Yehova U Dzumbulula Vhugala Hawe Kha Vha Ḓiṱukufhadzaho
Yehova U Dzumbulula Vhugala Hawe Kha Vha Ḓiṱukufhadzaho
“U ḓi-vhuyedza na u ofha Yehova, malamba ndi lupfumo na vhugala na vhutshilo.”—MIRERO 22:4.
1, 2. (a) Bugu ya Mishumo i sumbedza hani uri Stefano o vha e “munna o ḓalaho lutendo na Muya-mukhethwa”? (b) Ndi vhuṱanzi vhufhio vhu re hone ha uri Stefano o vha a tshi ḓiṱukufhadza?
STEFANO o vha e “munna o ḓalaho lutendo na Muya-mukhethwa.” Hafhu o vha o “ḓala tshilidzi na maanḓa.” Samusi o vha e muṅwe wa vhafunziwa vha Yesu vha u thoma, o vha a tshi khou ita vhuṱolo vhunzhi na maḓembe mahulu vhathuni. Nga muṅwe musi, vhaṅwe vhanna vha thoma u lwa nae, fhedzi “vha kundwa u fhindula vhuṱali na muya we a vha a tshi amba ngawo’.” (Mishumo 6:5, 8-10) Zwi vhonala uri Stefano o vha e mugudi vhukuma wa Ipfi ḽa Mudzimu, nahone o ḽi lwela nga maanḓa phanḓa ha vharangaphanḓa vha vhurereli ha Tshiyuda vha misini yawe. Mafhungo awe o ṅwaliwaho kha Mishumo ndima ya 7, a khwaṱhisedza kha u vha hawe na dzangalelo lwo khwaṱhaho kha ndivho ya Mudzimu ye ya vha i tshi khou dzumbululwa.
2 U fhambana na vharangaphanḓa vha vhurereli, vhe vhuimo na nḓivho zwavho zwa vha ita uri vha pfe vhe vha nṱha kha vhathu zwavho, Stefano o vha a tshi ḓiṱukufhadza. (Mateo 23:2-7; Yohane 7:49) Naho o vha a tshi ḓivha Maṅwalo, o vha o fushea vhukuma nga u ṋea mushumo wa “u kovhela vhathu zwiḽiwa” u itela uri vhaapostola vha kone u ḓiṋekedzela tshoṱhe kha u “konḓelela kha dzithabelo na kha mushumo wa u funza.” Stefano o vha e na bvumo ḽavhuḓi kha vhahawe nahone nga zwenezwo a nangiwa uri a vhe muṅwe wa vhanna vha sumbe vho themendelwaho uri vha dzudzanye u phaḓaladzwa ha zwiḽiwa. O ṱanganedza wonoyo mushumo nga u ḓiṱukufhadza.—Mishumo 6:1-6.
3. Stefano o vhona tshilidzi tshifhio tsha Mudzimu tshi songo mu fanelaho?
3 Yehova o ṱhogomela u ḓiṱukufhadza ha Stefano, u katela na vhumuya na u fulufhedzea hawe. Musi Stefano a tshi khou ṱanziela gogo ḽa maswina awe a vharangaphanḓa vha Vhayuda nḓuni ya Magota, vhahanedzi vhawe vho “vhona tshifhaṱuwo tshawe tshi tshi nga tsha muruṅwa.” (Mishumo 6:15) Mbonalo yawe ya tshifhaṱuwo yo vha i tshi nga ya muḓinḓa wa Mudzimu, e na mulalo u bvaho kha Mudzimu wa vhugala, Yehova. Nga murahu ha u ṋea vhuṱanzi ho khwaṱhaho kha miraḓo ya Magota, Stefano o vhona tshilidzi tshihulwane tsha Mudzimu tshi songo mu fanelaho. “A ḓala Muya-mukhethwa a lilala ṱaḓulu, a vhona vhurena ha Mudzimu na Yesu ó ima nga thungo ya tshanḓa tsha u ḽa tsha Mudzimu.” (Mishumo 7:55) Kha Stefano, ḽeneḽi bono ḽi swayeaho ḽo dovha ḽa khwaṱhisa vhuimo ha Yesu sa Murwa wa Mudzimu na Messia. Ḽo khwaṱhisa Stefano a ḓiṱukufhadzaho na u mu khwaṱhisedza uri Yehova u a mu ṱanganedza.
4. Yehova u dzumbululela vhugala hawe kha vhafhio?
4 Samusi bono ḽo ṋewaho Stefano ḽi tshi sumbedza, Yehova o dzumbulula vhugala hawe na ndivho yawe kha vhathu vha ofhaho Mudzimu vhane vha ḓiṱukufhadza na vhane vha dzhiela nṱha vhushaka havho nae. Bivhili i ri: “U ḓi-vhuyedza na u ofha Yehova, malamba ndi lupfumo na vhugala na vhutshilo.” (Mirero 22:4) Nga zwenezwo, ndi zwa ndeme uri ri pfesese zwine u ḓiṱukufhadza ha vhukuma ha amba zwone, na nḓila ine ra nga ṱahulela ngayo yeneyi pfaneleo ya ndeme, na nḓila ine ra vhuyelwa ngayo nga u i sumbedza masiani oṱhe a vhutshilo.
U Ḓiṱukufhadza ndi Pfaneleo ya Mudzimu
5, 6. (a) U ḓiṱukufhadza zwi amba mini? (b) Yehova o sumbedza hani u ḓiṱukufhadza? (c) Ri fanela u kwamea hani nga u ḓiṱukufhadza ha Yehova?
5 Zwi nga kha ḓi mangadza vhaṅwe vhathu uri Yehova Mudzimu, muhulwanesa na wa vhugala vhuhulwanesa ḽifhasini ḽoṱhe, na ene ndi tsumbo khulwanesa ya u ḓiṱukufhadza. A tshi amba na Yehova, Khosi Davida o ri: “U mpfarisa tshiṱangu tshau tshi tshidzaho. Tshanḓa tshau tshi dzula tshó ntika; U nkhulisa nga vhulenda hau.” (Psalme ya 18:35) A tshi ṱalusa Yehova sa a ḓiṱukufhadzaho, Davida o shumisa ipfi ḽa Luheberu ḽi ambaho “u kotama.” Nga nnḓa ha ipfi “ḓitukufhadza,” miṅwe mibulo i ambaho zwi fanaho ndi “u vuḓa” na “u ḓivhea fhasi.” Ngauralo Yehova o sumbedza u ḓiṱukufhadza musi a tshi ḓivhea fhasi musi a tshi khou shumisana na Davida a songo fhelelaho nahone a mu shumisa sa khosi yo Mu imelaho. Samusi mafhungo a re kha Psalme ya 18 a tshi sumbedza, Yehova o tsireledza nga u tikedza Davida, a mu phulusa “zwanḓani zwa maswina awe oṱhe na zwanḓani zwa Saulo.” Nga hu fanaho, Davida o zwi ḓivha uri vhuhulwane kana vhugala hoṱhe vhune a nga vhu wana e khosi vhu ḓitika nga u ḓiṱukufhadza ha Yehova a tshi itela ene. Yeneyo ṱhogomelo yo thusa Davida u ri a dzule a tshi ḓiṱukufhadza.
6 Hu pfi mini nga riṋe? Yehova o vhona zwo tea uri funza mafhungo-ngoho, nahone a nga vha o ri ṋea ndugelo dzo khetheaho dza tshumelo nga ndangulo yawe kana a nga kha ḓivha o ri shumisa nga iṅwe nḓila u itela u khunyeledza zwine a zwi funa. Ri fanela u ḓipfa hani nga ha zwenezwi zwoṱhe? Naa a ro ngo fanela u ḓiṱukufhadza? Naa a ro nga fanela u livhuha u ḓiṱukufhadza ha Yehova nahone ra iledza u ḓihudza, zwine vhukuma zwa nga ri ḓisela khombo?—Mirero 16:18; 29:23.
7, 8. (a) Yehova o sumbedza hani u ḓiṱukufhadza kha Manase? (b) Yehova, u katela na Manase, vho ri vhetshela tsumbo ine ra tea u i edzisa ya u ḓiṱukufhadza nga nḓila-ḓe?
7 Yehova ho ngo sumbedza u ḓiṱukufhadza huhulwane nga u shumisana hawe na vhathu vha songo fhelelaho fhedzi, fhedzi o dovha a sumbedza tshilidzi kha vhaheḓana, na u vusa kana u hulisa, vhane vha ḓiṱukufhadza. (Psalme ya 113:4-7) Sa tsumbo, ṱhogomelani mafhungo a Khosi Manase wa Yuda. O shumisa luvhi vhuimo hawe ha nṱha sa khosi nahone a ṱuṱuwedza vhurabeli ha mazwifhi nahone o “ita zwinzhi zwe zwa vhifhela Yehova zwa mu sinyuisa.” (2 Koronika 33:6) Mafheleloni, Yehova o ṱarafa Manase nga u tendela a tshi dzhielwa vhuhosi nga khosi ya Asuri. Musi e khothoni, Manase “a ḓi-vhuyedza zwihulu-hulu phanḓa ha Yehova Mudzimu,” lwe Yehova a mu vhuyedzedza uri a vhuse khuluṋonini ya Yerusalema, nahone Manase “a ḓivha ngazwo’ uri Mudzimu vhukuma ndi Yehova.” (2 Koronika 33:11-13) Ee, mafheleloni, u ḓiṱukufhadza ha Manase ha takadza Yehova, we na ene a mu sumbedza u ḓiṱukufhadza nga u mu hangwela nahone a dovha a mu vhea a vha khosi.
8 U ṱoḓa ha Yehova u hangwela zwivhi na u rembuluwa ha Manase zwi ri ṋea ngudo khulwane ya u ḓiṱukufhadza. Ri fanela u dzula ri tshi humbula uri nḓila ine ra fara ngayo vhathu vhe vha ri khakhela na mavhonele ane ra a sumbedza musi ro ita tshivhi zwi kwama nḓila ine Yehova a ḓo shumisana ngayo na riṋe. Arali ra hangwela milandu ya vhaṅwe nahone ra ṱanganedza vhukhakhi hashu nga u ḓiṱukufhadza, Yehova a nga ri sumbedza tshilidzi.—Mateo 5:23, 24; 6:12.
Vhugala ha Mudzimu vhu Dzumbululelwa vha Ḓiṱukufhadzaho
9. Naa u ḓiṱukufhadza ndi tshiga tsha vhushayanungo? Ṱalutshedzani.
9 Naho zwo ralo, ri songo dzhia u ḓiṱukufhadza na pfaneleo dzi fanaho naho sa tshiga tshi sumbedzaho vhushayanungo kana sa nḓowelo ya u vhuyafhedza vhukhakhi. Samusi Maṅwalo Makhethwa a tshi sumbedza, Yehova u a ḓiṱukufhadza, fhedzi u a sinyuwa zwo tea na u sumbedza maanḓa mahulwane musi zwi tshi ṱoḓea uri a ite nga u ralo. Nga ṅwambo wa u ḓiṱukufhadza hawe, Yehova u ṋea ṱhogomela yavhuḓi kana yo khetheaho kha vha ḓiṱukufhadzaho, ngeno e si na vhukonani na vhathu vha ḓikukumusaho. (Psalme ya 138:6) Yehova o sumbedza hani ṱhogomelo yo khetheaho kha vhashumeli vhawe vha ḓiṱukufhadzaho?
10. Ndi mini zwine Yehova a zwi dzumbululela vha ḓiṱukufhadzaho, samusi zwo sumbedzwa kha 1 Vha-Korinta 2:6-10?
10 Nga tshifhinga tshawe tsho teaho na nga nḓila yawe ye a i khetha ya vhudavhidzano, Yehova o dzumbulula kha vha ḓiṱukufhadzaho zwidodombedzwa zwa malugana na u khunyeledzwa ha ndivho yawe. Zwenezwi zwidodombedzwa a zwi dzumbululelwi vhathu vhane vha ḓitika nga u ḓikukumusa na nga swili kha vhuṱali kana mihumbulo ya vhathu. (1 Vha-Korinta 2:6-10) Fhedzi vha ḓiṱukufhadzaho, samusi vho ṋewa pfeseso yo teaho ya ndivho dza Yehova, vha sudzuluselwa u renda Yehova nga uri vha a dzhiela nṱha vhukuma vhugala hawe.
11. Ḓanani ḽa u thoma ḽa miṅwaha, vhaṅwe vho sumbedza hani u sa ḓiṱukufhadza, nahone zwenezwi zwo vha huvhadza nga nḓila-ḓe?
11 Kha ḓana ḽa u thoma ḽa miṅwaha, vhathu vhanzhi, u katela na vhe vha ḓiamba uri vha Vhakriste, vho sumbedza u sa ḓiṱukufhadza nahone vha khukhuliswa nga zwe muapostola Paulo a vha dzumbululela zwone nga ha ndivho ya Mudzimu. Paulo o vha “muapostola wa Vha-nnḓa,” fhedzi ho vha hu si nga ṅwambo wa lushaka lwawe, pfunzo, miṅwaha, kana rekhodo khulwane ya mishumo mivhuya. (Vha-Roma 11:13) Kanzhi, vhathu vha humbulaho nga lwa ṋama vha dzhia zwenezwi zwi zwithu zwine zwa sumbedza ane Yehova a ḓo mu shumisa sa tshishumiswa tshawe. (1 Vha-Korinta 1:26-29; 3:1; Vha-Kolosa 2:18) Naho zwo ralo, Paulo o vha a tshi funwa vhukuma nga Yehova u tendelana na tshilidzi Tshawe na ndivho yawe yo lugaho. (1 Vha-Korinta 15:8-10) Vhathu vhe Paulo a vha amba uri ndi “vhaapostola vha manaka-naka,” u katela na vhaṅwe vhapikisi, vho hana u ṱanganedza Paulo na nḓila ye a vha a tshi khou ṱalutshedza ngayo Maṅwalo. U sa ḓiṱukufhadza havho ho vha thivhela uri vha si wane nḓivho na u pfesesa nḓila ya vhugala ine Yehova a ḓadzisa ngayo ndivho yawe. Ri songo vhuya ra dzhiela fhasi kana u haṱula zwi songo tea vhathu vhe Yehova a vha khetha u vha shumisa u ḓadzisa zwine a zwi funa.—2 Vha-Korinta 11:4-6.
12. Tsumbo ya Mushe i sumbedza hani uri Yehova u ṱanganedza vhane vha ḓiṱukufhadza?
12 Kha ḽiṅwe sia, hu na tsumbo nnzhi dza Bivhilini dzi ombedzelaho nḓila ine vhathu vha ḓiṱukufhadzaho vha vhona vhugala ha Mudzimu ngayo. Mushe, “munna wa zwivhuya” u fhira vhathu vhoṱhe, o vhona vhugala ha Mudzimu nahone a ḓiphina nga vhushaka ha tsini nae. (Numeri 12:3) Onoyu munna a ḓiṱukufhadzaho, we a fhedza miṅwaha ya 40 e mulisa wa fhasi, khamusi vhunzhi ha yeneyo miṅwaha e Magumoni a Shango ḽa Arabia, o dzhielwa nṱha vhukuma nga Musiki nga nḓila nnzhi. (Ekisodo 6:12, 30) Nga thuso ya Yehova, Mushe o vha muambeli na mudzudzanyi muhulwane wa lushaka lwa Isiraele. O ḓiphina nga u ambedzana na Mudzimu. Nga bono, o vhona “tshivhumbeo tsha Yehova.” (Numeri 12:7, 8; Ekisodo 24:10, 11) Vhathu vhe vha ṱhogomela onoyu mushumeli a ḓiṱukufhadzaho na muimeleli wa Mudzimu vho fhaṱutshedzwa. Nga hu fanaho, ri ḓo fhaṱutshedzwa arali ra ṱhogomela na u thetshelesa muporofita muhulwane kha Mushe, Yesu, u katela na “mukoma a fulufhedzeaho na wa vhuṱali” o khethwaho ngae.—Mateo 24:45, 46; Mishumo 3:22.
13. Vhugala ha Yehova ho dzumbululelwa vhalisa vha ḓiṱukufhadzaho vha ḓana ḽa u thoma ḽa miṅwaha nga nḓila-ḓe?
13 ‘Lupenyo lwa Yehova lwo tanga’ vhonnyi nga nḓivhadzo ya muruṅwa ya mafhungo maḓifha a u bebwa ha “mutshidzi, a re Kristo Murena”? A si kha vharangaphanḓa vha vhurereli vha ḓihudzaho kana vhathu vha vhuimo ha nṱha, fhedzi ho vha hu kha vhalisa vha ḓiṱukufhadzaho vhe vha vha vhe “mathaga, vha tshi khou lisa miṱambi yavho vhusiku.” (Luka 2:8-11) Vhenevha vhathu vho vha vha sa dzhielwi nṱha nga ṅwambo wa vhutsila na mushumo wavho. Fhedzi ndi vhone vhe Yehova a vha dzhiela nṱha na vhe a khetha u vha ḓivhadza u thoma nga ha u bebwa ha Messia. Vhukuma, Yehova u dzumbulula vhugala hawe kha vha ḓiṱukufhadzaho na vha ofhaho Mudzimu.
14. Ndi phaṱutshedzo dzifhio dzi bvaho ha Mudzimu dzi waniwaho nga vha ḓiṱukufhadzaho?
14 Dzenedzi tsumbo dzi ri funza mini? Dzi ri sumbedza uri Yehova u ṱanganedza na u dzumbulela nḓivho na ndivho zwawe kha vhathu vha ḓiṱukufhadzaho. U khetha vhathu vhane vha si swikelele zwine vhathu vha zwi lavhelela nahone a vha shumisa u vhudza vhaṅwe ndivho yawe ya vhugala. Hezwi zwi fanela u ri ṱuṱuwedzela u bvela phanḓa ri tshi ṱoḓa Yehova, Ipfi ḽawe ḽa vhuporofita, na ndangulo yawe u itela u wana vhulivhisi. Ri nga vha na vhungoho ha uri Yehova u ḓo bvela phanḓa a tshi ḓivhadza vhashumeli vhawe vha ḓiṱukufhadzaho malugana na u ḓadzea ha ndivho yawe ya vhugala. Muporofita Amosi o ḓivhadza a ri: “Muṋe wa vhoṱhe Yehova ha nga ita tshithu, á songó thoma a ranga a vhudza vhaḓinḓa vhawe vha vhaporofita.”—Amosi 3:7.
Ṱahulelani u Ḓiṱukufhadza Nahone ni Ḓiphine nga u Ṱanganedzwa nga Mudzimu
15. Ndi ngani ri tshi fanela u ṱahulela u dzula ri tshi ḓiṱukufhadza, nahone zwenezwi zwo sumbedzwa hani kha mafhungo a Khosi Saulo wa Isiraele?
15 U itela u wana phaṱutshedzo dza nga hu sa fheli, ri fanela u dzula ri tshi ḓiṱukufhadza. Mbuno ya uri muthu o vhuya a ḓiṱukufhadza nga tshiṅwe tshifhinga vhutshiloni a zwi ambi uri u ḓo dzula a tshi ḓiṱukufhadza. Zwo ḓowelea uri muthu a litshe u ḓiṱukufhadza nahone a thome u ḓikukumusa, zwine zwa ita uri a vhe na maṱaṱa nahone zwa mu ḓisela khombo. Saulo, muthu wa u thoma u ḓodzwa a vha khosi ya Isiraele, o ita zwi fanaho. Musi a tshi khethwa lwa u thoma, o ḓipfa ‘e muṱuku.’ (1 Samuele 15:17) Naho zwo ralo, nga murahu ha u vhusa miṅwaha mivhili fhedzi, o vha na maṱaṱa. O nyadza ndugiselelo dza Yehova dza u ṋekedza zwiṱhavhelo a tshi shumisa Samuele, nahone a ḓiimelela uri ndi ngani o ṋekedza zwiṱhavhelo nga ene muṋe. (1 Samuele 13:1, 8-14) Hezwi zwo vha zwi u thoma ha zwiitea zwe zwa tevhekana zwe zwa sumbedza u sa ḓiṱukufhadza hawe. Zwenezwo zwo ita uri a si tsha ṱanganedza muya wa Mudzimu na u ṱanganedzwa ngae, zwe mafheleloni zwa mu ḓisela lufu lu shonisaho. (1 Samuele 15:3-19, 26; 28:6; 31:4) Ngudo i khagala: Ri fanela u dzula ri tshi lwela u ṱahulela u ḓiṱukufhadza, u iledza nga nungo dzoṱhe u ḓihudza, nga zwenezwo ri ḓo vha ri tshi khou iledza mishumo ya maṱaṱa ine ya nga ita uri ri si tsha ṱanganedzwa nga Yehova.
16. U humbula nga ha vhushaka hashu na Yehova na vhathu nga riṋe zwi nga ri thusa hani u ṱahulela u ḓiṱukufhadza?
16 Naho u ḓiṱukufhadza hu siho kha mutevhe wa zwiaṋwiwa zwa muya wa Mudzimu, ndi pfaneleo ya vhumudzimu ine ya tea u ṱahulelwa. (Vha-Galata 5:22, 23; Vha-Kolosa 3:10, 12) Samusi i tshi katela tshiimo tsha muhumbulo—zwine zwa amba nḓila ine ra ḓidzhia ngayo u katela na vhaṅwe—u ṱahulela u ḓiṱukufhadza zwi ṱoḓa vhuḓidini vhuhulwane. U humbula ho dzikaho na u elekanya nga vhushaka hashu na Yehova na vhathu nga riṋe zwi nga ri thusa u dzula ri tshi ḓiṱukufhadza. Phanḓa ha Mudzimu, vhathu vhoṱhe vha songo fhelelaho vha nga mahatsi madala ane a mela lwa tshifhinganyana, nahone nga murahu a oma nahone a fa. Vhathu vha nga nzie dzi re tsimuni. (Yesaya 40:6, 7, 22) Naa ṱari ḽithihi ḽa hatsi ḽi na tshiitisi tsha u ḓikukumusa nga ṅwambo wa uri ḽo lapfanyana u fhira maṅwe maṱari a hatsi? Naa nzie i na tshiitisi tsha u ḓikukumusa nga ṅwambo wa uri i a kona u fhufha u fhira dziṅwe nzie? Ndi vhutsilu u humbula nga yeneyo nḓila. Nga zwenezwo, muapostola Paulo o humbudza Vhakriste ngae a ri: “Ndi nnyi ane a U ṱalula? U na tshini tshe U si tou fhiwa? Hone arali wó tou fhiwa U zuwela’ni wa nga a wo ngo tou fhiwa?” (1 Vha-Korinta 4:7) U elekanya nga maṅwalo a Bivhilini a ngaho enea zwi nga ri thusa u ṱahulela na u sumbedza u ḓiṱukufhadza.
17. Ndi mini zwo thusaho muporofita Daniele u ṱahulela u ḓiṱukufhadza, nahone ndi mini zwine zwa nga ri thusa u ita zwi fanaho?
17 Muporofita wa Muheberu a vhidzwaho Daniele ho ambiwa nga hae u pfi ndi “munna mufuniwa” phanḓa ha Mudzimu nga ṅwambo wa u “ḓiṱukufhadza,” hawe. (Daniele 10:11, 12, vhambedzani NW.) Ndi mini tshe tsha thusa Daniele uri a ṱahulele u ḓiṱukufhadza? Tsha u thoma, o sumbedza u ḓitika nga Yehova o khwaṱha, a tshi mu rabela tshifhinga tshoṱhe. (Daniele 6:10, 11) Zwiṅwe hafhu, Daniele o vha e mugudi wa Ipfi ḽa Mudzimu a fhiseaho, zwithu zwe zwa mu thusa u dzula a tshi humbula nga vhugala ha Mudzimu. O vha a tshi dovha a tenda vhushayanungo hawe, hu si ha vhathu vhawe fhedzi. Nahone o vha tshi takalela vhukuma u tikedza u luga ha Mudzimu, hu si hawe. (Daniele 9:2, 5, 7) Naa ri nga guda kha tsumbo yavhuḓi ya Daniele nahone ra lwela u ṱahulela na u sumbedza u ḓiṱukufhadza kha masia oṱhe a vhutshilo hashu?
18. Ndi vhugala vhufhio ho lindelaho vhane vha ḓiṱukufhadza ṋamusi?
18 Mirero 22:4 i ri: “U ḓi-vhuyedza na u ofha Yehova, malamba ndi lupfumo na vhugala na vhutshilo.” Ee, Yehova u takalela vhane vha ḓiṱukufhadza, nahone vha ḓo wana vhugala na vhutshilo. Nga murahu ha uri Yehova a dzudzanye kuhumbulele kwawe musi a tshi khou ṱoḓa u ṱutshela tshumelo ya Mudzimu, mupsalme Asafu o ṱhogomela nga u ḓiṱukufhadza a ri: “U ḓo ndededza nga maano au ané wa a ḓivha, ngavhuya wa ḓo kona u nṱanganedza wa nkhulisa.” (Psalme ya 73:24) Hu pfi mini nga ṋamusi? Ndi vhugala vhufhio ho lindelaho vhane vha sumbedza u ḓiṱukufhadza? Nga nnḓa ha u ḓiphina nga u ṱanganedzwa na u vha na vhushaka havhuḓi na Yehova, vha nga lavhelela u vhona u ḓadzea ha maipfi o hevhedzwaho nga Khosi Davida ane a ri: “Shango ḽi ḓo vha ifa ḽa vho vuḓaho; ndi vhone vha u ḓo takalela muḓalo wa mulalo.” Ndi vhumatshelo havhuḓi lungafhani!—Psalme ya 37:11.
Naa Ni a zwi Humbula?
• Stefano ndi tsumbo ya u ḓiṱukufhadza we Yehova a mu dzumbululela vhugala Hawe nga nḓila-ḓe?
• Yehova Mudzimu o sumbedza u ḓiṱukufhadza nga nḓila dzifhio?
• Ndi tsumbo dzifhio dzi sumbedzaho uri Yehova u dzumbulula vhugala hawe kha vha ḓiṱukufhadzaho?
• Tsumbo ya Daniele i nga ri thusa u ṱahulela u ḓiṱukufhadza nga nḓila-ḓe?
[Mbudziso Dza Pfunzo]
[Bogisi kha siaṱari 12]
U Khwaṱha Fhedzi a Tshi Ḓiṱukufhadza
Buthanoni ḽa Vhagudi vha Bivhili (vhane ṋamusi vha ḓihwa nga u pfi Ṱhanzi dza Yehova) ḽa 1919 ngei Cedar Point, Ohio, U.S.A., J. F. Rutherford we a vha e na miṅwaha ya 50, we nga tshenetsho tshifhinga a vha e mulavhelesi wa mushumo, o khetha u shuma nga u ḓifunela u ṱanganedza vhaeni, u vha hwalela mihwalo, na u vha fhelekedza nḓuni dzavho. Nga ḓuvha ḽa u fhedza ḽa buthano, o takadza vhathetshelesi vha 7000 nga maipfi ane a ri: “Ni vhaambeli vha Khosi ya dzikhosi, na Murena wa marena, ni tshi ḓivhadza vhathu . . . muvhuso wa vhugala wa Murena washu.” Naho Wahashu Rutherford o vha e munna wa lutendo luhulwane, we a vha a tshi ḓivhelwa u amba nga nḓila ya maanḓa na ane a si timatime kha zwe a vha a tshi tenda uri ndi mafhungo-ngoho, o vha a tshi ḓiṱukufhadza zwa vhukuma kha Mudzimu, zwe kanzhi a vha a tshi zwi sumbedza kha thabelo dzawe kha vhurabeli ha nga matsheloni Bethele.
[Tshifanyiso kha siaṱari 9]
Stefano, we a vha a tshi ḓivha Maṅwalo, o phaḓaladza zwiḽiwa nga u ḓiṱukufhadza
[Tshifanyiso kha siaṱari 10]
U ḓiṱukufhadza ha Manase ho takadza Yehova
[Tshifanyiso kha siaṱari 12]
Ndi mini tsho itaho uri Daniele a vhe “munna mufuniwa”?