Mbudziso dzi Bvaho ha Vhavhali

Ndi mini zwe zwa vha zwi tshi fanyiselwa nga ndugiselelo ya ṅwaha wa mahumi maṱanu wo ambiwaho kha ndima ya vhu-25 ya Levitiko?

Mulayo wa Mushe wo laedza uri ‘nga ṅwaha wa vhuṱanu-na-vhuvhili masimu a lale tshoṱhe.’ Malugana na wonoyo ṅwaha, Vhaisiraele vho vha vho vhudzwa u ri: “Tsimu U songo i lima, miṱokola U songo i khwatha. Na ṱhalane dza ṅwahoḽa U songo dzi dobedza, na mitshelo ya muṱokola u songo khwathelwaho U songo i fula. Nga u vhe ṅwaha wa Sabatha.” (Levitiko 25:4, 5) Nga zwenezwo, ṅwaha muṅwe na muṅwe wa vhuṱanu-na-vhuvhili wo vha u tshi tea u vha Sabatha ya shango. Nahone ṅwaha muṅwe na muṅwe wa mahumi maṱanu une wa tevhela ṅwaha wa vhuṱanu-na-vhuvhili wa Sabatha, wo vha u tshi tea u vha ṅwaha wa mahumi maṱanu. Ho vha hu tshi fanela u bvelela mini nga wonoyo ṅwaha?

Yehova o vhudza Vhaisiraele nga Mushe a ri: “Hu vhe u khetha ṅwaha wa mahumi maṱanu; ni huwelele ni ri ndi wa u vhofholowa ha vhoṱhe vho dzulaho shangoni ḽa haṋu, ndi ṅwaha wa mihuvho; vhoṱhe vha vhuyelele mahayani avho na mashakani avho. Ṅwaha wa mahumi maṱanu nga u vhe ṅwaha wa mihuvho kha inwi. Nga wonoyo U songo zwala, U songo kaṋa na zwe zwa mela nga zwoṱhé. Ni songo fula zwiaṋwiwa zwa miṱokola yaṋu i sóngo khwathelwa.” (Levitiko 25:10, 11) Ṅwaha wa mahumi maṱanu zwo vha zwi tshi amba miṅwaha mivhili ya Sabatha ya shango i tshi khou tevhekana. Fhedzi wonoyo ṅwaha wo vha u tshi ḓisela vhenevho vhadzulapo mbofholowo. Muyuda muṅwe na muṅwe we a vha a tshi nga vha o rengiswa vhupulini o vha a tshi tea u vhofhololwa. Ifa ḽe muthu a vha o kombetshedzwa u ḽi rengisa ḽo vha ḽi tshi vhuyiselwa vha muṱa wa hawe. Ṅwaha wa mahumi maṱanu wo vha u ṅwaha wa u vusuluswa na u vhofhololwa ha Vhaisiraele vha kale. Zwenezwo zwo vha zwi tshi fanyisela mini kha Vhakriste?

U vutshela ha muthu wa u thoma, Adamu,  zwo ita uri vhathu vha vhe phuli ya tshivhi. Ndugiselelo ya Mudzimu ya u vhofholola vhathu kha dzhogo ya tshivhi ndi tshiṱhavhelo tshi rengululaho tsha Yesu Kristo. * (Mateo 20:28; Yohane 3:16; 1 Yohane 2:1, 2) Vhakriste vha rengululwa lini kha mulayo wa tshivhi? Musi a tshi khou amba na Vhakriste vho ḓodzwaho, muapostola Paulo o ri: “Mulayo wa muya wa vhutshilo ha kha Kristo Yesu wo mbofholola kha mulayo wa zwivhi na lufu.” (Vha-Roma 8:2) Vhane vha vha na fulufhelo ḽa u ya ṱaḓulu vha vhofhololwa musi vha tshi ḓodziwa nga muya mukhethwa. Naho mivhili yavho i ya ṋama nahone vha songo fhelela, Mudzimu u vha dzhia vho luga nahone a vha ita vharwa vhawe vha muya. (Vha-Roma 3:24; 8:16, 17) Kha tshigwada tsha vho ḓodzwaho, ṅwaha wa mahumi maṱanu wa Vhakriste wo thoma nga Pentekoste ya 33.C.E.

Hupfi mini nga “vha dziṅwe nngu,” vhane vha vha na tshilavhelelwa tsha u tshila kha ḽifhasi nga hu sa fheli? (Yohane 10:16) Kha vha dziṅwe nngu, Miṅwaha ya Tshigidi ya Vhuvhusi ha Kristo i ḓo sumbedza u vha tshifhinga tsha u vusuluswa na u vhofhololwa. Tshifhingani tsha honoho Vhuvhusi ha Miṅwaha ya Tshigidi ine ya fanyiselwa nga Ṅwaha wa Mahumi Maṱanu, Yesu u ḓo shumela mbuyelo ya tshiṱhavhelo tshawe tshirengululaho kha vhathu vha re na lutendo nahone u ḓo fhelisa tshivhi. (Ndzumbululo 21:3, 4) Mafheloni a Vhuvhusi ha Kristo ha Miṅwaha ya Tshigidi, vhathu vha ḓo vha vho fhelelaho nahone vha ḓo vhofhololwa kha tshivhi na lufu zwe vha zwi mamela. (Vha-Roma 8:21) Musi zwenezwo zwo no ḓadzea, ṅwaha wa mahumi maṱanu wa Vhakriste u ḓo vha wo fhela.

[Ṱhaluso dzi re magumoni a siaṱari]

[Tshifanyiso kha siaṱari 26]

Miṅwaha ya Tshigidi ine ya fanyiselwa nga ṅwaha wa mahumi maṱanu—ndi tshifhinga tsha u vusuluswa na u vhofhololwa ha “vha dziṅwe nngu”