O Funa Vhathu
“Ndi tshi takalela vhana vha vhathu.”—MIRERO 8:31.
1, 2. Yesu o sumbedza hani uri u funa vhathu zwi tshi bva mbiluni?
MURWA wa Mudzimu wa tanzhe ndi tsumbo yavhuḓi ya vhuṱali ha Yehova vhu mangadzaho nahone o vha e “muḓinḓa” wa Khotsi awe. Edzani u humbula nḓila ye Yesu a vha o takala na u fushea ngayo musi Khotsi awe a tshi “tea ḽiṱaḓulu” na u “sima thikho dza ḽifhasi.” Fhedzi kha zwithu zwoṱhe zwe Khotsi awe a zwi sika, Yesu o vha a tshi “takalela vhana vha vhathu.” (Mirero 8:22-31) Vhukuma, o funa vhathu u bva mathomoni.
2 Nga murahu, Yesu o sumbedza lufuno na u fulufhedzea kha Khotsi awe na u funa hawe vhathu zwi tshi bva mbiluni, musi a tshi bva ṱaḓulu nga u ḓifunela nahone a ḓa kha ḽifhasi sa muthu. Yesu o ita zwenezwo nga lufuno u itela uri a kone u ṋekedza vhutshilo hawe sa “tshirengululi a tshi itela vhanzhi.” (Mateo 20:28; Vhafilipi 2:5-8) Musi Yesu a tshi kha ḓi vha kha ḽifhasi, Mudzimu o mu ṋea maanḓa a u ita vhuṱolo. Honoho vhuṱolo vhu dzumbulula nḓila ine Yesu a funa ngayo vhathu na u sumbedza zwithu zwavhuḓi zwine a ḓo zwi itela vhathu hu si kale.
3. Ri ḓo ṱolisisa mini kha ino thero?
3 Musi Yesu e kha ḽifhasi, o huwelela “mafhungo maḓifha a Muvhuso wa Mudzimu.” (Luka 4:43) O vha a tshi zwi ḓivha uri wonoyo Muvhuso u ḓo ita uri dzina ḽa Khotsi awe ḽi khethwe na uri u ḓo tandulula thaidzo dza vhathu lwa tshoṱhe. Yesu o ita vhuṱolo vhunzhi musi a tshi huwelela. Honoho vhuṱolo ho dzumbulula u humbulela hawe vhathu vhoṱhe. Ndi ngani zwenezwo zwi zwa ndeme kha riṋe? Ngauri zwe a zwi ita, zwi ita uri ri vhe na fulufhelo ḽa vhumatshelo. Ngauralo, kha ri ṱolisise vhuṱolo vhuṋa ha Yesu.
“O MU ṊEA MAANḒA A U FHODZA”
4. Ho itea mini musi Yesu a tshi ṱangana na munna we a vha e na mapele?
4 Tshifhingani tsha vhuḓinḓa hawe, Yesu o ya fhethu hune ha pfi Galilea. Kha miṅwe miḓi henefho, o ṱangana na munna ane a vha na vhulwadze vhu ofhisaho ha mapele. (Marko 1:39, 40) Onoyo munna o vha a tshi khou lwala vhukuma lwe Luka we a vha e dokotela, a mu ṱalusa sa “o ḓala[ho] mapele.” (Luka 5:12) Bivhili i amba uri musi munna a lwalaho a tshi vhona Yesu, o “gwadama a mu humbela a ri: ‘Murena, arali u tshi funa, u nga mphodza.’” Onoyo munna o vha a tshi zwi ḓivha uri Yesu u na maanḓa a u mu fhodza, fhedzi o vha a tshi ṱoḓa u ḓivha arali Yesu a tshi funa u mu fhodza. Ndi ngani? Ngauri onoyo munna o vha o ḓowela Vhafarisei vhe vha vha vha tshi dzhiela fhasi vhathu vha re na mapele. Fhedzi Yesu o vha a tshi khou humbula mini? O vha a tshi ḓo fara hani onoyo munna we khamusi a vha o tshinyala lukanda? No vha ni tshi ḓo vha no ita mini?
5. Ndi ngani Yesu o vha a tshi ṱoḓa u fhodza munna wa mapele?
5 Onoyo munna a lwalaho a nga vha a songo vhidzelela uri “Dzitshikha! Dzitshikha!” samusi zwo vha zwi tshi ṱoḓea u ya nga Mulayo wa Mushe. (Levitiko 13:43-46) Fhedzi Yesu ho ngo sinyuwa. Nṱhani hazwo, o vha a tshi khou vhilaela nga ha onoyo munna nahone a tshi ṱoḓa u mu thusa. A ri ḓivhi zwa vhukuma zwe Yesu a vha a tshi khou zwi humbula, fhedzi ri a ḓivha nḓila ye a ḓipfa ngayo. O pfela onoyo munna vhuṱungu lwe a ita vhuṱolo. O ita zwiṅwe zwithu zwe vhaṅwe vhathu vha vha vha sa ḓo zwi ita, o kwama onoyo munna. Yesu o amba nga fulufhelo na u pfela vhuṱungu a ri: “Ndi a funa. Fhola.” Nga murahu, “mapele a mbo ḓi mu ṱutshela.” (Luka 5:13) Vhukuma, Yehova o ṋea Yesu maanḓa a u ita honoho vhuṱolo vhuhulu na u sumbedza nḓila ine a funa ngayo vhathu.—Luka 5:17.
6. Ndi mini zwine zwa takadza nga vhuṱolo he Yesu a vhu ita, nahone vhu sumbedza mini?
6 Yesu o kona u ita vhuṱolo vhunzhi vhu mangadzaho nga maanḓa a Mudzimu. Ho ngo fhodza munna wa mapele fhedzi. Yesu o dovha a fhodza vhathu vhane vha vha na maṅwe malwadze manzhi. Bivhili i ri vhudza uri vhathu vho vha vho mangala musi vha tshi “vhona vha sa koni u amba vha tshi vho amba, na vho holefhalaho vha tshi vho tshimbila na vho pofulaho vha tshi vho vhona.” (Mateo 15:31) Musi Yesu a tshi fhodza muthu, o vha a sa ṱoḓi miraḓo ya muthu ane a vha na mutakalo wavhuḓi uri a ṋeele ngayo u itela u fhodza. Yesu o vha e na maanḓa a u fhodza miraḓo yoṱhe ya muvhili i lwalaho. Nahone o vha fhodza nga u ṱavhanya, nga zwiṅwe zwifhinga o vha a tshi fhodza vhathu vhe vha vha vhe kule nae. (Yohane 4:46-54) Dzenedzi tsumbo dzi takadzaho dzi ri sumbedza mini? Dzi ri sumbedza uri Khosi yashu Yesu Kristo i na maanḓa na lutamo lwa u fhelisa malwadze oṱhe lwa tshoṱhe. Musi ri tshi guda nga nḓila ine Yesu a fara ngayo vhathu, ri vha na fulufhelo ḽa uri shangoni ḽiswa “u [ḓo] khathutshela vhaṱoma na vhatshinyali.” (Psalme ya 72:13) Yesu u ḓo fhodza vhane vha khou shengela ngauri u khou ṱoḓa u ita nga u ralo.
“TAKUWA, U HWALE VHULALO HAU U TSHIMBILE”
7, 8. Ṱalusani zwe zwa itea musi Yesu a sa athu u ṱangana na munna a lwalaho ngei Bethesda.
7 Nga murahu ha miṅwedzi i si gathi a tshi kha ḓi tou bva u fhodza munna wa mapele, Yesu o bva Galilea a ya Yudea he a bvela phanḓa a tshi huwelela mafhungo maḓifha a Muvhuso wa Mudzimu. Hu nga vha ho vha na vhathu vhanzhi vhe vha pfa mulaedza wa Yesu nahone vha kwamea nga lufuno lwe a vha sumbedza. Yesu o vha a tshi ṱoḓa vhukuma u khuthadza vhashai na vho tsikeledzeaho na u ṋea vhenevho vhathu fulufhelo.—Yesaya 61:1, 2; Luka 4:18-21.
8 Yesu o ya Yerusalema u itela u pembelela Paseka nga ṅwedzi wa Nisan. Ho vha ho ḓala nga vhathu vhe vha vha vha tshi khou ḓa kha wonoyo muḓi u itela u pembelela vhuṱambo ho khetheaho. Tsini na thembele ho vha hu na isha ḽine ḽa pfi Bethesda, nahone henefho Yesu o ṱangana na munna a sa koni u tshimbila.
9, 10. (a) Ndi ngani vhathu vho ya ishani ḽa Bethesda? (b) Ndi mini zwe Yesu a zwi ita ishani, nahone zwenezwi zwi ri funza mini? (Sedzani tshifanyiso tsha u thoma.)
9 Tshigwada tsha vhathu vha lwalaho tsho vha tshi tshi ya Bethesda. Ndi ngani? Ngauri tsho vha tshi tshi ḓivha uri muthu a lwalaho o vha a tshi fhola nga lwa vhuṱolo arali a dzhena ishani musi maḓi a tshi khou seluwa. Edzani u humbula nḓila ye vha vha vho ḓaḓa ngayo, musi vha tshi vhona vhathu vhanzhi vho hanganeaho, vha re na mbilaelo, na vho fulufhuwaho vhane vha ṱoḓa u fhodzwa. Yesu o vha o fhelela nahone o vha a sa ṱoḓi u fhodzwa, fhedzi o vha tshi ṱoḓa mini henefho? U funa hawe vhathu zwo mu ita uri a ye henefho. Henefho a ṱangana na munna a lwalaho lwa tshifhinga tshilapfu u fhira miṅwaha ye Yesu a i tshila kha ḽifhasi.—Vhalani Yohane 5:5-9.
Yesu o ṱoḓa vhane vha ṱoḓa thuso
10 Yesu o vhudzisa onoyo munna arali a tshi ṱoḓa u dovha a tshimbila. Edzani u humbula nḓila ye onoyo munna a vha o ṱungufhala ngayo musi a tshi vhudza Yesu uri u ṱoḓa u fhodzwa, fhedzi ho ngo fhola ngauri ho vha hu si na muthu we a vha a tshi nga mu thusa uri a dzhene ishani. Yesu o vhudza onoyo munna uri a ite zwithu zwi sa konadzei. O mu vhudza uri a hwale vhulalo hawe nahone a tshimbile. Ngauralo, onoyo munna a hwala vhulalo hawe nahone a mbo ḓi thoma u tshimbila! Honoho vhuṱolo vhu sumbedza zwavhuḓi zwine Yesu a ḓo zwi ita shangoni ḽiswa. Vhu dovha ha sumbedza nḓila ine Yesu a funa ngayo vhathu zwi tshi bva mbiluni. O ṱoḓa vhane vha ṱoḓa thuso. Tsumbo ya Yesu i ri ṱuṱuwedza uri ri bvele phanḓa ri tshi ṱoḓa vhathu vho tsikeledzeaho tsimuni yashu nga nṱhani ha zwithu zwi ofhisaho zwine zwa khou itea kha ḽino shango.
“NDI NNYI O KWAMAHO ZWIAMBARO ZWANGA?”
11. Marko 5:25-34 i sumbedza hani uri Yesu o vha a tshi funa vhathu vha lwalaho?
11 Vhalani Marko 5:25-34. Muṅwe mufumakadzi o vha e na vhulwadze vhu shonisaho lwa miṅwaha ya 12. Vhulwadze hawe ho kwama vhutshilo hawe, u katela na vhurabeli hawe. O ya kha madokotela manzhi nahone a fhedza tshelede yawe yoṱhe a tshi khou lingedza u wana dzilafho, fhedzi zwa tou ṋaṋa zwi tshi ya. Ḽiṅwe ḓuvha onoyo mufumakadzi, o dzudzanya u ita zwiṅwe zwithu uri a vhe khwine, ngauralo, a tshimbila vhukati ha gogo ḽa vhathu nahone a kwama tshiambaro tsha Yesu. (Levitiko 15:19, 25) Musi Yesu a tshi ṱhogomela uri maanḓa o bva khae, o vhudzisa uri ndi nnyi o mu kwamaho. Onoyo mufumakadzi “o vha o tshuwa a tshi khou tetemela, . . . a ḓa a gwadama phanḓa hawe nahone a mu vhudza ngoho yoṱhe.” Yesu o vha a tshi zwi ḓivha uri Yehova o fhodza onoyo mufumakadzi, ngauralo, Yesu o amba nae nga vhuthu a ri: “Ṅwana’nga, lutendo lwau lwo u fhodza. Ṱuwa nga mulalo, nahone u fhole vhulwadze hau.”
Yesu o sumbedza uri u na ndavha vhukuma na riṋe na thaidzo dzashu nga u ita vhuṱolo hawe (Sedzani dziphara 11, 12)
12. (a) Ni nga ṱalusa hani Yesu kha zwe ra zwi guda? (b) Ndi tsumbo ifhio ye Yesu a ri vhetshela yone?
12 Zwi a ri takadza vhukuma u vhona nḓila ye Yesu a funa ngayo vhathu zwihuluhulu vhe vha vha vha tshi khou lwala. Zwenezwi zwo fhambana vhukuma na Sathane ane a lingedza u ita uri ri tende uri a ri vha ndeme nahone a hu na muthu ane a ri funa. Naho zwo ralo, vhuṱolo ha Yesu vhu sumbedza uri u na ndavha vhukuma na riṋe na thaidzo dzashu. Ri a livhuha vhukuma ngauri ri na Khosi na Tshifhe Muhulu! (Vhaheberu 4:15) Zwi nga ri konḓela u pfesesa nḓila ine muthu o lwalaho lwa tshifhinga tshilapfu a ḓipfa ngayo, zwihuluhulu arali ri sa lwali. Fhedzi humbulani nga ha Yesu. O vha a tshi pfela vhathu vha lwalaho vhuṱungu naho ene a sa athu u vhuya a lwala. U nga ri ri nga ita zwoṱhe zwine ra nga kona u itela u edzisa tsumbo yawe ya lufuno.—1 Petro 3:8.
“YESU A LILA”
13. U vuswa ha Lazaro zwi sumbedza mini nga ha Yesu?
13 Yesu o vha a tshi kwamea vhukuma musi vhaṅwe vha tshi pfa vhuṱungu. Sa tsumbo, musi khonani yawe Lazaro i tshi fa, Yesu o ‘vhaisala’ nahone “a ṱungufhala zwihulu” musi a tshi vhona muṱa na khonani dza Lazaro vha tshi pfa vhuṱungu. (Vhalani Yohane 11:33-36.) Yesu o lila, naho o vha a tshi zwi ḓivha uri u ḓo vusa Lazaro. O vha a sa ofhi u sumbedza vhaṅwe nḓila ye a vha a tshi ḓipfa ngayo. Yesu o funa Lazaro na muṱa wawe vhukuma lwe a shumisa maanḓa a Mudzimu u vusa Lazaro!—Yohane 11:43, 44.
14, 15. (a) Ndi mini zwine zwa sumbedza uri Yehova u ṱoḓa u fhelisa u shengela ha vhathu? (b) Ndi mini zwine ra zwi guda kha mubulo une wa ri “mavhiḓani”?
14 Bivhili i ṱalusa Yesu sa ane a fana kokotolo na Khotsi awe Yehova. (Vhaheberu 1:3) Nga zwenezwo, vhuṱolo ha Yesu vhu sumbedza uri na Yehova u ṱoḓa u fhelisa malwadze, vhuṱungu na lufu. Hu si kale Yehova na Yesu vha ḓo vusa vhathu vhanzhi. Yesu o amba uri “hu ḓa tshifhinga tshine vhoṱhe vha re mavhiḓani” vha ḓo vuswa.—Yohane 5:28, 29.
15 Yesu o shumisa mubulo une wa ri “mavhiḓani,” une wa sumbedza uri Mudzimu u ḓo vha humbula. Mudzimu Ramaanḓaoṱhe ane a vha Musiki wa fhethu hoṱhe, a nga humbula zwidodombedzwa zwa vha funwa vhashu vho faho, u katela na vhumuthu havho. (Yesaya 40:26) Yehova ha sokou vha humbula fhedzi, fhedzi u a ṱoḓa u vha humbula. Mvuwo dze dza ambiwa Bivhilini ndi tsumbo dzavhuḓi dza zwine zwa ḓo itea shangoni ḽiswa.
ZWINE RA ZWI GUDA KHA VHUṰOLO HA YESU
16. Ndi tshibuli tshifhio tshavhuḓi tshine vhashumeli vha Mudzimu vha vha natsho?
16 Arali ra dzula ri tshi fulufhedzea, ri ḓo kona u vhona vhuṱolo vhuhulwane vhu sa athu u vhuya ha itea, ha u ponyoka maṱungu mahulu! Nga murahu ha Haramagedo, ri ḓo vhona vhuṱolo vhunzhi. Nga tshenetsho tshifhinga muthu muṅwe na muṅwe u ḓo vha na mutakalo wavhuḓi. (Yesaya 33:24; 35:5, 6; Nzumbululo 21:4) Edzani u humbula ni tshi khou vhona vhathu vha tshi khou laṱa mangilasi a maṱo, thonga, magobodo, zwidulo zwa vhaholefhali na zwithusedzi zwa u pfa. Yehova u a zwi ḓivha uri vhoṱhe vhe vha ponyoka Haramagedo vha fanela u dzula vho khwaṱha na u vha na mutakalo wavhuḓi ngauri vha ḓo vha vhe na mushumo munzhi une vha fanela u u ita. Ndi vhone vhane vha ḓo shandukisa Ḽifhasi ḽashu ḽavhuḓi ḽa vha paradiso.—Psalme ya 115:16.
17, 18. (a) Ndi ngani Yesu o ita vhuṱolo? (b) Ndi ngani ni tshi fanela u ita zwoṱhe zwine zwa ṱoḓea u itela u vha shangoni ḽiswa ḽa Mudzimu?
17 Ṋamusi “gogo ḽihulu” ḽi a ṱuṱuwedzea musi ḽi tshi vhala nga ha nḓila ye Yesu a fhodza ngayo vhalwadze. (Nzumbululo 7:9) Honoho vhuṱolo vhu khwaṱhisa fulufhelo ḽashu ḽavhuḓi ḽa u fhodzwa tshoṱhe tshifhingani tshi ḓaho. Vhu dovha ha ri sumbedza nḓila ine Murwa wa Mudzimu wa tanzhe a funa ngayo vhathu. (Yohane 10:11; 15:12, 13) U pfela vhuṱungu ha Yesu zwi sumbedza uri Yehova u funa vhashumeli vhawe zwi tshi bva mbiluni.—Yohane 5:19.
18 Ṋamusi shango ḽo ḓala vhuṱungu, tshengelo na lufu. (Vharoma 8:22) Ndi ngazwo ri tshi ṱoḓa shango ḽiswa ḽa Mudzimu. Henefho, vhathu vhoṱhe vha ḓo vha na mutakalo wo fhelelaho we Mudzimu a fulufhedzisa. Maleaxi 3:20 i ri ṋea fulufhelo ḽa uri ri ḓo “pembela sa ṋamana dzo khwaṱhaho,” ra takala na u khana sa ṋamana ngauri ro fhodzwa na u vhofhololwa kha u sa fhelela. U nga ri u dzhiela nṱha hashu Yehova na u vha na lutendo kha mafulufhedziso awe zwi nga ri ṱuṱuwedza u ita zwoṱhe zwine zwa ṱoḓea u itela uri ri dzhene shangoni ḽiswa. Zwi a ri ṱuṱuwedza lungafhani u ḓivha uri vhuṱolo he Yesu a vhu ita ho vha hu tsumbo yavhuḓi ine ya sumbedza uri hu si kale vhathu vha ḓo ḓiphina musi a tshi vhusa lwa tshoṱhe!
