya Ndeme?,” “Vhumatshelo Ho Ni Farela Mini?” na “Naa Mudzimu U Na Ndavha Na Inwi?”

14. (a) Ndi tshifhio tshipikwa tsha vidio nṋa dzine dza vha kha Bogisi Ḽashu Ḽa Zwishumiswa Zwa U Funza? (b) No khunyeledza mini musi ni tshi shumisa dzenedzi vidio?

¹⁴ Dzividio. Misini ya Yesu, muvhaḓi o vha a tshi shumisa zwishumiswa zwa zwanḓa. Musalauno, vhavhaḓi vha shumisa zwishumiswa zwa muḓagasi zwi ngaho sa saha, vhoro, giraindara, mutshini wa u khokhomedza zwibigiri (nailer) na zwiṅwe. Nga nnḓa ha khandiso dzo gandiswaho, ri na vidio dzine ra nga dzi tambela vhathu nahone vidio nṋa dzi wanala kha bogisi ḽashu ḽa zwishumiswa: Ndi Ngani Ni Tshi Fanela U Guda Bivhili?, Pfunzo Ya Bivhili I Farwa Hani?, Hu Itwa Mini Holoni Ya Muvhuso?, Ṱhanzi dza Yehova—Ri Vhonnyi? Vidio dzine dza vha nga fhasi ha mimunithi mivhili ndi dzavhuḓi musi ri tshi ita lwendo lwa u thoma. Dzine dza tamba tshifhinga tshilapfu ri nga dzi shumisa musi ri tshi ita nyendo dza u vhuyelela na musi ro wana vhane vha vha na tshifhinga. Zwenezwo zwishumiswa zwi nga ṱuṱuwedza vhathu uri vha gude Bivhili na u ya miṱanganoni.

15. Ṋeani tsumbo ya nḓila ine u ṱalela vidio nga luambo lwavho lwa ḓamuni zwa nga vha kwama ngayo.

¹⁵ Sa tsumbo, musi wahashu wa tshifumakadzini a tshi ṱangana na muṅwe mufumakadzi we a vha o pfuluwa a tshi bva Micronesia, ane luambo lwawe lwa ḓamuni lwa vha Luyapese, wahashu wa tshifumakadzini o mu sumbedza vidio ine ya ri, Ndi Ngani Ni Tshi Fanela U Guda Bivhili? nga luambo lwawe lwa ḓamuni. Musi vidio i tshi thoma u tamba, onoyo mufumakadzi o ri: “Holu ndi luambo lwanga. A thi zwi kholwi! Nḓila ine a amba ngayo  i sumbedza uri u bva fhethu huthihi na hune nda bva hone. Ri amba luambo luthihi!” Nga murahu ha zwenezwo, o ri u ḓo vhala na u ṱalela zwithu zwoṱhe zwine zwa vha kha jw.org nga luambo lwawe lwa ḓamuni. (Vhambedzani Mishumo 2:8, 11.) Ṱhogomelani iṅwe tsumbo. Wahashu wa tshifumakadzini wa ngei Amerika o rumela muḓuhulu wawe link ya vidio i fanaho nga luambo lwawe lwa ḓamuni nahone onoyo muḓuhulu wawe u dzula kha ḽiṅwe shango. O i ṱalela nahone a mu ṅwalela email a ri: “Tshipiḓa tshine tsha amba uri muthu muvhi a re na maanḓa ndi ene ane a langa shango tsho nkunga. Ndo ita khumbelo ya pfunzo ya Bivhili.” Nahone onoyo ṅwana u dzula kha shango ḽine mushumo washu wo thivhelwa!

16. Ndi tshifhio tshipikwa tsha tshibugwana: (a) Thetshelesani Mudzimu Nahone Ni Tshile Tshoṱhe. (b) Mafhungo Maḓifha A Bvaho Ha Mudzimu! (c) Ndi Vhafhio Vhane Vha Khou Ita Zwi Funwaho Nga Yehova Ṋamusi?

¹⁶ Zwibugwana. Ni nga funza hani ngoho muthu ane a si kone u vhala zwavhuḓi kana ane a si vhe na khandiso nga luambo lwawe? Nga u shumisa khandiso ine ya ri, Thetshelesani Mudzimu Nahone Ni Tshile Tshoṱhe. * Tshishumiswa tshavhuḓi tsha u thoma pfunzo ya Bivhili ndi tshibugwana tshine tsha ri Mafhungo Maḓifha A Bvaho Ha Mudzimu! Ni nga sumbedza muthu thero dza 14 dzi re kha gwati ḽa murahu nahone ni mu tendele a nange ine a i takalela. Ni thome pfunzo kha yeneyo thero. Naa no no lingedza zwenezwo zwithu musi ni tshi khou ita nyendo dza u vhuyelela? Tshishumiswa tsha vhuraru tshine tsha wanala kha bogisi ndi tshibugwana tshine tsha ri, Ndi Vhafhio Vhane Vha Khou Ita Zwi Funwaho Nga Yehova Ṋamusi? Yo itelwa u livhisa vhagudiswa ndanguloni. U itela u ḓivha nḓila ine na nga i shumisa ngayo kha pfunzo iṅwe na iṅwe ya Bivhili, sedzani Tshibugwana Tsha Muṱangano Wa Vhutshilo Na Vhuḓinḓa Hashu Ha Vhukriste, tsha ḽa March 2017.

17. (a) Ndi tshifhio tshipikwa tsha bugu iṅwe na iṅwe ya u fara pfunzo ya Bivhili? (b) Ndi mini zwine zwa fanela u itwa nga vhane vha khou ya u lovhedzwa, nahone ndi ngani?

¹⁷ Dzibugu. Nga murahu ha u thoma pfunzo ya Bivhili ni tshi shumisa tshibugwana, ni nga thoma u shumisa bugu Bivhili I Funza Mini Zwa Vhukuma? Tshenetsho tshishumiswa tshi ḓo ita uri onoyo muthu a ḓivhe zwo engedzeaho nga ha pfunzo i re Bivhilini. Nga murahu ha u fhedza yeneyo bugu nahone mugudiswa a tshi khou ita mvelaphanḓa, ni nga guda nae bugu Ni Ḓi-vhulungele Ngomu Lufunoni Lwa Mudzimu. Tshenetshi tshishumiswa tshi ḓo gudisa mugudiswa nḓila ine a nga shumisa ngayo maitele a Bivhili vhutshiloni hawe. Na nga murahu ha ndovhedzo, vhagudiswa vhaswa vha fanela u bvela phanḓa na u guda u vhuya u swikela vha tshi fhedza dzenedzo bugu mbili. Zwenezwo zwi ḓo ita uri ngoho i ṱoke midzi mbiluni dzavho.—Vhalani Vhakolosa 2:6, 7.

18. (a) Luṅwalo lwa 1 Timotheo 4:16 lu ri ṱuṱuwedza uri ri ite mini sa vhathu vhane vha funza ngoho, nahone hu vha na mvelelo dzifhio? (b) Ndi tshifhio tshipikwa tshine ra fanela u vha natsho musi ri tshi shumisa Bogisi Ḽashu Ḽa Zwishumiswa Zwa U Funza?

¹⁸ Sa Ṱhanzi dza Yehova, ro ṋewa mushumo wa u ḓivhadza “mulaedza wa ngoho wa mafhungo maḓifha” une wa ita uri vhathu vha wane vhutshilo vhu sa fheli. (Vhakol. 1:5; vhalani 1 Timotheo 4:16.) U itela u ita zwenezwo, ri na Bogisi Ḽa Zwishumiswa Zwa U Funza ḽine ḽa vha na zwithu zwine ra zwi ṱoḓa. (Sedzani “ Bogisi Ḽa Zwishumiswa Zwa U Funza.”) U nga ri ri nga shumisa zwenezwi zwishumiswa nga vhutsila arali zwi tshi konadzea. Muhuweleli muṅwe na muṅwe a nga ḓiitela phetho ya uri ndi lini hune a ḓo tshimbidza khandiso ine ya vha kha bogisi ḽa zwishumiswa musi o ṱangana na muthu ane a vha na dzangalelo. Fhedzi tshipikwa tshashu a si u sokou phaḓaladza khandiso na u sia khandiso kha vhane vha si vhe na dzangalelo kha mulaedza washu. Tshipikwa tshashu ndi u ita uri vhathu vhane vha fhulufhedzea, u ḓiṱukufhadza na u ṱoḓa u ḓivha Mudzimu vha vhe vhafunziwa na “uri vha wane vhutshilo vhu sa fheli.”—Mish. 13:48; Mat. 28:19, 20.