Vhonani Dzina Ḽi Re Govhani

ST. MORITZ. Naa no no vhuya na pfa nga ha ḽeneḽo dzina? Khamusi ndi nga ṅwambo wa uri ndi dzina ḽa fhethu ha vhuawelo hu ḓivheaho vhukuma Govhani ḽa Engadine ngei Switzerland. Fhedzi St. Moritz a hu sokou vha fhethu he ha kunga vhathu lwa miṅwaha minzhi nga zwifhaṱo zwi mangadzaho zwine zwa vha tsini na govha vhukati ha thavha dza Alps tshipembe-vhubvaḓuvha ha Switzerland tsini na mukano wa Italia. Hu dovha ha vha na Swiss National Park yo nakaho vhukuma i re na zwimela na zwipuka zwo fhamba-fhambanaho zwine zwa rendisa Yehova Musiki washu Muhulwane. (Ps. 148:7-10) Hu dovha ha vha na zwithu zwo salaho zwa sialala zwa kale zwe zwa vha zwi tshi wanala vhukati ha ḓana ḽa vhu-17 ḽa miṅwaha.

Hu na zwithu zwi songo ḓoweleaho kha nnḓu nnzhi govhani ḽeneḽi zwine zwa nga ni takadza. Zwo ḓowelea henefho fhethu u wana fhethu hu ngaho sa kha muhangammbwa ho ṅwalwa dzina  ḽa Mudzimu. Maḓanani a miṅwaha o fhiraho zwo vha zwi maitele o ḓoweleaho uri vhathu vha khavhise nnḓu nga u i ṅwalekanya, khamusi nga u tou ola, kana u tala-tala kha mbondo, kana kha tombo. Kha tshifanyiso tshi re afho fhasi ni nga kona u vhona nḓila ye nnḓu i re govhani ḽa Bever ya vha i tshi ṅwalwa ngayo. Ṱhalutshedzelo ya zwe zwa ṅwalwa ndi uri: “Nnḓu yeneyi yo fhaṱwa nga 1715. Yehova ndi mathomo, nahone ndi ene magumo. Mudzimu u kona zwithu zwoṱhe nahone a hu na zwine zwa nga itea arali e siho.” Vhukuma, tshiga tshiṅwe na tshiṅwe kha zwenezwo zwivhili, tshi na dzina ḽa Mudzimu.

Ni nga kona u vhona na muṅwalo u re kha muḓi wa kale wa Madulain. Muṅwalo wonoyo uri: “Psalme ya 127. Nnḓu arali yá sa fhaṱiwa nga Yehova, u ḓi-netisa ha vhafhaṱi ndi u sokou ita. Lucius Rumedius. Nga ṅwaha wa 1654.”

Ndi ngani dzina ḽa Mudzimu ḽo tou ṱanwa nga nḓila yeneyi henefho govhani? Kale tshifhingani tsha Tshanduko, Bivhili yo vha yo gandiswa nga Luromansh, luambo lwe lwa vho lwo thewa kha Lulatini lune lwa ambiwa ngei Engadine. Vhukuma, ndi yone bugu ya u thoma ye ya ṱalutshedzelwa nga luambo lwonolwo. Musi vha tshi ṱuṱuwedzwa nga zwe vha zwi vhala kha Ipfi ḽa Mudzimu, vhathu vhanzhi vha henefho vho ṅwala kha mbondo dzavho madzina avho, na ndimana dzi re Bivhilini dze dza vha dzi na dzina ḽa Mudzimu.

Vhukuma, u swika na ṋamusi, nga murahu ha maḓana a miṅwaha dzenedzo nnḓu dzo ṅwaliwa, zwe vha zwi ṅwala zwi kha ḓi ḓivhadza na u renda dzina ḽa Yehova. Vhathu vhane vha dalela ḽeneḽo govha na vhadzulapo vha khou guda zwinzhi nga ha Yehova Mudzimu a mangadzaho, nga u dalela tshiṅwe tshifhaṱo tshi re na dzina ḽawe—tshine tsha vha Holo ya Muvhuso ya Ṱhanzi dza Yehova ngei Bever.

[Ṱhaluso ya Vhubvo ha Tshifanyiso kha siaṱari 7]

© Stähli Rolf A/age fotostock