Mbudziso Dzi Bvaho Ha Vhavhali

Ndi ngani hu tshi ambiwa uri lufu lwa vhavhuya vha Mudzimu “maṱoni a Yehova ndi zwihulwane”?

▪ Mupsalme o hevhedzwaho o imba a ri: “Lufu lwa vhavhuya vhawe, maṱoni a Yehova ndi zwihulwane.” (Ps. 116:15) Vhutshilo ha mugwadameli wa ngoho muṅwe na muṅwe ndi ha ndeme kha Yehova. Naho zwo ralo, maipfi a re kha Psalme ya 116 ha khou amba nga ha u fa ha muthu muthihi fhedzi.

Musi hu tshi ṋekedzwa nyambo ya lufu lwa Mukriste, a zwo ngo tea u shumisa Psalme ya 116:15 musi hu tshi ambelwa kha mufu, naho o fa e mushumeli wa Yehova a fulufhedzeaho. Ndi ngani? Nga nṱhani ha uri maipfi a mupsalme a katela zwo engedzeaho. A amba uri Mudzimu a nga si tendele vhathu vhawe vhoṱhe vha fulufhedzeaho sa tshigwada vha tshi fa ngauri u vha dzhia vhe vha ndeme.—Sedzani Psalme ya 72:14; 116:8.

Psalme ya 116:15 i a ri khwaṱhisedza uri Yehova a nga si tendele uri sa tshigwada vhashumeli vhawe vha fulufhedzeaho vha fheliswe kha ḽifhasi. Zwi re zwone ndi uri ḓivhazwakale yashu ya musalauno i sumbedza uri ro konḓelela milingo mihulwane na u tovholwa, zwine zwa ṋea vhuṱanzi ho khwaṱhaho ha uri Mudzimu a nga si vhuye a tendela ri tshi fheliswa.

Nga nṱhani ha uri u na maanḓa mahulwanesa nahone ndivho yawe i ḓo ḓadzea, Yehova a nga si tendele uri ri fheliswe roṱhe sa tshigwada. Arali Mudzimu o vha a tshi nga tendela zwenezwo, zwo vha zwi tshi ḓo vhonala u nga maswina awe a na maanḓa u mu fhira, nahone zwenezwo zwi nga si vhuye zwa vuwa zwo itea! Ndivho ya Yehova ya uri ḽino ḽifhasi ḽi dzulwe nga vhathu vha fulufhedzeaho khae i ḓo ḓadzea. (Yes. 45:18; 55:10, 11) Arali zwo vha zwi songo ralo, na tshumelo khethwa ine Yehova a tea u itelwa yone yo vha i sa ḓo itwa arali hu si na vhathu vho salaho vhane vha nga mu gwadamela muṱani wa kha ḽifhasi wa thembele yawe ya muya! Ho vha hu sa ḓo vha na vhathu vhane vha nga vhumba “ḽifhasi ḽiswa”—vhathu vho lugaho vhane vha ḓo tshila nga fhasi ha “ḽiṱaḓulu ḽiswa.” (Ndzumb. 21:1) Zwiṅwe hafhu, U vhusa ha Kristo ha Miṅwaha ya Tshigidi zwo vha zwi sa ḓo konadzea arali hu si na vhathu vhane vha ḓo vhuswa kha ḽifhasi.—Ndzumb. 20:4, 5.

Vhathu vho vha vha sa ḓo fulufhela Mudzimu na dzina ḽawe, arali a vhe o tendela maswina awe a tshi fhelisa tshigwada tsha vhathu vhawe vhoṱhe kha ḽifhasi. U ita nga u ralo zwo vha zwi tshi ḓo ḓisela Yehova samba sa Muvhusahoṱhe. Zwiṅwe hafhu, nga nṱhani ha uri U a ḓiṱhonifha na dzina ḽawe ḽikhethwa, Yehova a nga si tendele uri vhashumeli vhawe vha fulufhedzeaho vha fheliswe vhoṱhe sa tshigwada. Ṱhogomelani hezwi: samusi e “Mululamisi” Mudzimu a nga si vhuye a kundwa u tsireledza tshigwada tsha vhathu vhane vha mu shumela nga u fulufhedzea. (Doit. 32:4; Gen. 18:25) Zwiṅwe hafhu, arali a tendela vhashumeli vhawe vhoṱhe sa tshigwada vha tshi fheliswa, zwenezwo zwi ḓo vha zwi tshi khou hanedzana na Ipfi ḽa Mudzimu ḽine ḽa ri: “Yehova ha nga laṱi vhathu vhawe, u itela dzina ḽawe.” (1 Sam. 12:22) I ngoho, “Yehova ha laṱedzi vhathu vhawe, ha laṱi shango ḽawe.”—Ps. 94:14.

Zwi khuthadza vhukuma u ḓivha uri vhathu vha Yehova vha nga si fheliswe kha ḽifhasi! Nga zwenezwo, kha ri dzule ri tshi fulufhedzea kha Mudzimu tshifhinga tshoṱhe nahone ri vhe na khwaṱhisedzo ya fulufhedziso ḽawe ḽine ḽa ri: “Mafumo oṱhe a fúlelwaho u lwa na iwe ha nga koni tshithu. Malimi oṱhe a u pomokaho khaṱhuloni, U ḓo a kunda. Ndi ḽone ifa ḽa vhalanda vha Yehova; ndi zwone zwivhuya zwavho zwi bvaho ha Nṋe.”—Yes. 54:17.

[Maipfi o ṱumbulwaho kha siaṱari 22]

Mudzimu a nga si ḓo vhuya a vuwa o tendela vhathu vhawe vha tshi fheliswa