Tshiingamo (nga Luisimane) tsha ḽa 15 September, 1950 tsho amba nga ha “pfanyisedzo” na “u ḓadzea ha zwine zwa khou fanyiswa.” Tsho ṱalutshedza uri musi hu tshi itwa pfanyisedzo hu vha hu tshi khou ambiwa nga ha zwithu zwine zwa ḓo ḓadzea nga nḓila khulwane tshifhingani tshi ḓaho. U ḓadzea ha zwine zwa khou fanyiswa hu nga ambela kha muthu, tshiitea kana tshithu tshine tsha fanyiselwa. Pfanyisedzo yo vha i tshi dovha ya vhidzwa murunzi, nahone u ḓadzea ha zwine zwa khou fanyiswa zwo vha zwi tshi vhidzwa tshiitea tsha vhukuma.

Tshifhingani tsho fhiraho, khandiso dzashu dzo amba uri vhanna na vhafumakadzi vha fulufhedzeaho vha nga ho sa Debora, Elihu, Yefeta, Yobo, Rahaba, Rebeka na vhaṅwe vhanzhi vho vha vha tshi fanyisela vhaḓodzwa kana “gogo ḽihulu.” (Nzumbululo 7:9) Sa tsumbo, ro amba uri Yefeta, Yobo na Rebeka vha fanyisela vhaḓodzwa, nahone Debora na Rahaba vha fanyisela gogo ḽihulu. Naho zwo ralo, tshifhingani tsha zwenezwino, a ro ngo vhambedza nga nḓila i fanaho. Ndi ngani zwo ralo?

Maṅwalo a funza uri vhaṅwe vhabvumbedzwa vha Bivhili vha fanyisela muṅwe muthu kana zwithu zwihulwane tshifhingani tshi ḓaho. Sa tsumbo, kha Vhagalata 4:21-31, muapostola Paulo o amba nga ha “pfanyisedzo” ine ya katela vhafumakadzi vhavhili. Mufumakadzi wa u thoma ndi Hagara phuli ya Abrahamu. Paulo o ṱalutshedza uri onoyo mufumakadzi o vha a tshi fanyisela lushaka lwa Isiraele, lwe lwa vha lwo vhofhwa na Yehova nga Mulayo wa Mushe. Mufumakadzi wa vhuvhili ndi “mufumakadzi ane a ḓilanga,” Sara mufumakadzi wa Abrahamu. O vha a tshi fanyisela mufumakadzi wa Mudzimu ane a vha tshipiḓa tsha ṱaḓulu tsha ndangulo ya Mudzimu. Paulo o dovha a amba zwinzhi zwi fanaho vhukati ha khosi ine ya vha tshifhe, Melkizedeke na Yesu. (Vhaheberu 6:20; 7:1-3) Zwiṅwe hafhu, Paulo o vhambedza muporofita Yesaya na vharwa vhawe na Yesu na vhaḓodzwa vha Vhakriste. (Vhaheberu 2:13, 14)  Yehova o hevhedza Paulo uri a ite u vhambedza ho raloho hoṱhe, nga zwenezwo, ri nga vha na vhungoho ha uri pfanyisedzo na u ḓadzea ha zwine zwa khou fanyiswa zwo tea.

Naho Bivhili i tshi sumbedza uri muthu huna zwine a zwi fanyisela, a ro ngo fanela u humbulela uri zwidodombedzwa zwiṅwe na zwiṅwe kana zwiitea zwa vhutshilo ha onoyo muthu zwi fanyisela zwithu zwihulwane tshifhingani tshi ḓaho. Sa tsumbo, Paulo o amba uri Melkizedeke u fanyisela Yesu. Naho zwo ralo, Paulo ha ambi nga ha tshifhinga tshee Melkizedeke a ḓisela ngatsho Abrahamu tshinkwa na veini, musi o no kunda mahosi maṋa. Nga zwenezwo, a huna tshiitisi tsha Maṅwalo tsha u ṱoḓa ṱhaluso yo dzumbamaho kha tshenetsho tshiitea.—Genesi 14:1, 18.

Vhaṅwe vhaṅwali vha miṅwahani ya musi Kristo o no fa vho ita vhukhakhi vhuhulwane vhukuma. Vho dzhia mafhungo maṅwe na maṅwe a Bivhili e pfanyisedzo. The International Standard Bible Encyclopaedia i ṱalusa pfunzo dza Origen, Ambrose na Jerome, nga u amba uri: “Vho ṱoḓa pfanyisedzo nahone vha dzi wana kha tshiitea tshiṅwe na tshiṅwe, na kha zwithu zwiṱuku-ṱuku zwo ṅwalwaho Maṅwaloni. Na kha zwiitea zwi songo serekanaho na zwo ḓoweleaho, zwo ṱumanywa na ngoho yo dzumbamaho . . . , na tshivhalo tsha khovhe dzo fashwaho nga vhafunziwa vhusikuni he Mutshidzi a vhonala khavho—vhaṅwe vho lingedza u ṱalutshedza tshivhalo tsha dzenedzo khovhe tshine tsha vha 153!”

Muṅwe muṅwali ane a pfi Augustine wa ngei Hippo, o amba nga ha tshiitea tsha Bivhili tshee Yesu a kanzwa vhanna vha 5000 nga zwinkwa zwiṱanu zwa bali na khovhe mbili, zwine zwa vha na ṱhalutshedzo ya lwa pfanyisedzo. O amba uri zwinkwa zwiṱanu zwa bali zwi fanyisela bugu ṱhanu dza u thoma dza Bivhili. Nahone bali yo vha i tshi fhirwa nga goroi, zwenezwi zwo vha zwi tshi fanyisela uri “Thestamennde ya Kale” yo vha i tshi fhirwa nga “Thestamennde Ntswa.” O dovha a ṱalutshedza uri khovhe mbili dzi fanyisela khosi na tshifhe. Muṅwe mugudi o ṱalutshedza uri u renga ha Yakobo vhutanzhe ha Esau nga tshitshuu kana zwithu zwitswuku zwi fanyisela u renga ha Yesu fulufhelo ḽa ṱaḓulu a tshi itela vhathu nga malofha awe matswuku!

Arali dzenedzo ṱalutshedzo dzi tshi vhonala dzi sa tendisei, ni nga kona u pfesesa vhuleme. Vhathu a vha koni u ḓivha mafhungo a re Bivhilini ane a fanyisela zwithu zwihulwane na a sa zwi fanyiseli. Nga zwenezwo, ndi zwithu zwifhio zwa vhuṱali zwine ra fanela u zwi ita? Musi Maṅwalo a tshi funza uri muthu, tshiitea kana tshithu tshine tsha fanyisela zwithu zwihulwane zwa tshifhingani tshi ḓaho, ri ṱanganedza yeneyo ṱhaluso. Naho zwo ralo, a ro ngo fanela u fanyisela mafhungo a Bivhili musi hu si na tshiitisi tsha Maṅwalo tsha u ita nga u ralo.

Nga zwenezwo, naa ri nga vhuyelwa nga zwidodombedzwa na mafhungo ane ra a vhala Bivhilini? Muapostola Paulo o ṅwala uri: “Zwithu zwoṱhe zwo ṅwalwaho kale zwo ṅwalelwa u ri funza, uri nga u konḓelela hashu na nga u khuthadzwa nga Maṅwalo ri vhe na fulufhelo.” (Vharoma 15:4) Paulo o vha a tshi khou ṅwalela Vhakriste vho ḓodzwaho vha ḓanani ḽa u thoma ḽa miṅwaha, a tshi vha vhudza nga ha nḓila ine vha nga vhuyelwa ngayo nga mafhungo a bvaho Bivhilini. Naho zwo ralo, u bva nga tshenetsho tshifhinga, Vhakriste vhoṱhe, u katela na vha “dziṅwe nngu” vho vhuyelwa nga ngudo dzi bvaho Maṅwaloni.—Yohane 10:16; 2 Timotheo 3:1.

Nga zwenezwo, mafhungo manzhi a Bivhili, ha shumi fhedzi kha vhaḓodzwa, vha “dziṅwe nngu” kana Vhakriste kha tshiitea tsho khetheaho tsha ḓivhazwakale. U fhambana na zwenezwo, vhunzhi ha mafhungo a Bivhili o vhuyedza vhashumeli vhanzhi vha Mudzimu vha tshifhingani tsha kale na musalauno. Sa tsumbo, vhuṱungu he Yobo a sedzana naho, a vhu fanyiseli fhedzi vhuṱungu he vhaḓodzwa vha sedzana naho tshifhingani tsha Nndwa ya Shango ya u Thoma. Vhunzhi ha vhathu vha Mudzimu, vhanna na vhafumakadzi, vhaḓodzwa na vha “dziṅwe nngu” vho sedzana na vhuṱungu u fana na Yobo nahone vho vhuyelwa nga u guda eneo mafhungo. Vho “vhona mvelelo ye Yehova a ita uri i vhe hone, uri Yehova u na lufuno luhulu na khathutshelo.”—Yakobo 5:11.

Zwivhidzoni zwashu musalauno, hu na vhafumakadzi vha vhalala vha fulufhedzeaho u fana na Debora, u katela na vhahulwane vhane vha kha ḓi vha vhaswa vho ṱalifhaho u fana na Elihu. Ri dovha ra vha na vhavulanḓila vha fhiseaho vhane vha vha na ṱhuṱhuwedzo i fanaho na ya Yefeta, u katela na vhanna na vhafumakadzi vha fulufhedzeaho vha konḓelelaho u fana na Yobo. Ri livhuha Yehova zwi tshi bva mbiluni nge a ita vhungoho ha uri “zwithu zwoṱhe zwo ṅwalwaho kale” zwi a wanala musalauno u itela uri ri “khuthadzw[e] nga Maṅwalo ri vhe na fulufhelo”!

Nga nṱhani ha zwenezwo zwiitisi, a ri lingedzi u ṱumanya zwiitisi zwa pfanyisedzo kana u ḓadzea ha tshifhinga tshi ḓaho kha mafhungo maṅwe na maṅwe a Bivhili. U fhambana na zwenezwo, khandiso dzashu zwino dzi livhisa ṱhogomelo nga maanḓa kha pfunzo dzi vhuyedzaho dzi bvaho Maṅwaloni.