Naa Ni A Ṱanganedza Thuso Ya Yehova?
Naa Ni A Ṱanganedza Thuso Ya Yehova?
“Yehova ndi muthusi wanga, a thi nga ofhi.”—VHA-HEBERU 13:6, NW.
1, 2. Ndi ngani zwi zwa ndeme uri ri ṱanganedze thuso na vhulivhisi zwa Yehova vhutshiloni?
EDZANI u humbula ni tshi khou tshimbila dzithavhani. Naho zwo ralo, a ni noṱhe, hu na mulivhisi, nahone ndi ene mulivhisi wa khwine. U na tshenzhelo na nungo u ni fhira, fhedzi u tshimbila tsini na inwi a sa fheli mbilu. U a zwi vhona uri ni dzulela u wa. Nga ṅwambo wa u ṱoḓa ni tshi tsireledzea, u a ni fara nga tshanḓa uri a ni thuse zwihuluhulu fhethu hu re na khombo. Naa no vha ni tshi ḓo hana a tshi ni thusa? Na khathihi! Vhutshilo haṋu vhu khomboni.
2 Samusi ri Vhakriste, hu na nḓila i re na vhuleme ine ra fanela u tshimbila khayo. Naa ri fanela u tshimbila kha yeneyo nḓila tsekene ri roṱhe. (Mateo 7:14) Hai, Bivhili i sumbedza uri Mulivhisi wa khwine, Yehova Mudzimu, u a tendela vhathu vha tshi tshimbila nae. (Genesi 5:24; 6:9) Naa Yehova u a thusa vhashumeli vhawe musi vha tshi khou tshimbila? U ri: “Nṋe Yehova ndi Mudzimu wau, ndi khwaṱhisa tshanḓa tshau, ndi U vhudza ndi ri: U songo ofha; a U [thusaho, NW] ndi Nṋe.” (Yesaya 41:13) U fana na mulivhisi we ra amba ngae kha tshifanyiso tshashu, Yehova u thusa na u vha khonani ya vhane vha ṱoḓa u tshimbila nae. Vhukuma a huna na muthihi washu ane a nga hana thuso yawe!
3. Ndi mbudziso dzifhio dzine ra ḓo dzi ṱolisisa kha yeneyi khaseledzo?
3 Kha thero yo fhiraho, ro haseledza nḓila nṋa dze Yehova a thusa ngadzo vhathu vhawe vha zwifhingani zwa kale. Naa u kha ḓi thusa vhathu vhawe nga nḓila dzi fanaho na ṋamusi? Nahone ri nga vha hani na vhungoho ha uri ri ṱanganedza thuso iṅwe na iṅwe? Kha ri ṱolisise dzenedzo mbudziso. Nga u ita nga u ralo, ri nga vha na fulufhelo ḽo khwaṱhaho ḽa uri Yehova ndi Muthusi washu wa vhukuma.—Vha-Heberu 13:6.
U Thuswa nga Vharuṅwa
4. Ndi ngani vhashumeli vha Mudzimu ṋamusi vha tshi nga vha na vhungoho ha uri vha khou tikedzwa nga vharuṅwa?
4 Naa vharuṅwa vha a thusa vhashumeli vha Yehova vha musalauno? Ee, vha a thusa. Vhukuma, ṋamusi a vha bveleli nga nḓila i vhonalaho u itela u phulusa vharabeli vha ngoho khomboni. Na zwifhingani zwa Bivhili, vharuṅwa vho vha vha sa dzheneleli nga yeneyo nḓila. Vho vha vha tshi ita zwithu zwinzhi vha sa vhonwi nga vhathu, u fana na ṋamusi. Naho zwo ralo, vhashumeli vha Mudzimu vho vha vha tshi ṱuṱuwedzea vhukuma musi vha tshi ṱhogomela uri hu na vharuṅwa vhane vha ḓo vha tikedza. (2 Dzikhosi 6:14-17) Ri na tshiitisi tshavhuḓi tsha u ḓipfa nga nḓila i fanaho.
5. Bivhili i zwi sumbedza hani uri vharuṅwa vha a ṱanganela kha mushumo wa u huwelela ṋamusi?
5 Vharuṅwa vha Yehova vha na dzangalelo kha mushumo une ra khou ita. Ndi mushumo ufhio? Ri nga wana phindulo kha Ndzumbululo 14:6: “Nda vhona Muruṅwa a tshi fhufha a buḓekanya ḽiṱaḓulu e na mafhungo-maḓifha a ndalamo ya lini na lini a u yo kwengweledza vho dzulaho shangoni, kha tshakha na khoro na ndimi na mbeu dzoṱhe.” Enea mafhungo-maḓifha a ndalamo ya lini na lini a tshimbidzana zwavhuḓi na “mafhungo-maḓifha aya a muvhuso,” he Yesu a dzula o amba hu tshee nga phanḓa uri “a ḓo ḓivhadzwa mashangoni oṱhe, uri a vhe thovhedzo kha dzitshakha dzoṱhe,” musi hu sa athu ḓa vhufhelo ha ano maitele a zwithu. (Mateo 24:14) Vhukuma, vharuṅwa a vha khou huwelela nga nḓila yo livhaho. Yesu o ṋea vhathu wonoyo mushumo wa ndeme. (Mateo 28:19, 20) Naa a zwi ṱuṱuwedzi u ḓivha uri musi ri tshi khou ḓadzisa wonoyo mushumo, ri a thuswa nga vharuṅwa vhakhethwa, zwivhumbiwa zwa muya zwo ṱalifhaho na zwi re na maanḓa?
6, 7. (a) Ndi mini zwine zwa sumbedza uri vharuṅwa vha khou tikedza mushumo washu wa u huwelela? (b) Ri nga ita mini u itela uri ri thuswe nga vharuṅwa vha Yehova?
6 Hu na vhuṱanzi vhu pfalaho ha uri vharuṅwa vha a tikedza mushumo washu. Sa tsumbo, ri anzela u pfa uri musi vhe vhuḓinḓani havho, Ṱhanzi dza Yehova dzi ṱangana na muthu we a vha a tshi kha ḓi bva u rabela Mudzimu uri a mu thuse uri a wane mafhungo-ngoho. Zwenezwo zwithu zwi itea lunzhi-lunzhi lune a zwo ngo fanela u dzhiiwa sa zwine zwa sokou itea nga khombo. Nga ṅwambo wa thuso ya vharuṅwa, vhathu vhanzhi vha khou guda u ita zwine ‘muruṅwa ane a khou buḓekanya ḽiṱaḓulu’ a khou zwi ḓivhadza a tshi ri: “Ofhani Mudzimu ni rende ene.”—Ndzumbululo 14:7.
7 Naa ni a ṱulutshelwa u thuswa nga vharuṅwa vha Yehova vha re na maanḓa? Nga zwenezwo, itani zwi re maanḓani aṋu vhuḓinḓani haṋu. (1 Vha-Korinta 15:58) Musi ri tshi ṱanganela nga u ḓifunela kha wonoyu mushumo wa Yehova, ri nga vha na vhungoho ha uri ri ḓo thuswa nga vharuṅwa vhawe.
U Thuswa nga Murangaphanḓa wa Vharuṅwa
8. Yesu u na vhuimo vhufhio ngei ṱaḓulu, nahone ndi ngani zwi tshi ri khwaṱhisa?
8 Yehova u dovha a ri thusa nga vharuṅwa nga iṅwe nḓila. Ndzumbululo 10:1 i amba nga “muruṅwa wa maanḓa” we “tshifhaṱuwo tshawe tsho vha tshi tshi nga ḓuvha.” Onoyo muruṅwa we a vhonwa kha bono zwi tou vha khagala uri u fanyisela Yesu Kristo o ṋewaho vhugala e maanḓani a ṱaḓulu. (Ndzumbululo 1:13, 16) Naa zwa vhukuma Yesu ndi muruṅwa? Ee, nga muhumbulo wa uri ndi muruṅwa muhulu. (1 Vha-Thesalonika 4:16) Yesu u na maanḓa mahulu kha vharwa vhoṱhe vha muya vha Yehova. Yehova o mu vhea uri a vhe murangaphanḓa kha mmbi Yawe yoṱhe ya vharuṅwa. Onoyo muruṅwa ndi tshisima tsha thuso i re na maanḓa vhukuma. Nga nḓila-ḓe?
9, 10. (a) Yesu u shuma hani sa “muthusi” washu musi ri tshi tshinya? (b) Ndi thuso ifhio ine ra nga i wana kha tsumbo ya Yesu?
9 Muapostola Yohane wa mulala o ṅwala a ri: “Hone muthu a tshi tshinya, ri na [muthusi, NW] ha Khotsi, Yesu Kristo o lugaho.” (1 Yohane 2:1) Ndi ngani Yohane o amba uri Yesu ndi “muthusi” washu zwihuluhulu musi ri “tshi tshinya”? Zwi re zwone ndi uri ri tshinya ḓuvha ḽiṅwe na ḽiṅwe, nahone tshivhi tshi isa lufuni. (Muhuweleli 7:20; Vha-Roma 6:23) Naho zwo ralo, Yesu o kumedza vhutshilo hawe sa tshiṱhavhelo a tshi itela zwivhi zwashu. Nahone u tsini na Khotsi ashu a re na khathutshelo u itela uri humbelela pfarelo. Muṅwe na muṅwe washu u ṱoḓa yeneyo thuso. Ri nga i wana hani? Ri fanela u rembuluwa kha zwivhi zwashu nahone ri humbele u hangwelwa nga mutheo wa tshiṱhavhelo tsha Yesu. Ri fanela u dovha ra iledza u dovholola zwivhi zwashu.
10 Nga nnḓa ha uri fela, Yesu o ri vhetshela tsumbo yo fhelelaho. (1 Petro 2:21) Tsumbo yawe i a ri livhisa, i a ri thusa u dzudzanya vhutshilo hashu u itela uri ri iledze u ita tshivhi tshihulwane nahone ri takadze Yehova Mudzimu. Naa a ri takaleli yeneyo thuso? Yesu o dovha a fulufhedzisa uri ri ḓo dovha ra ṋewa muṅwe muthusi.
U Thuswa nga Muyamukhethwa
11, 12. Muya wa Yehova ndi mini, u na maanḓa mangafhani, nahone ndi ngani ri tshi u ṱoḓa ṋamusi?
11 Yesu o fulufhedzisa uri: “Ndi ḓo humbela Khotsi uri a ni fhe [muthusi, NW] muṅwe, wa u dzula na inwi lini na lini. Ndi Muya wa mafhungo-ngoho ané shango ḽa kundwa u mu ṱanganedza.” (Yohane 14:16, 17) Wonoyu “Muya wa mafhungo-ngoho,” kana muyamukhethwa, a si muthu, fhedzi ndi maanḓa—ane a vha maanḓa a Yehova a shumaho. U na maanḓa mahulwane vhukuma. Ndi maanḓa e Yehova a a shumisa musi a tshi sika fhethu hoṱhe, kha u ita vhuṱolo vhu mangadzaho, na u ṋea ndzumbululo nga mabono. Samusi Yehova a si khou shumisa muya wawe nga dzenedzo nḓila dzo livhaho ṋamusi, naa zwenezwo zwi amba uri a ri u ṱoḓi?
12 Na khathihi! Kha zwenezwi “zwifhinga zwi lemelaho,” ri ṱoḓa muya wa Yehova u fhira naho hu lini. (2 Timotheo 3:1) U ri khwaṱhisa uri ri konḓelele musi ri milingoni. U ri thusa u ṱahulela pfaneleo dzavhuḓi dzine dza ri sendedza tsini-tsini na Yehova na vhahashu vha tshinnani na vha tshisadzini vha muya. (Vha-Galata 5:22, 23) Nga zwenezwo, ri nga vhuyelwa hani nga yeneyi thuso yavhuḓi i bvaho ha Yehova?
13, 14. (a) Ndi ngani ri tshi nga vha na vhungoho ha uri Yehova o ḓiimisela u ṋea vhathu vhawe muyamukhethwa? (b) Ndi nga zwiito zwifhio zwine ra nga sumbedza uri a ri ṱanganedzi zwa vhukuma tshifhiwa tsha muyamukhethwa?
13 Tsha u thoma, ri fanela u rabela uri ri wane muyamukhethwa. Yesu o ri: “Huufha inwi ni re vhavhi, ni tshi ḓivha u ṋea vhana vhaṋu zwifhiwa zwavhuḓi! Khotsi wa ṱaḓulu u ni fhira kule-kule. Vha mu humbelaho u ḓo vha fha Muya-mukhethwa.” (Luka 11:13) Ee, Yehova ndi Khotsi wavhuḓi vhukuma. Arali ra mu humbela muyamukhethwa zwi tshi bva mbiluni ri na lutendo, a nga si ḓo ri dzima tshenetsho tshifhiwa. Nga zwenezwo, mbudziso ndi ya uri, Naa ri a u humbela? Ri na tshiitisi tshavhuḓi tsha u humbela kha thabelo dzashu dza ḓuvha ḽiṅwe na ḽiṅwe.
14 Tsha vhuvhili, ri wana tshenetsho tshifhiwa nga u shuma u tendelana nawo. Sa tsumbo: Kha ri ri Mukriste u khou lwisana na nḓowelo ya u vhona zwifanyiso zwa u ṱangana nga dzimbeu. O rabela uri a wane muyamukhethwa uri u mu thuse u lwisana na ḽeneḽi dzema ḽi songo kunaho. O ṱoḓa nyeletshedzo kha vhahulwane vha Vhakriste, nahone vho mu eletshedza uri a dzhie vhukando ho khwaṱhaho, ha u iledza u sendela tsini na zwenezwo zwithu zwi tshinyaho. (Mateo 5:29) Hu pfi mini arali a nyadza nyeletshedzo dzavho nahone a bvela phanḓa a tshi vhona zwenezwo zwithu zwine zwa mu linga? Naa u khou tshila u tendelana na u rabelela hawe muyamukhethwa uri u mu thuse? Kana naa u khou vha khomboni ya u ṱungufhadza muya wa Mudzimu na u kundelwa u ṱanganedza tshenetshi tshifhiwa? (Vha-Efesa 4:30) Vhukuma, roṱhe ri fanela u ita zwoṱhe zwine ra nga kona u itela u vha na vhungoho ha uri ri bvela phanḓa ri tshi wana yeneyi thuso yavhuḓi i bvaho ha Yehova.
U Thuswa nga Ipfi ḽa Mudzimu
15. Ri nga zwi sumbedza hani uri a ri dzhieli fhasi Bivhili?
15 Bivhili yo sumbedza u vha tshisima tsha thuso kha vhashumeli vha Yehova vha fulufhedzeaho u bva maḓanani manzhi a miṅwaha. Nṱhani ha u dzhiela fhasi Maṅwalo Makhethwa, ri fanela u dzula ri tshi humbula nḓila ine Bivhili ya vha tshisima tsha maanḓa ngayo. Zwi ṱoḓa vhuḓidini u itela u ṱanganedza yeneyo thuso. Ri fanela u ita uri u vhala Bivhili zwi vhe tshipiḓa tsha maitele ashu a ḓuvha ḽiṅwe na ḽiṅwe.
16, 17. (a) Psalme ya 1:2, 3 i ṱalusa hani malamba a u vhala mulayo wa Mudzimu? (b) Psalme ya 1:3 i sumbedza hani uri ri fanela u shuma vhukuma?
16 Psalme ya 1:2, 3 i amba nga munna ane a takadza Mudzimu: “Ané tshawe ha vha u takalela mulayo wa Yehova, mulayo uyo a u elelwa masiari na vhusiku. U ḓo nga muri wo simiwaho milongani ya maḓi, u aṋwaho mitshelo nga tshifhinga tsha hone, u sa omiho maṱari. Zwiné a ita zwoṱhe zwi a vulea.” Naa ni a pfesesa muhumbulo muhulwane wa yeneyo ndimana? Zwi a leluwa u vhala eneo maipfi nahone wa phetha nga uri a khou sokou ṱalusa fhethu havhuḓi ha mulalo—hu re na miri ya murunzi tsini na mulambo. Zwi nga vha zwavhuḓi lungafhani u tou eḓelanyana nga masiari fhethu ho tou raloho! Fhedzi heyi psalme a i khou ri kunga uri ri humbule nga ha u awela. Nṱhani hazwo, yeneyi psalme i khou amba nga ha u shuma nga mafulufulu. Nga nḓila-ḓe?
17 Ṱhogomelani uri muri we wa ambiwa hafha a u sokou vha muri wa murunzi we wa sokou mela tsini na mulambo. Ndi muri u aṋwaho mitshelo, “wo simiwaho” hu na ndivho fhethu ho khethiwaho—“milongani ya maḓi.” Muri muthihi u nga aluwa hani tsini na milonga? Zwi re zwone ndi uri tsimuni ya mitshelo, muṋe wa tsimu khamusi a nga bwa mugero une wa isa maḓi kha midzi ya miri yawe ya ndeme. Khezwo, ndi hone zwino mbuno i khagala! Arali nga lwa muya ri tshi hula u fana na muri, ndi nga ṅwambo wa uri muṅwe muthu o ita mushumo wa biko u itela uri thusa. Ri ṱanganela na ndangulo ine ya ri ṋea maḓi o kunaho a mafhungo-ngoho, fhedzi ri fanela u ita vhuḓidini. Ri fanela u ita vhuḓidini ha u nwa eneo maḓi a ndeme, u elekanya na u ita ṱhoḓisiso u itela u dzhenisa eneo mafhungo-ngoho a Ipfi ḽa Mudzimu mihumbuloni yashu na mbiluni. Nga yeneyo nḓila, na riṋe ri ḓo aṋwa mitshelo yavhuḓi.
18. Ndi mini zwine zwa ṱoḓea u itela u wana phindulo dzi bvaho Bivhilini dza mbudziso dzashu?
18 Bivhili i nga si ri thuse arali ri sa i vhali. Ri nga si lavhelele uri Bivhili i vulee yone iṋe nahone nga zwenezwo ri lavhelele phindulo ya mbudziso yashu kha ḽeneḽo siaṱari. Musi ro sedzana na u ita phetho, ri fanela u ṱoḓa ‘nḓivho ya Mudzimu’ u fana na musi ri tshi bwa lupfumo lu re mavuni. (Mirero 2:1-5) U ita ṱhoḓisiso nga mafulufulu na nga vhuronwane kanzhi zwi a ṱoḓea u itela u wana nyeletshedzo ya Maṅwalo ine ya amba nga ṱhoḓea dzashu. Ri na khandiso nnzhi dzo thewaho Bivhilini dzine dza ḓo ri thusa u ita ṱhoḓisiso yashu. Musi ri tshi khou shumisa zwenezwo u itela u bwa nga mafulufulu uri ri wane vhuṱali ha ndeme vhu re Ipfini ḽa Mudzimu, ri vha ri tshi khou shumisa thuso ine Yehova a ri ṋea yone.
U Thuswa nga Vhatendi nga Riṋe
19. (a) Ndi ngani thero dzi re kha Tshiingamo na Awake! dzi tshi nga dzhiiwa sa thuso ine ya ṋekedzwa nga vhatendi nga riṋe? (b) No thuswa hani nga thero i re kha dziṅwe dza magazini dzashu?
19 Vhashumeli vha Yehova vha a thusana tshifhinga tshoṱhe. Naa Yehova o shanduka kha ḽeneḽi sia? Na khathihi. A zwi timatimisi uri muṅwe na muṅwe washu a nga humbula nga zwiitea zwe ra wana thuso yo teaho ye ra vha ri tshi khou i ṱoḓa nga tshifhinga tsho teaho kha vhatendi nga riṋe. Sa tsumbo, naa ni nga humbula iṅwe thero kha Tshiingamo kana Awake! ye ya ni khuthadza musi ni tshi i ṱoḓa kana u ni thusa u piringulula vhuleme kana u sedzana na vhuleme kha lutendo lwaṋu? Yehova o ni ṋea yeneyo thuso nga u shumisa “mukoma a fulufhedzeaho na wa vhuṱali” we a ṋewa mushumo wa u ri ṋea “zwiḽiwa nga tshikhathi tshazwo.”—Mateo 24:45-47.
20. Ndi nga nḓila dzifhio hune vhahulwane vha Vhakriste vha sumbedza u vha ‘zwifhiwa kha vhathu’?
20 Kanzhi thuso ine ra i wana kha vhatendi nga riṋe i vha yo livha vhukuma. Muhulwane wa Mukriste u ṋea nyambo ine ya ri ṱuṱuwedza, kana u ita nyendo dza vhulisa dzine dza ri thusa zwifhingani zwi konḓaho, kana nyeletshedzo ya vhulenda ine ya ri thusa u vhona na u kunda vhushayanungo hashu. Muṅwe Mukriste ane a livhuha o ṅwala malugana na thuso ye muhulwane a mu ṋea yone a ri: “Musi ndi tshumeloni ya tsimu u a nṱuṱuwedza u amba maḓipfele anga. Nga madekwana a nga phanḓa ha ḽeneḽo ḓuvha, ndo rabela Yehova, ndi tshi khou humbela muṅwe muthu ane nda nga amba nae. Nga ḽeneḽo ḓuvha ḽi tevhelaho, onoyo wahashu a amba na nṋe nga nḓila ya vhulenda. O nthusa u vhona nḓila ye Yehova a vha a tshi khou nthusa ngayo u bva kale. Ndi livhuha Yehova nge a nthumela onoyo muhulwane.” Nga dzenedzo nḓila dzoṱhe, vhahulwane vha Vhakriste vha sumbedza uri vha ‘zwifhiwa kha vhathu,’ zwine Yehova a zwi ṋea a tshi shumisa Yesu Kristo u itela u ri thusa u konḓelela nḓilani ya vhutshilo.—Vha-Efesa 4:8.
21, 22. (a) Hu vha na mvelelo dzifhio musi vha re tshivhidzoni vha tshi shumisa nyeletshedzo i wanalaho kha Vha-Filipi 2:4? (b) Ndi ngani nyito ṱhukhu dza vhulenda dzi dza ndeme?
21 Nga nnḓa ha vhahulwane, Mukriste muṅwe na muṅwe a fulufhedzeaho u ṱoḓa u shumisa ndaela yo hevhedzwaho ya ‘u sa lavhelesa zwawe fhedzi, fhedzi na u lavhelesa zwi re zwa vhaṅwe.’ (Vha-Filipi 2:4) Musi vhathu vha re tshivhidzoni tsha Vhukriste vha tshi shumisa yeneyo nyeletshedzo, hu vha na mishumo ya vhulenda. Sa tsumbo, muṅwe muṱa wo welwa nga khombo dzo fhambanaho zwi songo lavhelelwa. Khotsi o ṱuwa na ṅwananyana wawe vhengeleni. Musi a tshi khou vhuya hayani, vha wana khombo ya goloi. Onoyo ṅwananyana a fa; khotsi a huvhala lwo kalulaho. Musi a tshi bva vhuongeloni, o vha o no holefhala lwe a vha a si tsha ḓo kona u ḓiitela tshithu. Musadzi wawe o vha o tsikeledzea vhukuma maḓipfeleni nga u mu ṱhogomela e eṱhe. Ngauralo vhaṅwe vhavhingani tshivhidzoni vha dzhia vhenevha vhavhingani vho tsikeledzeaho nahone vha vha ṱhogomela vhege dzo vhalaho.
22 Vhukuma, a si mishumo yoṱhe ya vhulenda ine ya katela eneo makhaulambilu na u ḓikumedza. Iṅwe thuso ine ra i wana i vha i si khulwane nga u ralo. Hu sa londwi uri ndi vhulenda vhungafhani vhune ha sumbedzwa, ri a vhu livhuha. Naa ni nga humbula nga zwifhinga zwa musi maipfi a vhulenda kana nyito ya u humbulela nga wahashu wa tshinnani kana wa tshisadzini zwe zwa ni ṋea yeneyo thuso ine na i ṱoḓa? Yehova u anzela u ri ṱhogomela nga dzenedzo nḓila.—Mirero 17:17; 18:24.
23. Yehova u zwi dzhia hani musi ri tshi lingedza u thusana?
23 Naa ni a ṱoḓa Yehova a tshi ni shumisa sa nḓila ya u thusa vhaṅwe? Ni na tshibuli tsho khetheaho tsha u ita nga u ralo. Zwi re zwone ndi uri Yehova u a dzhiela nṱha honoho vhuḓidini vhune na vhu ita. Ipfi ḽawe ḽi ri: “Mu-tonda-vhaṱoma o adzima Yehova; u ḓo mu fha zwe a ṋea vhaḽa.” (Mirero 19:17) Dakalo ḽihulwane ri ḽi wana nga u thusa vhahashu vha tshinnani na vha tshisadzini. (Mishumo 20:35) Vhathu vhane vha ḓiita tshilendele nga khole a vha wani ḽeneḽo dakalo ḽa u ṋea yeneyo thuso kana ṱhuṱhuwedzo ya u ḽi wana. (Mirero 18:1) Nga zwenezwo, kha ri vhe vhane vha fulufhedzea nga u kuvhangana tshifhinga tshoṱhe miṱanganoni ya Vhukriste u itela u ṱuṱuwedzana.—Vha-Heberu 10:24, 25.
24. Ndi ngani ri songo fanela u ḓipfa ri si na thuso nga ṅwambo wa u sa vhona vhuṱolo ha Yehova vhu mangadzaho ha tshifhingani tsho fhiraho?
24 Naa a si zwavhuḓi u elekanya nga nḓila dzine Yehova a ri thusa ngadzo? Naho ri sa tsha tshila tshifhingani tshine Yehova a ita honoho vhuṱolo vhu mangadzaho ha u ḓadzisa ndivho dzawe, a ro ngo fanela u ḓipfa ri si na thuso. Zwa ndeme vhukuma ndi uri Yehova u ri ṋea thuso yoṱhe ine ra i ṱoḓa u itela uri ri dzule ri tshi fulufhedzea. Nahone arali ra konḓelela roṱhe nga lutendo, ri ḓo vhona mishumo i mangadzaho na ya vhugala ya Yehova kha ḓivhazwakale yoṱhe! Nga zwenezwo kha ri ḓiimisele u ṱanganedza na u shumisa nga vhuḓalo thuso ya Yehova ya lufuno u itela uri na riṋe ri dovholole maipfi a ndimana yashu ya ṅwaha wa 2005 ane a ri: “Thuso yanga i bva ha Yehova.”—Psalme ya 121:2, NW.
Ni Humbula Mini?
Yehova u ṋea hani thuso ine ra i ṱoḓa ṋamusi—
• nga u shumisa vharuṅwa?
• nga u shumisa muyamukhethwa?
• nga u shumisa Ipfi ḽawe ḽo hevhedzwaho?
• nga u shumisa vhatendi nga riṋe?
[Mbudziso Dza Pfunzo]
[Tshifanyiso kha siaṱari 18]
Zwi a ṱuṱuwedza u ḓivha uri vharuṅwa vha khou tikedza mushumo wa u huwelela
[Tshifanyiso kha siaṱari 21]
Yehova a nga shumisa muṅwe wa vhatendi nga riṋe uri a ri ṋee khuthadzo ine ra i ṱoḓa