Vhulenda Vhu Dzikisa Tsinyuwo

MUṄWE mukegulu ho ngo sumbedza vhukonani musi George na Manon, Ṱhanzi mbili dza ngei Netherlands dzi tshi mu dalela u itela u mu vhudza mafhungo maḓifha a Muvhuso. Vho wanulusa uri o lovhelwa nga vhanna vhavhili na murwa wawe, nahone o vha a tshi khou tambudzwa nga vhulwadze ha marambo. Naho o fheleledza o dzika musi vha tshi haseledza nae, ho ngo vhuya a sumbedza u vha na vhukonani.

Naho zwo ralo, George o amba na Manon uri vha vhuyelele kha onoyo mukegulu vho mu rengela maluvha ngauri o vha a tshi vhonala e na vhuludu, nahone o sinyuwa. Musi vha tshi vhuyelela, onoyo mukegulu ane a pfi Rie, o mangala vhukuma fhedzi o vha o takala. Naho zwo ralo, vho vha vho swika nga tshifhinga tshee a vha a sa ḓo kona u haseledza navho, nahone vha tendelana nga ḓuvha na tshifhinga tshine vha ḓo dovha vha dalelana ngatsho. Musi George na Manon vha tshi vhuyelela nga ḓuvha na tshifhinga tshee vha tendelana ngatsho, vho wana hu si na muthu. Naho vho lingedza u ya nga zwifhinga zwo fhamba-fhambanaho, a vho ngo wana muthu. Vho mbo ḓi thoma u humbula uri khamusi u khou tou vha shavha.

Nga ḽiṅwe ḓuvha, George o fheleledza o wana Rie e hone hayani. Rie o humbela pfarelo nga nṱhani ha u sa kona u vha hone nga ḓuvha ḽe vha tendelana ngaḽo nahone a ṱalutshedza uri o vha e vhuongeloni. O ri: “Fhedzi ni nga si kholwe zwe nda zwi ita musi no no ṱuwa. Ndo mbo ḓi thoma u vhala Bivhili!” Vho mbo ḓi vha na khaseledzo yavhuḓi, nahone ha mbo ḓi thomiwa pfunzo ya Bivhili.

Musi Rie a tshi khou ḓi guda Bivhili, o shanduka a vha muthu o takalaho a re na vhulenda, nṱhani ha u vha muthu ane a dzula o sinyuwa. Naho o vha a tshi dzula e hayani, o mbo ḓi thoma u amba nga ha lutendo lwawe luswa na vhane vha mu dalela. Mutakalo wawe wo vha u sa mu tendeli uri a ye miṱanganoni ya tshivhidzo tshifhinga tshoṱhe, fhedzi o vha a tshi takalela u dalelwa nga vhahashu vha tshinnani na vha tshisadzini. Nga ḓuvha ḽe a fara ngaḽo miṅwaha ya 82, o ya guvhanganoni ḽa ḽiisela nahone a lovhedzwa u itela u sumbedza u ḓiṋekedza hawe kha Mudzimu.

Nga murahu ha miṅwedzi i si gathi musi o no lovha, ho wanala tshirendo tshe tsha vha tsho ṅwalwa ngae. Kha tshenetsho tshirendo, o ṱalusa nḓila ine zwa vhavha ngayo u vha na vhuludu musi wo no vha mulala, a ombedzela na ndeme ya u sumbedzwa vhulenda. Manon o ri: “Ndo kwamea vhukuma musi ndi tshi vhala tshirendo tshenetsho, nahone ndi takalela uri Yehova o ri thusa uri ri kone u mu sumbedza vhulenda.”

Vhukuma, tsumbo ya Yehova i ri ṱuṱuwedza u sumbedza vhaṅwe lufuno lwo raloho na vhulenda. (Vha-Ef. 5:1, 2) Vhuḓinḓa hashu vhu ḓo aṋwa mitshelo musi ri sa ‘hangwi uri ri vhaḓinḓa vha Mudzimu, nga vhulenda.’—2 Vha-Kor. 6:4, 6.