1. Ri khou tshila tshifhingani tshifhio?

RI KHOU tshila “zwifhinga[ni] zwi lemelaho zwi konḓaho u sedzana nazwo.” U bva nga 1914, musi hu tshi thoma ‘maḓuvha a vhufhelo,’ vhuimo shangoni ho ṋaṋa u fhira naho hu lini. (2 Timotheo 3:1-5) Nahone ri nga vha na vhungoho ha uri shango ḽi ḓo bvela phanḓa ḽi tshi vha ḽivhi, ngauri vhuporofita ha Bivhili vhu amba uri “vhathu vhavhi na vhadzia-vhufhura vha ḓo tou ṋaṋa u ita vhuvhi.”—2 Timotheo 3:13.

2. Ndi vhuḓimvumvusi vhufhio vhune vhathu vha vhu takalela? (Sedzani tshifanyiso tsha u thoma.)

² Vhathu vhanzhi ṋamusi vha ḓimvumvusa nga u ṱalela kana u ita zwithu zwa vhuvemu kana u ḓifara luvhi kana u ḓidzhenisa kha zwa madambi na madimoni. Sa tsumbo, Inthanethe, mbekanyamushumo dza thelevishini, mimuvi, dzibugu na dzimagazini kanzhi zwi ita uri vhuvemu na u ḓifara luvhi zwi vhonale zwi tshi ṱanganedzea. Nahone vhuḓifari he ha vha vhu tshi tshuwisa vhathu vhu vho ṱanganedzea nahone ho no vha mulayoni huṅwe fhethu. Fhedzi zwenezwo a zwi  ambi uri Yehova u takalela honoho vhuḓifari.—Vhalani Vharoma 1:28-32.

3. Vhathu vhanzhi vha humbula mini nga ha vhathu vhane vha tshila nga zwilinganyo zwa Mudzimu?

³ Ḓanani ḽa u thoma ḽa miṅwaha, vhathu vho vha vha tshi ḓimvumvusa nga u ṱalela vhuvemu na u ḓifara luvhi. Fhedzi vhatevheli vha Yesu a vho ngo ita ngauralo ngauri vho vha vha tshi tshila nga zwilinganyo zwa Mudzimu. Zwenezwi zwo ‘mangadza’ vhathu vho vha tangaho. Ho vha na mvelelo dzifhio? Vhathu vho vha vha tshi ita miswaswo nga Vhakriste nahone vho vha vha tshi vha tovhola. (1 Petro 4:4) Na ṋamusi, vhathu vhanzhi vha humbula uri vhathu vhane vha tshila nga zwilinganyo zwa Mudzimu a vha pfesesei. Zwi re zwone ndi uri Bivhili i ri sevha uri vhane vha tevhela tsumbo ya Yesu Kristo “na vhone vha ḓo tovholwa.”—2 Timotheo 3:12.

4. Ndi ngani ri songo fanela u funa ḽino shango?

⁴ Arali ri tshi ṱoḓa u ita zwine Mudzimu a zwi funa, ri nga si fune “shango kana zwithu zwi re khaḽo.” (Vhalani 1 Yohane 2:15, 16.) Sathane “mudzimu wa ano maitele a zwithu,” u langa shango. U shumisa vhurereli, mivhuso, madzangano a zwa vhuvhambadzi na vhaanḓadzi vha mafhungo u itela u xedza vhathu. (2 Vhakorinta 4:4; 1 Yohane 5:19) A ri ṱoḓi u ṱuṱuwedzwa nga shango, ngauralo, ri fanela u iledza vhukonani vhu si havhuḓi. Bivhili i ri sevha uri: “Ni songo fhurwa. Vhukonani vhu si havhuḓi vhu tshinya vhuḓifari havhuḓi.”—1 Vhakorinta 15:33.

5, 6. A ro ngo fanela u ḓikonanya na vhafhio, nahone ndi ngani?

⁵ U itela u dzula ri na vhushaka havhuḓi na Yehova, a ri khethi u ḓikonanya na vhathu vhane vha ita zwithu zwivhi. Zwenezwi zwi katela vhathu vhane vha amba uri vha gwadamela Yehova, ngeno vha tshi khetha u sa mu thetshelesa. Arali vhathu vho raloho, vha ita tshivhi tshihulwane nahone vha si rembuluwe, ri litsha u ḓikonanya navho.—Vharoma 16:17, 18.  

⁶ Kanzhi vhathu vha ṱoḓa u takadza khonani dzavho na u takalelwa ngadzo. Nga zwenezwo, arali ra ḓikonanya na vhathu vhane vha si thetshelese Mudzimu, na riṋe ri nga lingea u ita zwine vha zwi ita. Sa tsumbo, arali ra vha na vhukonani ha tsini na vhathu vhane vha ḓifara luvhi nga zwa vhudzekani, ri nga kha ḓi fana navho. Zwenezwo zwo itea kha vhahashu. Nahone vhe vha si rembuluwe vho bviswa tshivhidzoni. (1 Vhakorinta 5:11-13) Nga nnḓa ha musi vha tshi rembuluwa, vhuimo havho vhu nga fana na he ha ṱaluswa nga Petro.—Vhalani 2 Petro 2:20-22.

7. Ndi vhafhio vhane ra fanela u vha khetha uri vha vhe khonani dzashu dza tsini?

⁷ Naho ri tshi ṱoḓa u vha na vhuthu kha  muṅwe na muṅwe, a ro ngo fanela u vhumba vhukonani ha tsini na vhathu vhane vha si thetshelese Mudzimu. Zwi ḓo vha zwi vhutsilu uri Ṱhanzi ya Yehova i siho mbinganoni i khethe u dzula na muthu ane a sa ṱhonifhe na u tshila nga zwilinganyo zwa Yehova. Zwi ḓo vha zwo khakhea uri Ṱhanzi ya Yehova i funane na muthu ane a si vhe mushumeli wa Yehova a fulufhedzeaho na o lovhedzwaho. Ndi zwa ndeme vhukuma u ṱanganedzwa nga Mudzimu, u fhira u takadza vhathu vhane vha si mu fune. Ri fanela u vha na vhukonani ha tsini fhedzi na vhathu vhane vha ita zwine Mudzimu a zwi funa. Yesu o ri: “Ngauri ane a ita zwine Khotsi anga a zwi funa, ndi ene murathu wanga na khaladzi anga na mme anga.”—Marko 3:35.

8. Vhukonani vhu si havhuḓi ho kwama hani Isiraele ḽa kale?

⁸ Vhukonani vhu si havhuḓi vhu vha na masiandoitwa a si avhuḓi. Sa tsumbo, ṱhogomelani zwe zwa itea kha Vhaisiraele. Musi vha sa athu u swika Shangoni ḽo Fulufhedziswaho, Yehova o vha sevha nga ha vhathu vhane vha dzula henefho. O ri: “U songo rabela midzimu yavho; U songo i shumela wa edzisa maitele avho; one U a fhedzise tshoṱhe, U phusukanye zwifanyiso zwa midzimu yavho. Inwi ni shumele Yehova Mudzimu waṋu.” (Ekisodo 23:24, 25) Fhedzi vhunzhi ha Vhaisiraele a vho ngo thetshelesa ndaela ya Mudzimu nahone a vho ngo fulufhedzea khae. (Psalme ya 106:35-39) Ho vha na mvelelo dzifhio? Nga murahu, Yehova o landula lushaka lwa Isiraele nahone a khetha tshivhidzo tsha Vhakriste sa vhathu vhawe.—Mateo 23:38; Mishumo 2:1-4.

9. Ndi ngani zwianḓadzi zwa mafhungo zwa ḽino shango zwi khombo?

⁹ Vhunzhi ha zwenezwi zwianḓadzi zwa mafhungo zwa ḽino shango, zwi nga ho sa mbekanyamushumo dza thelevishini, website na dzibugu, zwi nga tshinya vhushaka hashu na Yehova. Zwenezwi zwithu a zwo ngo itelwa u thusa Vhakriste uri vha vhe na lutendo kha Yehova na mafulufhedziso awe. Nṱhani hazwo, zwi ṱuṱuwedza vhathu uri vha fulufhele shango ḽivhi ḽa Sathane. Nga u ralo, ri fanela u ṱhogomela vhukuma uri ri si khethe u ṱalela, u vhala kana u thetshelesa zwithu zwine zwa nga ita uri ri vhe na “nyemulo dza shango.”—Tito 2:12.

10. Hu ḓo itea mini kha zwianḓadzi zwa ḽino shango?

¹⁰ Hu si kale, shango ḽa Sathane na zwianḓadzi zwa mafhungo zwi re na khombo zwi ḓo fheliswa. Bivhili i ri: “Shango ḽi a fhira na nyemulo dzaḽo, fhedzi ane a ita zwine Mudzimu a zwi funa u ḓo dzula e hone lini na lini.” (1 Yohane 2:17) Nga hu fanaho, mupsalme o imba a ri: “Vhadzia-u-tshinya vha ḓo lovha.” O dovha a ri: “Shango ḽi ḓo vha ifa ḽa vho vuḓaho; ndi vhone vha u ḓo takalela muḓalo wa mulalo.” Zwi ḓo dzhia tshifhinga tshingafhani? “Vha u ḓo vha vhaṋe vha shango ndi vhavhuya, ndi vhone vha u ḓo dzula khaḽo’ lini na lini.”—Psalme ya 37:9, 11, 29.

11. Mudzimu u ri thusa hani uri ri dzule ri tshi fulufhedzea khae?

¹¹ U fhambana na shango ḽa Sathane, ndangulo ya Yehova i ri thusa uri ri tshile nga nḓila i ri livhisaho vhutshiloni vhu sa fheli. Yesu o rabela Yehova, a ri: “Uri vha wane vhutshilo vhu sa fheli, vha fanela uri  vha ḓivhe iwe Mudzimu wa ngoho u woṱhe, vha ḓivhe na Yesu Kristo we wa mu ruma.” (Yohane 17:3) Yehova u shumisa ndangulo yawe u itela u ri ṋea zwoṱhe zwine ra zwi ṱoḓa u itela uri ri mu ḓivhe. Sa tsumbo, ri na magazini nnzhi, dzibugwana, dzibugu, dzividio na website zwine zwa ri thusa uri ri dzule ri tshi shumela Mudzimu. Ndangulo yawe i dovha ya dzudzanya miṱangano ya tshifhinga tshoṱhe zwivhidzoni zwi fhiraho 110 000 shangoni ḽoṱhe. Zwine ra zwi guda Bivhilini kha yeneyo miṱangano na kha maguvhangano mahulwane zwi khwaṱhisa lutendo lwashu kha Yehova na mafulufhedziso awe.—Vhaheberu 10:24, 25.

12. Ṱalutshedzani ndaela i re Bivhilini ya u vhinga kana u vhingwa “Murenani fhedzi.”

¹² Vhakriste vhane vha ṱoḓa u vhinga kana u vhingwa vha fanela u ṱhogomela nga vhuronwane vhane vha khetha u konana navho. Ipfi ḽa Mudzimu ḽi a ri sevha: “Ni songo ḓikungela dzhogo na vha sa tendiho. Ngauri u luga na vhutshinyi zwi na vhushaka-ḓe? Kana tshedza na swiswi zwi ṱangana’fhi?” (2 Vhakorinta 6:14) Bivhili i vhudza vhashumeli vha Mudzimu uri vha vhinge kana u vhingwa “Murenani fhedzi,” zwine zwa amba u vhinga kana u vhingwa fhedzi nga muthu o ḓiṋekedzelaho na o lovhedzwaho na ane a tshila nga zwilinganyo zwa Yehova. (1 Vhakorinta 7:39) Musi ni tshi vhinga kana u vhingwa nga muthu o raloho, muthu ane a funa Yehova, ni ḓo vha ni na mufarisi ane a ḓo ni thusa u dzula ni tshi fulufhedzea kha Mudzimu.

13. Mudzimu o ṋea Vhaisiraele ndaela ifhio nga ha mbingano?

¹³ Yehova u a ḓivha zwi re khwine kha riṋe nahone ndaela ya u vhinga kana u vhingwa “Murenani fhedzi” a si zwithu zwiswa. Sa tsumbo, ṱhogomelani zwe Yehova a zwi vhudza Vhaisiraele nga ha vhathu vhe vha vha vha sa mushumeli. A tshi shumisa Mushe, o ṋea ndaela ya uri: “Ni songo dzeana navho’; ṅwananyana wa hau a songo dzewa nga munna wa havho; na murwa wau U songo mu dzekisa ṅwananyana wa havho; ngauri vha nga ḓo ungelela vhana vhau vha ndaṱa vha shumela midzimu i sili; mbiti dza Yehova dza vhó ḓo U dugela, dza ṱavhanya u ni lozwa.”—Doiteronomio 7:3, 4.

14, 15. Ho itela mini kha Salomo nge a si thetshelese ndaela ya Yehova?

¹⁴ Nga u ṱavhanya musi Salomo a tshi vha khosi ya Isiraele, o humbela vhuṱali nga thabelo nahone Yehova a fhindula thabelo yawe. Nga zwenezwo, Salomo o vha na bvumo sa muvhusi a re na vhuṱali wa lushaka lwo bvelelaho. Zwi re zwone ndi uri mufumakadzi wa Saba o vha o takadzwa vhukuma nga vhuṱali ha Salomo lwe a ri khae: “Vhuṱali hau na vhuḓi hau, zwi fhira zwine vha U amba ngazwo’, zwe nṋe nda zwi pfa.” (1 Dzikhosi 10:7) Fhedzi  tsumbo ya Salomo i dovha ya ri funza zwine zwa nga itea arali muthu a sa thetshelesa ndaela ya Mudzimu nahone a vhinga kana u vhingwa nga muthu a sa shumeli Yehova.—Muhuweleli 4:13.

¹⁵ Naho Yehova o vha o mu fhaṱutshedza, Salomo ho ngo thetshelesa ndaela ya Mudzimu i pfalaho. Salomo “o vha a tshi funa vhasadzi vha dziṅwe dzitshakha” vhe vha vha vha sa shumeli Yehova nahone mafheleloni o vha e na vhasadzi vha 700 na vhaṅwe vhasadzi vha 300. Ho vha na mvelelo dzifhio? Musi Salomo o no kalaha, vhafumakadzi vhawe “vha ungeledza mbilu yawe, a tevhela midzimu i sili, . . . Salomo a ita zwe zwa vhifhela Yehova.” (1 Dzikhosi 11:1-6) Vhukonani vhu si havhuḓi ho mu ita uri a si tsha fulufhedzea kha Yehova. Arali zwenezwi zwo itea kha Salomo, zwi nga itea kha muṅwe na muṅwe. Ndi ngazwo ri sa vhuyi ra humbula u vhinga kana u vhingwa nga muthu a sa funi Yehova!

16. Ndi nyeletshedzo ifhio ine Bivhili ya i ṋea muthu o vhingaho kana o vhingwaho nga muthu ane a si vhe mutendi?

¹⁶ Hu pfi mini arali muthu a vha mugwadameli wa Yehova, ngeno o vhinga kana u vhingwa nga muthu ane a si vhe mutendi? Bivhili i ri: “Na inwi vhafumakadzi, ḓiṱukufhadzeni kha vhanna vhaṋu, uri arali hu na vhane vha si thetshelese ipfi ḽa Mudzimu, vha kungee hu songo ambiwa navho, fhedzi nga vhuḓifari ha vhafumakadzi vhavho.” (1 Petro 3:1) Vhukuma, zwenezwi zwi dovha zwa shuma na kha munna ane mufumakadzi wawe a si vhe mugwadameli wa Yehova. Ipfi ḽa Mudzimu  ḽi khagala: Ivhani munna kana mufumakadzi wavhuḓi nahone ni shumise zwilinganyo zwa Mudzimu zwa mbingano. Nga zwenezwo, musi mufarisi waṋu a tshi ṱhogomela uri no shanduka, na ene a nga ṱoḓa u shumela Yehova. Zwenezwi ndi zwe vhavhingani vhanzhi vha zwi tshenzhela.

17, 18. Ndi mini zwe zwa thusa Noaxe u ponyoka Maḓi Mahulu, nahone ndi mini zwe zwa thusa Vhakriste vha ḓanani ḽa u thoma ḽa miṅwaha u ponyoka u fheliswa ha Yerusalema?

¹⁷ Vhukonani vhu si havhuḓi vhu nga ni ṱuṱuwedza uri ni si thetshelese Yehova, fhedzi vhukonani havhuḓi vhu nga ni thusa uri ni fulufhedzee khae. Noaxe ndi tsumbo yavhuḓi kha riṋe. O tshila tshifhingani tsha musi “vhuvhi ha vhathu hó anda fhano shangoni” nahone “zwoṱhe zwiito na mihumbulo yavho zwí zwivhi fhedzi misi yoṱhe.” (Genesi 6:5) Vhathu vho vha vhe vhavhi lwe Yehova a dzhia phetho ya u fhelisa shango ḽivhi. Fhedzi Noaxe o vha o fhambana navho. Bivhili i mu vhidza “munna muvhuya” we a “pfana na Mudzimu.”—Genesi 6:7-9.

¹⁸ Noaxe o vha a sa ḓikonanyi na vhathu vhe vha vha vha sa funi Yehova. Ene na muṱa wawe vho vha vho farakanea nga u fhaṱa gungwa nahone o dovha a “huwelela nga ha u luga.” (2 Petro 2:5) Noaxe, mufumakadzi wawe, vharwa vhawe vhararu na vhafumakadzi vhavho vho vha vhe na vhukonani havhuḓi. Vho vha vha tshi dzula vho farakanea nga u ita zwithu zwi takadzaho Mudzimu nahone zwenezwo zwo ita uri vha ponyoke Maḓi Mahulu. Roṱhe ṋamusi ri vhaḓuhulu vhavho, ngauralo, ri fanela u livhuha uri Noaxe na muṱa wawe vho thetshelesa Yehova na u iledza vhukonani vhu si havhuḓi. Nga nḓila i fanaho, Vhakriste vha ḓanani ḽa u thoma ḽa miṅwaha a vho ngo vha na vhukonani na vhathu vhe vha vha vha sa funi Yehova. Vho mu thetshelesa nahone vha ponyoka musi Yerusalema u tshi fheliswa nga 70 C.E.—Luka 21:20-22.

19. Ndi mini zwine zwa ḓo ri thusa u dzula ri tshi fulufhedzea kha Yehova?

¹⁹ U fana na Noaxe, muṱa wawe na Vhakriste vha ḓanani ḽa u thoma ḽa miṅwaha, a ri ḓikonanyi na vhathu vhane vha si fune Yehova. Ri na vhahashu vhanzhi vha fulufhedzeaho vhane ra nga vha nanga sa dzikhonani dzashu. Vha ḓo ri thusa u ‘ima ro khwaṱha lutendoni’ zwifhingani zwenezwi zwi konḓaho. (1 Vhakorinta 16:13; Mirero 13:20) Humbulani uri zwi ḓo vha zwi zwavhuḓi lungafhani u ponyoka vhufhelo ha ḽino shango ḽivhi na u tshila shangoni ḽiswa ḽa Yehova! Ndi zwa ndeme lungafhani u iledza u ḓikonanya na vhavhi zwino!