Mbudziso Dzi Bvaho Ha Vhavhali

Musi muapostola Yohane a tshi ṅwala uri “lufuno lwo khunyelelaho, iṱali lu tshi pandela nyofho kule,” o vha a tshi khou amba mini nga mubulo une wa ri “lufuno lwo khunyelelaho,” nahone ndi “nyofho” ifhio ine ya pandelelwa kule?

Muapostola Yohane o ṅwala a ri: “Lufuno a lu na nyofho khalwo’. Lufuno lwo khunyelelaho, iṱali lu tshi pandela nyofho kule, ngauri nyofho i a shengedza. A ofhaho, ene ha athu u khunyeledza zwa lufuno.”—1 Yohane 4:18.

Eneo mafhungo nga vhuḓalo a sumbedza uri Yohane o vha a tshi khou haseledza nga u amba wo vhofholowa—zwihulu-hulu vhukati ha lufuno lwa u funa Mudzimu na u amba nga Hae wo vhofholowa. Zwenezwi zwi nga vhonala kha zwine ra zwi vhala kha ndimana ya 17: “Lufuno lu tshi khunyelela vhukati hashu ndi uri ri vhe na fulufhelo nga ḓuvha ḽa khaṱhulo, ngauri na riṋe ri fana na Ene, naho rí shangoni ḽino.” Nḓila ine Mukriste a funa ngayo Mudzimu na u ḓipfa a tshi funiwa ngayo nga Mudzimu i mu ṱuṱuwedzela u amba nae o vhofholowa—musi a tshi ya kha Mudzimu nga thabelo.

Mubulo une wa ri “lufuno lwo khunyelelaho” ndi wa ndeme vhukuma. Samusi ḽo shumiswa Bivhilini, ipfi “khunyelelaho” a ḽi ambeli tshifhinga tshoṱhe kha u fhelela nga nḓila yo livhaho, fhedzi tshiṅwe tshifhinga ḽi ambela kha zwithu zwa vhuimo ha nṱha. Sa tsumbo, kha Pfunzo yawe ya Thavhani, Yesu o ri: “Ndi zwone-ha, ivhani vhavhuya vho gumaho, ni nge khotsi-aṋu wa ṱaḓulu é muvhuya o gumaho.” Yesu o vha a tshi khou vhudza vhatevheli vhawe uri arali vha tshi funa vhane vha vha funa fhedzi, lufuno lwavho lu ḓo vha lu songo eḓana. Vha fanela u ita uri lufuno lwavho lu fhelele, kana lu engedzee, vha fune na maswina avho. Ngauralo, nga hu fanaho, musi Yohane a tshi ṅwala nga ha “lufuno lwo khunyelelaho,” o vha a tshi khou amba nga ha lufuno lwa Mudzimu lune lwa bva mbiluni, lwo khwaṱhaho, nahone lune lwa katela masia oṱhe a vhutshilo.—Mateo 5:46-48; 19:20, 21.

Musi Mukriste a tshi ya kha Mudzimu nga thabelo, u a zwi ḓivha uri u na tshivhi nahone ho ngo fhelela. Naho zwo ralo, arali e na lufuno lwo khwaṱhaho lwa u funa Mudzimu nahone e na vhuṱanzi ho khwaṱhaho ha uri Mudzimu u a mu funa, a nga si timatime uri ha nga mu ṱanganedzi. Nṱhani hazwo, u a ḓiphina nga u amba o vhofholowa zwine zwa vha mbiluni yawe na u humbela pfarelo kha mutheo wa tshiṱhavhelo tshi rengululaho tsho lugiselelwaho nga Mudzimu a re na lufuno a tshi shumisa Yesu Kristo. U pfa e na khwaṱhisedzo ya uri Mudzimu u a pfa thabelo dzawe.

Ri nga ‘khunyeledza hani lufuno’ lwashu nahone ra ‘laṱela kule’ nyofho dza u landulwa kana u sa ṱanganedzwa? Muapostola Yohane o ri: “Onoyo-ha ané a ita zwiné fhungo ḽawe [Mudzimu] ḽa amba kha onoyo nangoho u funa Mudzimu ho ḓala. Ndi zwone zwiné ra ḓivhalea ngazwo’ zwauri ri khae’.” (1 Yohane 2:5) Ṱhogomelani: Arali Mudzimu o ri funa ri tshee vhavhi, naa a nga si ri fune nga nḓila yo engedzeaho arali ra rembuluwa nahone ra “ita zwine fhungo ḽawe ḽa amba”? (Vha-Roma 5:8; 1 Yohane 4:10) Vhukuma, arali ra dzula ri tshi fulufhedzea, ri nga vha na khwaṱhisedzo ye muapostola Paulo a vha e nayo musi a tshi amba zwi tevhelaho nga ha Mudzimu: “Ene we a si tshivhe Murwa wawe vhukuma, a mu ṋekedza a tshi itela riṋe roṱhe, izwi a nga litsha u ri ṋea zwoṱhe na Ene-shuu?”—Vha-Roma 8:32.