Tsiko Ya Yehova I Mangadzaho

“Zwe wa zwi Ita zwó Anda Hani, Yehova!”

HU SA londwi uri ni dzula mahayani kana ḓoroboni, dzithavhani kana tsini ha lwanzhe, roṱhe ro tangiwa nga tsiko i mangadzaho. Zwo tea, 2004 Calendar of Jehovah’s Witnesses i na zwifanyiso zwine zwa sumbedza mishumo ya zwanḓa zwa Yehova Mudzimu i mangadzaho.

Zwi takadzaho ndi uri vhathu vha dzula vha tshi sumbedza dzangalelo kha mishumo ya Mudzimu. Sa tsumbo, ṱhogomelani Salomo, we vhuṱali hawe ha vha ‘vhu fhiraho vhuṱali ha vhoṱhe vho dzulaho thungo ya Vhubvaḓuvha.’ Bivhili i ri: “O vha a tshi amba zwa muṱaululo wa Libanoni, na zwa muḓonḓe u melaho mitsheṱoni, a tshi amba zwa dziphukha na zwa zwiṋoni na zwikhokhonono na dzikhovhe.” (1 Dzikhosi 4:30, 33) Khotsi a Salomo, Khosi Davida o vha a tshi anzela u elekanya nga ha mishumo ya vhutsila ya Mudzimu. O sudzuluselea u ḓivhadza nga ha Musiki wawe a ri: “Zwe wa zwi ita zwó anda hani, Yehova! Zwoṱhe wo zwi shuma nga vhuṱali; shango ḽoṱhe ḽo ḓala zwivhumbiwa zwau.”—Psalme ya 104:24. *

Ri fanela u ṱhogomela na u elekanya nga ha tsiko. Sa tsumbo, ri nga ‘lilala uri ri vhone [nga maṱo ashu] zwi re ṱaḓulu’ nahone ri ḓivhudzise u ri: “Ndi nnyi we a zwi sika?” Ee, ndi Yehova Mudzimu, ane a vha na ‘thakha nnzhi’ na ane a vha na ‘maanḓa mahulu’ nga ngoho!—Yesaya 40:26.

U elekanya nga ha mishumo ya tsiko ya Yehova zwi fanela u ri kwama hani? Nga nḓila tharu dzi tevhelaho. Zwi nga (1) ri humbudza uri ri dzhiele nṱha vhutshilo hashu, (2) u ri sudzulusela u thusa vhaṅwe u guda kha tsiko, nahone (3) u ri ṱuṱuwedzela uri ri ḓivhe na u livhuha Musiki washu nga nḓila yo engedzeaho.

Vhutshilo hashu sa vhathu, vhune ha fhira ha “zwipuka zwi si na maano,” vhu ita uri ri kone u ṱhogomela na u dzhiela nṱha tsiko i mangadzaho. (2 Petro 2:12) Maṱo ashu a nga vhona u naka ha shango. Nḓevhe dzashu dzi nga kona u pfa nyimbo dza zwiṋoni. Nahone u kona hashu u ṱhogomela tshifhinga na fhethu zwi ita uri ri kone u vha na mihumbulo i takadzaho. Naho vhutshilo hashu ha zwino vhu songo fhelela, u tshila ndi zwa ndeme vhukuma!

Vhabebi vha nga takala musi vha tshi vhona vhana vhavho vha tshi takalela tsiko. Vhana vha takalela vhukuma u fara khumba lwanzheni, u tamba na zwipuka, na u gonya miri! Vhabebi vha fanela u thusa vhana vhavho u vhona nḓila ine tsiko na Musiki zwa tshimbidzana ngayo. Nyofho na ṱhonifho zwine vhana vha nga vha nazwo nga ha tsiko ya Yehova zwi nga dzula mihumbuloni yavho vhutshiloni havho hoṱhe.—Psalme ya 111:2, 10.

Ri ḓo vha ri matsilu arali ri tshi takalela tsiko fhedzi ra sa rende Musiki wayo. Vhuporofita ha Yesaya vhu ri thusa uri ri elekanye nga ha yeneyi  mbuno musi vhu tshi ri: “Naa a U zwi ḓivhi, a wo ngo zwi pfa zwauri Yehova ndi Mudzimu wa lini na lini, we a sika shango hune ḽa guma, a sá neti, a sá ṋoki, wa ṱhalukanyo i sá swikelwi.”—Yesaya 40:28.

Ee, mishumo ya Yehova i ṋea vhuṱanzi ha vhuṱali hawe vhu sa vhambedzwi na tshithu, maanḓa awe mahulwane, na lufuno lwawe luhulwane kha riṋe. Musi ri tshi vhona zwithu zwo nakaho u mona na riṋe na u ṱalukanya pfaneleo dza We a zwi sika, ri nga sudzuluselea u amba maipfi a Davida ane a ri: “Haho’ a ngaho Iwe . . . ; a huna a edzaho mishumo yau.”—Psalme ya 86:8.

Ri nga vha na vhungoho ha uri vhathu vha thetshelesaho vha ḓo bvela phanḓa vha tshi takadzwa nga mishumo ya Yehova ya tsiko. U ya nga hu sa fheli, ri ḓo dzula ri na tshibuli tsha u guda zwo engedzeaho nga ha Yehova. (Muhuweleli 3:11) Nahone musi ri tshi guda zwo engedzeaho nga hae, ri sudzulusea u funa Musiki washu.

[Ṱhaluso dzi re magumoni a siaṱari]

[Bogisi kha siaṱari 9]

Rendani Musiki

Vhorasaintsi vhanzhi vho ṱalifhaho vha a vhona ndeme ya Mudzimu musi zwi tshi ḓa kha tsiko. Zwenezwo zwi sumbedzwa nga tsumbo dzi si gathi dzi thevhelaho:

Muphurofesa wa Chemistry ane a pfi Henry Schaefer o ri: “Ndeme na dakalo ḽa davhi ḽa zwa saintsi ḽanga ḽi engedzwa nga ṅwambo wa u wana zwiṅwe zwithu zwiswa nahone nda ḓivhudza uri, ‘Ndi nḓila ye Mudzimu a zwi sika ngayo.’ Tshipikwa tshanga ndi u pfesesa tshipiḓa tshiṱuku tsha ndivho dza Mudzimu.”

Edward Milne, muḓivhi wa mupo wa Britain o ri: “Malugana na u ṱanḓavhuwa ha fhethu hoṱhe, muvhali u fanela u ḓiitela phetho ene muṋe, fhedzi nḓila ine riṋe ra pfesesa ngayo a yo ngo fhelela malugana Nae.”

Alexander Polyakov, muḓivhi wa mbalo wa Russia o ri: “Ri a zwi ḓivha uri mupo u ṱaluswa sa wone wavhuḓisa kha mbalo ngauri wo sikiwa nga Mudzimu.”

Louis Agassiz, ane a guda nga ha vhutshilo o ri: “Kha ngudo dzashu dza zwithu zwi tshilaho ri khou shumisa mihumbulo ya Musiki, u mu ḓivha khwine malugana na mihumbulo yawe, ri tshi khou shumisa maitele Awe nahone hu si ashu.”

[Tshifanyiso kha siaṱari 8, 9]

Gentoo penguins, Antarctic Peninsula

[Tshifanyiso kha siaṱari 9]

Grand Teton National Park, Wyoming, U.S.A.

[Ṱhaluso ya Vhubvo ha Tshifanyiso]

Jack Hoehn/Index Stock Photography