U HUWELELA mafhungo maḓifha ndi mushumo wa ndeme vhukuma une wa khou itwa ḽifhasini ṋamusi. Ndi ndugelo khulwane u imela Yehova kha wonoyu mushumo wa u huwelela. Naho zwo ralo, nga zwiṅwe zwifhinga zwi nga vha khaedu uri vhavulanḓila na vhahuweleli vha dzule vha tshi fhisea vhuḓinḓani. Ndi ngani?

Vhaṅwe vhahuweleli vha wana uri vha vha na nyambedzano pfufhi musi vha tshi huwelela nnḓu nga nnḓu ngauri vhathu vhanzhi a vha wanali mahayani. Nahone musi vhathu vhe hayani, zwi nga kha ḓi itea vha vha vhe si na dzangalelo kha mulaedza wa Muvhuso nahone vha nga ri sinyutshela. Vhaṅwe vhahuweleli vha na tsimu khulwane ine ya vha na vhathu vhane vha aravha zwavhuḓi, fhedzi vha ofha uri vha nga si kone u huwelela khavho vhoṱhe. Zwiṅwe hafhu, vhaṅwe ndi kale vha tshi khou huwelela lwa miṅwaha minzhi nahone vho no nyabwa ngauri vhufhelo a vhu athu u swika.

Hu ḓo vha na khaedu vhuḓinḓani hashu dzine dza nga kwama u fhisea hashu. Ri tshila shangoni ḽi langwaho nga “muvhi,” Sathane Diabolo, nga zwenezwo ri lavhelela uri zwi ḓo ri konḓela u huwelela mafhungo maḓifha.—1 Yohane 5:19.

Hu sa londwi khaedu dzine na sedzana nadzo sa muthu nga eṱhe vhuḓinḓani, ni nga vha na vhungoho ha uri Yehova u ḓo ni thusa u dzi kunda. Fhedzi ni nga ita mini u itela u engedza u fhisea haṋu vhuḓinḓani? Kha ri haseledze dziṅwe nyeletshedzo.

Ṅwaha muṅwe na muṅwe, vhathu vhanzhi vha a lovhedzwa sa Ṱhanzi dza Yehova. Arali ni kha ḓi tou bva u lovhedzwa, ni nga guda zwinzhi kha vhathu vhane vha vha na miṅwaha minzhi vha tshi khou huwelela. Nahone arali ni muhuweleli lwa miṅwaha minzhi, naa ni nga thusa vhaswa ngohoni? U ita nga u ralo zwi nga fusha vhukuma.

Yesu o vha a tshi zwi ḓivha uri vhafunziwa vhawe vho vha vha tshi ṱoḓa vhulivhisi ha u vha vhagudisi vha bvelelaho, nahone o vha sumbedza nḓila ya u huwelela. (Luka 8:1) Musalauno, vhaswa ngohoni vha ṱoḓa u gudiswa hu fanaho u itela uri vha vhe vhahuweleli vha bvelelaho.

A ro ngo fanela u humbula uri nga nṱhani ha uri muhuweleli muswa u ya vhuḓinḓani, u khou guda u funza. U ṱoḓa vhulivhisi vhu bvaho kha mugudisi a re na vhuthu na lufuno. Muhuweleli a re na  tshenzhelo u fanela u mu gudisa nḓila ya (1) u lugiselela na nḓila ya u amba na ṋemuḓi, (2) u haseledza na vhathu, (3) u tshimbidza khandiso, (4) u vhuyelela kha vhe vha sumbedza dzangalelo, na (5) u thoma pfunzo ya Bivhili. Muhuweleli muswa ngohoni a nga vha mugudisi a bvelelaho arali a sedza na u edzisa nḓila ine muhuweleli a re na tshenzhelo a gudisa ngayo. (Luka 6:40) Nahone muhuweleli muswa ngohoni u ḓo thoma u ḓifulufhela nga u ḓivha uri hu na muthu o ḓiimiselaho u mu thusa musi zwi tshi ṱoḓea. U khoḓa na u ṋea nyeletshedzo muhuweleli muswa ngohoni zwi nga mu thusa.—Muhuweleli 4:9, 10.

Hu sa londwi vhuḓidini haṋu ha u amba na ṋemuḓi, nga zwiṅwe zwifhinga ni vha na nyambedzano yavhuḓi na muthu ane na khou tshimbila nae musi ni tshi khou huwelela. Humbulani uri Yesu o rumela vhafunziwa vhawe u huwelela “nga vhavhili nga vhavhili.” (Luka 10:1) Musi vha tshi khou tshimbila vhoṱhe vho vha vha tshi ṱuṱuwedzana na u khuthadzana. Ri na tshibuli tshavhuḓi tsha u “uri ri ṱuṱuwedzane” musi ri tshi shuma na vhahashu vha tshinnani na vha tshisadzini vhuḓinḓani.—Vharoma 1:12.

Ndi zwifhio zwiṅwe zwithu zwine na nga amba nga hazwo? Naa muṅwe wa vhoiwe u na tshenzhelo ya zwenezwino i ṱuṱuwedzaho? Naa no guda zwiṅwe zwine zwa ni takadza kha pfunzo ya muthu nga eṱhe kana sa muṱa? Naa no ṱuṱuwedzwa nga zwiṅwe zwe na zwi pfa muṱanganoni? Nga zwiṅwe zwifhinga ni nga shuma na muhuweleli ane na sa mu ḓivhe zwavhuḓi. Khamusi ni nga mu vhudzisa nḓila ye a wana ngayo ngoho. Ndi mini zwe zwa mu ita uri a tende uri heyi ndi ndangulo ya Yehova? Ndi ndugelo kana tshenzhelo dzifhio dzine a vha nadzo? Khamusi ni nga mu vhudza dziṅwe dza tshenzhelo dzaṋu. Hu sa londwi nḓila ine vhathu vha aravha ngayo tsimuni, musi ni tshi tshimbila na muṅwe muthu tsimuni, ni vha na tshibuli tshavhuḓi tsha u “fhaṱana.”—1 Vhathesalonika 5:11.

Uri ri dzule ri tshi fhisea vhuḓinḓani ri fanela u khwinisa nḓila ine ra ita ngayo pfunzo ya muthu nga eṱhe. “Mulanda a fulufhedzeaho na wa vhuṱali” u gandisa thero dzo fhamba-fhambanaho dzine ra nga dzi guda. (Mateo 24:45) Kha ri haseledze iṅwe tsumbo yavhuḓi ya thero ya pfunzo ya muthu nga eṱhe: Ndi ngani mushumo wa u huwelela u wa ndeme vhukuma? Bogisi “ Ndi Ngani Ni Tshi Fanela U Dzula Ni Tshi Fhisetshela Vhuḓinḓa?” ḽi sumbedza zwiṅwe zwa zwiitisi.

U ṱolisisa mbuno dzine dza vha kha mutevhe u re kha bogisi zwi nga ni ṱuṱuwedza u bvela phanḓa ni tshi fhisetshela u huwelela. Sa nḓila ya u guda Bivhili, lingedzani u ṅwala mutevhe wa zwiṅwe zwiitisi zwa Maṅwalo zwa u fhisetshela u huwelela. Nga zwenezwo, elekanyani nga ha zwenezwo zwiitisi.  Musi ni tshi ita nga u ralo, u fhisetshela haṋu vhuḓinḓa hu ḓo khwaṱha.

Tshifhinga tshoṱhe ndangulo ya Yehova i ri sumbedza nḓila dzine dza nga ri thusa u khwinisa vhuḓinḓa hashu. Sa tsumbo, zwiṅwe zwine ra nga zwi ita kha mushumo washu wa u huwelela nnḓu nga nnḓu, ri nga lingedza u ṅwala vhurifhi, u ṱanziela nga luṱingo, u huwelela zwiṱaraṱani kana huṅwe fhethu ha vho muthu munzhi, na u ṱanziela kha vhathu lu songo dzudzanyeaho kana musi vhe mishumoni yavho. Khamusi ri nga dovha ra ita nzudzanyo dza u huwelela fhethu hu re na Ṱhanzi dzi si gathi kana hune dzi si vhe hone.

Naa no ḓiimisela u lingedza maitele maswa? Vhanzhi vhe vha lingedza dzenedzi nyeletshedzo vho bvelela. Ṱhogomelani tsumbo tharu.

Wahashu wa tshisadzini ane a pfi April o dzhia phetho ya u lingedza u shumisa nyeletshedzo i re kha iṅwe thero ya Vhuḓinḓa ha Muvhuso ya nḓila ine a nga thoma ngayo pfunzo dza Bivhili. O thoma u vhala na vhathu vhararu vhane a shuma navho. April o vha o mangala na u takala musi vhuraru havho vha tshi tenda u guda nahone vha thoma u ya miṱanganoni.

Ro dovha ra ṱuṱuwedzwa u ṱoḓa vhathu vhane vha vha na dzangalelo ḽa u vhala thero dzi re kha khandiso dzashu. Mulavhelesi wa ḽiisela wa ngei United States o dzhia phetho ya u tshimbidza magazini wa Awake! une wa amba nga ha mathaela kha vhalangi vha mavhengele oṱhe a re henefho a mathaela. Ene na mufumakadzi wawe vho dovha vha tshimbidza khandiso i re na mutevhe wa tshiṱoho tshine tsha ri “Understanding Your Doctor” kha ofisi dza madokotela a fhiraho 100. O amba uri u ya henefho zwo thusa vhathu uri vha ḓowele mushumo washu wa u  huwelela na khandiso dzashu. Nga murahu ha u ḓivha vhathu khwine tsimuni, mulavhelesi wa ḽiisela na mufumakadzi wawe vho kona u ita nyendo nnzhi dza u vhuyelela.

Wahashu wa tshisadzini ane a pfi Judy o ṅwalela ofisini khulwane dza shango ḽoṱhe ngauri o takalela ṱhuṱhuwedzo ya u ṱanziela nga luṱingo. O amba uri mme awe vhe vha vha vhe na miṅwaha ya 86 nahone vhe na thaidzo nnzhi dza mutakalo, vho vha vha tshi ṱanziela kha vhathu tshifhinga tshoṱhe nga luṱingo. Nga zwenezwo, mme awe vho thoma u fara pfunzo ya Bivhili na mufumakadzi we a vha e na miṅwaha ya 92!

Nyeletshedzo dzi ṋewaho kha khandiso dzashu dzi a shuma vhukuma. Dzi lingedzeni! Dzi nga ni thusa u dzula no takala nahone ni tshi fhisea vhuḓinḓani.

Ndi mini zwine zwa ita uri mushumo washu wa u huwelela u bvelele? A si uri ri tshimbidza khandiso nngana, ri fara pfunzo dza Bivhili nngana, kana ndi vhathu vhangana vhane ra vha thusa u vha Ṱhanzi dza Yehova. Humbulani nga ha Noaxe. Ndi vhathu vhangana vhe Noaxe a vha thusa uri vha vhe vhagwadameli vha Yehova nga nnḓa ha muṱa wawe? Naho zwo ralo, o vha muhuweleli a bvelelaho. Tsha ndeme ndi uri ri shumela Yehova nga u fulufhedzea.—1 Vhakorinta 4:2.

Vhahuweleli vhanzhi vha ṱhogomela uri u itela uri vha ḓipfe vho takala nga ha mushumo wa u huwelela, vha fanela u ḓivhetshela zwipikwa zwi pfalaho. Ndi zwifhio zwiṅwe zwa zwenezwo zwipikwa? Zwipikwa zwi si gathi zwo ṅwalwa kha bogisi “ Ḓivhetsheleni Zwipikwa Zwi Pfalaho.”

Humbelani Yehova uri a ni thuse uri ni ite uri vhuḓinḓa haṋu vhu vhe vhu vhuyedzaho na vhu re na ndivho. Musi ni tshi swikelela zwipikwa zwaṋu, ni ḓo ḓipfa no fushea nga u ḓivha uri ni khou ita zwoṱhe zwine na nga kona u itela u huwelela mafhungo maḓifha.

Ndi ngoho uri u huwelela mafhungo maḓifha zwi nga vha khaedu. Fhedzi hu na zwithu zwine na nga zwi ita u itela uri ni fhisee vhuḓinḓani haṋu. Ivhani na nyambedzano i ṱuṱuwedzaho na ane na khou tshimbila nae vhuḓinḓani, itani uri pfunzo yaṋu ya muthu nga eṱhe i vhe ya tshifhinga tshoṱhe na i re na ndivho, lingedzani nyeletshedzo dza mulanda a fulufhedzeaho na wa vhuṱali, nahone ni ḓivhetshele zwipikwa zwi pfalaho. Tsha ndeme vhukuma kha zwoṱhe, humbulani uri Yehova Mudzimu o ni fha ndugelo ya u huwelela mafhungo maḓifha sa muṅwe wa Ṱhanzi dzawe. (Yesaya 43:10) Vhukuma, ni ḓo takala lungafhani musi ni tshi bvela phanḓa ni tshi fhisetshela vhuḓinḓa haṋu!