Ḓuvha ḽa u Rwelwa Ṱari—Ḓuvha Ḽavhuḓi

“RO FHAṰUTSHEDZWA nga ḓuvha ḽavhuḓi. Ḓuvha ḽo ṱavha. A huna makole. Mahatsi ndi madala. Zwiṋoni zwi khou imba. Ri na mutsho wavhuḓi vhukuma, nahone a huna tshine tsha nga ri kula nungo. Yehova a si Mudzimu wa u kula nungo. Ndi Mudzimu wa phaṱutshedzo.”

Nga eneo maipfi, Wahashu Samuel Herd, muraḓo wa Tshigwada tshi Langaho wa Ṱhanzi dza Yehova, o vula mbekanyamushumo ya u rwelwa ṱari ya kilasi ya vhu-117 ya Tshikolo tsha Bivhili tsha Watchtower tsha Gilead. Zwenezwo zwo itea nga ḽa 11 September, 2004. Yeneyo mbekanyamushumo yavhuḓi yo katela nyeletshedzo i fhaṱaho i bvaho Bivhilini kathihi na tshenzhelo dze vhagudiswa vha vha nadzo musi vhe tshikoloni na dza vharumiwa vha re na miṅwaha minzhi tshumeloni ya vhurumiwa. Vhukuma, ḽo vha ḽi ḓuvha ḽavhuḓi kha vhathu vha 6974 vhe vha vha vhe hone Tshisimani Tsha u Gudisa tsha Watchtower ngei Patterson, New York, na kha zwiṅwe zwifhaṱo zwa ngei Brooklyn na Wallkill, vhe vha vha vho ṱalela kha thelevishini.

Maipfi a u Ṱuṱuwedza Vhagudiswa

John Kikot, ane a vha muraḓo wa Komiti ya Davhi ḽa United States, o ṋekedza maipfi a khuthadzaho nga tshiṱoho tshine tsha ri, “Dzulani ni na dakalo sa Murumiwa.” O amba uri vhagudiswa vha Gilead vha ḓivhelwa dakalo ḽavho, samusi zwo vhonala kha honovhu vhuṱambo. Ndayo i bvaho Maṅwaloni ye vha i wana musi tshikolo tshi tshi khou ḓi bvela phanḓa yo takadza vhagudiswa, nahone zwino vho vha vho lugela u thusa vhaṅwe uri vha tshenzhele dakalo ḽi fanaho. Nga nḓila-ḓe? Nga u ḓiṋekedzela vhuḓinḓani havho sa vharumiwa. Yesu o ri: “Mashudu a muṋei a fhira a muṋeiwa.” (Mishumo 20:35) Musi vharumiwa vhaswa vha tshi edzisa Yehova Mudzimu, “Mudzimu o takalaho” wa mafunda, ane a ḓivhadza vhaṅwe mafhungo-ngoho, vha ḓo kona u dzula vho takala.—1 Timotheo 1:11, NW.

We a tevhela kha yeneyo mbekanyamushumo ho vha hu muṅwe muraḓo wa Tshigwada tshi Langaho, David Splane, we tshiṱoho tshawe tsha vha tshi tshi ri: “Ni Ḓo Tshilisana Hani na Vhaṅwe?” A zwi timatimisi uri zwo naka nahone ndi zwavhuḓi u dzula nga vhuthihi, naho zwenezwi zwi tshi nga ṱoḓa ‘u vha zwithu zwoṱhe kha vhoṱhe.’ (1 Vha-Korinta 9:22, vhambedzani NW; Psalme ya 133:1) Wahashu Splane o amba uri vhenevha vhagudiswa vhane vha khou rwelwa ṱari vha ḓo shumisana na vhathu vhanzhi mushumoni wavho wa vhurumiwa—vhathu tsimuni, vharumiwa ngavho, vhahashu vha tshinnani na vha tshisadzini kha zwivhidzo zwavho zwiswa, na vhane vha vha kha ofisi ya davhi ine ya livhisa kha mushumo wa u huwelela na u funza. O ṋekedza nyeletshedzo dzi shumaho malugana na u ita uri vhukonani vhu vhe vhu takadzaho nga hune zwa nga konadzea ngaho: Gudani luambo lwa henefho, fhaṱutshelani nahone ni ḓiimisele u tendelana na mikhuvha ya henefho, ṱhonifhani vharumiwa nga vhoiwe, nahone ni pfe vharangaphanḓa vhaṋu.—Vha-Heberu 13:17.

Mugudisi wa Gilead Lawrence  Bowen o tevhela na tshiṱoho tshi re na mbudziso ine ya ri: “Mahumbulele Aṋu O Sendamela Ngafhi?” O humbudza vhagudiswa uri vhane vha ‘haṱula nga mbonalo ya nga nnḓa’ a vho ngo ṱanganedza Yesu sa Messia. (Yohane 7:24) Sa vhathu vha songo fhelelaho, vhoṱhe vha fanela u ḓilinda uri vha sa tevhele ‘mihumbulo ya vhathu’ nṱhani ha u tevhela “zwa Mudzimu.” (Mateo 16:22, 23) Hu ḓi nga na vhathu vho vhibvaho siani ḽa muya vha fanela u bvela phanḓa vha tshi lugisa mahumbulele avho. U fana na tshikepe lwanzheni, u ita tshanduko zwino zwi nga amba u swikelela zwipikwa kana u pwashetshelwa nga gungwa ḽa muya. U bvela phanḓa ri tshi guda Bivhili zwi ri thusa uri ri elelwe “zwa Mudzimu.”

Wallace Liverance, ane a vha mugudisi wa Tshikolo tsha Gilead, o phetha tshenetshi tshipiḓa tsha mbekanyamushumo. Tshiṱoho tshawe tsho thewaho kha Yesaya 55:1 tsho vha tshi tshi ri: “Ni ḓo Renga Mini?” O ṱuṱuwedza vhagudiswa uri vha ‘renge’ u homoloswa, dakalo, na thikhedzo i bvaho kha mulaedza wa vhuporofita ha Mudzimu misini yashu. Vhuporofita ha Yesaya ho vhambedza ḽeneḽi ipfi ḽa Mudzimu na maḓi, veine, na mukhaha. Ḽi nga rengwa hani hu ‘si na mali na tsha u renga ngatsho’? Wahashu Liverance o ṱalutshedza  uri zwi konadzea nga u livhisa ṱhogomelo kha vhuporofita ha Bivhili na u bvisa mihumbulo i si ya maṅwalo na u dzhenisa mihumbulo ya Mudzimu na nḓila dzawe. (Yesaya 55:2, 3, 6, 7) Nga u ita zwenezwi, vharumiwa vhaswa vha nga kona u vha vha bvelelaho kha mishumo yavho. Kanzhi vhathu vha songo fhelelaho vha humbula uri dakalo ḽi bveledzwa nga u lwela u vha na zwithu zwi vhonalaho. Tshiambi tsho ṱuṱuwedza tsha ri: “Ni songo tendelana na eneo mahumbulele. Itani vhungoho ha uri ni vhetshele thungo tshifhinga tsha u guda Ipfi ḽa Mudzimu ḽa vhuporofita. Ḽi nga ni homolosa, u ni khwaṱhisa, na u ni ḓisela dakalo kha mushumo wa vhoiwe wa vhurumiwa.”

Tshenzhelo na Nyambedzano dzi Takadzaho dza Vhagudiswa

Vhagudiswa vho ṱanganela misi yoṱhe kha mushumo wa u huwelela. Mark Noumair, muṅwe mugudisi wa Gilead, o haseledza na vhagudiswa vho vhalaho vhe vha anetshela tshenzhelo dza zwe zwa itea, dze dza ombedzela tshiṱoho tshine tsha ri ‘U sa Vha Na Ṱhoni dza u Amba Mafhungo Maḓifha.’ (Vha-Roma 1:16) Vhathetshelesi vho ḓiphina nga u thetshelesa nḓila ye vhenevha vhaḓinḓa vha re na tshenzhelo vha ṱanziela ngayo nnḓu nga nnḓu, zwiṱaraṱani, na mavhengeleni. Vhagudiswa vhane vha ḓivha dziṅwe nyambo vho dzhia vhukando ha u amba na vhathu vhane vha amba dzenedzo nyambo tsimuni ya zwivhidzoni zwe vha vha vho avhelwa khazwo. Vhaṅwe vho shumisa zwavhuḓi khandiso dzo thewaho Bivhilini dzo gandiswaho nga Ṱhanzi dza Yehova, vha dzi shumisa kha nyendo dza u vhuyelela na musi vha tshi thoma pfunzo dza Bivhili dza hayani. Vho vha vha si na ‘ṱhoni’ dza u huwelela mafhungo maḓifha.

Wahashu William Nonkes, ane a shuma kha Muhasho wa Tshumelo, o haseledza na vharumiwa vha re na tshenzhelo vha bvaho Burkina Faso, Latvia, na Russia. Vho ṋekedza nyeletshedzo dzi shumaho dzo thewaho kha tshiṱoho tshine tsha ri, “Yehova u Lambedza Vha Fulufhedzeaho nga Lufuno.” Muṅwe wahashu we ha ambiwa nae o ṱuṱuwedza vhagudiswa uri vha humbule nga ha mmbi ya maswole a 300 a Gideoni. Swole ḽiṅwe na ḽiṅwe ḽo vha ḽi na mushumo we wa thusa uri fulo ḽa Gideoni ḽi bvelele. (Vhahaṱuli 7:19-21) Nga hu fanaho, vharumiwa vhane vha dzula vhe kha mishumo yavho vha a lambedzwa.

“Ivhani Zwoṱhe kha Vhoṱhe” tshenetsho tsho vha tshi tshiṱoho tshe tsha ombedzelwa kha nyambedzano ye ya farwa nga Samuel Roberson, ane a vha mugudisi ngei Patterson. O haseledza na miraḓo miṋa ya Komiti ya Davhi i bvaho Senegal, Guam, Liberia, na ḽa Madagascar. Enea mashango oṱhe o ṱangana a na vharumiwa vha 170. Kha yeneyo khaseledzo vhagudiswa vhe vha vha vha tshi khou rwelwa ṱari vho pfa nḓila ine Komiti ya Davhi ya thusa ngayo vharumiwa vhaswa uri vha ḓowelane na mishumo yavho. Kanzhi zwenezwo zwo vha zwi tshi katela u guda mikhuvha ye ya vha i tshi nga vhonala i songo ḓowelea kha mashango a Vhukovhela. Sa tsumbo, kha maṅwe mashango zwo ḓowelea vhukuma u vhona vhanna, u katela na Vhakriste tshivhidzoni, vha tshi khou tshimbila vhoṱhe vho farana nga zwanḓa sa dzikhonani. Kha zwiṅwe zwipiḓa zwa shango ḽi re nga fhasi ha davhi ḽa Guam, hu ḽiwa zwiḽiwa zwi songo ḓoweleaho. Fhedzi vhaṅwe vho kona u zwi ḓowela na vharumiwa vhaswa vha nga zwi ḓowela-vho.

Guy Pierce, muraḓo wa Tshigwada tshi Langaho, o amba nga tshiṱoho tshine tsha ri: “Dzulani Ni Tshi Fulufhedzea kha ‘Muvhuso wa Murena Washu.’ ” O humbudza vhathetshelesi a ri: “Yehova o vhumba zwithu e na ndivho. O vha e na ndivho nga zwivhumbwa zwawe. Ndivho yawe nga ha yeneyi khungulu a yo ngo shanduka. A huna tshine tsha ḓo i thivhela uri i sa ḓadzee. A huna na tshithu na tshithihi tshine tsha nga i shandula.” (Genesi 1:28) Wahashu Pierce o ṱuṱuwedza vhoṱhe uri vha ḓiṱukufhadze nga u fulufhedzea kha vhuvhusi ha Mudzimu hu sa londwi vhuleme he ha vha hone nga ṅwambo wa tshivhi tsha munna wa u thoma, Adamu. Wahashu Pierce o ṱuṱuwedza a ri: “Ri khou tshila tshifhingani tsha khaṱulo. Ro salelwa nga tshifhinga tshiṱuku uri ri thuse vha mbilu dzavhuḓi u ḓivha mafhungo-ngoho. Shumisani tshifhinga tshaṋu zwavhuḓi u itela uri ni kone u swikelela vhaṅwe nga mafhungo maḓifha a Muvhuso.” Vhane vha tikedza Muvhuso wa Mudzimu nga u fulufhedzea vha nga khwaṱhisedzwa uri u ḓo vha tikedza.—Psalme ya 18:25.

Kha tshipiḓa tsha u fhedza, mudzulatshidulo o vhala ndumeliso na maipfi a u tamela zwivhuya a bvaho kha maṅwe madavhi u mona na shango ḽoṱhe. Nga murahu ha zwenezwo a ṋea vhagudiswa vhane vha khou rwelwa ṱari dipuloma dzavho, muṅwe wa vhagudiswa a vhala luṅwalo lu bvaho kha kilasi, lu tshi khou sumbedza u livhuha na u dzhiela nṱha vhugudisi he vha vhu wana. Yo vha i phetho yo teaho ya ḓuvha ḽavhuḓi ḽine vhoṱhe vha vha vhe hone vha sa ḓo vhuya vha ḽi hangwa.

[Bogisi kha siaṱari 23]

MBALO YA KILASI

Mbalo ya mashango o imelwaho: 11

Mbalo ya mashango e vha rumelwa khao: 22

Mbalo ya vhagudiswa: 48

Mbalotshikati ya miṅwaha: 34,8

Mbalotshikati ya miṅwaha ngohoni: 18,3

Mbalotshikati ya miṅwaha vhuḓinḓani: 13,4

[Tshifanyiso kha siaṱari 24]

Kilasi ya Vhu-117 Ya Vhagudiswa vho Ṱhaphudzaho vha Tshikolo Tsha Bivhili Tsha Watchtower Tsha Gilead

Kha mutevhe u re fhasi, miduba yo vhaliwa u bva phanḓa u ya murahu, nahone madzina o tevhekanyiswa u bva kha tsha monde u ya kha tsha u ḽa mudubani muṅwe na muṅwe.

(1) Thompson, E.; Norvell, G.; Powell T.; Kozza, M.; McIntyre, T. (2) Reilly, A.; Clayton, C.; Allan, J.; Blanco, A.; Muñoz, L.; Rustad, N. (3) Guerrero, Z.; Garcia, K.; McKerlie, D.; Ishikawa, T.; Blanco, G. (4) McIntyre, S.; Cruz, E.; Guerrero, J.; Ritchie, O.; Avellaneda, L.; Garcia, R. (5) Powell, G.; Fiskå, H.; Muñoz, V.; Baumann, D.; Shaw, S.; Brown, K.; Brown, L. (6) Shaw, C.; Reilly, A.; Peloquin, C.; Münch, N.; McKerlie, D.; Ishikawa, K. (7) Münch, M.; Peloquin, J.; Kozza, T.; Avellaneda, M.; Allan, K.; Ritchie, E.; Norvell, T. (8) Cruz, J.; Baumann, H.; Clayton, Z.; Fiskå, E.; Thompson, M.; Rustad, J.