1, 2. Ndi mavhonele afhio ane vhashumeli vha Yehova vha vha nao?

VHASHUMELI vha Yehova vho lindela vha sa fheli mbilu uri vhuporofita vhu ḓadzee. Sa tsumbo, Yeremia o vha o lavhelela uri Vhababele vha ḓo fhelisa Yuda, nahone zwenezwo zwo itea nga 607 B.C.E. (Yeremia 25:8-11) Yesaya o porofita uri Yehova u ḓo bvisa Vhayuda vhuthubwani vha vhuyelela Yuda nahone a ri: “Vha mashudu ndi vhane vha lindela Ene.” (Yesaya 30:18) Na Mixa o vha o lavhelela uri mafulufhedziso a Yehova a ḓo ḓadzea nahone a ri: “Ndi lavhelesa Yehova.” (Mixa 7:7) Nahone lwa miṅwaha minzhi, vhashumeli vha Mudzimu vho vha vhe na fulufhelo ḽa uri Messia o fulufhedziswaho kana Kristo u ḓo ḓa.—Luka 3:15; 1 Petro 1:10-12. * (Sedzani ṱhaluso i re magumoni a siaṱari.)

² Na riṋe ṋamusi, ro lindela vhuporofita nga ha Muvhuso wa Yehova vhu tshi ḓadzea. Yesu, sa Khosi ya Muvhuso u ḓo vhofholola vhashumeli vha Mudzimu hu si kale kha ḽino shango ḽi re na khombo. U ḓo fhelisa vhathu vhavhi na tshengelo yoṱhe. (1 Yohane 5:19) Nga zwenezwo, ri fanela u dzula ro lavhelela  uri ḓuvha ḽa Yehova ḽi ḓo ḓa tshifhinga tshiṅwe na tshiṅwe na u ita zwoṱhe zwine ra nga kona u itela u dzula ro ḽi lindela.

3. Arali ro lindela lwa tshifhinga tshilapfu uri vhufhelo vhu ḓe, ri nga ḓivhudzisa mini?

³ Ri lavhelela nga maṱo matswuku ḓuvha ḽa musi zwine Mudzimu a zwi funa zwi tshi itwa kha ḽifhasi. (Mateo 6:10) Fhedzi arali ro lindela lwa miṅwaha minzhi uri vhufhelo vhu swike, ri nga thoma u ḓivhudzisa uri, ‘Ndi ngani ri tshi fanela u dzula ro lavhelela uri vhufhelo vhu ḓo ḓa hu si kale?’

4. Ndi ngani zwi zwa ndeme uri ri ‘dzule ro fhaṱuwa’?

⁴ Yesu o ṋea vhatevheli vhawe ndaela ya uri vha ‘dzule vho fhaṱuwa.’ Ndi ngazwo zwi zwa ndeme uri ri dzule ro lavhelela uri vhufhelo vhu ḓo ḓa hu si kale. (Mateo 24:42; Luka 21:34-36) Zwiṅwe hafhu, ndangulo ya Yehova i dzula i tshi ri humbudza u “lindela na u dzula [r]i tshi humbula u vha hone ha ḓuvha ḽa Yehova” na u dzula ro livhisa ṱhogomelo kha fulufhedziso ḽa Yehova ḽa shango ḽiswa.—Vhalani 2 Petro 3:11-13.

5. Ndi tshifhio tshiṅwe tshiitisi tshine ra vha natsho tsha u dzula ro lavhelela ḓuvha ḽa Yehova?

⁵ Arali vhatevheli vha Yesu vha ḓanani ḽa u thoma ḽa miṅwaha vho vha vha tshi fanela u dzula vho lavhelela ḓuvha ḽa Yehova, ndi zwa ndeme vhukuma na kha riṋe ṋamusi. Ndi ngani? Ngauri tshiga tshe tsha ṋewa nga Yesu tshi sumbedza uri ndi kale e Khosi ya Muvhuso wa Mudzimu u bva nga 1914 na uri ri khou tshila maḓuvhani a vhufhelo, kana kha “vhufhelo ha ano maitele a zwithu.” Sa tsumbo, samusi Yesu o zwi porofita, vhuimo ha shango vhu khou ṋaṋa nahone mafhungo maḓifha a Muvhuso a khou huwelelwa ḽifhasini ḽoṱhe. (Mateo 24:3, 7-14) Yesu ho ngo amba uri maḓuvha a vhufhelo a ḓo dzhia tshifhinga tshingafhani, nga zwenezwo, ri fanela u dzula ro ḓilugiselela uri vhufhelo vhu ḓo ḓa tshifhinga tshiṅwe na tshiṅwe.

6. Ri zwi ḓivha hani uri vhuimo ha shango vhu ḓo ṋaṋa musi ri tsini na vhufhelo?

⁶ Naa “vhufhelo ha ano maitele a zwithu” vhu ambela kha tshifhinga tshi ḓaho musi shango ḽi tshi ṋaṋa u fhira zwino? Bivhili i amba uri vhathu vha ḓo vha vhavhi nga ho engedzeaho “maḓuvhani a vhufhelo.” (2 Timotheo 3:1, 13; Mateo 24:21; Nzumbululo 12:12) Nga zwenezwo, naho zwino zwithu zwo vhifha vhukuma, ri a ḓivha uri zwithu zwi ḓo bvela phanḓa zwi tshi ṋaṋa.

7. Mateo 24:37-39 i ri funza mini nga ha vhuimo ha shango ha maḓuvhani a vhufhelo?

⁷ Vhaṅwe vha nga humbula uri musi “maṱungu mahulu” a sa athu u ḓa, hu ḓo vha na nndwa mashangoni oṱhe na uri vhathu vhanzhi vha ḓo lwala kana u fa nga nḓala. (Nzumbululo 7:14) Fhedzi arali zwenezwo zwa itea, zwi ḓo vha khagala kha muṅwe na muṅwe uri vhuporofita ha Bivhili vhu khou ḓadzea. Zwi ḓo vha khagala na kha vhathu vhane vha si vhe na dzangalelo kha zwine Bivhili ya zwi amba. Humbulani uri Yesu o ri maḓuvhani a vhufhelo vhathu vhanzhi a vha nga ḓo “ṱhogomela tshithu.” Vha ḓo vha vha tshi khou tshila vhutshilo ha ḓuvha ḽiṅwe na ḽiṅwe ho ḓoweleaho nahone vha ḓo mangala musi ḓuvha ḽa Yehova ḽi tshi ḓa. (Vhalani Mateo 24:37-39.) Vhukuma, a ro ngo fanela u lavhelela uri vhuimo ha shango vhu ḓo ṋaṋa u vha vhuvhi musi “maṱungu mahulu” a sa athu u ḓa zwine zwa ḓo ita uri  vhathu vha tende uri vhufhelo vhu tsini.—Luka 17:20; 2 Petro 3:3, 4.

8. Ngauri ro fhaṱutshela tshiga tsha Yesu, ri na vhungoho vhufhio?

⁸ Tshiga tshe Yesu a tshi ṋea tsho vha tsho itelwa u ṋea vhatevheli vhawe tsevho i re khagala ya tshifhinga tshee vha vha vha tshi ḓo vha vha tshi khou tshila khatsho. Vhatevheli vha Yesu vho vha vho fhaṱuwa. (Mateo 24:27, 42) U bva nga 1914, zwipiḓa zwo fhamba-fhambanaho zwa tshiga tsha Yesu zwi khou ḓadzea. Ri na vhungoho ha uri ri khou tshila maḓuvhani a vhufhelo ha ano “maitele a zwithu.” Yehova o no dzhia phetho ya uri u ḓo fhelisa lini shango ḽivhi ḽa Sathane.

9. Ndi ngani ri tshi fanela u dzula ro lavhelela uri vhufhelo vhu ḓo ḓa hu si kale?

⁹ Nga zwenezwo, ndi ngani ri tshi fanela u dzula ro lavhelela uri vhufhelo vhu ḓo ḓa hu si kale? Ngauri ri thetshelesa Yesu Kristo. Zwiṅwe hafhu, ri zwi vhona zwavhuḓi uri tshiga tshe Yesu a tshi ṋea nga ha maḓuvha a vhufhelo tshi khou ḓadzea. Ri tenda uri vhufhelo vhu tsini, hu si ngauri ri tenda zwiṅwe na zwiṅwe zwine ra zwi pfa, fhedzi ngauri ri a tenda uri vhuporofita ha Bivhili vhu khou ḓadzea. Ri fanela u dzula ro fhaṱuwa na u dzula ro ḓilugiselela u ḓa ha vhufhelo.

10, 11. (a) Ndi ngani Yesu o vhudza vhafunziwa vhawe uri vha ‘dzule vho fhaṱuwa’? (b) Yesu o vhudza vhatevheli vhawe uri vha ite mini arali vhufhelo ha sa ṱavhanya u swika nga tshifhinga tshee vha vha vho tshi lavhelela? (Sedzani tshifanyiso tsha u thoma.)

¹⁰ Ndi kale vhunzhi hashu ri tshi khou shumela Yehova nga u fulufhedzea na u lindela nga u fhisea uri ḓuvha ḽawe ḽi ḓe. Hu sa londwi uri ndi kale ro lindela, ri fanela u dzula ro lavhelela uri ḽeneḽo ḓuvha ḽi ḓo ḓa hu si kale. Ri fanela u ḓilugiselela musi Yesu a tshi ḓa u fhelisa shango ḽa Sathane. Humbulani zwe Yesu a vhudza vhafunziwa vhawe uri vha zwi ite: “Dzulani no fhaṱuwa ngauri a ni ḓivhi uri tshifhinga tsho vhewaho tshi lini. Zwi fana na muthu ane a khou fara lwendo lwa u ya shangoni ḽa kule ane a sia nnḓu yawe, o ṋea vhalanda vhawe maanḓa, muṅwe na muṅwe o mu ṋea mushumo wawe, nahone a laya mulindi wa muṋango uri a dzule o fhaṱuwa. Ngauralo, dzulani no fhaṱuwa, ngauri a ni ḓivhi uri Muṋe wa nnḓu u ḓo vhuya lini, kana nga madekwana kana vhukati ha vhusiku kana nga maḓautsha, uri musi a tshi vhuya zwi songo lavhelelwa, a si ni wane no eḓela. Fhedzi zwine nda vhudza inwi, ndi vhudza vhoṱhe ndi ri: Dzulani no fhaṱuwa.”—Marko 13:33-37.

¹¹ Musi vhatevheli vha Yesu vha tshi pfesesa uri o thoma u vhusa nga 1914, vho ṱhogomela uri vhufhelo vhu nga swika tshifhinga tshiṅwe na tshiṅwe. Nga zwenezwo, vho ḓilugiselela vhufhelo nga u ita zwo engedzeaho kha mushumo wa u huwelela. Yesu o amba uri a nga ḓa “vhukati ha vhusiku kana nga maḓautsha.” Arali zwenezwo zwa itea, vhatevheli vhawe vha fanela u ita mini? Yesu o ri: “Dzulani no fhaṱuwa.” Ngauralo, naho ri tshi pfa u nga ndi kale ro lindela, zwenezwi a zwi ambi  uri vhufhelo vhu kule kana a vhu nga ḓi tshifhingani tshashu.

12. Habakuku o humbela Yehova mini, nahone Mudzimu o mu fhindula hani?

¹² Muporofita Habakuku o lindela a sa fheli mbilu musi a tshi khou huwelela nga ha u fheliswa ha Yerusalema. Vhaṅwe vhaporofita vhe vha vha hone phanḓa hawe na vhone vho huwelela wonoyo mulaedza lwa miṅwaha minzhi. Habakuku o kona u vhona uri vhuvhi ho vha ho anda nahone hu si na khaṱulokwayo u fhira naho hu lini. O humbela thuso kha Yehova a ri: “Yehova! Zwi ḓo guma Iini ndi tshi vhidzelela?” Naho Yehova a songo amba uri vhufhelo vhu ḓo ḓa lini, o fulufhedzisa Habakuku a ri: “A ḽi nga shaei.” Yehova o dovha a vhudza Habakuku uri a “ḽi lindele.”—Vhalani Habakuku 1:1-4; 2:3.

13. Habakuku o vha a tshi nga vha o humbula mini, nahone ndi ngani zwenezwo zwo vha zwi tshi ḓo vha khombo?

¹³ Edzani u humbula Habakuku o neta nga u lindela vhufhelo nahone a ri: ‘Ndi kale ndo lindela uri Yerusalema u fheliswe lwa miṅwaha minzhi. Vhufhelo vhu ḓo dzhia tshifhinga tshilapfu vhu sa athu u ḓa. A tho ngo fanela u bvela phanḓa ndi tshi huwelela nga hawo. Vhaṅwe vha nga kona u ita mushumo.’ Ho vha hu tshi ḓo itea mini arali o humbula nga u ralo? O vha a tshi ḓo vha a songo ṱanganedzwa nga Yehova. Nahone arali o vha a songo ḓilugisela musi vhufhelo vhu tshi ḓa, o vha a tshi ḓo vha o fheliswa.

14. Ndi ngani ri tshi ḓo livhuha uri Yehova o ri sevha uri ri dzule ro lavhelela vhufhelo?

¹⁴ Edzani u humbula ni shangoni ḽiswa. Zwiitea zwoṱhe zwe zwa vha zwo porofitwa nga ha maḓuvha a vhufhelo zwo ḓadzea sa zwe Yehova a zwi amba. Ni fulufhela Yehova u fhira naho hu lini, nahone ni na fulufhelo ḽo khwaṱhaho ḽa uri u ḓo ita zwiṅwe zwithu zwoṱhe zwe a zwi fulufhedzisa. (Vhalani Yoshua 23:14.) Ni livhuha vhukuma uri Yehova o vhea tshifhinga tsho teaho tsha u ḓisa vhufhelo na uri o sevha vhathu vhawe uri vha dzule vho vhu lavhelela.—Mishumo 1:7; 1 Petro 4:7.

15, 16. Ndi ngani ri tshi fanela u ita zwoṱhe zwine ra nga kona kha mushumo wa u huwelela tshifhingani tshino tsha vhufhelo?

¹⁵ Ndangulo ya Yehova i ḓo dzula i tshi ri humbudza uri ri livhise vhutshilo hashu kha u shumela Yehova. Dzenedzi khumbudzo a dzi ri thusi fhedzi kha u dzula ro farakanea kha u shumela Mudzimu, fhedzi dzi ri thusa u vhona uri mulaedza washu wo ṱavhanyiswa. Ri na vhungoho  ha uri tshiga tshe Yesu a tshi ṋea tshi khou ḓadzea zwino, na uri vhufhelo vhu khou ḓa hu si kale. Nga zwenezwo, ri vhea Yehova u thoma vhutshiloni hashu na u dzula ri tshi huwelela mafhungo maḓifha nga ha Muvhuso.—Mateo 6:33; Marko 13:10.

¹⁶ Musi ri tshi huwelela mafhungo maḓifha kha vhaṅwe, ri vha thusa uri vha ponyoke kha u fheliswa ha shango ḽa Sathane ḽine ḽa ḓo fheliswa hu si kale. Ho vha na khombo khulwane ye ya itea lwanzheni nga 1945 musi tshikepe tsha Wilhelm Gustloff tshi tshi nupela. Ho fa vhathu vhanzhi. Wahashu wa tshisadzini na munna wawe vho ponyoka kha tshenetsho tshikepe. Onoyo wahashu wa tshisadzini u humbula uri naho tshikepe tsho vha tshi tshi khou nupela, muṅwe mufumakadzi o vha a tshi khou vhidzelela a tshi ri: “Phuthumennde dzanga! Phuthumennde dzanga! Dzhuwele dzanga! Dzhuwele dzanga dzoṱhe dzi khou nupela. Ndo xelelwa nga zwithu zwoṱhe!” Fhedzi vhaṅwe vhanameli vho pfesesa uri ndi zwifhio zwe zwa vha zwi zwa ndeme vhukuma nahone vha ita zwoṱhe u itela u tshidza vhutshilo ha vhathu. Vhutshilo vhu khomboni ṋamusi. Na riṋe ri ṱoḓa u fana na vhenevho vhanameli vha si na tseḓa nahone ra livhisa ṱhogomelo kha nḓila ye mushumo washu wa u huwelela wa ṱavhanyiswa ngayo. Ri ṱoḓa u ita zwoṱhe zwine ra nga kona u itela  u thusa vhathu uri vha ponyoke vhufhelo ha ano maitele.

17. Ndi ngani ri tshi fanela u tenda uri vhufhelo vhu nga ḓa tshifhinga tshiṅwe na tshiṅwe?

¹⁷ Ri kona u vhona zwavhuḓi uri vhuporofita ha Bivhili vhu khou ḓadzea na uri vhufhelo ha ano maitele mavhi vhu tsini vhukuma. Ro lindela “ṋanga dza fumi” na “ḽivhanda” zwi tshi vutshela vhurabeli ha mazwifhi vhune ha vha Babele Ḽihulu. (Nzumbululo 17:16) A ro ngo fanela u humbulela uri hu ṱoḓea tshifhinga tshilapfu zwenezwo zwi sa athu u itea. Ni songo hangwa uri Mudzimu u ḓo “dzhenisa mbiluni dzadzo” uri dzi vutshele vhurereli ha mazwifhi nahone zwenezwi zwi nga itea nga u bonya ha iṱo tshifhinga tshiṅwe na tshiṅwe! (Nzumbululo 17:17) Shango ḽivhi ḽa Sathane ḽi ḓo fheliswa hu si kale. Nga zwenezwo, ri fanela u thetshelesa tsevho ya Yesu: “Ni ṱhogomele uri mbilu dzaṋu dzi sa ḓo lemelwa nga u ḽesa, u nwesa, na mbilaelo dza vhutshilo, ḽeneḽo ḓuvha ḽa ni ḓela nga u ṱavhanya sa tshikwekwe.” (Luka 21:34, 35; Nzumbululo 16:15) Kha ri dzule ro fhaṱuwa na u dzula ro farakanea tshumeloni ya Yehova ri na fulufhelo ḽa uri u ḓo lwela vhane vha dzula vho “mu lindela.”—Yesaya 64:4.

18. Ndi mbudziso ifhio ine ya ḓo fhindulwa kha thero i tevhelaho?

¹⁸ Musi ro lindela vhufhelo ha ḽino shango ḽivhi, ri fanela u thetshelesa nyeletshedzo i bvaho kha mufunziwa Yuda ine ya ri: “Vhafunwa, ḓikhwaṱhiseni kha lutendo lwaṋu lukhethwa-khethwa, ni rabele ni tshi ṱuṱuwedzwa nga muya mukhethwa ni dzule ni tshi ita zwithu zwine zwa ḓo ita uri Mudzimu a ni fune, musi no lindela khathutshelo ya Murena washu Yesu Kristo, ine ya isa vhutshiloni vhu sa fheli.” (Yuda 20, 21) Fhedzi ri nga sumbedza hani uri ri lavhelela uri shango ḽiswa ḽa Mudzimu ḽi ḓo ḓa hu si kale na uri ro ḽi lavhelela nga maṱo matswuku? Ri ḓo haseledza zwenezwi kha thero i tevhelaho.