Naa ni Fanela u Dzhena Kereke?

‘A THI faneli u vha muraḓo wa kereke kana u ya kerekeni misi yoṱhe u itela u sumbedza uri ndi a tenda kha Mudzimu!’ Heyi ndi nḓila ine vhunzhi ha vhathu vha ḓipfa ngayo malugana na u vha muraḓo wa kereke kana dzangano naho ḽi ḽifhio ḽa vhurereli. Zwi re zwone ndi uri, vhaṅwe vha amba uri vha ḓipfa vhe tsini vhukuma na Mudzimu musi vha sa dzheni kereke u fhira musi vha tshi ya tshumeloni ya vhurereli kerekeni. Ṋamusi, zwo ḓowelea u amba uri u vha muraḓo wa tshigwada tsha vhurereli kana dzangano a si zwa ndeme u itela u sumbedza u vha na lutendo kha Mudzimu.

Naho zwo ralo, vhaṅwe vha ḓipfa nga nḓila yo fhambanaho na yeneyo. Vha tenda uri u vha muraḓo wa kereke na u ya kerekeni misi yoṱhe ndi zwa ndeme, nahone zwihuluhulu arali muthu a tshi ṱoḓa u ṱanganedzwa nga Mudzimu. Ngauralo eneo ndi mafhungo a ndeme kha muthu muṅwe na muṅwe, a si a ndeme fhedzi kha vhathu vhane vha guda nga ha vhurereli hu u itela u ḓivha tshivhalo tsha vhane vha dzhena kereke na vha sa dzheni. Nga ṅwambo wa uri vhushaka hashu na Mudzimu vhu a kwamea nga ha enea mafhungo, naa a zwi nga ḓo vha zwo tea u ḓivha nḓila ine Mudzimu a ḓipfa ngayo nga ha enea mafhungo? Nga zwenezwo, ri nga guda mini kha Ipfi ḽawe Bivhili malugana na enea mafhungo?

Nḓila ye Mudzimu a Tshilisana Ngayo na Vhathu Misini ya Kale

Hu ṱoḓaho u vha miṅwaha ya 4 400 yo fhiraho, muḓalo wa maḓi u re na khombo wo ḓadza ḽifhasi ḽoṱhe. Tshenetsho tshiitea tshi nga si hangwee nga hu leluwaho, nahone vhathu nga vhuphara vha na mafhungo a tshenetsho tshiitea u swikela na ṋamusi. Naho eneo mafhungo o fhambana nga zwidodombedzwa, fhedzi a na zwithu zwinzhi zwine zwa fana, u katela na mbuno ya uri ho ponyoka vhathu vha si gathi na zwipuka zwi si gathi fhedzi.

Naa u ponyoka havho wonoyo Muḓalo zwo sokou itea nga khombo? Mafhungo a Bivhili a sumbedza uri a zwo ngo sokou itea. Zwa ndeme ndi uri Mudzimu ho ngo vhudza vhathu nga muthihi nga muthihi malugana na u ḓa ha Maḓi Mahulu. Nṱhani hazwo, O vhudza Noaxe, we na ene a  vhudza vhathu vha misini yawe nga ha u ḓa ha Muḓalo.—Genesi 6:13-16; 2 Petro 2:5.

U ponyoka zwo vha zwo ḓitika nga u vha muraḓo wa tshiṅwe tshigwada na u ḓiimisela u ṱanganedza vhulivhisi he Mudzimu a vhu ṋea Noaxe. Na zwipuka zwe zwa ponyoka Muḓalo zwo thuswa nga uri zwo vha zwi tshipiḓa tsha tshenetsho tshigwada. Noaxe o ṋewa vhulivhisi ho livhaho u itela uri a ite ndugiselelo ya u tshidza zwifuwo.—Genesi 6:17–7:8.

Maḓanani a miṅwaha e a tevhela, vhaḓuhulu vha Noaxe, vhe vha vha vhe vhana vha murwa wawe Semu, vho mbo ḓi ya vhupulini ngei Egipita. Naho zwo ralo, ndivho ya Mudzimu yo vha i ya u vha vhofholola na u vha i sa shangoni ḽe a ḽi fulufhedzisa Abrahamu makhulukuku wavho. Na zwenezwi a zwo ngo vhudzwa vhathu vhoṱhe nga muthihi nga muthihi, fhedzi zwo vha zwo vhudzwa vhe vha nangiwa uri vha vhe vharangaphanḓa—Mushe na mukomana wawe, Aroni. (Ekisodo 3:7-10; 4:27-31) Nga murahu ha musi vho no bviswa vhupulini ngei Egipita, vho mbo ḓi ṋewa Mulayo wa Mudzimu Thavhani ya Sinai nahone vha itwa lushaka lwa Isiraele.—Ekisodo 19:1-6.

U phuluswa zwo vha zwi tshi nga konadzea fhedzi kha Vhaisiraele, ngauri vho vha vhe tshipiḓa tsha tshigwada tsho thomiwaho nga Mudzimu nahone vha tevhela vhulivhisi ha vharangaphanḓa vho nangiwaho vha tshenetsho tshigwada. Ho dovha ha itwa na dziṅwe ndugiselelo dza uri vhaṅwe Vhaegipita vha kone u vha miraḓo ya tshenetshi tshigwada tshe tsha vha tshi tshi takalelwa nga Mudzimu. Musi Vhaisiraele vha tshi bva Egipita, vhenevha vhathu vho ṱuwa navho, vhe na tshilavhelelwa tsha u wana phaṱutshedzo dza Mudzimu.—Ekisodo 12:37, 38.

Hafhu, ḓanani ḽa u thoma ḽa miṅwaha, Yesu o thoma mushumo wawe wa u huwelela, a tshi kuvhanganya vhathu uri vha vhe vhafunziwa vhawe. O vha a tshi shumisana navho vhe tshigwada, naho o livhisa ṱhogomelo kha vhathu nga muthihi nga muthihi zwi tshi ya nga ṱhoḓea dzavho. A tshi amba na vhaapostola vhawe vha fulufhedzeaho vha 11, Yesu o ri: “Vho konḓelelaho na nṋe milingoni ndi vho-inwi. Huno nṋe ndi ḓo ni kumedza muvhuso vhunga Khotsi-anga ó u kumedza nṋe.” (Luka 22:28, 29) Nga murahu, muyamukhethwa wa Mudzimu wo ḓa kha vhenevho vhafunziwa musi vho kuvhangana sa tshigwada.—Mishumo 2:1-4.

Hedzi tsumbo dzi sumbedza zwavhuḓi zwa uri tshifhingani tsho fhelaho Mudzimu o vha a tshi shumisana na vhathu vhawe sa tshigwada. Vhathu vha si gathi vhe Mudzimu a shumisana navho nga muthihi nga muthihi—u fana na Noaxe, Mushe, Yesu, na vhaṅwe—vho vha vha tshi shumiswa Ngae u itela u amba na tshenetsho tshigwada. A huna tshiitisi tshine tsha nga ita uri ri ambe uri Mudzimu u shumisana na vhashumeli vhawe nga nḓila yo fhambanaho ṋamusi. Naho zwo ralo, hezwi zwi vusa iṅwe mbudziso: Naa u vha muraḓo wa tshigwada naho tshi tshifhio tsha vhurereli zwi ḓo vha zwo luga? Ri ḓo ṱhogomela yeneyi mbudziso ya ndeme theroni i tevhelaho.

[Tshifanyiso kha siaṱari 4]

U bva kale Mudzimu o vha a tshi shumisana na vhathu vhawe sa tshigwada tsho dzudzanyeaho