Naa Ni a Ṱoḓa u Tshila Nga hu sa Fheli?

MUṄWE mukegulu wa Dzhapani o ri: “A thi ofhi u fa. Fhedzi zwi a ntsikeledza u ḓivha uri ndi ḓo ṱutshela haya maluvha.” Muṅwe muḓinḓa wa Mukriste we a mu dalela hayani hawe o kona u pfesesa nḓila ye a ḓipfa ngayo, ngauri onoyo mukegulu o vha e na ngade yavhuḓi. Vhathu vhanzhi vhane vha amba uri a vha ofhi u fa vha a ḓiphina nga tsiko nahone vha nga ṱulutshelwa u tshila tshoṱhe.

Zwi ḓa hani uri vha tshile tshoṱhe? Vhathu vhanzhi vha a hanedza wonoyo muhumbulo. Vhaṅwe vha nga ita na u amba uri a vha na dzangalelo ḽa u tshila tshoṱhe. Ndi ngani muṅwe muthu a tshi nga ḓipfa nga u ralo?

 Naa Vhutshilo vhu sa Fheli a vhu nga Takadzi?

Vhaṅwe vha humbula uri u tshila tshoṱhe zwi nga si takadze. Vha nga kha ḓi sumba vhathu vhane vho no aluwa nahone vhane vha sa tsha kona u ita tshithu nga nnḓa ha u ḓidzulela nahone vha sedza thelevishini. Arali yeneyo i nḓila ine na ḓipfa ngayo, ṱhogomelani zwe muḓivhi wa dziṋaledzi Robert Jastrow a zwi amba musi o vhudziswa uri arali vhutshilo vhu sa fheli vhu tshi ḓo vha phaṱutshedzo kana samba. Jastrow o fhindula a ri: “Vhu ḓo vha phaṱutshedzo kha vhane vha vha na dzangalelo ḽa u bvela phanḓa ni tshi guda. Muhumbulo wa uri vha ḓo vha na nḓivho ya nga hu sa fheli u nga vha u takadzaho khavho. Fhedzi kha vhathu vhane vha humbula uri vho no gudesa zwithu zwinzhi na vha songo ṱanḓavhuwaho ngeleloni, vhutshilo vhu sa fheli vhu nga vha samba khavho. A vha na zwine vha nga zwi ita nga tshifhinga tshine vha vha natsho.”

Nḓila ine vhutshilo vhu sa fheli ha ḓo vha ngayo zwi ḓo ḓitika nga mavhonele aṋu inwi muṋe. Arali ni na ‘dzangalelo ḽa u bvela phanḓa ni tshi guda,’ humbulani nga ha zwithu zwine zwa ḓo khunyeledzwa kha sia ḽa zwa vhutsila, muzika, zwa u fhaṱa, vhulimi kana buḓo naho ḽi ḽifhio ḽine muthu a nga ḽi tovhola. Vhutshilo vhu sa fheli kha ḽifhasi vhu ḓo bveledza zwilavhelelwa zwa u ṱoḓa u vha a bvelelaho kha masia o fhambanaho.

U kona u sumbedza na u tshenzhela lufuno nga hu sa fheli zwi ḓo ita uri vhutshilo vhu sa fheli vhu vhe vhu fushaho nga ngoho. Ro sikiwa ri na vhukoni ha u sumbedza lufuno, nahone ri a takala musi ri tshi sumbedzwa lufuno. U sumbedzana lufuno na vhaṅwe vhathu zwi bveledza u fushea ha tshoṱhe hune ha sa fhele nga u ya ha tshifhinga. U tshila tshoṱhe zwi ḓo ṋea vhathu tshibuli tsha u bvela phanḓa vha tshi ṱahulela lufuno hu si kha vhathu fhedzi, fhedzi zwihuluhulu na kha Mudzimu. Muapostola Paulo o ri: “Hone arali muthu a tshi funa Mudzimu, uyo u ḓihwa nga ene Mudzimu.” (1 Vha-Korinta 8:3) Ndi tshilavhelelwa tshavhuḓi lungafhani—u ḓivha na u ḓivhiwa nga Muvhusi wa fhethu hoṱhe! Zwiṅwe hafhu, u guda nga ha Musiki washu a re na lufuno a hu gumi. Nga zwenezwo, vhutshilo vhu sa fheli vhu nga vha hani vhu sa takadzi na vhu sa vhuyedzi?

Naa Vhutshilo ndi ha Ndeme Nga Ṅwambo wa uri ndi ha Tshifhinganyana?

Vhaṅwe vha humbula uri u pfufhifhala ha vhutshilo ndi zwone zwine zwa ita uri vhu vhe ha ndeme. Vha nga vhambedza vhutshilo na musuku, une u sa wanale nga vhunzhi. Vha amba uri arali musuku wo vha u tshi nga wanala huṅwe na huṅwe, wo vha u tshi ḓo vha u si wa ndeme.Naho zwo ralo, musuku wo vha u tshi ḓo vha u tshee wo naka. Zwo tou ralo na nga vhutshilo.

 Ri nga vhambedza u ḓiphina nga vhutshilo vhu sa fheli na u wana muya munzhi. Vhaalavhi vhane vha vha kha tshikepe tshine tsha khou kundelwa u bva nga fhasi ha maḓi vha nga dzhia muya u wa ndeme vhukuma. Nga murahu ha u tshidzwa havho, naa ni humbula uri vha ḓo gungula malugana na u ḓiphina havho nga muya munzhi? Na kathihi!

U fana na vhenevho vhaalavhi, ri nga tshidzwa nga tshilavhelelwa tsha u tshila u swika nga hu sa fheli. Muapostola Paulo o ṅwala a ri: “Mulifho wa zwivhi ndi lufu, tshifhiwa tshiné ra ṋewa nga tshilidzi tsha Mudzimu ndi u tshila-tshoṱhe kha Kristo Yesu Murena washu.” (Vha-Roma 6:23) Nga tshiṱhavhelo tsha Yesu tshi rengululaho, Mudzimu u ḓo fhelisa lufu na u sa fhelela kha vhathu nahone u ḓo ṋea vhathu vha thetshelesaho tshifhiwa tsha vhutshilo vhu sa fheli. Ri fanela u livhuha lungafhani yeneyo ndugiselelo ya lufuno!

Hu pfi Mini nga Vhane Na vha Funa?

Vhaṅwe vhathu vha nga kha ḓi ḓivhudzisa u ri: ‘Hu pfi mini nga vhane nda vha funa? Vhutshilo vhu sa fheli vhu nga si vhe ha ndeme kha nṋe arali ndi si navho.’ Khamusi no no wana nḓivho ya Bivhili nahone no no guda nga khonadzeo ya u ḓiphina nga vhutshilo vhu sa fheli kha ḽifhasi ḽa paradiso. (Luka 23:43; Yohane 3:16; 17:3) Nga ho ḓoweleaho, ni ṱoḓa miraḓo ya muṱa wa haṋu, vhaṅwe vhathu vhane na vha funa, na khonani dzaṋu vha tshi wana dakalo ḽine na khou fulufhela u ḽi wana shangoni ḽiswa ḽa u luga ḽo fulufhedziswaho nga Mudzimu.—2 Petro 3:13.

Fhedzi hu pfi mini arali khonani dzaṋu na vhathu vhane na vha funa vha si na dzangalelo ḽa u tshila tshoṱhe kha ḽifhasi ḽa paradiso? Ni songo tendela zwenezwo zwi tshi ni nyabwisa. Bvelani phanḓa ni tshi ṱoḓa nḓivho yo teaho ya Maṅwalo nahone ni ite zwithu u tendelana nayo. Muapostola Paulo o ṅwala a ri: “U ḓivha’ni, iwe musadzi, arali wa ḓo tshidza munna? U ḓivha’ni, iwe munna, arali wa ḓo tshidza musadzi?” (1 Vha-Korinta 7:16) Vhathu vha nga shanduka. Sa tsumbo, muṅwe munna we a vha a tshi pikisa Vhukriste o shanduka nahone nga murahu a vha muhulwane wa tshivhidzo tsha Vhukriste. U ri: “Ndi livhuha vhukuma nge muṱa wanga une nda u funa wa dzula wo farelela kha maitele a Bivhili kha u pikisa hanga hoṱhe.”

Mudzimu u a kwamea nga vhutshilo haṋu na ha vhathu vhane na vha funa. Vhukuma, “Mudzimu . . . ha funi vhaṅwe vha tshi xela, u funa vhoṱhe vha tshi ḓa vha rembuluwa.” (2 Petro 3:9) Yehova Mudzimu u ṱoḓa inwi na vhane na vha funa ni tshi tshila nga hu sa fheli. Lufuno lwawe ndi lu hulwane u fhirisa lwa vhathu vha songo fhelelaho. (Yesaya 49:15) Ngauralo ndi ngani ni sa ṱahuleli vhushaka havhuḓi na Mudzimu? Nga zwenezwo ni ḓo kona u thusa vhane na vha funa uri na vhone vha ite nga u ralo. Naho arali zwa zwino vha si na fulufhelo ḽa u tshila tshoṱhe, mavhonele avho a nga shanduka musi vha tshi vhona uri ni tshila u tendelana na nḓivho yo teaho ya Bivhili.

Hu pfi mini nga vhane na vha funa vho no faho? Malugana na vha dzimilioni vho no faho, Bivhili yo vha farela fulufhelo ḽavhuḓi ḽa mvuwo—u vuswa vhafuni na u ya u tshila kha ḽifhasi ḽa Paradiso. Yesu Kristo o fulufhedzisa a ri: “Hu ḓa tshikhathi, tshiné vhoṱhe vha re zwaloni vha ḓo . . . bvelela.” (Yohane 5:28, 29) Na vho faho vha sa ḓivhi Mudzimu vha ḓo vuswa, ngauri Bivhili i ri: “Vhafu vha ḓo vuwa, vhoṱhe, vho lugaho na vha so ngo luga.” (Mishumo 24:15) Zwi ḓo vha zwi takadzaho lungafhani u ṱanganedza vhathu vho raloho musi vha tshi vuswa!

Vhutshilo vhu sa Fheli—Tshilavhelelwa Tshi Takadzaho

Arali ni tshi nga wana dakalo na u fushea zwino hu sa londwi khakhathi dzoṱhe dza ḽino shango, nga hu re khagala ni ḓo kona u ḓiphina nga vhutshilo vhu sa fheli paradisoni kha ḽifhasi. Musi muṅwe wa Ṱhanzi dza Yehova a tshi sumbedza phaṱutshedzo dzine vhutshilo vhu sa fheli ha ḓo dzi bveledza, muṅwe musadzi o ri: “A thi ṱoḓi u tshila tshoṱhe. Honovhu vhutshilo ha u tshila miṅwaha ya 70 kana ya 80 ho luga kha nṋe.” Muṅwe muhulwane wa Mukriste we a vha e henefho o mu vhudzisa a ri: “Naa no no vhuya na humbula nga nḓila ine vhana  vhaṋu vha ḓo ḓipfa ngayo arali na fa?” A thoma u lila musi a tshi humbula nḓila ine vhana vhawe vha ḓo pfa ngayo vhuṱungu musi vho xelelwa nga mme avho. O tenda a ri: “Ndi lwa u tou thoma kha nṋe u ṱhogomela uri ndi humbulela nṋe muṋe fhedzi, nahone ndi a kona u zwi vhona uri vhutshilo vhu sa fheli a si fulufhelo ḽi re na tseḓa, fhedzi ndi ḽine ḽa kwama vhushaka hashu na vhaṅwe.”

Vhaṅwe vha nga kha ḓi humbula uri a huna muthu ane a ḓo vhaisala musi ndi tshi khou tshila kana ndo fa. Naho zwo ralo, We a ri ṋea Vhutshilo u a kwamea samusi a tshi ri: “Nga vhutshilo hanga! Nṋe a thi takaleli lufu lwa mu-ita-zwivhi; tshine nda takalela ndi u huma hawe ó laṱa nḓila mmbi yawe, a hanya.” (Hesekiele 33:11) Samusi Mudzimu a tshi kwamea vhukuma na nga vhutshilo ha vhavhi, zwi tou pfala uri u a ṱhogomela vhukuma vhane vha mu funa nga ngoho.

Khosi Davida wa Isiraele ḽa kale o vha e na fulufhelo kha ṱhogomelo ya Yehova ya lufuno. Davida o vhuya a ri: “Ngauri khotsi-anga na mme-anga vho nṱutshela, Yehova a nṱanganedza.” (Psalme ya 27:10) Davida o vha a tshi zwi ḓivha uri vhabebi vhawe vha a mu funa. Fhedzi naho arali vhabebi vhawe—mashaka awe a tsinisa—a mu laṱa, o vha a tshi zwi ḓivha uri Mudzimu ha nga mu laṱedzi. Nga ṅwambo wa lufuno lwawe na ṱhogomelo yawe, Yehova u ri fha vhutshilo vhu sa fheli u katela na vhushaka vhu sa fheli nae. (Yakobo 2:23) Naa a ri ṱanganedzi nga ndivhuho zwenezwi zwifhiwa zwavhuḓi?

[Tshifanyiso kha siaṱari 7]

Lufuno lwa u funa Mudzimu na vhahura lu ḓo ita uri u tshila tshoṱhe zwi vhe zwa ndeme