Maṅwalo ha ambi tshithu tshine tsha hanedzana na u fhiswa ha tshitumbu.

Hu na mafhungo a re Bivhilini ane a amba nga ha zwitumbu kana marambo a vhathu zwe zwa fhiswa. (Yosh. 7:25; 2 Koron. 34:4, 5) Zwenezwi zwi nga vha zwo sumbedza uri vhenevho vhathu vho vha vha si vha ndeme uri vha nga vhulungwa nga nḓila ya tshirunzi. Musi vhathu vho fa vha fhiswa, zwo vha zwi sa ambi uri vho vha vha songo fanelea u vhulungwa.

Ri nga kona u vhona zwenezwi kha mafhungo a lufu lwa Khosi Saulo na vharwa vhawe vhararu. Vhuṋa havho vho fa vha tshi khou u lwa na Vhafilisita. Muṅwe wa vharwa vhawe o vha e Yonathani, khonani yavhuḓi na i fulufhedzeaho ye ya tikedza Davida. Musi vhahali vha Vhaisiraele vha dzulaho Yabese kha ḽa Gileada vha tshi pfa zwe zwa itea, vho dzhia zwenezwo zwitumbu zwiṋa vha zwi fhisa, nahone vha vhulunga marambo. Nga murahu Davida a khoḓa vhenevho Vhaisiraele nga zwe vha ita.—1 Sam. 31:2, 8-13; 2 Sam. 2:4-6.

Fulufhelo ḽa Maṅwalo kha vho faho ndi mvuwo—Mudzimu u ḓo vusa vhathu. Hu sa londwi uri muthu o faho o tou fhiswa kana hai, Yehova a nga si kundwe u mu vusa e kha muvhili muswa. Vhaheberu vhararu vha fulufhedzeaho vhe vha vha vho sedzana na lufu ṋanḓoni ya mulilo u ya nga ndaela ya Khosi Nebukadanetsara, a vho ngo ofha uri arali vha fhiswa muliloni, Mudzimu o vha a sa ḓo vha vusa. (Dan. 3:16-18) Zwenezwo ndi ngoho na kha vhashumeli vha Yehova vha fulufhedzeaho vhe vha fa nahone zwitumbu zwavho zwa fhiswa gammbani dza tshengedzo dza Vhanazi. Vhashumeli vho fhamba-fhambanaho vha Mudzimu vha fulufhedzeaho vho vhulahwa nga mithuthubo kana nga dziṅwe nḓila dze dza si sie masalela a zwitumbu zwavho. Naho zwo ralo, hu na khwaṱhisedzo ya uri vha ḓo vuswa.—Nzumb. 20:13.

A zwi vhuyi zwa ṱoḓa uri Yehova a ṱanganye masalela a kale a muvhili wa muthu uri a kone u mu vusa. Zwenezwi zwi vhonala kha Vhakriste vho ḓodzwaho vhane Mudzimu a vha vusela u tshila ṱaḓulu. U fana na Yesu we a “vuswa lwa muya,” Vhakriste vho ḓodzwaho vha vuselwa u tshila ṱaḓulu vha tshi kha ḓivha nga nḓila ine vha vha ngayo, fhedzi vhe na muvhili wa muya. A hu na tshipiḓa tsha muvhili wavho wa kale tshine tsha ya ṱaḓulu.—1 Pet. 3:18; 1 Vhakor. 15:42-53; 1 Yoh. 3:2.

Fulufhelo ḽashu ḽa mvuwo ḽo ḓitika kha lutendo lune ra vha nalwo lwa uri Mudzimu u na maanḓa na lutamo lwa u ita zwe a zwi fulufhedzisa, a ḽo ngo ḓitika nga zwine zwa nga kha ḓi itwa kha mivhili yashu musi ro fa. (Mish. 24:15) Ndi ngoho uri ri nga si kone u pfesesa nga vhuḓalo nḓila ye Mudzimu a vusa ngayo vhathu nga lwa vhuṱolo zwifhingani zwa kale kana nḓila ine a ḓo zwi ita ngayo tshifhingani tshi ḓaho. Naho zwo ralo, ri fulufhela Yehova. O ri “khwaṱhisedza” zwenezwo nga u vusa Yesu.—Mish. 17:31; Luka 24:2, 3.

Ndi zwavhuḓi uri Vhakriste vha humbule nga ha nḓila ine zwithu zwa itwa ngayo hune vha dzula hone, na nḓila ine vhathu vha ḓipfa ngayo na ṱhoḓea dza mulayo malugana na u vhulunga zwitumbu. (2 Vhakor. 6:3, 4) Nga zwenezwo, phetho ya uri tshitumbu tshi a fhiswa kana hai, ndi phetho ya muthu nga eṱhe kana ya muṱa.