Miṱa Ya Vhakriste—I Fanela U ‘Dzula Yo Ḓilugisa’
Miṱa Ya Vhakriste—I Fanela U ‘Dzula Yo Ḓilugisa’
“Dzulani nó ḓi-lugisa, ngauri a ni ḓivhi tshikhathi tshiné Murwa-muthu a ḓo ḓa ngatsho’.”—LUKA 12:40.
1, 2. Ndi ngani ri tshi fanela u thetshelesa nyeletshedzo ya Yesu ya u ‘dzula ro ḓilugisa’?
“MUSI Murwa-muthu a tshi ḓo ḓa é vhurenani hawe,” a tshi ḓo khethekanya “tshakha dzoṱhe,” hu ḓo itea mini kha inwi na vha muṱa waṋu? (Mat. 25:31, 32) Samusi zwenezwi zwi tshi ḓo itea nga tshikhathi tshine ra si tshi ḓivhe, ndi zwa ndeme vhukuma uri ri thetshelese nyeletshedzo ya Yesu ya uri ri ‘dzule ro ḓilugisa’!—Luka 12:40.
2 Kha thero yo fhiraho ro haseledza nḓila ine muraḓo muṅwe na muṅwe wa muṱa wa nga hwala ngayo vhuḓifhinduleli hawo u itela u thusa muṱa woṱhe uri u dzule wo fhaṱuwa. Kha ri haseledze nga ha dziṅwe nḓila dzine ra nga shela ngadzo mulenzhe kha u ita uri muṱa u vhe na vhumuya havhuḓi.
Ivhani Na Iṱo ‘Ḽo Tshaho’
3, 4. (a) Miṱa ya Vhakriste i fanela u dzula yo fhaṱutshela mini? (b) Zwi amba mini u vha na iṱo ‘ḽo tshaho’?
3 U itela uri i dzule yo ḓilugisela u ḓa ha Kristo, miṱa i fanela u ṱhogomela uri i sa kheluswe vhurabelini ha ngoho. Miraḓo ya muṱa i fanela u dzula yo fhaṱuwa uri i si kheluswe nga zwiṅwe zwithu. Samusi u funesa zwithu zwi vhonalaho zwi tshikwekwe tshine tsha fasha miṱa minzhi, ṱhogomelani zwe Yesu a zwi amba malugana na u dzula ri na iṱo ‘ḽo tshaho.’ (Vhalani Mateo 6:22, 23.) U fana na musi luvhone lu tshi vhonetshela nḓilani u itela uri ri sa khukhulwe musi ri tshi tshimbila henefho, zwine ra zwi vhona nga ‘maṱo ashu a mbilu’ a re a lwa pfanyisedzo zwi nga ri thusa uri ri tshimbile zwavhuḓi, ri si khukhulwe.—Vha-Ef. 1:18.
4 U itela uri maṱo ashu a kone u vhona zwavhuḓi, a fanela u kona u shuma zwavhuḓi na u kona u livhisa ṱhogomelo kha zwe a zwi sedza. Hu itea zwi fanaho na kha maṱo ashu a mbilu kana a lwa pfanyisedzo. U vha na iṱo ḽo tshaho ḽa lwa pfanyisedzo zwi amba uri ri ḓo livhisa ṱhogomelo kha ndivho nthihi fhedzi. Nṱhani ha u tshilela u funa zwithu zwi vhonalaho na u vhilaedziswa nga maanḓa nga u ṱhogomela ṱhoḓea dza lwa ṋama dza muṱa, ri ḓo ita uri iṱo ḽashu ḽi dzule ḽo tsha nga u livhisa ṱhogomelo kha zwithu zwa muya. (Mat. 6:33) Zwenezwi zwi amba uri ri ḓo fushea nga zwithu zwi vhonalaho zwine ra vha nazwo nahone ra ita uri u shumela Mudzimu zwi ḓe u thoma vhutshiloni hashu.—Vha-Heb. 13:5.
5. Muṅwe muswa wa musidzana a re miṅwahani ya vhufumi o sumbedza hani uri o livhisa “iṱo” ḽawe kha u shumela Mudzimu?
5 Musi vhana vho gudiswa zwavhuḓi uri vha vhe na iṱo ḽo tshaho, hu vha na mvelelo dzavhuḓi vhukuma! Ṱhogomelani tsumbo ya muswa wa musidzana a re miṅwahani ya vhufumi ngei shangoni ḽa Ethiopia. O phasa zwavhuḓi vhukuma tshikoloni lwe musi a tshi fhedza tshikolo tsha murole wa nṱha a wana basari ya uri a bvele phanḓa na pfunzo dzawe. Naho zwo ralo, samusi o vha o livhisa iṱo ḽawe kha u shumela Yehova, ho ngo ṱanganedza basari yeneyo. Nga u ṱavhanya nga murahu ha zwenezwo, o wana mushumo we wa vha u tshi ḓo mu holela R28,200 nga ṅwedzi—tshelede nnzhi vhukuma musi i tshi vhambedzwa na muholo wo ḓoweleaho shangoni ḽa hawe. Fhedzi “iṱo” ḽa onoyo musidzana ḽo vha ḽo livhisa ṱhogomelo kha tshumelo ya vhuvulanḓila. Ho ngo thoma a vhudzisa vhabebi vhawe musi a tshi hana mushumo wonoyo. Vhabebi vhawe vho ḓipfa hani musi vha tshi pfa zwe a zwi ita? Vho takala vhukuma nahone vha mu vhudza uri vha ḓirwa khana ngae!
6, 7. Ndi khombo ifhio ine ra fanela u i ‘fhaṱutshela’?
6 Tsevho ya Yesu i re kha Mateo 6:22, 23 i katela na u ṱhogomela uri ri si vhe na tseḓa. Yesu o vhambedza iṱo ḽi songo tshaho na iṱo “ḽivhi.” Iṱo “ḽivhi” ḽi na tseḓa na vhupangwa. (Mat. 6:23) Yehova u ḓipfa hani nga muthu a re na vhupangwa kana a re na tseḓa? Bivhili i ri: “Vhupombwe hone, na vhuyaḓa hoṱhe, na vhuvhuḓu [kana tseḓa], zwi songo vhuya zwa ita na u buliwa kha inwi.”—Vha-Ef. 5:3.
7 Naho ri tshi nga ṱavhanya u kona u vhona uri vhaṅwe vha na tseḓa, ri nga konḓelwa nga u vhona uri na riṋe ri na tseḓa. Nga zwenezwo, zwi ḓo vha vhuṱali u thetshelesa nyeletshedzo ya Yesu ine ya ri: “Fhaṱuwani, ni thanyele vhuvhuḓu hoṱhe, ngauri muthu ha tshili nga zwiné a vha nazwo’ zwa vha zwinzhi.” (Luka 12:15) U itela u dzula ro fhaṱuwa, ri fanela u ḓiṱolisisa u itela u vhona he mbilu dzashu dza sendamela hone. Miṱa ya Vhakriste i fanela u humbula nga ho dzikaho nga ha tshifhinga na tshelede ine vha i fhedza kha zwa vhuḓimvumvusi, zwa u ḓitakadza na kha u renga zwithu zwi vhonalaho.
8. Musi zwi tshi ḓa kha u renga thundu, ri nga dzula hani ro ‘fhaṱuwa’?
8 Musi ni sa athu renga tshiṅwe tshithu, a no ngo fanela u humbula fhedzi nga ha u vha na tshelede kana u sa vha na tshelede ya u tshi renga. Thomani ni humbule nga ha mbuno dzi tevhelaho: ‘Naa ndi ḓo kona u shumisa tshithu tshenetsho tshe nda tshi renga na u kona u tshi ṱhogomela tshifhinga tshoṱhe? Naa zwi ḓo nndzhiela tshifhinga tshingafhani uri ndi kone u tshi shumisa zwavhuḓi?’ Vhaswa, ni songo fulufhela zwiṅwe na zwiṅwe zwine na zwi vhona zwi tshi khou kunguwedzwa nga ha thundu nahone na vho ṱoḓa zwiambaro zwa madzina kana zwiṅwe zwithu zwi ḓuraho. Gudani u ḓifara. Zwiṅwe hafhu, humbulani uri khamusi u renga zwiṅwe zwithu zwi nga khakhisa vha muṱa wa haṋu uri vha si kone u dzula vho ḓilugisela u ḓa ha Murwa muthu. Ivhani na lutendo kha fulufhedziso ḽa Yehova ḽa uri: “A thi nga U litshi, a thi nga U laṱedzi.”—Vha-Heb. 13:5.
Tovholani Zwipikwa Zwa Muya
9. U tovhola zwipikwa zwa lwa muya zwi nga thusa muṱa nga nḓila-ḓe?
9 Iṅwe nḓila ine miraḓo ya muṱa ya nga khwaṱhisa ngayo lutendo lwayo na u shela mulenzhe kha vhumuya ha muṱa woṱhe ndi u ḓivhetshela zwipikwa zwa lwa muya na u zwi tovhola. U ita nga u ralo zwi nga thusa miṱa uri i kone u vhona arali i tshi khou ita mvelaphanḓa kha u swikelela tshipikwa tshayo tsha u takadza Yehova, na u thusa muṱa uri u kone u vhona mishumo ine ya fanela u ḓa u thoma vhutshiloni havho.—Vhalani Vha-Filipi 1:10.
10, 11. Ndi zwifhio zwipikwa zwe na ḓivhetshela zwone sa muṱa, nahone ndi zwifhio zwipikwa zwine na nga ṱoḓa u ḓivhetshela zwone tshifhingani tshi ḓaho?
10 U ḓivhetshela zwipikwa zwiṱuku zwine zwa nga kona u swikelelwa nga muraḓo muṅwe na muṅwe wa muṱa na zwone zwi nga vhuyedza. Sa tsumbo, ni nga ḓivhetshela tshipikwa tsha uri ḓuvha ḽiṅwe na ḽiṅwe ni haseledze ndimana ya ḓuvha. Phindulo dzine dza ṋewa nga miraḓo ya muṱa dzi nga thusa ṱhoho ya muṱa u pfesesa nḓila ine muṱa wawe wa ḓipfa ngayo nga ha Yehova na mafhungo-ngoho. U vhea tshipikwa tsha u vhala Bivhili noṱhe sa muṱa tshifhinga tshoṱhe zwi ṋea vhana tshibuli tshavhuḓi vhukuma tsha u khwinisa nḓila ine vha vhala ngayo u katela na nḓila ine vha pfesesa ngayo mulaedza wa Bivhili. (Ps. 1:1, 2) Nahone zwi ḓo vha zwavhuḓi uri ri zwi ite tshipikwa tshashu u khwinisa thabelo dzashu. U ṱahulela pfaneleo dza zwiaṋwiwa nga muya ndi tshipikwa tshavhuḓi vhukuma tshine ra nga tshi tovhola. (Vha-Gal. 5:22, 23) Kana ri nga ṱoḓa nḓila dza u sumbedza vhathu vhane ra ṱangana navho vhuḓinḓani uri ri a vha pfela vhuṱungu. U lwela u swikelela zwipikwa zwenezwi sa muṱa zwi nga thusa vhana u guda u pfela vhaṅwe vhuṱungu, nahone khamusi zwi nga ita uri vha vhe na lutamo lwa u vha vhavulanḓila vha tshifhinga tshoṱhe kana vharumiwa.
11 Ndi ngani ni sa haseledzi nga ha zwiṅwe zwipikwa zwine inwi na muṱa waṋu na nga zwi tovhola? Naa muṱa waṋu u nga ḓivhetshela tshipikwa tsha u fhedza tshifhinga tsho engedzeaho vhuḓinḓani? Naa ni nga lwela u kunda nyofho dza u ṱanziela nga luṱingo, u huwelela tshiṱaraṱani, kana fhethu ha mabindu? Hu pfi mini nga u ya u shuma fhethu hu re na ṱhoḓea khulwane ya vhahuweleli vha Muvhuso? Naa muṅwe muṱani a nga guda luṅwe luambo u itela u huwelela mafhungo maḓifha kha vhathu vha dziṅwe tshaka?
12. Ndi mini zwine ṱhoho dza miṱa dza nga zwi ita u itela u thusa muṱa uri u aluwe nga lwa muya?
12 Sa ṱhoho ya muṱa, sedzani masia ane muṱa waṋu wa nga khwinisa khao u itela uri u bvele phanḓa nga lwa muya. Nga murahu, ni ḓivhetshele zwipikwa zwo livhaho zwine zwa ḓo ni thusa u khwinisa kha masia eneo. Zwipikwa zwine na ḓivhetshela zwone sa muṱa zwi fanela u pfala na u swikelelea u tendelana na zwiimo zwa vhoiwe na vhukoni. (Mir. 13:12) Vhukuma, u swikelela zwipikwa zwi vhuyedzaho zwi dzhia tshifhinga. Nga zwenezwo, nṱhani ha u tambisa tshifhinga tshaṋu nga u ṱalela thelevishini, tshi binduliseni nga u tovhola zwithu zwa muya. (Vha-Ef. 5:15, 16) Shumani nga maanḓa u itela u swikelela zwipikwa zwe na ḓivhetshela zwone sa muṱa. (Vha-Gal. 6:9) Muṱa une wa tovhola zwipikwa zwa muya u ita uri u bvelela hawo phanḓa “hu vhoniwe nga vhoṱhe.”—1 Tim. 4:15.
Ivhani Na Vhurabeli Ha Muṱa Ha Nga Madekwana Tshifhinga Tshoṱhe
13. Ndi ifhio tshanduko ye ya vha hone kha mbekanyo ya miṱangano ya vhege iṅwe na iṅwe, nahone ndi dzifhio mbudziso dzine ra fanela u ḓivhudzisa dzone?
13 U shandulwa ha mbekanyo dza miṱangano ya vhege iṅwe na iṅwe nga ḽa 1 January, 2009, zwi fanela u vha zwo thusa vhukuma miṱa uri i kone u ‘dzula yo ḓilugisela’ u ḓa ha Murwa-muthu. A hu tsha vha na muṱangano wa Pfunzo ya Bugu ya Tshivhidzo we wa vha u tshi farwa u woṱhe nahone zwino u farwa khathihi na Tshikolo tsha Vhuḓinḓa ha lwa Ṱaḓulu na Muṱangano wa Tshumelo. Yeneyi tshanduko yo itelwa u ṋea miṱa ya Vhakriste tshibuli tsha u khwaṱhiswa nga lwa muya nga u dzudzanya ḓuvha ḽithihi nga madekwana ḽine ha ḓo farwa ngaḽo vhurabeli ha muṱa. Zwino samusi ho no ḓi fhela tshifhinga yeneyi ndugiselelo yo thoma, ri nga ḓivhudzisa uri: ‘Naa ndi khou shumisa tshifhinga tshe ra ṋewa tshone u itela u fara Vhurabeli ha Muṱa ha nga madekwana kana u itela u fara pfunzo ya muthu nga eṱhe? Naa ndo kona u swikelela ndivho ya ndugiselelo yeneyi?’
14. (a) Ndi ifhio ndivho ya ndeme ya u fara Vhurabeli ha Muṱa ha nga madekwana na pfunzo ya muthu nga eṱhe tshifhinga tshoṱhe? (b) Ndi ngani u vhetshela thungo madekwana a u guda zwi zwa ndeme?
14 Ndivho ya ndeme ya u fara Vhurabeli ha Muṱa ha nga madekwana na pfunzo ya muthu nga eṱhe tshifhinga tshoṱhe ndi ya uri ri kone u sendela tsini-tsini ha Mudzimu. (Yak. 4:8) Musi ri tshi ḓiṋea tshifhinga tsha u guda Bivhili tshifhinga tshoṱhe nahone ri tshi vha na nḓivho yo engedzeaho nga ha Musiki washu, vhushaka hashu nae vhu a khwaṱha. Musi ri tshi sendela tsini na Yehova, ri a ṱuṱuwedzea u mu funa ‘nga mbilu yoṱhe, na nga muya woṱhe, na nga u ṱalukanya hoṱhe, na nga maanḓa ashu oṱhe.’ (Marko 12:30) Vhukuma, ri a ḓiimisela u thetshelesa Mudzimu na u mu edzisa. (Vha-Ef. 5:1) Nga zwenezwo, u fara Vhurabeli ha Muṱa ha nga madekwana tshifhinga tshoṱhe ndi zwa ndeme u itela u thusa miraḓo yoṱhe ya muṱa uri i ‘dzule yo ḓilugisa’ musi ro lindela “vhuṱungu vhuhulu” he ha dzula ho ambiwa. (Mat. 24:21) Ndi zwa ndeme u itela uri ri tshidzwe.
15. Vhurabeli ha Muṱa ha nga madekwana vhu nga kwama hani nḓila ine miraḓo ya muṱa ya funana ngayo?
15 Ndugiselelo ya Vhurabeli ha Muṱa ha nga madekwana i dovha ya vha na tshiṅwe tshipikwa—tsha u thusa miraḓo ya muṱa uri i vhe na vhushaka ha tsini-tsini. U fhedza tshifhinga noṱhe ni tshi khou haseledza nga mafhungo a lwa muya vhege iṅwe na iṅwe zwi a kwama nḓila ine miraḓo ya muṱa ya funana ngayo. Vhavhingani vha vha na vhushaka ha tsini-tsini lungafhani musi vha tshi ḓiphina nga u guda vhoṱhe Bivhili! (Vhalani Muhuweleli 4:12.) Vhabebi na vhana vhane vha gwadamela vhoṱhe vha vha na vhuthihi na lufuno lune lwa vha “mbofho i putelaho zwo khunyelelaho.”—Vha-Kol. 3:14.
16. Anetshelani nḓila ye vhahashu vhararu vha tshisadzini vha vhuyelwa ngayo nga u vhetshela thungo madekwana a u guda vhoṱhe Bivhili.
16 Ṱhogomelani nḓila ye vhaṅwe vhahashu vha tshisadzini vhararu vha vhuyelwa ngayo nga ndugiselelo yeneyi nga u ḓivhetshela tshifhinga tsha u guda Bivhili. Naho vhe si mashaka, vhenevha vhahashu vha tshisadzini vhararu vha vhaaluwa vha tshilikadzi vha dzula ḓoroboni nthihi nahone ho no fhela miṅwaha vhe khonani dza tsini. Vho vha vha tshi ṱoḓa u fhedza tshifhinga tshinzhi vha tshi khou ḓiphina nga vhukonani nahone vha tshi dovha vha vhuyelwa nga lwa muya nṱhani ha u sokou ṱangana u itela u ḓidzingadza, nahone zwenezwo zwo ita uri vha ite phetho ya u vhetshela thungo maṅwe madekwana a u ṱangana u itela u guda vhoṱhe Bivhili. Vho thoma u ita zwenezwi vha tshi khou guda bugu ine ya pfi “Bearing Thorough Witness” About God’s Kingdom. Muṅwe wavho o ri: “Ri ḓiphina vhukuma nga u vha roṱhe lune pfunzo yashu ya fhedza tshifhinga tshi fhiraho awara. Ri lingedza u vhona nga iṱo ḽa muhumbulo vhuimo he vhahashu vha vha vhe khaho ḓanani ḽa u thoma ḽa miṅwaha nahone ri haseledza nga ha zwe ra vha ri tshi ḓo zwi ita vhuimoni ho raloho. Nahone ri lingedza uri zwe ra zwi guda ri zwi shumise vhuḓinḓani. Zwenezwi zwo ita uri mushumo washu wa u huwelela nga ha Muvhuso na wa u ita vhafunziwa u takadze na u bvelela u fhira u thomani.” Nga nnḓa ha u vha khwaṱhisa nga lwa muya, ndugiselelo yeneyo yo dovha ya ita uri dzenedzi khonani dza mbiluni dzi dovhe dzi vhe na vhushaka ha tsini-tsini. Vho ri: “Ri dzhiela nṱha vhukuma ndugiselelo yeneyi.”
17. Ndi zwithu zwifhio zwine zwa ita uri Vhurabeli ha Muṱa ha nga madekwana vhu bvelele?
17 Hu pfi mini nga inwi? Naa ni khou vhuyelwa hani nga madekwana e na a vhetshela thungo u itela u fara vhurabeli ha muṱa kana pfunzo ya muthu nga eṱhe? Arali ni sa zwi iti tshifhinga tshoṱhe, ndugiselelo yeneyi i nga si ni vhuyedze. Muraḓo muṅwe na muṅwe wa muṱa u fanela u vha wo no lugela u guda nga tshifhinga tsho vhewaho. Zwithu zwi si zwa ndeme a zwo ngo fanela u tendelwa uri zwi ri thithise nga madekwana eneo. Zwiṅwe hafhu, zwine zwa ḓo gudwa zwi fanela u vha zwine muṱa waṋu wa nga zwi shumisa vhutshiloni ha ḓuvha ḽiṅwe na ḽiṅwe. Ni nga ita mini u itela uri zwenezwi zwifhinga zwa vhoiwe zwa u guda zwi takadze? Funzani nga nḓila i bvelelaho, nahone ni gude fhethu hu ṱhonifheaho na hu si na nyivhi-nyivhi.—Yak. 3:18. *
‘Fhaṱuwani’ Nahone Ni ‘Dzule No Ḓilugisa’
18, 19. Naa u ḓivha uri Murwa-muthu u ḓo ḓa hu si kale zwi fanela u ni kwama hani na muṱa waṋu?
18 Vhuimo ha shango vhune ha khou tou ṋaṋa u tshinyala vhu ita uri ri sa timatime na luthihi uri shango ḽivhi ḽa Sathane ḽo vha maḓuvhani a vhufhelo u thoma nga 1914. Zwi tou vha khagala uri Haramagedo i tsini. Hu si kale Murwa-muthu u ḓo ḓa u itela u haṱula vhathu vha sa ofhi Mudzimu. (Ps. 37:10; Mir. 2:21, 22) Naa u ḓivha zwenezwo a zwo ngo fanela u ita uri inwi na muṱa waṋu ni dzule no ḓilugisa?
19 Naa ni khou thetshelesa nyeletshedzo ya Yesu ya uri ri dzule ri na iṱo ‘ḽo tshaho’? Naho vhathu vha ḽino shango vha tshi khou tovhola lupfumo, bvumo, kana maanḓa, naa muṱa waṋu u khou tovhola zwipikwa zwa muya? Naa ndugiselelo ya Vhurabeli ha Muṱa ha nga madekwana kana u ḓivhetshela tshifhinga tsha pfunzo ya muthu nga eṱhe zwi khou ni vhuyedza? Naa ni khou swikelela zwipikwa zwe na ḓivhetshela zwone? Samusi zwo haseledzwa theroni yo fhiraho, naa ni khou hwala vhuḓifhinduleli haṋu vhu re Maṅwaloni sa munna, mufumakadzi, muswa, nahone zwenezwo zwa kona u thusa muṱa woṱhe uri u ‘dzule wo fhaṱuwa’? (1 Vha-Thes. 5:6) Arali ni tshi khou ita nga u ralo, ni ḓo ‘dzula no ḓilugisela’ u ḓa ha Murwa-muthu.
[Ṱhaluso i re magumoni a siaṱari]
^ phar. 17 U itela u wana miṅwe mihumbulo ya zwine na nga zwi ita uri Vhurabeli ha Muṱa ha nga madekwana vhu takadze na u swikelela ṱhoḓea dza muṱa, sedzani khandiso ya Tshiingamo tsha ḽa 15 October, 2009, masiaṱari 29-31.
No Guda Mini?
• Ṱalutshedzani nḓila ine miṱa ya Vhakriste ya nga ‘dzula yo ḓilugisa’ ngayo nga . . .
u vha na iṱo ‘ḽo tshaho.’
u ḓivhetshela na u tovhola zwipikwa zwa lwa muya.
u fara Vhurabeli ha Muṱa ha nga madekwana tshifhinga tshoṱhe.
[Mbudziso dza Pfunzo]
[Tshifanyiso kha siaṱari 13]
Iṱo ‘ḽo tshaho’ ḽi ḓo ri ṱuṱuwedza uri ri si thithiswe nga zwithu zwa shango