Ḓilindeni Kha Vhufhura
Ḓilindeni Kha Vhufhura
“Ni vhone hu sa ḓo vha na ané a ni thuba nga . . .vhufhura vhu sí na háho.”—VHA-KOLOSA 2:8.
1-3. (a) Ndi tsumbo dzifhio dzi sumbedzaho uri vhufhura ho phaḓalala hu ṱoḓaho u vha kha masia oṱhe a vhutshilo ha ḓuvha ḽiṅwe na ḽiṅwe? (b) Ndi ngani ri songo fanela u mangadzwa nga vhufhura vhu re hone shangoni?
“NDI vhathu vhangana vhane a vha athu zwifhelwa nga vhathu vhane vha khou vha thusa?” Miṅwahani yo fhiraho, muṅwe muphurofesa wa zwa mulayo o ita tsenguluso nga u vhudzisa yeneyo mbudziso. Ha aravhiwa hani? U a ṱalutshedza: “Kha vhoramilayo vha zwigidi, ndi ramilayo muthihi fhedzi a sa athu vhuya a zwifhelwa nga muthu ane a khou mu thusa.” Nga tshiitisi tshifhio? “Onoyo ramilayo o vha a tshi kha ḓi tou bva u thoma u shuma na dzangano ḽihulwane ḽa vhoramilayo nahone o vha a sa athu amba na muthu ane a khou mu thusa.” Zwenezwi zwo ṱanganiwaho nazwo zwi sumbedza uri mazwifhi na vhufhura zwo ḓala shangoni ḽa ṋamusi.
2 Vhufhura vhu vha hone nga nḓila dzo fhambanaho nahone ho phaḓalala hu ṱoḓaho u vha kha masia oṱhe a vhutshilo ha musalauno. Mivhigo ya mafhungo i na tsumbo nnzhi dza musi vhorapolotiki vha tshi zwifha nga ha zwine vha zwi ita, vhaḓivhambalelano na vhoramilayo vha a engedza kha mbuyelo dza vhubindudzi, vhakunguwedzi vha nga fhura vharengi, muthu ane a shuma kha zwa khothe u fhura khamphani dza ndindakhombo, ri tshi tou bula tsumbo dzi si gathi. Nga zwenezwo hu dovha ha vha na vhufhura ha zwa vhurereli. Mufunzi u fhura vhathu zwavho nga pfunzothendwa dza mazwifhi, dzi ngaho u sa fa ha muyatshivhili, mulilo wa hele, na Vhuraruthihi.—2 Timotheo 4:3, 4.
3 Naa ri fanela u mangadzwa nga honoho vhufhura hoṱhe? Na khathihi. Malugana na ‘maḓuvha a vhufhelo,’ Bivhili i a sevha: “Vhathu vhavhi hone na vhadzia-madambi vha ḓo ṋaṋisa vhuvhi, vha tshi ya vha tshi xedza vhaṅwe, na vhone vha tshi xedzwa.” (2 Timotheo 3:1, 13) Samusi ri Vhakriste, ri fanela u ṱhogomela mihumbulo i xedzaho ine ya nga ri khelusa kha mafhungo-ngoho. Hu na mbudziso mbili dzine ra nga dzi vhudzisa: Ndi ngani vhufhura ho ḓala nga u rali ṋamusi, nahone ri nga ḓitsireledza hani kha u fhurwa?
Ndi Ngani Hu Na Vhufhura Vhunzhi Nga U Rali Shangoni?
4. Bivhili i ṱalusa hani uri ndi ngani vhufhura ho phaḓalala shangoni?
4 Bivhili i ṱalusa zwavhuḓi uri ndi ngani vhufhura ho phaḓalala kha ḽeneḽi shango. Muapostola Yohane o ṅwala uri “shango ḽoṱhe ḽo vhumbulutshela kha Muvhi.” (1 Yohane 5:19) Onoyo “Muvhi” ndi Sathane Diabolo. Malugana nae, Yesu o ri: “Ha ngo ima na mafhungo-ngoho; ngauri kha ene a huna mafhungo-ngoho. A tshi amba mazwifhi, u amba zwi re zwawe; ngauri ndi ene muzwifhi, ndi ene khotsi ya vhadzia-u-zwifha.” Nga zwenezwo, naa zwi a mangadza uri ḽeneḽi shango ḽi sumbedza pfaneleo dza muya, maitele, na vhufhura ha muvhusi waḽo?—Yohane 8:44; 14:30; Vha-Efesa 2:1-3.
5. Sathane o khwaṱhisa hani vhuḓidini hawe ha vhufhura kha tshino tshifhinga tsha vhufhelo, nahone zwihuluhulu u vutshela vhafhio?
5 Kha tshino tshifhinga tsha vhufhelo, Sathane o khwaṱhisa vhuḓidini hawe. O poselwa fhano kha ḽifhasi. U a zwi ḓivha uri o salelwa nga tshifhinga tshiṱuku, nahone u na “mbiti khulu.” O ḓiimisela u lozwa vhathu vhanzhi nga hune a nga kona ngaho, nahone u khou ‘xedza shango ḽoṱhe.’ (Ndzumbululo 12:9, 12) Sathane u fhura tshifhinga tshoṱhe. Nṱhani hazwo, u khou bvela phanḓa na vhuḓidini hawe ha u xedza vhathu. * U shumisa maitele awe oṱhe a vhufhura—u katela tshimbevha na vhukwila u itela u swingisa mihumbulo ya vha sa tendi na u vha ita uri vha vhe kule na Mudzimu. (2 Vha-Korinta 4:4) Onoyu mufhuri makone o ḓiimisela nga ho khetheaho u itela u mila vhane vha khou rabela Mudzimu “muyani na nga mafhungo-ngoho.” (Yohane 4:24; 1 Petro 5:8) Ni songo vhuya na hangwa uri Sathane o amba uri: ‘Ndi nga ita uri muthu muṅwe na muṅwe a shandukele Mudzimu.’ (Yobo 1:9-12) Kha ri ṱhogomele “vhutsila ha vhufhura” ha Sathane na nḓila ine ra nga ḓilinda khaho.—Vha-Efesa 6:11, Jewish New Testament.
Ḓilindeni Kha U Fhurwa Nga Vhagunei
6, 7. (a) Ndi zwifhio zwine vhagunei vha nga zwi ita? (b) Maṅwalo a sumbedza hani zwavhuḓi zwine vhagunei vha zwi ṱoḓa?
6 Ndi kale Sathane a tshi khou shumisa vhagunei kha vhuḓidini hawe u itela u xedza vhashumeli vha Mudzimu. (Mateo 13:36-39) Vhagunei vha nga ḓiita u nga vha rabela Yehova na u tenda Bivhili, fhedzi vha landula ndangulo yawe i vhonalaho. Vhaṅwe vho ita na u vhuyelela kha pfunzothendwa dzi sa hulisi Mudzimu dza “Babele ḽihulu,” vhurereli ha mazwifhi ha shango ḽoṱhe. (Ndzumbululo 17:5; 2 Petro 2:19-22) Vho hevhedzwa nga Mudzimu, vhaṅwali vha Bivhili vho shumisa maipfi a re na maanḓa u itela u bvukulula zwiṱuṱuwedzi na maitele zwa vhagunei.
7 Ndi tshifhio tshipikwa tsha vhagunei? Vhanzhi a zwi vha takadzi u litsha vhurereli he khamusi vha vha vha tshi vhu dzhia vhu ha ngoho. Kanzhi vha ṱoḓa u khelusa na vhaṅwe. Nṱhani ha uri vha ṱoḓe na u ita vhafunziwa vhavho, vhagunei vhanzhi vha ṱoḓa u ‘kunga vhafunziwa [vhane vha vha, vhafunziwa vha Kristo].’ (Mishumo 20:29, 30) Malugana na vhafunzi vha mazwifhi, muapostola Paulo o ḓivhadza heyi tsevho yo ṱavhanyiswaho: “Ni vhone hu sa ḓo vha na ané a ni thuba.” (Vha-Kolosa 2:8) Naa zwenezwo a zwi ṱalusi zwine vhagunei vhanzhi vha khou lingedza u zwi ita? U fana na mutswi ane a tswa muthu a songo lavhelela muṱani wahawe, vhagunei vha vutshela miraḓo ya tshivhidzo i fulufhedzeaho, vha tshi ṱoḓa u vha bvisa kha sambi.
8. Ndi maitele afhio ane vhagunei vha a shumisa u itela u swikelela zwipikwa zwavho?
8 Ndi maitele afhio ane vhagunei vha a shumisa u itela u swikelela zwipikwa zwavho? Vha anzela u shumisa nḓila ya u shanda mafhungo, ngoho i songo fhelelaho, na mazwifhi madala-dala. Yesu o vha a tshi zwi ḓivha uri vhatevheli vhawe vha ḓo farwa luvhi nga vhane vha “pomoka vhuvhi hoṱhe hú u zwifha.” (Mateo 5:11) Vhenevho vhahanedzi vha re na vhukwila vha ḓo amba mazwifhi u itela u fhura vhaṅwe. Muapostola Petro o sevha nga ha vhagunei vhane vha ḓo shumisa ‘maipfi a xedzaho,’ vhane vha ḓo phaḓaladza “vhufhura,” na u ‘shanda maṅwalo’ u itela u swikelela zwipikwa zwavho. (2 Petro 2:3, 13; 3:16) Zwi ṱungufhadzaho ndi uri vhagunei vho bvelela kha “u shandukisa lutendo lwa vhaṅwe.”—2 Timotheo 2:18.
9, 10. (a) Ri nga ḓilinda hani uri ri sa fhurwe nga vhagunei? (b) Ndi ngani ri sa vhilaeli arali u pfesesa hashu ndivho ya Mudzimu hu tshi ṱoḓa u shandulwa?
9 Ri nga ḓilinda hani uri ri sa fhurwe nga vhagunei? Nga u thetshelesa nyeletshedzo i bvaho Ipfini ḽa Mudzimu, ine ya ri: ‘Vharathu vhanga, ni sedze vha itaho dziphiringanyo na zwikhukhuliso, zwithu zwi sá anḓani na pfunzo ye na funzwa nahone ni vha iledze.’ (Vha-Roma 16:17, vhambedzani NW.) Ri vha ‘iledza’ nga u landula mahumbulele avho ane vha a amba, o ṅwaliwaho, kana ane a vha kha Internet. Ndi ngani ri tshi dzhia honoho vhukando? Tsha u thoma, ngauri Ipfi ḽa Mudzimu ḽi ri livhisa uri ri ite nga u ralo, nahone ri fulufhela uri Yehova u ṱoḓa zwa khwine kha riṋe.—Yesaya 48:17, 18.
10 Tsha vhuvhili, ri funa ndangulo ye ya ri funza mafhungo-ngoho a ndeme ane a ri fhambanya tshoṱhe na Babele Ḽihulu. Hafhu, ri a dzhiela nṱha uri nḓivho yashu nga ha ndivho ya Mudzimu a yo ngo fhelela, ho vha na tshanduko kha u pfesesa hashu miṅwahani yo fhiraho. Vhakriste vha fulufhedzeaho vha lindela Yehova a tshi ita dzenedzo tshanduko dzoṱhe vha sa vhilaeli. (Mirero 4:18) Zwa zwino ri nga si ṱutshele ndangulo ine Mudzimu a takalela u i shumisa, ngauri ri a kona u vhona vhuṱanzi vhu re khagala uri u khou i takalela.—Mishumo 6:7; 1 Vha-Korinta 3:6.
Ḓilindeni Uri Ni Sa Ḓifhure
11. Ndi ngani vhathu vha songo fhelelaho vhe na nḓowelo ya u ḓifhura?
11 Vhathu vha songo fhelelaho vha na nḓowelo ya u ḓifhura ine Sathane a ṱavhanya u i shumisa luvhi. Yeremia 17:9 i ri: “Mbilu ndi yone mudzia-tshimbevha vhukuma, ndi mmbi; i nga ḓihwa nga nnyi?” Nahone Yakobo o ṅwala a ri: “Ngauri muthu u tou lingwa a tshi kokodzwa, a tshi kungiwa nga nyemulo yawe ene muṋe.” (Yakobo 1:14) Zwi re zwone ndi uri arali mbilu dzashu dza kungiwa, dzi nga lingea nga nyemulo mmbi zwi tshi ita uri i vhonale i tshi kunga na u sa vha na khombo. Eneo mavhonele ndi a vhufhura, u ḓiṋekedza kha u ita tshivhi tshine mafheleloni tsha u tshinyadza.—Vha-Roma 8:6.
12. Ri nga fashwa nga u ḓifhura nga nḓila-ḓe?
12 U ḓifhura hu nga ri fasha nga hu leluwaho. Mbilu ine ya vha mudzia-tshimbevha i nga vhuyafhedza vhukhakhi vhuhulwane vhune ra vha naho kana tshivhi tshihulwane. (1 Samuele 15:13-15, 20, 21) Mbilu dzashu dzine dza vha mmbi dzi nga dovha dza ṱoḓa nḓila dza u vhuyafhedza vhuḓifari vhu timatimisaho. Sa tsumbo, ṱhogomelani mafhungo a u ḓimvumvusa. Huṅwe u ḓimvumvusa ndi havhuḓi nahone hu a takadza. Naho zwo ralo, vhunzhi ha zwine ḽino shango ḽa zwi sumbedza kha dzifilimu na kha mbekanyamushumo dza thelevishini na kha Internet a zwo ngo kuna nahone ndi zwa vhuyaḓa. Zwi a leluwa u ḓivhudza uri ri nga vhona u ḓimvumvusa hu songo kunaho nahone hu sa vhe na khombo. Vhaṅwe vho ita na uri, ‘A zwi vhaisi luvalo lwanga, ngauralo zwo khakhea ngafhi?’ Fhedzi vhenevho vhathu vha khou “ḓifhura nga mahumbulele o khakheaho.”—Yakobo 1:22, NW.
13, 14. (a) Ndi tsumbo ifhio ya Maṅwalo i sumbedzaho uri luvalo lwashu a si tshiendedzi tshi fulufhedzeaho tshifhinga tshoṱhe? (b) Ri nga ḓilinda hani kha u ḓifhura?
13 Ri nga ḓilinda hani kha u ḓifhura? Tsha u thoma, ri fanela u humbula uri luvalo lwa muthu a lu fulufhedzei tshifhinga tshoṱhe. Ṱhogomelani mafhungo a muapostola Paulo. Musi a sa athu vha Mukriste, o tovhola vhatevheli vha Kristo. (Mishumo 9:1, 2) Luvalo lwawe lu nga vha lu songo mu rwa nga tshenetsho tshifhinga. Naho zwo ralo, zwi khagala uri lwo vha lu tshi khou shumiswa luvhi. Paulo o ri: “Ndo zwi ita nga u sa ḓivha, ndí kha u sa tenda.” (1 Timotheo 1:13) Zwa uri huṅwe u ḓimvumvusa a hu vhaisi luvalo lwashu a zwi ambi uri luvalo lwashu lu khou amba zwone. Ndi luvalo lwo gudiswaho zwavhuḓi nga Ipfi ḽa Mudzimu lune lu nga ri livhisa zwavhuḓi.
14 U itela u iledza u ḓifhura, huna dziṅwe nyeletshedzo dzi thusaho dzine ra fanela u dzi humbula. Ḓiṱolisiseni nga thabelo. (Psalme ya 26:2; 2 Vha-Korinta 13:5) U ḓiṱolisisa nga u fulufhedzea zwi nga dzumbulula ṱhoḓea ya u ita dziṅwe tshanduko kha mavhonele aṋu kana nḓila dzaṋu. Thetshelesani vhaṅwe. (Yakobo 1:19) Samusi u ḓiṱolisisa hu tshi ṱuṱuwedzwa nga mihumbulo yashu, ndi vhuṱali u thetshelesa maipfi a Vhakriste nga riṋe vho vhibvaho. Arali ni tshi khou ita dziphetho kana ni tshi khou tshila nga nḓila i timatimisaho phanḓa ha vhatendi nga inwi vha linganyiselaho na vha re na tshenzhelo, ni nga ḓivhudzisa uri, ‘Naa hu nga vha hu uri luvalo lwanga a lwo ngo gudiswa zwavhuḓi kana uri mbilu yanga i khou mphura?’ U ḓifusha tshifhinga tshoṱhe nga Bivhili na khandiso dzo thewaho Bivhilini. (Psalme ya 1:2) U ita ngauralo zwi ḓo ni thusa uri mihumbulo, mavhonele, na maḓipfele zwaṋu zwi tendelane na maitele a Mudzimu.
Ḓilindeni Kha Mazwifhi A Sathane
15, 16. (a) A tshi ita vhuḓidini ha u ri fhura, Sathane u shumisa mazwifhi afhio? (b) Ri nga iledza hani u fhurwa nga eneo mazwifhi?
15 Sathane u shumisa mazwifhi o fhambanaho u itela u ita vhuḓidini ha u ri fhura. U lingedza u ita uri ri tende zwa uri thundu dzi vhonalaho dzi ri ḓisela dakalo na u fushea, fhedzi ngoho ndi ya uri a si zwone. (Muhuweleli 5:10-12) U ṱoḓa ri tshi tenda zwa uri ḽino shango ḽivhi ḽi ḓo dzula ḽi hone lini na lini, naho hu na vhuṱanzi vhu re khagala ha uri ri khou tshila “maḓuvhani a vhufhelo.” (2 Timotheo 3:1-5) Sathane u ṱuṱuwedza muhumbulo wa uri a huna khombo kha u tshila vhutshilo ha u ḓifara luvhi, naho vhane vha ṱoḓa u ḓitakadza kanzhi vha tshi kaṋa mvelelo dzi vhaisaho vhukuma. (Vha-Galata 6:7) Ri nga iledza hani u fhurwa nga eneo mazwifhi?
16 Vhuyelwani nga tsumbo dza Bivhilini. Bivhili i na tsumbo dza vhathu vhe vha fhurwa nga mazwifhi a Sathane. Vhe vha funesa zwithu zwi vhonalaho, vhe vha si ṱhogomele zwifhinga zwe vha vha vha tshi khou tshila khazwo, kana vhe vha ḓidzhenisa kha zwa u ḓifara luvhi—zwe zwa ita uri hu sa vhe na mvelelo dzavhuḓi. (Mateo 19:16-22; 24:36-42; Luka 16:14; 1 Vha-Korinta 10:8-11) Gudani kha tsumbo dza musalauno. Zwi ṱungufhadzaho ndi zwa uri nga tshiṅwe tshifhinga Vhakriste a vha vhi na mavhonele a u ṱavhanyisa zwithu nahone vha thoma u tenda uri nga u shumela Mudzimu vha khou ṱahela zwiṅwe zwithu zwavhuḓi. Vha ṱutshela ngoho u itela u tshila vhutshilo ha u ḓitakadza. Naho zwo ralo, vhenevho vhathu vha kha “nḓila-vhuredzi,” fhedzi mafheleloni vhuḓifari havho ha u sa ofha Mudzimu vhu ḓo ita uri hu vhe na mvelelo dzi si dzavhuḓi. (Psalme ya 73:18, 19) Zwi ḓo vha vhuṱali uri ri gude kha vhukhakhi ha vhaṅwe.—Mirero 22:3.
17. Ndi ngani Sathane a tshi bveledza mazwifhi a uri Yehova ha ri funi kana uri dzhiela nṱha?
17 Hu na maṅwe mazwifhi ane Sathane a a shumisa nga hu bvelelaho—mazwifhi a uri Yehova ha ri funi kana ha ri dzhieli nṱha. Sathane o fhedza miṅwaha ya zwigidi a tshi khou guda vhathu vha songo fhelelaho. U a zwi ḓivha zwavhuḓi uri u kulea nungo hu nga ri pwasha muyani. (Mirero 24:10) Nga zwenezwo, u bveledza mazwifhi a uri a ri vha ndeme phanḓa ha Mudzimu. Arali ri tshi ‘poswa fhasi’ nahone ra tenda uri Yehova ha ri ṱhogomeli, ri nga lingea ra fulufhuwa. (2 Vha-Korinta 4:9) Zwenezwi ndi zwine Mufhuri muhulwane a ṱoḓa zwone! Nga zwenezwo, ri nga ḓilinda hani kha u fhurwa nga mazwifhi a Sathane?
18. Bivhili i ri khwaṱhisedza hani nga ha lufuno lwa Yehova?
18 Elekanyani nga ha zwine Bivhili ya ri vhudza zwone nga ha nḓila ine Mudzimu a ri funa ngayo. Ipfi ḽa Mudzimu ḽi shumisa zwiṅwe zwifanyiso zwi pfalaho u itela uri khwaṱhisedza uri Yehova u a ri ṱhogomela na u ri funa nga muthihi nga muthihi. U dzhenisa miṱodzi yaṋu kha ‘mudzio wawe,’ zwine zwa amba uri u a vhona na u humbula miṱodzi ine na i rothisa musi ni tshi khou lingedza uri ni dzule ni tshi fulufhedzea. (Psalme ya 56:8) U a zwi ḓivha musi ‘mbilu yaṋu yo vunḓekana’ nahone u vha e tsini haṋu nga zwenezwo zwifhinga. (Psalme ya 34:18) U ḓivha tshiṅwe na tshiṅwe nga ha inwi, u katela na tshivhalo tsha ‘mavhudzi a ṱhohoni yaṋu.’ (Mateo 10:29-31) Zwa ndeme vhukuma, Mudzimu o “ṋekedza Murwa wawe mu-bebwa-eṱhe” a tshi itela riṋe. (Yohane 3:16; Vha-Galata 2:20) Nga zwiṅwe zwifhinga, ni nga wana zwi tshi konḓa u tenda uri eneo maṅwalo a a shuma kha inwi muṋe. Naho zwo ralo, ri fanela u tenda zwine Yehova a zwi amba. U ṱoḓa ri tshi tenda uri u a ri funa hu si nga tshigwada fhedzi, fhedzi nga muthihi nga muthihi.
19, 20. (a) Ndi ngani zwi zwa ndeme u ḓivha na u landula mazwifhi a Sathane a uri Yehova ha ri funi? (b) Muṅwe mulavhelesi a dalelaho zwivhidzo o thusa hani vhe vha kulea nungo?
19 Ṱhogomelani na u landula mazwifhi. Arali na zwi ḓivha uri muṅwe muthu u khou zwifha, ni nga ḓilinda kha u fhurwa. Ngauralo, u ḓivha uri Sathane u ṱoḓa ni tshi tenda mazwifhi a uri Yehova ha ni funi i nga vha thuso i re na maanḓa. A tshi dzhia vhukando u tendelana na thero ya Tshiingamo ye ya sevha nga ha vhutsila ha Sathane, muṅwe Mukriste o ri: “Ndo vha ndi sa vhuyi nda zwi humbula uri Sathane u lingedza u shumisa maḓipfele anga u itela u nkula nungo. U ḓivha zwenezwi zwo nṋea mafulufulu a uri ndi kunde enea maḓipfele.”
20 Ṱhogomelani zwe mulavhelesi a dalelaho zwivhidzo a ṱangana nazwo ngei shangoni ḽa Amerika Tshipembe. Musi a tshi khou ita nyendo dza vhulisa kha vhatendi ngae vho kuleaho nungo, o vha a tshi anzela u vha vhudzisa uri, ‘Naa ni a tenda kha Vhuraruthihi?’ O kuleaho nungo o vha a tshi anzela uri, ‘Na khathihi,’ a tshi ṱhogomela uri eneo ndi maṅwe a mazwifhi a Sathane. Nga zwenezwo mulavhelesi a dalelaho zwivhidzo a vhudzisa uri, ‘Naa ni a tenda kha mulilo wa hele?’ A dovha a ri, ‘Na khathihi!’ Nga zwenezwo onoyo muhulwane a dalelaho zwivhidzo a vha vhudza uri hu kha ḓivha na maṅwe mazwifhi a Sathane ane a sa vhe khagala u fana na eneo. A livhisa ṱhogomelo kha siaṱari 249, phara 21, kha bugu ine ya pfi Sendelani Tsini Na Yehova, * ine ya sumbedza uri ndi mazwifhi a uri Yehova ha ri funi nga muthihi nga muthihi. Onoyo mulavhelesi a dalelaho zwivhidzo o vhiga mvelelo dzavhuḓi nga u thusa vhe vha kulea nungo u ṱhogomela na u landula eneo mazwifhi a Sathane.
Ḓilindeni Uri Ni Sa Fhuriwe
21, 22. Ndi ngani ri siho swiswini malugana na vhutsila ha Sathane ha vhufhura, nahone ri fanela u ḓiimisela u ita mini?
21 Tshifhingani tsha u fhedza tsha maḓuvha a vhufhelo, zwi fanela u lavhelelwa uri Sathane u ḓo bvela phanḓa a tshi bveledza mazwifhi manzhi na vhufhura. Zwi takadzaho ndi uri Yehova ho ngo ri sia ri swiswini malugana na vhutsila ha Sathane ha vhufhura. Bivhili na khandiso dzo thewaho Bivhilini dza “mukoma a fulufhedzeaho na wa vhuṱali” dzi sumbedza zwavhuḓi maitele mavhi a Diabolo. (Mateo 24:45) U sevhiwa hu tshee nga phanḓa, zwi ri thusa u ḓilugisela u a kunda.—2 Vha-Korinta 2:11.
22 Nga zwenezwo, kha ri ḓilinde kha mihumbulo ya vhagunei. U nga ri ri nga ḓiimisela u iledza tshikwekwe tsha vhutsila tsha vhufhura. Kha ri ṱhogomele na u landula mazwifhi oṱhe a Sathane. Nga u ita ngauralo, ri ḓo linda vhushaka hashu na “Yehova wa mafhungo-ngoho,” ane a nengwa vhufhura.—Psalme ya 31:5; Mirero 3:32.
[Ṱhaluso dzi re magumoni a siaṱari]
^ phar. 5 Malugana na ḽiiti ḽo ṱalutshedzelwaho nga uri ‘u xedza’ kha Ndzumbululo 12:9, iṅwe bugu i amba uri ḽi “sumbedza nyito i bvelaho phanḓa ine ya vha nḓowelo.”
^ phar. 20 Yo gandiswa nga Ṱhanzi dza Yehova.
Ni A Zwi Elelwa?
• Ndi ngani ho ḓala vhufhura nga u rali shangoni ṋamusi?
• Ri nga ḓilinda hani kha u fhurwa nga vhagunei?
• Ri nga ḓilinda hani kha nḓowelo naho i ifhio ya u ḓifhura?
• Ri nga iledza hani u fhurwa nga mazwifhi a Sathane?
[Mbudziso Dza Pfunzo]
[Tshifanyiso kha siaṱari 17]
Ni songo ḓifhura malugana na u ḓimvumvusa
[Tshifanyiso kha siaṱari 18]
Musi ni tshi khou ḓilinda kha u ḓifhura, ḓiṱolisiseni nga thabelo, ni thetshelese vhaṅwe, nahone ni ḓifushe tshifhinga tshoṱhe nga Ipfi ḽa Mudzimu