Ni a zwi Humbula?

Naa no takalela u vhala thero dza zwenezwino dza Tshiingamo? Arali zwo ralo, vhonani arali ni tshi nga fhindula mbudziso dzi tevhelaho:

• Mukriste a nga ita mini arali a tshi ḓipfa o neta kha maḓipfele na muyani?

Ri fanela u ḓivha zwavhuḓi tshiitisi tsha u neta hashu. Zwi nga kha ḓi thusa u ṱolisisa mikhuvha yashu na thundu dzashu, ra laṱa mihwalo i si ya ndeme. Ri nga ḓivhetshela zwipikwa zwi swikeleleaho u ya nga vhuimo hashu. U ṱhogomela mutakalo washu ndi zwa ndeme nahone ri fanela u rabela misi yoṱhe nahone ri elekanye nga zwine ra zwi vhala.—8/15, masiaṱari 23-6.

• Ndi ngani Ṱhanzi dza Yehova dzi tshi dzhia tshivhalo tsha 144 000 tshi tsha vhukuma?

Musi muapostola Yohane o no vhudzwa nga ha tshivhalo tsha 144 000, o vhona “gogo ḽihulu, ḽi sa koni u vhalwa nga muthu.” (Ndzumbululo 7:4, 9, maḽeḓeretsendama ndi ashu.) Arali mbalo ya 144 000 yo vha i ya pfanyisedzo, mvelelo ya phambano vhukati ha dzenedzo ndimana mbili yo vha i sa ḓo vha hone. Yesu o amba nga ha vhane vha ḓo vhusa nae a vha vhidza “sambi ḽiṱuku.” (Luka 12:32, maḽeḓeretsendama ndi ashu; 22:29)—9/1, siaṱari 30.

• Ndi ngani Muisiraele o vha a tshi nga rengisela wa nnḓa tshipuka tsho faho tshi songo bviswa malofha?

Wa nnḓa kana mutsinda a songo rembuluwaho o vha e siho nga fhasi ha Mulayo. Nga zwenezwo Muisiraele o vha o tendelwa u mu ṋea kana u mu rengisela zwipuka zwo raloho. (Doiteronomio 14:21) Fhedzi o rembuluwaho o vha a tshi tea u tevhedza Mulayo nahone o vha o thivhelwa u ḽa ṋama ya tshipuka tshi songo bviswaho malofha. (Levitiko 17:10)—9/15, siaṱari 26.

• Biomimetics ndi mini, nahone ndi ngani Vhakriste vha tshi nga vha na dzangalelo kha zwenezwi zwithu?

Ndi sia ḽa zwa saintsi ḽine ḽa edzisela nḓila ye zwithu zwa mupo zwa vhumbwa ngayo. Sa tsumbo, murathu na mukomana vha ha Wright vho ita bufho nga murahu ha u guda nga ha zwiṋoni zwihulwane. Nga zwenezwo, biomimetics i nga sudzulusa Mukriste uri a ṋee Musiki vhugala.—10/1, siaṱari 9.

• Ndi nnyi we a bulwa kha 2 Vha-Korinta 12:2-4 uri o takulwa a iswa paradisoni?

Eneo mafhungo a tevhela nga murahu ha ndimana dze Paulo a imelela vhuapostola hawe. Samusi Bivhili i sa ambi nga ha muṅwe muthu we a tshenzhela zwenezwo nahone samusi hu Paulo ane a ri vhudza nga hazwo, zwi vhonala uri Paulo o vhona ḽeneḽi bono.—10/15, siaṱari 8.

• Ndi dzifhio dziṅwe pfaneleo dza Yesu dzine dza ita uri a fanelee u vha Murangaphanḓa o khethwaho nga Mudzimu?

Yesu o dzula a tshi fulufhedzea nga ho fhelelaho, nahone matshilele awe o vha a tshi sumbedza u fulufhedzea na u luga. O vha o ḓikumedza tshoṱhe kha Mudzimu. Yesu o vha a tshi vhilaelela vhathu zwa vhukuma nahone o vha o ḓiimisela u shuma.—11/1, masiaṱari 6-7.

• Madimoni a ḓo vha e ngafhi tshifhingani tsha Miṅwaha ya Tshigidi?

Ri nga phetha nga yo teaho uri vha ḓo poselwa mugodini kathihi na Sathane tshifhingani tsha Miṅwaha ya Tshigidi ya Vhuvhusi ha Kristo. (Ndzumbululo 20:1-3) Genesi 3:15 yo amba hu tshee nga phanḓa nga ha u pwashiwa ha ṱhoho ya ṋowa, zwine zwa katela u poselwa hawe mugodini Miṅwaha ya Tshigidi. Mbeu yawe i katela vharuṅwa vhavhi, kana madimoni. Mbuno ya uri vho sumbedza u ofha dindi i sumbedza uri vha a ḓivha nga ha honohu u poselwa mugodini hu sa iledzei hune ha khou ḓa. (Luka 8:31)—11/15, masiaṱari 30-1.

• Ndi ngani muthu a tshi fanela u ṱhogomela malugana na u nwa halwa, naho a sa nwi u swika hune vhathu vha zwi ṱhogomela uri o kambiwa?

Vhaṅwe vhathu a vha vhonali uri vho kambiwa naho vhonwa halwa vhunzhi vhukuma. Naho zwo ralo, muthu a nga fheleledza a tshi vho ḓitika nga halwa nahone a ‘vho vhoxwa nga u nwesa.’ (Tito 2:3) Yesu o sevha nga ha u “lemedzwa nga vhupangwa na nga u nwesa.” (Luka 21:34, 35) Halwa a vhu lindeli uri muthu a vhuye a kambiwe u itela uri vhu ite uri muthu a kumedze—ṋamani na muyani.—12/1, masiaṱari 19-21.