YEHOVA, ndi “Mulai” washu muhulwane. (Yes. 30:20) Lufuno lwawe lu mu ṱuṱuwedza u funza na u gudisa vhaṅwe. Sa tsumbo, a tshi ṱuṱuwedzwa nga lufuno Yehova o sumbedza Yesu ‘zwoṱhe zwé a shuma.’ (Yoh. 5:20) Nga nṱhani ha uri Yehova u a ri funa u ri ṋea “lulimi lwa vho funzwaho,” musi ri tshi ita vhuḓidini ha u mu hulisa na u thusa vhaṅwe.—Yes. 50:4.

Komiti ya u Funza ya Tshigwada tshi Langaho i edzisela lufuno lune Yehova a vha nalwo nga u shumisa zwikolo zwa lwa ṱaḓulu zwa fumi u itela u gudisa vha re na lutamo kana vhane zwiimo zwavho zwa vha tendela u ya kha zwenezwo zwikolo. Naa ni dzhia zwenezwo zwikolo sa vhuṱanzi vhu sumbedzaho uri Yehova u a ri funa?

Ni ḓo takalela u vhala nga ha zwikolo zwa lwa ṱaḓulu zwi re hone na nḓila ye vhaṅwe vhe vha ya khazwo vha vhuyelwa ngayo. Nga murahu ni ḓivhudzise uri, ‘Ndi nga vhuyelwa hani nga yeneyi pfunzo ya Mudzimu?’

Samusi e “Mudzimu wa lufuno,” Yehova u ri ṋea pfunzo ine ya ita uri vhutshilo hashu vhu vhe na  ndivho, ine ya ri lugiselela u sedzana na khaedu, na u ri thusa uri ri vhe na dakalo ḽihulwane vhuḓinḓani hashu. (2 Vha-Kor. 13:11) U fana na vhafunziwa vha ḓanani ḽa u thoma ḽa miṅwaha, ro shomedzelwa zwavhuḓi u itela u thusa vhaṅwe, u ‘vha funza u ita zwoṱhe’ zwe ra laiwa zwone.—Mat. 28:20.

Naho ri sa ḓo kona u ya kha zwenezwi zwikolo zwoṱhe, ri nga vhuyelwa nga zwiṅwe zwazwo. Nahone ri nga shumisa vhulivhisi ha mutheo ha Bivhili vhune ha vha hone. Ri nga dovha ra engedza vhukoni hashu ha u funza vhuḓinḓani nga u shuma na vhashumeli vha Yehova vho gudiswaho zwavhuḓi.

Ḓivhudziseni uri, ‘Naa zwiimo zwanga zwi nga tenda uri ndi kone u ya kha tshiṅwe tsha zwenezwi zwikolo?’

Vhagwadameli vha Yehova vha zwi dzhia i ndugelo u tikedza zwenezwi zwikolo zwa ndeme na u gudiswa khazwo. Ungari zwe na zwi guda zwi nga ita uri ni sendele tsini na Mudzimu na u ni shomedzela nga vhuḓalo uri ni kone u ḓadzisa vhuḓifhinduleli he na ṋewa hone, zwihuluhulu ha u tevhedza ndaela yo ṱavhanyiswaho ya u huwelela mafhungo maḓifha.