Mbudziso dzi Bvaho ha Vhavhali

Ndi ngani Davida mulanda a fulufhedzeaho wa Yehova o tendela musadzi wawe Mihali uri a vhe na tshifanyiso tsha zwitungulo, samusi zwo sumbedzwa kha 1 Samuele 19:12, 13?

Kha ri thome ri ṱolisise eneo mafhungo nga u pfufhifhadza. Musi maano a Khosi Saulo a u ṱoḓa u vhulaha Davida a tshi swika nḓevheni dza musadzi wa Davida, o mbo ḓi dzhia vhukando nga u ṱavhanya. Bivhili i ri: “Mihali a bvisa Davida nga buli, a bva a shavha a ponyoka. Mihali a dzhia tshifanyiso [zwi vhonala uri tsho vha tshi na tshivhumbeo tshi eḓanaho na tsha munna], a tshi vhea vhulaloni, a tshi pombedza nga nguvho ya mbudzi ṱhohoni, a tshi fukedza nga nguvho.” Musi vhaḓinḓa vha Saulo vha tshi ḓa u fara Davida, Mihali o vha vhudza u ri: “U khou lwala.” Enea maano o ita uri Davida a wane tshifhinga tsha u shavha.—1 Samuele 19:11-16.

Zwithu zwe zwa fukulwa mavuni zwi sumbedza uri tshifhingani tsha kale, zwifanyiso zwa zwitungulo zwo vha zwi sa shumiselwi vhurabeli fhedzi, fhedzi zwo vha zwi tshi dovha zwa shumiselwa na kha mafhungo a mulayo. Samusi marifhi ane a sumbedza muṋe wa thundu na khwaṱhisedzo ya ndaka a tshi nga ṋea muthu ndugelo ṋamusi, zwo vha zwo tou ralo na nga zwifanyiso zwa zwitungulo nga tshenetsho tshifhinga. Zwi vhonala uri u vha na tshifanyiso tsha zwitungulo nga tshiṅwe tshifhinga zwo vha zwi tshi nga shuma u ṋea mukwasha ndugelo ya u wana ndaka ya mazwale wawe. Hezwi zwi nga ri sumbedza na tshiitisi tsha musi Rahele o dzhia tshifanyiso tsha zwitungulo tsha khotsi awe, na uri ndi ngani khotsi awe vho vha vha tshi khou tshi ṱoḓa murahu. Kha eneo mafhungo, Yakobo munna wa Rahele, o vha a sa ḓivhi zwe musadzi wawe a zwi ita.—Genesi 31:14-34.

Musi Vhaisiraele vha tshi thoma u vha lushaka, vho wana Milayo ya Fumi, ye khayo wa vhuvhili wa hone wo vha u tshi amba uri vha songo ḓiitela tshifanyiso tsha midzimu i sili. (Ekisodo 20:4, 5) Nga murahu, muporofita Samuele o amba nga ha wonoyu mulayo musi a tshi khou amba na Khosi Saulo. O ri: “U sá pfa ndi tshivhi tshithihi na madambi; u hana u vhudzwa zwi nga u laṱa Mudzimu wa yo’ tungula.” (1 Samuele 15:23) Nga tshenetshi tshiitisi, zwi vhonala uri tshifanyiso tsha zwitungulo tsho vha tshi sa shumi sa ifa kha ḽa Isiraele. Naho zwo ralo, zwi vhonala uri enea maitele a kale a Vhayuda a u tenda zwi siho o bvela phanḓa kha miṅwe miḓi ya Vhaisiraele. (Vhahaṱuli 17:5, 6; 2 Dzikhosi 23:24) U vha ha Mihali na tshifanyiso tsha midzimu i sili zwi sumbedza uri o vha a sa fulufheli tshoṱhe kha Yehova. Davida o vha a sa ḓivhi tshithu nga ha tshenetsho tshifanyiso tsha zwitungulo ngauri Mihali o vha e ṅwananyana wa Khosi Saulo.

Mavhonele a Davida malugana na u ḓikumedza tshoṱhe kha Yehova a vhonala kha maipfi ane a ri: “Yehova ndi Ene Muhulu, Mu-rendwa vhukuma, Muofhiwa ndi Ene kha midzimu yoṱhe. Midzimu yoṱhe ya vha-nnḓa ndi i sili; ngenó Yehova é Ene musika Ḽiṱaḓulu.”—1 Koronika 16:25, 26.

[Tshifanyiso kha siaṱari 29]

Mulayo wa vhuvhili kha ya Fumi wo vha u tshi thivhela u itwa ha zwifanyiso zwa midzimu i sili, u fana na tsho sumbedzwaho hafha

[Ṱhaluso ya Vhubvo ha Tshifanyiso]

From the book The Holy Land, Vol. II, 1859